The Camp Meeting, jān Worthington Whittredge

Māe 3–9

Katak im Bujen Ko 46–48

“Kom̧in Kanooj Kappukot Mennin Letok ko Rem̧m̧antata”

Ilo am̧ riiti Katak im Bujen Ko 46–48, Jetōb Kwojarjar emaron̄ kam̧ool n̄an eok kōn m̧ool ko ilo jekjen kein. Rekooti im etali en̄jake ko remaron̄ jipan̄ eok kappukot wāween ko n̄an jipan̄ ro uwaan kūlaaj eo kōn ejja m̧ool kein wōt.

Je En̄jake ko Rej Im̧we Eok

Kajjitōk bwe ren Kwaļo̧k

Emaron̄ lukkun jipan̄ ro uwaan kūlaaj eo n̄an kwaļo̧k, jān iien n̄an iien, an wōnm̧aanļo̧k wōt aer ekkatak ippāer make ak ippān baam̧le eo aer. N̄an waanjon̄ak, n̄e ro uwaan kūlaaj eo rej kwaļo̧k juon ļōmņak kōn juon men eo me er ak juon uwaan baam̧le eo ekar lo ilo wiik in, komaron̄ kajjitōk ippāer ta eo rekar kōm̧m̧ane ilo iien aer ekkatak me ekar im̧we kōļmenļo̧kjeņ ko aer.

Katakin Katak eo

Katak im Bujen Ko 46:1–7

Jej aikuj karuwaineneik aolep n̄an Kabun̄ eo an Jisōs Kraist.

• Elōn̄ armej, aer en̄jake im ta eo rej en̄jake ilo kweilo̧k ko an Kabun̄ in emaron̄ lukkuun im̧we m̧akūtkūt ko aer ilo Kabun̄ in. Katak ko an Irooj ilo Katak im Bujen Ko 46:1–7 emaron̄ jipan̄ membōr ro ilo ward eo ejaake en̄jake ko rekaruwainene, eļap meļeļeier ilo iien kabun̄ jar, n̄an doon im ro ri lotok ro. Ro uwaan kūlaaj eo remaron̄ kappukot eoon kein, kappukot katak ko rej ekkeijelļo̧k n̄an kweilo̧k ko an Kabun̄ im kelaajrak ioon boot eo ta rekar loe. N̄an kajjojo aitōm̧ ko ilo laajrak eo, kūlaaj eo emaron̄ kōmeļeļeik ta eo katak eo ej āinwōt ilo mour kake.

• Ewi wāween an kōmeļeļe ko an Irooj ilo Katak im Bujen Ko 46 jipan̄ ro uwaan kūlaaj eo lo kweilo̧k ko an Kabun̄ in āinwōt juon iien em̧m̧an n̄an en̄jake Jetōb Kwojarjar? Komaron̄ kajjitōk ippān ro uwaan kūlaaj eo n̄an kappukot Katak im Bujen Ko 46:2 im kōmeļeļeik n̄e em̧ōj aer kar lo ritōl ro im rikaki ro tōl juon kweilo̧k ium̧win im̧we eo an Jetōb Kwojarjar. Ta eddo eo an ro rej pād ilo kweilo̧k ko? Ļōmņak n̄an kajjitōk ippān ro uwaan kūlaaj eo n̄an kwaļo̧k n̄e rej en̄jake juon kweilo̧k eo kar kōjeikiiki im tōl jān Jetōb Kwojarjar.

• Bōlen komaron̄ kajjitōk ippān jejjo uwaan kūlaaj n̄an kwaļo̧k en̄jake ko aer kōn jinoin aer kar pād ilo kweilo̧k eo an Kabun̄ eo an Jisōs Kraist im Armej ro Rekwojarjar ilo Raan Ko Āliktata. Ta eo ekar kōm̧m̧an bwe ren en̄jake aer ruwainene? Ta naan in rojan̄ eo remaron̄ kar leļo̧k n̄an membōr ro jet n̄an jipan̄ kōm̧m̧an bwe kweilo̧k ko an Kabun̄ in en ļapļo̧k aer karuwainene? Ewi wāween ad mour kōn kapilōk eo an Irooj ilo Katak im Bujen Ko 46:1–7? Kōtļo̧k bwe ren kamineneik ta eo rej aikuj ba eļan̄n̄e rej ello rūwamājet ej delo̧n̄e tok mōn jar eo kein kajuon kōttan.

• Juon al ainwōt “’Tis Sweet to Sing the Matchless Love” (Hymns, no. 176 ak 177) emaron̄ bar jipan̄ ro uwaan kūlaaj eo ļōmņak kōn im kōnono kōn wāween an kweilo̧k ko an Kabun̄ in ad ļapļo̧k aer karuwainene im kōketak. Bōlen ro uwaan kūlaaj eo remaron̄ al juon al ippān dooin im kwaļo̧k ļōmņak jān naan ko ilo al eo kōn wāween jipan̄ ro jet en̄jake iakwe an Anij ilo mōn jar eo.

  

  Irooj ekar katakin bwe aolep rej ruwainene ilo Kabun̄ eo An.

Katak im Bujen Ko 46:7–33

Jemedwōj Ilan̄ ej letok menin letok an jetōb n̄an em̧m̧anļo̧k eo an ajri ro Nejin.

• Rikwojarjar ro etto rekar dim ilo aer tōmak kōn waļo̧k tok eo an Jetōb Kwojarjar. Ekōjkan am̧ maron̄ jipan̄ ro uwaan kūlaaj eo am̧ kalōk tōmak eo aer bwe menin letok kein remaron̄ waļo̧k ilo mour ko ad rainin? Komaron̄ jino ilo am̧ kajjitōk ippān ro uwaan kūlaaj eo am̧ n̄an riit Katak im Bujen Ko 46:7-33 ilo pea ak kurup jidik ko. Kajjitōk ippāer n̄an lale diktata ļalem menin letok ko an jetōb im n̄an kōmeļeļeik wāween aer kar lo menin letok ko me rekar waļo̧k ilo mour ko aer ak mour an bar juon me rejeļā kake—ekoba armej ro ilo kūlaaj eo. Ta eo rekar lo me remaron̄ kwaļo̧k n̄an kūlaaj eo n̄an kalōk tōmak ko aer ilo menin letok kein?

• Irooj ekar kwaļo̧k bwe menin letok ko an Jetōb rej kōjeram̧m̧an ro me rej tiljek im rej “jab kōn juon kakōļļe” (eoon 9). Bōlen ro uwaan kūlaaj eo remaron̄ kōmeļeļeik wāween an menin letok ko an jetōb kōjeram̧m̧an ro retiljek. Ekōjkan an menin letok kein jipan̄ ro me rekōņaan bōk ak kōkajoorļo̧k naan in kam̧ool ko aer kōn gospel in?

• Jet armej rej iakwe Anij im kajeon̄ kōjparok kien ko An ak rejjab en̄jake ke rejjan̄in kar en̄jake jabdewōt menin letok ko an Jetōb. Ekōjkan an naan in kapilōk in ilo Katak im Bujen Ko 46:7–33 jipan̄?

Katak im Bujen Ko 47

Jetōb Kwojarjar emaron̄ tōl kōj ilo ad kakūrm̧ool kūr ko ad.

• Elōn̄ armej remaron̄ iookļo̧k ta eo John Whitmer ekar en̄jake ke ekar kōņaan kam̧oole bwe kūr eo an ej jān Anij. Bōlen ro uwaan kūlaaj eo remaron̄ kwaļo̧k ejja en̄jake rōt in wōt me rekar en̄jake. Ta eo jej lo ilo Katak im Bujen Ko 47 me emaron̄ kar kōm̧m̧an bwe John Whitmer en peran ilo ijjitōn̄ ko an?

Kōkōm̧anm̧anļo̧k Ad Katakin

Eddo eo am̧ āinwōt juon rūkaki. Katakin eļapļo̧k jān kwaļo̧k meļeļe wōt ko em̧ōj am̧ kar kōpooji. Juon iaan men ko rem̧m̧an ikkijeen katakin ej ejaake juon mejatoto ijo ro uwaan kūlaaj eo remaron̄ ekkatak im lo m̧ool ko kōn er make im kwaļo̧k ta eo rekar ekkatak ippān ro jet. N̄an waanjon̄ak, ilo aolepān katak eo, kajjitōk ippān ro uwaan kūlaaj eo kōn en̄jake ko aer ilo aer ekkatak jeje ko rekwojarjar ilo moko m̧weer.