Eprōļ 19–25

Katak im Bujen ko 41:3

“Aō Kien n̄an Tōl Kabun̄ in Aō”

Kwojjab maron̄ in ekōnono āinwōt juon kūlaaj aolep pedped in katak ko kar katakin ilo Katak im Bujen ko 41–44. Pukot im̧we n̄an jipan̄ eok kāālet pedped in katak ko me renaaj kanooj jejjet n̄an kūlaaj eo am̧.

Je En̄jake ko rej Im̧we Eok

Pija eo ej Bōk Jikin Kajjitōk n̄an Kwaļo̧ke

Ke revelesōn ko ilo jekjōn 42 raar jeje, Josep Smith eaar je bwe Armej ro Rekwojarjar “raar būki ilo m̧ōņōņō” (“Letter to Martin Harris,” Feb. 22, 1831, josephsmithpapers.org). Rōjan̄ ro uwaan kūlaaj eo n̄an kwaļo̧k kwaļo̧k jabdewōt men jān ekkatak eo aer make ak an baam̧le wiik in me raar būki ilo m̧ōņōņō.

Katakin Katak ko

Katak im Bujen ko 41–42

Kien ko an Anij rej tōl Kabun̄ in An im maron̄ tōl mour ko ad.

• Ilo Katak im Bujen ko 41, Irooj eaar jipan̄ kepooj Armej ro Rekwojarjar n̄an bōk kien eo An, eo Ekar kwaļo̧k jet raan tok ālik (lale jekjōn 42). Elmen an maron̄ revelesōn eo ilo jekjōn 42 kar jipan̄ Armej ro Rekwojarjar bōk kien ko an Anij? N̄an jipan̄ ro uwaan kūlaaj eo uwaaki kajjitōk in, komaron̄ kūr er n̄an riiti Katak im Bujen ko 41:1–6 n̄an lo pedped in katak ko me remaron̄ jipan̄ kōj bōk kien eo an Anij. Elmen ad maron̄ kōjerbal pedped in katakin kein n̄e ewōr ad iien ko rem̧m̧an n̄an bōk naan in kōmeļeļe eo jāņ Irooj?

• Unin tōl eo an wiik in ilo Itok, Ļoor E—N̄an Kajjojo Armej im Baam̧le ko elmakote ajije jekjōn 42 n̄an ļalem kumi in eoon ko, eo kajjojo ej jutak kōn juon pedped in katak eaorōk. Kurup kein remaron̄ kapidodoikļo̧k n̄an am̧ ekōnono kōn jekjōn in āinwōt juon kūlaaj. N̄an waanjon̄ok, komaron̄ je eoon ko ioon boot eo im kūr ro uwaan kūlaaj n̄an kāālet juon kumi. Kajjitōk ippān ro uwaan kūlaaj eo n̄an riiti eoon ko aer im pukot juon men eo me rej en̄jake ej aorōk n̄an kōj ilo tōre in ad. Innām remaron̄ kwaļo̧k waanjon̄ok ko jān mour ko aer make me ej kwaļo̧k elmen ad jeraam̧m̧an n̄e jej tōl mour ko ad jāņ kien kein.

Katak im Bujen ko 41:9–11

Irooj ej kajjitōk ippān ro Rikarejeran n̄an kaarmejete.

• Edward Partridge, bisop eo jino in tata an Kabun̄ in kar jepļaaktok, kar kakien e bwe en joļo̧k jerbal eo an im “joļo̧k aolepān an iien” jerbal ilo kūr eo an. Em̧ool men̄e menin ejjab menin aikuj n̄an kōj, ta eo jej lo ilo eoon kein me emaron̄ jerbal n̄an jerbal in jipan̄ eo ad n̄an Anij? (Kōn elōn̄ļo̧k meļeļe kōn Edward Partridge, lale “A Bishop unto the Church,” Revelations in Context, 77–83.)

Katak im Bujen ko 42:61, 65–68; 43:1–7

Revelesōn ej bōktok aenōm̧m̧an, lan̄lōn̄, im mour indeeo.

• Āinwōt ritōl ro an Kabun̄ in m̧oktata, ro uwaan kūlaaj eo am̧ emaron̄ wōr aer kajjitōk ko me āinwōt “ittino ko” kōnke remaron̄ kajjitōk tōl jān Irooj. Komaron̄ rōjan̄ er n̄an je juon aer kajjitōk ak juon inepata me remaron̄ aikuji revelesōn an juon make. Ta eo jej lo ilo Katak im Bujen ko 42:61, 65–68 me emaron̄ jipan̄ kōj ilo ad pukot revelesōn?

• N̄an jipan̄ membōr ro meļeļe elmen an Anij letok revelesōn n̄an tōl Kabun̄ in An, komaron̄ kūr er n̄an riiti Katak im Bujen ko 43:1–7. Remaron̄ bar alooje pija in alooj eo “Prophets and Revelation—Hearing His Voice” (ChurchofJesusChrist.org).

Katak im Bujen ko 43:8–10

Jej kweilo̧k ippān doon n̄an “katakin im kotak doon.”

• Elmen ad maron̄ kōjerbal Katak im Bujen ko 43:8–10 n̄an katakin juon eo ej en̄jake ejjab menin aikuj n̄an itok n̄an kweilo̧k ko an Kabun̄ in? Laajrak eo ilo “Kein Jipan̄ ko Jet” emaron̄ jipan̄ pedped e ekōnono in kōn un ko rekwojarjar an doulul ko an priesthood im Doulul eo an Kōrā ro (laajrak eo ej barāinwōt jerbal n̄an kūlaaj koa n Doulul eo an Jiron̄ ro). Ro uwaan kūlaaj eo remaron̄ kwaļo̧k elmen aer bōk kūņaer ilo doulul ko, Doulul eo an Kōrā ro, im kūlaaj ko an Kabun̄ in ekar kōjeraam̧m̧an er. Ta eo eoon 8–10 rej kwaļo̧k kōn ta eo jej aikuj kōm̧m̧ane n̄an m̧aanjabpopo n̄an e im bōk kuņaad ilo kweilo̧k ko ad?

  

  Kweilo̧k ļo̧k ilo imōnjar eo ej juon wāween jemaron̄ “katakin im kotak doon.”

Kein Jipan̄ ko Jet

Etke jaar ejaak n̄an doulul ko im Doulul ko an Kōrā.

Sister Julie B. Beck, kar Būreejtōn eo Eutiej an Doulul eo an Kōrā ro, eaar kōmeļeļik etke Anij eaar ejaake kōj n̄an doulul ko an priesthood im Doulul ko an Kōrā ro:

1. “N̄an ejaake kōj ium̧win priesthood eo im ālkin jon̄ok eo an priesthood.”

2. “N̄an pedped wōt ioon ļaddik ro im jiron̄ ro nejin Jemedwōj Ilan̄ kōn jerbal in lo̧mo̧o̧r eo im n̄an kōjerbal er ie. Doulul ko im Doulul ko an Kōrā ro rej rikaļoor kar ejaaki kōn eddo eo n̄an jipan̄ ilo jerbal eo an Jemed n̄an bōktok mour indeeo n̄an ajri ro Nejin.”

3. “N̄an jipan̄ bisop ro kōtōbalbal joko eo an Irooj. Joko eo an Irooj ekoba, ‘iien ko aer, tōļan ko, meanwōd, m̧weiuk ko, im jāān ko’ an ro uwaan Kabun̄ in [Bok in Bōk Meļeļe 2: Tōl Kabun̄ eo, 6.1.3 ChurchofJesusChrist.org]. Tōļan ko an Armej ro Rekwojarjar rej aikuj kōjerbali n̄an jipan̄ lale rijeram̧ōl im riaikuj im n̄an kalōk aelōn̄ in kiin̄ eo an Irooj.”

4. “N̄an leļo̧k kōjparok im juon jikin kone n̄an ajri ro nejin Jemedwōj Ilan̄ im baam̧le ko aer ilo raan ko āliktata.”

5. “N̄an kōkajoorļo̧k im rejtake kōj ilo jerbal ko ad ilo baam̧le im eddo ko āinwōt ļaddik im leddik ro nejin Anij.” (“Why We Are Organized into Quorums and Relief Societies” [Brigham Young University devotional, Jan. 17, 2012], speeches.byu.edu.)

Kōkōm̧anm̧anļo̧k Ad Katakin

Karuwainene. “Ijello̧kin aolep iien leļo̧k kūr ko n̄an kōm̧m̧ane juon men ejenolo̧k, ļōmņak in kūr rūkkatak ro n̄an ļōm̧ņak kōn wāween ko aer make n̄an kōjerbal ta eo raar ekkatak kake” (Teaching in the Savior’s Way, 35).