M̧aaj 29–Eprōļ 4

Ijtō

“N̄aij E eo Ej Mour, N̄aij E eo Kar M̧ane ”

Ejjeļo̧k men eaorōkļo̧k n̄an ad meļeļe jān Pinmuur eo an Jisōs Kraist. Ļōmņak kōn armej ro renaaj pād ilo kūlaaj eo am̧, ta enaaj jipan̄ er kapen aer tōmak ilo Jisōs Kraist?

Je En̄jake ko rej Im̧we Eok

Kajjitōk n̄an Kwaļo̧k

Ilo an ro uwaan kūlaaj eo am̧ kar ekkatak Katak im Bujen Ko iiō in, remaron̄ kar lo eoon ko kōn Rilo̧mo̧o̧r eo me eļap meļeļeier n̄an er. Jino kūlaaj eo kōn leļo̧k iien ko rem̧m̧an n̄an aer kwaļo̧k eoon kein. Ekōjkan kar ekkatak eo ad kōn Katak im Bujen Ko tok n̄an kiiō kar kapenļo̧k tōmak eo ad ilo Jisōs Kraist?

Katakin Katak ko

Jisōs Kraist eaar kadedeļo̧k juon “pinmuur eo ewāppen.”

• Kōnke Pinmuur eo an Jisōs Kraist ej juon katak eaorōk, ļōmņak in joļo̧k ebwe iien n̄an kanooj lale bwe ro uwaan kūlaaj eo rej meļeļe kake. N̄an kōm̧m̧ane menin, komaron̄ je ioon boot eo kajjitōk kein āinwōt: Ta Pinmuur eo an Jisōs Kraist? Elmen an jelet mour eo aō kajjojo raan? Elmen an jelet mour eo aō indeeo? Elmen aō bōk kajoor in pinmuur eo an Rilo̧mo̧o̧r eo ilo mour eo aō? Leļo̧k n̄an ro uwaan kūlaaj eo jejjo minit ko n̄an kejekļo̧kjeņ kōn kajjitōk kein im n̄an kappukōt eoon ko me rej jipan̄ uwaaki. Ro uwaan kūlaaj eo remaron̄ je eoon ko ilo jeje ko aer rekwojarjar ioon bo̧o̧t eo, im komaron̄ kōnono kaki jidik āinwōt juon kūlaaj. Errein jet waanjon̄ok ko: Luk 22:39–44; 1 Jon 1:7; 2 Nipai 2:6–9; Mosaia 3:5–13, 17–18; Alma 7:11–14; Moronai 10:32–33; Katak im Bujen ko 19:16–19; 45:3–5.

• Enaaj ļap meļeļe in n̄an ro uwaan kūlaaj eo n̄an alooje “The Savior Suffers in Gethsemane” (ChurchofJesusChrist.org) m̧okta jān riiti naan ko an Rilo̧mo̧o̧r eo make kōn en̄taan eo An ilo Katak im Bujen ko 19:16–19. Elmen an eoon kein kapen kam̧m̧oolol eo ad kōn en̄taan eo an Jisōs Kraist? Pija in Ijtō ko jet komaron̄ kwaļo̧ki repād ilo “Kein Jipan̄ ko jet.”

  

  Irooj in Jar, jān Yongsung Kim

Katak im Bujen Ko 76:11–14, 20–24; 110:1–10

Rikanaan Josep Smith eaar kam̧ool bwe Jisōs Kraist emour.

• Josep Smith eaar lo jerkakpeje Rilo̧mo̧o̧r im kwaļo̧k juon kam̧ool ekajoor bwe Jisōs Kraist emour. N̄an jipan̄ ro uwaan kūlaaj eo ekkatak naan in kam̧ool eo an Josep Smith, komaron̄ ajije er n̄an ruo kumi ko im leļo̧k n̄an kajjojo kumi ko n̄an riiti n̄e ejjab Katak im Bujen Ko 76:11–14, 20–24 ak 110:1–10. Kūr kajjojo ro uwaan kūlaaj eo n̄an pukote diktata juon naan ilo eoon kein me ej kōmeļeļeik Rilo̧mo̧o̧r eo. Ro uwaan kūlaaj remaron̄ bōk kūņaer je naan ko raar loi ioon boot eo, im komaron̄ kōjerbal naan kein n̄an tōl juon iien ekōnono kōn m̧wiļ ko im kajoor eo an Rilo̧mo̧o̧r eo. Elmen an naan in kam̧ool eo an Josep Smith kōkajoorļo̧k tōmak eo ad ilo kwojarjar im mijen eo Jisōs Kraist?

• Jet ro uwaan ilo kūlaaj eo emaron̄ kar kakkejel katak ko ilo Katak Bujen Ko ippān naan ko im pedped in katak ko ilo al in jar eo “Ij Jeļā Bwe Aō Dri Pinmuur Ej Mour” (Al Ko Al In Ajri, no. 28; lale laajrak eo an wiik in ilo Itok, Ļoor Eō—N̄an Kajjojo im Baam̧le ko). Bōlen remaron̄ kōņaan kwaļo̧k ta eo raar loe. Komaron̄ bar riit ak al al in āinwōt juon kūlaaj im pukot naan ko ilo eoon kein: Katak im Bujen ko 6:34; 45:3–5; 88:77; 98:18; 138:23. Elmen ad kar itok n̄an jeļā bwe ad Ripinmuur ej mour?

Katak im Bujen Ko 29:26–27; 42:45–46; 63:49; 88:14–17, 27–31; 93:33–34

Kōnke kōn Jisōs Kraist, jenaaj bar jerkakpeje.

• N̄an jipan̄ ro uwaan kūlaaj eo kōnono kōn ta eo Katak im Bujen Ko rej katakin kōn jerkakpeje, komaron̄ kūr er n̄an antoone bwe juon m̧ōttaer ak ro uwaan baam̧le ej kajjitōk ta meļeļe n̄an jerkakpeje. Elmen ad maron̄ jipan̄ armej in meļeļe ta in jerkakpeje? Rōjan̄ ro uwaan kūlaaj n̄an lale Katak im Bujen ko 88:14–17, 27–31 kōn jet men ko remaron̄ jipan̄. Eoon in jipan̄ ko jet ekoba Alma 11:40–45 im Alma 11:21–23. Ta eo jenaaj kwaļo̧ke n̄an jipan̄ eo m̧ōttad ak uwaan baam̧le eo en̄jake lan̄lōn̄ eo im kōjatdikdik eo me ej itok jān katak eo kōn jerkakpeje?

• Elmen am̧ maron̄ jipan̄ ro uwaan kūlaaj eo ļōmņake kōn menin letok eo an Rilo̧mo̧o̧r eo kōn jerkakpeje? Bōlen komaron̄ je ilo boot eo Kōnke kōn Jisōs Kraist … im kūr ro uwaan kūlaaj eo n̄an pukot eoon kein kōn naan ko me emaron̄ kadedeļo̧k naan in: Katak im Bujen ko 29:26–27; 42:45–46; 63:49; 93:33–34. Elmen an m̧ool ko ilo eoon kein jelet jekjek in ad kalimjōk mej? Elmen aer jelet mour ko ad kajjojo raan?

Kein Jipan̄ ko jet

Kōkōm̧anm̧anļo̧k Ad Katakin

Jipan̄ ro uwaan kūlaaj eo etale jeje ko rekwojarjar. “Kajjitōk kajjitōk ko rejelet rikatak ro n̄an pukot uwaak ko ilo jeje ko rekwojarjar. … Jipan̄ er lo men̄e jeje ko rekwojarjar rekar jeje elōn̄ iiō ko remootļo̧k, epād ie uwaak ko an Irooj kōn kajjitōk ko im inepata ko jej iooni” (Teaching in the Savior’s Way, 30).