Independence, Missouri, jān Al Rounds

Māe 24–30

Katak im Bujen Ko 58–59

“Kanooj M̧ōņōņō in Poub kōn Tokjān”

Ālkin am̧ riiti Katak im Bujen Ko 58–59, ļōmņak kōn kajjitōk kein rej elaajrak: Ta eo kwoj en̄jake ej im̧we eok n̄an kwaļo̧k n̄an kūlaaj eo am̧? Ta eo kwoj kōjatdidkdik renaaj loe? Ewi wāween am̧ naaj jipan̄ er lo men kein?

Je En̄jake ko Rej Im̧we Eok

Kajjitōk bwe ren Kwaļo̧k

N̄an im̧we ro uwaan kūlaaj eo n̄an kwaļo̧k ta eo rekar ekkatak ilo iien aer ekkatak jān jeje ko rekwojarjar, komaron̄ je kajjitōk kein rej elaajrak ilo bo̧o̧t eo: Ta eo jekar ekkatak? Ekōjkan ad mour kōn ta eo jekar ekkatak kake? Ro uwaan kūlaaj eo remaron̄ kōlaajrak ium̧win kajjitōk eo kein kajuon m̧ool ko rej loi ilo Katak im Bujen Ko 58–59. Innem remaron̄ joļo̧k jejjo minit kōmeļeļeik aitia ko ilo aer mour kōn m̧ool ko im je aitia ko aer ium̧win kajjitōk kein karuo.

Katakin Katak eo

Katak im Bujen Ko 58:1–5, 26–33

Kōjeram̧m̧an ej itok ekkar n̄an iien ko an Anij im ad tiljek.

• Katak im Bujen Ko 58 ej katakin kōn m̧ool ko me remaron̄ boktok aenōm̧m̧an ilo iien melejon̄ ko. Ro uwaan kūlaaj eo remaron̄ lo jet iaan m̧ool ko ilo iien aer ekkatak ilo jekjen in; kajjitōk ippāer n̄an kwaļo̧k ta eo rekar loe. Ak remaron̄ kappukot eoon ko 1–5, 26–33 ilo kūlaaj, kajjojo ak ilo kurup ko, n̄an juon men me emaron̄ jipan̄ juon eo me ej en̄taan kōn apan̄ ak juon eo ej kōttar kōjeram̧m̧an eo me kar kallim̧uri kake. Ālkin aer kwaļo̧k ta eo rekar lo, bōlen ro jet uwaan kūlaaj eo remaron̄ kwaļo̧k en̄jake ko aer ak eoon ko jet me rekar kam̧ool kōn m̧ool ko ilo eoon kein.

• Āinwōt m̧ōttan kōmeļeļe ko am̧ kōn pedped in, komaron̄ kwaļo̧k juon pijaan alooj “Hope Ya Know, We Had a Hard Time” (ChurchofJesusChrist.org) im kōmeļeļeik ta eo jemaron̄ kōm̧m̧ane n̄an jipan̄ ro me rej jelm̧ae iien ko reppen. Kout eo jān Sister Linda S. Reeves ilo “Kein Jipan̄ Ko Jet” remaron̄ jipan̄ kōmeļeļe ko am̧. Ewi wāween an naan ko an Sister Reeves jelōt wāween ad kalimjōk melejon̄ ko ad?

Katak im Bujen Ko 58:26–29

Jemaron̄ “kwaļo̧k eļap em̧m̧an” kōn wōt “anemkwōj in kāālet eo aer”

• Ta eo ro uwaan kūlaaj eo rekar ekkatak jān aer kar ekkatak jān Katak im Bujen Ko 58:26–29 ilo wiik in? Bōlen komaron̄ kōjepel kūlaaj eo n̄an kurup im kajjitōk ippān ro uwaan kūlaaj eo n̄an kōmeļeļeik ilo kurup ko aer kajjojo naan ko me rej lo eļap tokjen ilo eoon kein. Ewi wāween an eoon kein im̧we kōj n̄an “kōm̧m̧an eļap em̧m̧an”? (eoon 27). Etke Irooj ekōņaan bwe jen jab “kipel e ilo men otemjeļo̧k”? (eoon 26). Ta eo eoon kein rej elmakote kōn ta eo Irooj ekōnaan bwe jān āinwōt??

Katak im Bujen Ko 59:9–19

Jabōt ej raan eo an Irooj.

• N̄an jipan̄ ro uwaan kūlaaj eo kappukot ta eo Irooj ekar katakin kōn Rikwojarjar ro etto ilo Missouri kōn raan in Jabōt, komaron̄ kajjitok ippāer n̄an kappukot ilo Katak im Bujen Ko 59:9–19 im kōm̧m̧an juon laajrak ilo bo̧o̧t eo kōn ta eo kajjojo eoon ko rej katakin kōj kōn raan in Jabōt. Ro uwaan kūlaaj eo remaron̄ kwaļo̧k wāween an naan in kam̧ool eo aer kōn raan in Jabōt eddōkļo̧k ilo aer kar kōjparok raan in Jabōt im kōkwojarjar e.. Sabbath.ChurchofJesusChrist.org ewōr ie jet pijaan alooj ko me remaron̄ jipan̄ jino juon kōmeļeļe.

• Ilo Katak im Bujen Ko 59, Irooj ekar katakin kōn raan in Jabōt ilo an kōjerbal naan ko āinwōt “lan̄lōn̄,” “laurin̄rin̄,” im “m̧ōņōņō” (eoon ko 14–15). Ro uwaan kūlaaj eo remaron̄ kappukot naan ko āinwōt kein ilo eoon ko 9–19. Ro uwaan kūlaaj eo remaron̄ kwaļo̧k ta eo rej kōm̧m̧ane n̄an kōm̧m̧an bwe Jabōt en kam̧ōņōņō. Ewi wāween ad maron̄ kōjerbal eoon kein n̄an katakin ro jet etke jej kautiej raan in Jabōt?

• Kōmeļeļe in emaron̄ bar juon iien em̧m̧an n̄an ro uwaan kūlaaj eo n̄an kwaļo̧k aitia ko kōn wāween aer im baam̧le ko aer kōjerbal Jabōt n̄an kōm̧m̧an bwe m̧ōko m̧ōer ren pedped wōt ilo ekkatak ko an gospel in. Kajjitōk ippāer n̄an kwaļo̧k wāween an kijejeto ko aer jipan̄ er “kanooj kōjparok … libbijinjin jān laļ” (eoon 9).

  

  Kwojkwoj eo ej m̧ōttan eo eaorōk n̄an kautiej Jabōt.

Kein Jipan̄ ko jet

Melejon̄ ko ad remaron̄ tōl kōj n̄an Rilo̧mo̧o̧r.

Linda S. Reeves, kar membōr eo m̧okta in Būreejtōnji eo Eutiej an Kōrā, ekar katakin:

“Irooj ej kōtļo̧k bwe jān kajjeon̄ im mālijjon̄, jet iien n̄an aolepān kajoor eo ad. Jaar loe mour ko an ro rejitōn bōro— im bōlen eo ad make—til im menkwaraar im kar bwilōn̄ etke juon Jemedwōj Ilan̄ eo eiakwe im kea enaaj kōtļo̧k an men kein waļo̧k. Ak E jab likūt kōj ilo menkwaraar ko; Ej jutak kōn Pein reppeļļo̧k, kijerjer karuwaineneik kōj n̄an itok n̄an E. …

“… E ej kijerjer n̄an jipan̄ kōj, n̄an kainōm̧m̧an kōj, im n̄an bōkļo̧k metak eo ad ilo ad pedped ioon kajoor in Pinmuur eo im nōbar bujen ko ad. Mālijjon̄ ko im en̄taan ko jej en̄jaki remaron̄ men ko rej tōl kōj n̄an itok n̄an E im dāpdep n̄an bujen ko ad bwe jen maron̄ ro̧o̧l n̄an im̧aan Mejān im bōk aolep men ko an Jemān.” (“Bōk Kōjeram̧m̧an ko an Bujen ko Am̧,” Ensign ak Liaona, Nob. 2013, 119–20).

Kōkōm̧anm̧anļo̧k Ad Katakin

Lale bwe kwon katakin katak eo em̧ool. “Wōnm̧aanļo̧k kajjitōk ippam̧ make, ‘Ewi wāween an ta eo ij katakin naaj jipan̄ ro uwaan kūlaaj eo aō kalōk tōmak ilo Kraist, ukweļo̧k, kōm̧m̧an im kōjparok bujen ko ippān Anij, im bōk Jetōb Kwojarjar eo?”” (Teaching in the Savior’s Way, 20).