Daviess County, Missouri

Juun 14–20

Katak im Bujen Ko 64–66

“Irooj ej Aikuj Bōro eo im Ļōmņak eo Em̧ōņōņō”

Ilo iien am̧ ekkatak ilo wiik in, jar im ļōmņak kōn ta pedped ko jān Katak im Bujen Ko 64–66 enaaj kōļapļo̧k tōmak im jeļāļo̧kjeņ eo an ro uwaan kūlaaj eo am̧.

Je En̄jake ko Rej Im̧we Eok

Kajjitōk bwe ren Kwaļo̧k

N̄an rōjan̄ ro uwaan kūlaaj eo n̄an kwaļo̧k juon men rej loe eļap meļeļein ilo aer ekkatak jeje ko rekwojarjar ilo wiik in, komaron̄ kajjitōk ippāer n̄an kejo̧kļo̧kjeņ kōn idajon̄jon̄ ko jej jelm̧aeiki rainin. Innem kajjitōk ippāer n̄an kwaļo̧k juon eoon jān Katak im Bujen Ko 64–66 me rej en̄jake emaron̄ jipan̄ kōn juon iaan idajon̄jon̄ ko.

Katakin Katak eo

Katak im Bujen Ko 64:1–11

Emenin aikuj bwe jen jeorļo̧k an doon bōd.

• Bōlen ro uwaan kūlaaj eo remaron̄ jeraam̧m̧an jān kōnono kōn etke jeorļo̧k an ro jet bōd emaron̄ lukkuun pen—im wāween aer kar eļļā ioon men ko reppen. Remaron̄ kappukot ilo Katak im Bujen Ko 64:1–11 pedped in katak ko im m̧ool ko me rej im̧we er n̄an ļapļo̧k aer jeorļo̧k bōd. Ta eo jej ekkatak kōn Rilo̧mo̧o̧r jān eoon kein? N̄an jipan̄ kōmeļeļeik kōjeraam̧m̧an ko injeorļo̧k bōd, komaron̄ kwaļo̧k bwebwenato in Morrell Bowen jān ennaan eo an Elder Jeffrey R. Holland “Jerbal in Karejar in Kajim̧we” (Ensign ak Liaona, Nob. 2018, 77–79) ak pijaan alooje eo “Forgiveness: My Burden Was Made Light” (ChurchofJesusChrist.org). Ak juon uwaan kūlaaj eo emaron̄ kōņaan kwaļo̧k juon bwebwenato an juon make kōn aer erļo̧keļo̧k ak bōk jeorļo̧k bōd. Ewi wāween an kar armej ro ilo waanjon̄ak kein kar jeraam̧m̧an jān kajoor in jeorļo̧k bōd?

Katak im Bujen Ko 64:31–34

Irooj ej kajjitōk e “bōro im ļōmņak eo em̧ōņōņō.”

• Irooj ejjab kōņaan bwe jen “m̧ōk”; ijoke, eindein n̄an armej ro rej kajjieon̄ jon̄an aer maron̄—ekoba, bōlen, jet ilo kūlaaj eo am̧—n̄an “m̧ōk ilo kōm̧m̧an em̧m̧an.” Etke m̧ōk in ej waļo̧k? Ta kapilōk eo jej loe ilo Katak im Bujen Ko 64:31–34 me emaron̄ jipan̄ kōj n̄e jej apan̄ kōn en̄jake rōt kein?

• N̄an kōkm̧anm̧anļo̧k kōmeļeļe ko am̧, komaron̄ kwaļo̧k pija ko me rekillep im rekabwilōn̄lōn̄ me kar kalōki ilo juon tōre aeitok jān “men ko reddik”— āinwōt juon pija annan̄ ak juon em̧ birōk eļap Ta waanjon̄ak ko kōn “jerbal em̧m̧an” me Irooj ekar letok n̄an kōj? Ta men dikdik ko me jemaron̄ kōm̧m̧ani kiiō n̄an kōm̧m̧ane pedped eo n̄an jerbal in?

• N̄an jipan̄ ro uwaan kūlaaj eo kejo̧kļo̧kjeņ ilo m̧wilaļ in kōn Katak im Bujen Ko 64:34, komaron̄ je Bōro im Ļōmņak eo Em̧ōņōņō ioon bo̧o̧t eo. Ro uwaan kūlaaj eo remaron̄ kōlaajrake ium̧win taitōl eo ta eo rej en̄jake me ej meļeļein n̄an leļo̧k buruōd im ad ikdeleel in ļōmņak n̄an Irooj. N̄an juon kōmeļeļe kōn naan kein, lale ennaan ko an Elder Donald L. Hallstrom ilo “Kein Jipan̄ ko Jet” Jeje ko rekwojarjar āinwōt kein me rej elaajrak remaron̄ barāinwōt letok ļōmņak ko jet: Mosaia 7:33; Ether 4:15; Katak im Bujen Ko 43:34; Moses 7:18; Josep Smith—Bwebwenato 1:19.

Katak im Bujen Ko 65

Aelōn̄ in kiin̄ eo an Anij ioon laļ in ej kōpooj laļ in n̄an jepļaaktok eo an Rilo̧mo̧o̧r.

• Katak im Bujen Ko 65 ej leļo̧k juon kōmeļeļe eim̧we an mijen eo an Kabun̄ eo an Irooj ilo raan ko āliktata. N̄an jipan̄ ro uwaan kūlaaj eo meļeļe m̧ōttan eo aer ilo mijen eo, komaron̄ kajjitōk ippāer n̄an kappukot ilo jekjen 65 kappukot uwaak ko n̄an kajjitōk ko āinwōt kein: Ta eo Irooj ekōņaan bwe aelōn̄ in kiin̄ eo An ren kadedeikļo̧k ilo laļ in? Ta eo Ekōņaan bwe in kōm̧m̧ane n̄an jipan̄? Komaron̄ barāinwōt kōjo̧ pijaan alooj eo “Prepare Today for the Second Coming” (ChurchofJesusChrist.org) ak iookļo̧k ennaan eo an Būreejtōn Dallin H. Oak ilo “Kein Jipan̄ Ko Jet.” Ro uwaan kūlaaj eo remaron̄ kwaļo̧k wāween aer uwaake kajjitōk ko an Būreejtōn Oaks.

Kein Jipan̄ ko jet

“Bōro eo im Ļōmņak eo Em̧ōņōņō.”

Elder Donald L. Hallstrom ej elmakote meļeļe in emaron̄ n̄an enaan eo bōro im ļōmņak eo em̧ōņōņō”:

“Bōro ej bōk jikin iakwe im wūjlepļo̧k. Jej kōm̧m̧ane kaarmājet ko im ineek eddo ko an ro jej iakwe er me jeban maron̄ kar niknik kaki kōn un ko jet. Eļan̄n̄e iakwe ejjab pād, wūjlepļo̧k eo ad edikļo̧k. …

“Bōk ‘juon ļōmņak eo em̧ōņōņō’ ej lukkun kallikar ad leļo̧k kijejeto eo ad em̧m̧antata im ļōmņak eo erreo tata im kappukot mālōtlōt an Anij. Ej kwaļo̧k ļōmņak in bwe ad wūjlepļo̧k eļap ilo mour n̄an ekkatak ej aikuj m̧ōttan men ko me rej piktokin mour indeeo. Ej meļeļein bwe ej aikuj lōn̄ juon jem̧jerā ejeņoļo̧k ikōtaan ron̄jake naan an Anij im pokake e” (“Bōro eo im Ļōmņak eo Em̧ōņōņō,” Ensign, June 2011, 31–32).

Kōppopo n̄an Itok eo Kein Karuo.

“Ak n̄e raan in itok eo an [Jisōs Kraist] en kar ilju? Eļan̄n̄e jejjeļā ke jenaaj ioone Irooj ilju—ilo ad m̧ōkaj mej m̧okta ak kōn itok eo jejjab kōtmene—ta eo jen kar kōm̧m̧an rainin? Ta eo ruōd jen kar kwaļo̧k? Ta kōm̧m̧an ko enkar bōjrak ad kōm̧m̧ani? Ta akkaun ko jen kar kōļļāiki? Ta jeorļo̧k bōd eo jen kar jeorļo̧ke? Ta naan in kam̧ool ko jen kar kwaļo̧k? (Dallin H. Oaks, “Kōppopo n̄an Itok eo Kein Karuo,” Ensign ak Liaaona, Māe 2004, 9).

Kōkōm̧anm̧anļo̧k Ad Katakin

Bōk kajoor jān Rilo̧mo̧o̧r. “Ilo kijejeto eo am̧ n̄an mour im katakin eļapļo̧k āinwōt Rilo̧mo̧o̧r, kojāmin likjab n̄an tōpar kōttōpar eo am̧ ilo iien ko. Jab ebbwer; ijjeļo̧kin, kōtļo̧k bwe bōd im m̧ōjņo̧ ko am̧ ren kooktak kwe n̄an Jemedwōj Ilan̄ im Rilo̧mo̧o̧r” (Teaching in the Savior’s Way, 14).