Campfire ilo Missouri, jān Bryan Mark Taylor

Māe 31–Juun 6

Katak im Bujen Ko 60–62

“Aolep Kanniōk Ej ilo Peiū”

Elder Ronald A. Rasband ekar ba: “Kajjojo iaad jej aikuj moktata kōkajoor jetōb ko ilo kōj make innem kōkajoorļo̧k ro ipeļaakid. Lōmņak kōn jeje ko rekwojajar aolep iien, im keememej lōmņak im en̄jake ko kwar en̄jaki ilo am riiti” (“N̄e Kwō Ab Meļo̧kļo̧k,” Ensign ak Liaona, Nob. 2016, 114).

Je En̄jake ko Rej Im̧we Eok

Kajjitōk bwe ren Kwaļo̧k

Komaron̄ im̧we juon kōmeļeļe eļap meļeļein ilo am̧ kajjitōk ippān ro uwaan kūlaaj eo n̄an uwaake juon kajjitōk ak aitia me ej iookļo̧k eoon ko me kwoj riit ilo m̧weo im̧ōm̧. N̄an waanjon̄ak, komaron̄ kajjitōk ippāer n̄an kwaļo̧k juon men eo rekar ekkatak ilo wiik in kōn Jemedwōj Ilan̄ ak Jisōs Kraist.

Katakin Katak eo

Katak im Bujen Ko 60:2–3, 7, 13–14; 62:3, 9

Irooj ej bun̄ buruōn n̄e jej kōpeļļo̧k lo̧n̄iid n̄an kwaļo̧k gospel eo.

• Āinwōt membōr ro ilo Kabun̄ eo, jejeļā bwe gospel eo em̧ōj an jepļaaktok ej juon men eo eļap an aorōk me ej kōjeram̧m̧an mour ko an ajri ro nejin Anij. Kōn menin etke jet iien jej āliklik n̄an kwaļo̧k naan in kam̧ool ko ad n̄an ro jet? Ļōmņak n̄an kajjitōk ippān ro uwaan kūlaaj eo n̄an kōllaajrak ioon bo̧o̧t eo un ko etke jejjab maron̄ kōpeļļo̧k lo̧n̄iid n̄an kwaļo̧k gospel eo. Ro uwaan kūlaaj eo remaron̄ riiti, Katak im Bujen Ko 60:2–3, 7, 13–14; 62:3, 9, kappukot naan ko ak jentōj ko me rej im̧we er n̄an kwaļo̧k gospel eo. Remaron̄ bar kōllaajrake ta ko rej loi ioon bo̧o̧t eo. Bōlen jet uwaan kūlaaj eo remaron̄ kwaļo̧k juon aer en̄jake ke rekar eļļā jān mijak ko aer im kar kwaļo̧k gospel eo n̄an juon armej.

• Ilo Katak im Bujen Ko 60–62, elōn̄ katak ko, jim̧or lukkuun kallikar im jab lukkun allikar, kōn kwaļo̧k gospel eo. N̄an jipan̄ ro uwaan kūlaaj eo lo katak kein, komaron̄ kajjitōk ippān kajjojo iaan armej ro n̄an etale juon iaan jekjen ko im kwaļo̧k jabdewōt men rej lo me ej katakin er kōn kwaļo̧k gospel eo. Emaron̄ kōļapļo̧k kōmeļeļe eo n̄an riit kōn waajon̄ak ko an mijinede ro ijo jabdewōt ilo jeje ko rekwojarjar, (lale, n̄an waanjon̄ak, Jerbal 8:27–40; Alma 19:16–17) im kōmeļeļeik ta eo rekar ekkatak jāni. Ta waanjon̄ak ko jemaron̄ kwaļo̧ki jān mour ko ad make? Jabdewōt ro uwaan kūlaaj eo remaron̄ ke kwaļo̧k wāween aer kar jino ekkatak kōn gospel in im wāween aer kar en̄jake kōn armej ro me rekar katakin er? Kūlaaj eo am̧ emaron̄ jeraam̧m̧an jān wāween role-play ko me jemaron̄ “kōpeļļo̧k [lon̄iid]” im kwaļo̧k gospel eo.

  

  Anij ekōņaan bwe jen kwaļo̧k gospel eo n̄an ro jet.

Katak im Bujen Ko 60:2–4; 61:1–2, 20, 36–38; 62:1, 6

Jeje ko rekwojarjar rej katakin kōj kōn Jisōs Kraist.

• Kajjitōk ippān ro uwaan kūlaaj eo n̄an je ioon bo̧o̧t eo jabdewōt men ko rekar ekkatak kōn Rilo̧mo̧o̧r ilo wiik in jān aer ekkatak jekjen ko 60–62, ippānļo̧k eoon ko rej ekkeijel. Ak remaron̄ kappukot ilo Katak im Bujen Ko 60:2–4; 61:1–2, 20, 36–38; 62:1, 6 n̄an pukot men ko me kar katakin kōn Rilo̧mo̧o̧r. Ta bwebwenato ko jān eoon ko ak jān mour eo am̧ make me ej kwaļo̧k eddo ko im m̧wil in Rilo̧mo̧o̧r eo me rekar ekkatak kake? (n̄an waanjon̄ak, Jon 8:1–11; Ether 2:14–15). Komaron̄ kajjitōk ippān ro uwaan kūlaaj eo n̄an kwaļo̧k naan in kam̧ool ko aer kōn Jisōs Kraist ak n̄an kejo̧kļo̧kjeņ kake ta meļeļein An ba n̄an er.

Katak im Bujen Ko 60:5; 61:22; 62:5–8

Irooj ekōņaan bwe jen kōm̧m̧ani kālet ko jet “āinwōt n̄e em̧m̧an n̄an [kōj].”

• Ļōmņak n̄an kajjitōk ippān ro uwaan kūlaaj eo n̄an riiti Katak im Bujen Ko 60:5; 61:22; 62:5–8 ilo pea ak kurup jiddik ko im kwaļo̧k ta eo rekar en̄jake emaron̄ ta ennaan eo an Irooj n̄an kōj. N̄aat eo rekar en̄jake ke rej aikuj kōjerbal en̄jake eo aer make n̄an kōm̧m̧ane juon jokālet? Ļōmņak n̄an kwaļo̧k ennaan eo jān Būreejtōn Dallin H. Oaks ilo “Kein Jipan̄ ko Jet” āinwōt m̧ōttanļo̧k kōmeļeļe eo am̧. Ewi wāween an pāāren ro jipan̄ ajri ro nejier ekkatak pedped in eaorōk?

Kein Jipan̄ ko jet

Jerbal ekkar n̄an en̄jake eo ad em̧m̧an tata.

Būreejtōn Dallin H. Oaks ekar katakin:

“Juon ikdeleel n̄an tōl jān Irooj ej juon kajoor, ak ej aikuj itok ippān tok jeļā eo bwe Jemedwōj Ilan̄ ej kōjekdoon elōn̄ jokālet ko kōn wōt jokālet ko ad make. Jokālet an juon make ej juon iaan kein jipan̄ n̄an eddōkļo̧k me jekar aikuj jelm̧aeiki ilo mour in. Armej ro me rej kajjieon̄ leļo̧k aolep jokālet n̄an Irooj im akweļap kōn revelesōn ilo aolep kālet ejjab to enaaj lo jekjek ko me rej jar n̄an bōk tōl im rejjab bōke. N̄an waanjon̄ak, ekkā an waļo̧k ilo elōn̄ jekjek ko me kālet ko rejjab lukkuun aorōk ak kālet kein jim̧ōr rekkar.

“Jej aikuj ekkatak kake ilo ļōmņak ko ad, ilo ad kōjerbal kajoor in maron̄ ļōmņak me Rikōm̧anm̧an eo ekar letok n̄an kōj. Innem jej aikuj jar n̄an bōk tōl im jerbal ekkar n̄an e eļan̄n̄e jej bōke. Eļan̄n̄e jejjab bōk tōl, jej aikuj jerbal ekkar n̄an en̄jake ko ad em̧m̧an tata” (“Our Strengths Can Become Our Downfall,” Ensign, Oct. 1994, 13–14).

Kōkōm̧anm̧anļo̧k Ad Katakin

Jeļā ro me rej apan̄. Apan̄ an ro me kwoj katakin er emaron̄ pen n̄an jeļā. Ak kōn jipan̄ an Jetōb im ritōl ro am̧, komaron̄ jeļā wāween eo em̧m̧an tata n̄an tōpar rein kajjojo. (Lale Teaching in the Savior’s Way, 8–9.)