Māe 10–16

Katak im Bujen Ko 49–50

“Men eo ej jān Anij ej Meram”

Bwe jen “kwaļo̧k naan eo em̧ool an Rikaenōm̧m̧an eo” (Katak im Bujen Ko 50:17), kappukot im̧we eo ekwojarjar ilo am̧ kejo̧kļo̧kjeņ” Katak im Bujen Ko 49–50. Innem ron̄jake tōl an Anij ilo am̧ katakin.

Je En̄jake ko Rej Im̧we Eok

Kajjitōk bwe ren Kwaļo̧k

N̄an kakobaba n̄an kwaļo̧k ļōmņak ko me rej bōki ilo aer ekkatak jeje ko rekwojarjar, ro uwaan kūlaaj eo remaron̄ jeram̧m̧an jān aer kōmeļeļeik wāween an ļōmņak ko itok. Komaron̄ kajjitōk ippān ro uwaan kūlaaj eo n̄an kwaļo̧k n̄an doon aer ļōmņak kōn juon eoon ilo Katak im Bujen Ko 49–50 im kōmeļeļeik ta eo ekar tōl er n̄an ļōmņak ko.

Katakin Katak eo

Katak im Bujen Ko 49; 50:1–36

M̧ool ko an gospel eo remaron̄ jipan̄ eō kile katak ko rebōd.

• Jekjen 49 kar leļo̧k n̄an kapene katak ko rem̧ool me kar kajim̧we ta ko ro jet rej katakin (lale laajrak eo an wiik in ilo Itok, Ļōōr Eō—N̄an Kajjojo Armej im Baam̧le ko kōn jet kadkadin bwebwenato ko). N̄an jipan̄ ro uwaan kūlaaj eo katak kake jekjek in, komaron̄ kōjepel ro uwaan kūlaaj eo n̄an kurup ko im leļak n̄an kajjojo iaan kurup ko juon iaan unin kōņono ko kar kwaļo̧ki (āinwōt an ellaajrak ilo jekjen taitōļ n̄an jekjen 49). Kurup ko remaron̄ kōmeļeļe kōn kajjitōk ko: Ta m̧ool ko me Irooj ekar letok n̄an katakin kōn unin kōnono in ilo jekjen 49? Ta eo armej ro rej tōmak kake kōn unin kōnono eo rainin? Ta m̧ool ko jet me em̧ōj an Irooj kar katakin kake jān rikanaan ro ad āliktata? Leļo̧k n̄an ro uwaan kūlaaj eo iien em̧m̧an n̄an kwaļo̧k en̄jake ko aer kōn m̧ool ko em̧ōj kwaļo̧ki ilo raan kein ad.

• Āinwōt elder ro ilo Kirthland ro me “rekar jab meļeļe waļo̧k tok eo an jetōb ko kajjojo” (Katak im Bujen Ko 50 , jekjen taitōļ), jet iien jej būlōn̄ eļan̄n̄e juon men jej en̄jake ak lo ej jān Jetōb ak jān kareel an ro jet. Ta eo jemaron̄ ekkatak jān Katak im Bujen Ko 50:1–36 n̄an jipan̄ kōj kile im̧we eo an Jetōb? Komaron̄ kōtļo̧k bwe kajjojo ro uwaan kūlaaj eo ren bōk juon laajrak in eoon n̄an ekkatak innem kajjitōk ippān ro uwaan kūlaaj eo n̄an kwaļo̧k ta eo raar lo.

Katak im Bujen Ko 49:15–17

M̧are eo ikōtaan em̧m̧aan im kōrā eaorōk ilo karōk eo an Anij.

• Kōnke m̧are ej pedped in karōk eo an Jemedwōj Ilan̄, Setan ej kijoroor n̄an katarpoke. Kūlaaj eo am̧ emaron̄ jeram̧m̧an jān an kōm̧m̧ane juon laajrak ilo bo̧o̧t kōn m̧ool ko me Irooj ekar kwaļo̧k kōn m̧are. N̄an waanjon̄ak, ta m̧ool ko kōn m̧are jejeļā kake jān Katak im Bujen Ko 49:15–17? Eoon in jipan̄ ko jet ekoba Jenesis 2:20–24; 1 Korint 11:11; ak ko jet loi ilo “Marriage, Marry” Unin Tōl eo n̄an Jeje ko Rekwojarjar (scriptures.ChurchofJesusChrist.org). Ro uwaan kūlaaj eo remaron̄ bar lo m̧ool ko ilo “Baam̧le eo: Juon Naan in Kean̄ n̄an Laļ in.” Pedped ioon ta eo jej ekkatak jān kein jipan̄ kein, etke m̧are eo ikōtaan juon em̧m̧aan im juon kōrā eaorōk n̄an karōk eo an Anij? (lale “Kein Jipan̄ ko Jet”).

  

  M̧are eo ikōtaan juon em̧m̧aan im juon kōrā ej ekkapit jān Anij.

Katak im Bujen Ko 50:13–22

Rikaki im rikkatak ro rej ketak ippān doon kōn Jetōb eo.

• Kōmeļeļe eo an Irooj kōn kwaļo̧k im bōk m̧ool eo me emaron̄ letok juon iien em̧m̧an n̄an kōmeļeļeik eddo eo aer jim̧or āinwōt rikaki eo im ro uwaan kūlaaj eo ilo aer ekkatak jān gospel eo. Ļōmņak n̄an kajjitōk ippān ro uwaan kūlaaj eo n̄an etale Katak im Bujen Ko 50:13–22 ilo pea im kōmeļeļeik eddo ko an Jetōb, rūkaki ro, im rikatak ro. Jejjo pea remaron̄ kwaļo̧k ippān kūlaaj eo ta eo rekar ekkatak. Ta ko jet “bar wāween [ko]” jej jet iien kajjieon̄ katakin ak ekkatak gospel eo? (eoon 17). Ewi wāween ad em̧m̧anļo̧k ilo ad bōke jān Jetōb? Ta eo jej im̧we n̄an kōm̧m̧ane ilo m̧ōko m̧ōd im ilo m̧ōn jar ko n̄an an em̧m̧anļo̧k ad katakin im ekkatak gospel eo?

Kein Jipan̄ ko jet

M̧are eaorōk n̄an karōk eo an Jemedwōj Ilan̄.

Elder David A. Bednar ekar kōmeļeļeik etke m̧are eaorōk n̄an karōk in lo̧mo̧o̧r eo an Anij:

“Kōn karōk in ekwojarjar, em̧m̧aan im kōrā ro rej n̄an jerbal ippān doon n̄an wāppen im juon tarlep in aibojooj. Kōn m̧wil im maron̄ ko rejeņo̧ļo̧k, ļaddik im leddik ro kajjojo rej boktok n̄an mour in pālele eo kōļmenļo̧kjeņ ko im en̄jake ko rejeņo̧ļo̧k. Em̧m̧aan im kōrā ro eokkotaktak aer jipan̄ ak rej jon̄an wōt juon im rej ippān doon me remaron̄ tōprak ilo ejjeļo̧k bar juon wāween. Em̧m̧aan eo ej kadedeikļo̧k im kōweppānļo̧k kōrā eo im kōrā eo ej kadedeikļo̧k im kōweppānļo̧k em̧m̧aan eo ilo aer ekkatak jān im kajoor ilo aer ippān doon im kōjeram̧m̧an doon.

“Juon em̧ kōn ļeo pālele im lio pālele ej juon jekjek eutiej ijo ajri ro remaron̄ rūttoļo̧k ilo iakwe im jim̧we im ijo aikuj ilo jetōb im kanniōk an ajri ro remaron̄ bwe. Āinwōt m̧wil ko rejeņo̧lo̧k an jim̧or em̧m̧aan im kōrā ro rej leļo̧k n̄an kadedeikļo̧k juon jem̧jerā in m̧are, bwe ejja m̧wil ko reaorōk n̄an karūttoļo̧k, kajiriri, im katakin ajri ro” (“Marriage Is Essential to His Eternal Plan,” Ensign, June 2006, 83–84).

Kōkōm̧anm̧anļo̧k Ad Katakin

Tōl ekōnono ko reim̧we. Aolep ewōr ijo koņaer, ak jet iien ejjab aolep ewōr aer iien. Ālkin im̧we an Jetōb, lale wāween ko n̄an kōļapļo̧k oran ro uwaan kūlaaj eo ro me remaron̄ kwaļo̧k ļōmņak im en̄jake ko aer.