Eprōļ 5–Eprōļ 11.

Katak im Bujen ko 30–36

“Em̧ōj Kūr Eok n̄an Kwaļo̧k Naan kōn Gospel eo Aō”

Ilo am̧ riiti Katak im Bujen ko 30–36, ta ennaan ko kwoj en̄jake rekkar n̄an ko kwoj katakin? Ta eo enaaj jipan̄ im̧we er n̄an kwaļo̧k gospel eo n̄an ro jet?

Je En̄jake ko Rej Im̧we Eok

Kajjitōk n̄an Kwaļo̧k

Bōlen ro uwaan kūlaaj remaron̄ kwaļo̧k jet men raar riiti ilo Katak im Bujen ko 30–36 me ej im̧we er n̄an kwaļo̧k gospel eo.

Katakin Katak ko

Katak im Bujen ko 30–36

Kar kūr kōj n̄an kwaļo̧k naan kōn gospel eo an Jisōs Kraist.

• Unin tōl eo an wiik in Itok, Ļoor Eō—N̄an Kajjojo im Baam̧le ko ej elmakote etale Katak im Bujen ko 30–36 kōn ta eo Irooj eaar kajjitōk ippān mijenede ro An im ta eo Ej kōjeraam̧m̧an er. Ro uwaan kūlaaj eo remaron̄ kwaļo̧k ta ko rekar loi. (Lale, n̄an waanjon̄ok, Katak im Bujen ko 30:8; 31:3–5; 32:1, 5; 35:24.) Bōlen komaron̄ kūr er n̄an je juon leta n̄an juon eo ej jerbal in mijenede kiiō ak eo ej kōppopo n̄an juon mijen im ekoba jet naan in kōmeļeļe ko im kallim̧ur ko.

• Kwoj ke katakin jodikdik ro me rej kōppopo n̄an jerbal āinwōt mijenede ro ? Eļan̄n̄e kwoj, komaron̄ kūr kajjojo ro uwaan kūlaaj eo n̄an etale juon jekjōn jān Katak im Bujen ko 30–36 im pukot juon men me ej im̧we er n̄an jerbal. Komaron̄ kalikkar bwe mijenede ro rej kōnono kaki ilo jekjōn kein raar kāāl im kar jab iminene ilo Kabun̄ in. Ta eo eaar kakarbōb er n̄an kwaļo̧k gospel eo? Komaron̄ barāinwōt kōņaan kwaļo̧k pija in alooj in kōllaajrake ilo “Kein Jipan̄ ko jet.” Ta eo pija in alooj eo ej kwaļo̧k kōn etke jej aikuj jerbal āinwōt mijenede ro im ekōjkan ad maron̄ m̧aanjabpopo?

• Ejjab aolep ewōr an iien eo em̧m̧an n̄an jerbale juon mijen edipio, bōtaab jemaron̄ aolep karuwaineneik ro jet n̄an itok n̄an Kraist im ron̄jake ennaan eo an Jepļaaktok eo. Ro uwaan kūlaaj eo remaron̄ kōm̧m̧ane juon laajrak in wāween ko reoktak remaron̄ “kōpeļļo̧k [lon̄ier]” (Katak im Bujen ko 33:8–10). Ta jet iaan iien ko rem̧m̧an rej make jebar jej aikuj kwaļo̧k tōmak ko ad ippān ro jet? Ta kapilōk eo ilo Katak im Bujen ko: 30–36 ej jerbal n̄an kwaļo̧k gospel eo ilo wāween kein? Ļōmņak in kajjitōk ippān jet uwaan kūlaaj eo me eaar wōr aer en̄jake ko rem̧m̧an ilo kwaļo̧k gospel eo n̄an kwaļo̧k ļōmņak ko aer im uwaaki kajjitōk ko an kūlaaj eo n̄e emaron̄ wōr aer.

• Irooj eaar kallim̧uri Ezra Thayer im Northrop Sweet bwe eļan̄n̄e renaaj kōpeļļo̧k lo̧n̄ier im kwalo̧k gospel eo, renaaj “erom āinwōt Nipai etto” (Katak im Bujen ko 33:8). Ta paoktok ko ekar ewōr ippān Nipai me emaron̄ iokļo̧k kwaļo̧k gospel in?, (lale, n̄an waanjon̄ok, 1 Nipai 3:7; 4:6; 10:17; 17:15; 2 Nipai 1:27–28). Elmen an paoktok kein jipan̄ kōj ilo kijejeto ko ad n̄an kwaļo̧k gospel eo?

  

  Irooj ej kajjitōk ippād n̄an kwaļo̧k gospel eo ilo tōre in ad āinwōt kar Kabun̄ in m̧okta.

Katak im Bujen ko 32–33; 35

Irooj ej kōpooj kōj n̄an jerbal eo Ej kōņaan bwe jen kōm̧m̧ane.

• Elmen an Irooj kar jipan̄ kōj kōm̧m̧ane jerbal eo An? Juon ekōnono kōn mour ko an armej ro kar kōmeļeļeik ilo Katak im Bujen ko 32–33, 35 emaron̄ in juon ijjino eo em̧m̧an n̄an kejekļo̧kjeņ kōn en̄jake kein. N̄an waanjon̄ok, komaron̄ kwaļo̧k ippān kūlaaj eo bwebwenato in Ezra Thayer kōn ettōņak eo an ilo “Kein Jipan̄ ko Jet” innām kūr ro uwaan kūlaaj eo n̄an riiti Katak im Bujen ko 33:1–13, eo ej m̧ōttan revelesōn eo n̄an Ezra Thayer. Elmen an Irooj kepooj Ezra n̄an jerbal eo Irooj eaar kōņan bwe en kōm̧m̧ane? (lale Katak im Bujen ko 33:2). Komaron̄ barāinwōt kajjitōk ippān juon uwaan kūlaaj eo n̄an kwaļo̧k jet meļeļe in bwebwenato eo kōn kadkad eo ikōtaan Parley P. Pratt im Sidney Rigdon (lale “Ainikien ko an Jepļaaktok eo: Naan in Kam̧ool ko an Rioktak ro Jino in tata” ilo Itok, Ļoor Eō—N̄an Kajjojo im Baam̧le ko). Elmen an kar kadkad in kōjeraam̧m̧an Kabun̄ in? Ta kein kam̧ool eo jej loe bwe pein Irooj eaar pād ilo mour ko an em̧m̧aan rein? Bōlen ro uwaan kūlaaj ro remaron̄ kwaļo̧k en̄jake ko me rekar jipan̄ er lo bwe Irooj eaar jeļā kōn er ilo ejja jekjek in wōt.

Kein Jipan̄ ko jet

Visōn eo an Ezra Thayer

Ezra eaar jet visōn eo jet iien m̧okta jān an kar peptiaj, eaar wōr juon an visōn eo me “ juon em̧m̧aan eaar itok im bōktok n̄an eō juon peba lemlem im kar letok n̄an n̄a, im barāinwōt juon robba im kar jiron̄ eō n̄an [kōjan̄] e. Iaar jiron̄ ebwe ijjan̄in kar [kōjan̄jan̄] robba ilo mour eo aō. Eaar ba komaron̄ [kōjan̄] e, kajjieon̄ e. … Iaar kōjan̄i ainikien eo ijjan̄in kar kōjan̄e” (“Revelation, October 1830–B, Revelation Book 1,” historical introduction, josephsmithpapers.org). Tokālik ke Josep Smith ej bōk revelesōn eo n̄an Ezra Thayer im Northrop Sweet, kiiō kar je āinwōt Katak im Bujen ko 33, Ezra eaar ukōt revelesōn āinwōt peba lemlem eo ilo visōn eo an.

Kōkōm̧anm̧anļo̧k Ad Katakin

Kōketak juon mejatoto in kautiej. “Jipan̄ ro uwaan kūlaaj eo am̧ meļeļe bwe kajjojo iaer rejelet jetōb eo an kūlaaj eo. Kōketak er n̄an jipan̄ eok ejake juon mejatoto ejjeļo̧k ņojak, iakwe, im kautiej bwe aolep ren en̄jake ineem̧m̧an in kwaļo̧k en̄jake ko aer, doulul ko, im naan in kam̧ool ko” (Teaching in the Savior’s Way, 15).