Ni Samuel a Lamanite a mangisursuro iti rabaw ti pader

Ni Samuel a Lamanite iti rabaw ti Pader, ni Arnold Friberg

Agosto 31–Septiembre 6

Helaman 13–16

“Naragsak a Damag ti Naindaklan a Rag-o”

Ania kadagiti pannursuro ken padto ni Samuel a Lamanite a mariknam a kangrunaan a makatulong kadagiti miembro ti klasem? Bayat ti panagadalmo iti Helaman 13–16, utobem no kasano a matulongam ida a mangsapul iti kaipapanan dagitoy a kapitulo.

Isuratmo Dagiti Impresionmo

icon iti panagbibinninglay

Yawis ti Panagbibinninglay

Awisem dagiti miembro ti klase a mangibinglay iti maysa a kapareha ti maysa a banag a nasursuroda, maysa a banag a naawatanda a nasaysayaat, wenno maysa a banag nga inaramatda bayat ti panangbasada iti pakaammuan ni Samuel a Lamanite iti Helaman 13–16 iti daytoy a lawas. Kalpasanna paibinglaymo iti sumagmamano kadakuada iti sibubukel a klase.

icon iti panangisuro

Isuro ti Doktrina

Helaman 13

Agsarita ken agakem dagiti katulongan ti Apo a mayannurot iti panangiturong ti Dios.

• Indawat ti Apo ken ni Samuel a Lamanite nga agaramid iti maysa a banag a mabalin a kasla narigat: mangikasaba kadagiti tao a nangpapanaw idi kenkuana iti ruar ti siudadda. Ti panangbasa iti Helaman 13:2–5 ket mabalin a mangipalagip kadagiti miembro ti klase kadagiti naririgat a banag nga indawat ti Apo kadakuada nga aramidenda. Awisem ida a mangibinglay kadagiti padasda. Kasano a tinulongan ida ti Apo? Kas pagarigan, nalabit a mabalin nga ibinglay dagiti miembro ti klase dagiti padasda idi nangikabil ti Apo iti maysa a banag iti pusoda a tinarigagayanna nga isaoda iti maysa a tao (kitaen iti bersikulo 4). Ania dagiti bendision a nakitan dagiti miembro ti klase idi sinurotda ti panangiturong ti Apo?

  Presidente Russell M. Nelson

  Iturongnatayo ti propeta ken ni Jesucristo.

• Nupay naiturong dagiti pammallaag ni Samuel kadagiti natangken ti panagpuspusona a Nephite, isuro ti Helaman 13 dagiti sumagmamano nga adalen para kadatayo amin. Tapno matulongan dagiti miembro ti klase a mangsapul iti personal a kaipapanan kadagiti balikasna, mabalinmo nga awisen ida a mangsukisok iti Helaman 13 para iti maysa a mensahe a kasla adda pakainaiganna iti panawentayo. (No kasapulanda ti tulong, mabalinmo nga isurat dagiti sumaganad a bersikulo iti pisarra: 8, 21–22, 26–29, 31, ken 38.) Kalpasanna mabalinda nga ibinglay no ania ti nasarakanda iti kada paris, iti babassit a grupo, ken iti intero a klase. Ania dagiti maipada a mensahe nga inted dagiti propeta kadatayo iti agdama?

Helaman 14; 16:13–23

Dagiti pagilasinan ken pagsidsiddaawan ti mabalin a mangpapigsa iti pammati dagiti saan a mangpatangken iti panagpuspusoda.

• Ti balabala iti daytoy a lawas iti Umaykayo, Sumort Kaniak—Para kadagiti Indibidual ken Pamilia ket mangisingasing kadagiti pagilasinan nga inted kadatayo ti Apoi “tapno mamati[tayo] iti naganna” (Helaman 14:12). Nalabit a mabalin nga ibinglay dagiti miembro ti klase no ania ti natakuatanda bayat ti panangutobda iti daytoy a kapanunotan. Penken nga ilawlawag a dagiti pagilasinan iti biagtayo ket saan unay a makasagid rikna ken ad-adda a personal ngem kadagiti pagilasinan nga impadto ni Samuel. Ania dagiti dadduma pay a panggep para kadagiti pagilasinan a naisingasing iti Helaman 14:28–30? Mabalin pay nga ibinglay dagiti miembro ti klase ti dadduma pay a banag nga inaramiden ti Apo a makatulong kadakuada a mangpapigsa iti pammatida Kenkuana.

• Ti panangbasa maipapan iti no kasano a naipatungpal dagiti padto ni Samuel ket mabalin a mangpapigsa iti pammati dagiti miembro ti klase ken ni Jesucristo ken iti misionna. Nalabit a mabalin nga usaren dagiti miembro ti klase ti Helaman 14 tapno mangaramid iti tsart a mangilista kadagiti padto ni Samuel maipapan iti pannakayanak ken ipapatay ni Cristo iti maysa a bangirna ken dagiti reperensia iti nasantuan a kasuratan a nakaipatungpalan dagitoy a padto iti sabali a bangirna. Sumagmamano kadagitoy a reperensia ti mabalin a mangiraman kadagiti bersikulo manipud iti 3 Nephi 1:15–21 ken 3 Nephi 8:5–25. Apay a napateg a maammuantayo maipapan kadagitoy a padto ken ti pannakaipatungpalda?

• Mabalin a nadlaw dagiti miembro ti klase—iti Helaman 16 ken dadduma pay a lugar kadagiti nasantuan a kasuratan—a ti panangkita kadagiti pagilasinan ken pagsidsiddaawan ket saan a kasapulan a maikagapu iti maysa tapno mamati ken ni Cristo. Awisem ida a mangibinglay iti sumagmamano a pagarigan manipud kadagiti nasantuan a kasuratan a nakakita kadagiti pagilasinan ngem saanda a namati. Segun iti Helaman 16:13–23, apay nga adu a tao iti panawen ni Samuel a Lamanite ti saan a namati kadagiti pagilasinan ken padto? Kasano nga uyotan ni Satanas dagiti tao nga “agpannuray iti bukodda a pigsa ken … sirib” iti agdama? (Helaman 16:15). Ania ti masursurotayo manipud iti daytoy a pakaammuan a makatulong kadatayo a maliklikan dagiti isu met laeng a biddut?

Helaman 15:3

Dusaen ti Apo dagiti ay-ayatenna.

• Naglaon dagiti balikas ni Samuel iti adu a naiget a pannusa, ngem mangted ti Helaman 15:3 iti naidumduma a pannirigan iti pannakadusa manipud iti Apo. Maysa a wagas tapno matulongan a maawatan dagiti miembro ti klase daytoy a pannirigan ket isu ti panangbasa iti daytoy a bersikulo nga aggigiddan ken panangawis kadakuada a mangibinglay iti pakakitaan a makitada iti ayat ken asi ti Dios kadagiti padto ken ballaag ni Samuel. Kasano nga agbalin a maysa a pagilasinan ti ayat ti Apo ti pannusana?

• Tapno nasaysayaat a maawatan dagiti miembro ti klase ti mensahe iti Helaman 15:3, mabalinmo nga ibinglay ti tallo a panggep para iti nadiosan a panagdusa nga insuro ni Elder D. Todd Christofferson (kitaen iti “Dagiti Mainayon a Resources”). Bingayen ti klase iti tallo a grupo, ket idawat iti tunggal grupo a mangilawlawag iti maysa kadagitoy a panggep (makatulong dagiti nasantuan a kasuratan ken video a naisingasing iti “Dagiti Mainayon a Resources”). Kalpasanna mabalin nga ibinglay ti tunggal grupo iti klase dagiti ania man a nalawag a pannakaammo ken pannakaawat [insights] manipud iti panaglilinnawagda a mangtulong kadakuada a nasaysayaat a maawatanda a dusaen ti Apo dagiti ay-ayatenna.

Helaman 16

Iturongnatayo ti propeta iti Apo.

• Iti Helaman 16, ania ti masursurotayo manipud kadagiti immawat kadagiti pannursuro ni Samuel? Ania ti masursurotayo manipud kadagiti saan nga immawat kenkuana? Mabalin a makaparegta ti dumngeg kadagiti miembro ti klase a mangibinglay no kasano a nagun-odda ti pammaneknekda maipapan iti kinapateg ti panangsurot kadagiti sibibiag a propeta. Mabalinda pay nga ibinglay no kasano nga usarenda ti Helaman 16 wenno dagiti balikas ni Elder Andersen iti “Dagiti Nainayon a Resources” tapno ilawlawag iti maysa a tao no apay a pinilida a suroten ti propeta.

icon iti panagsursuro

Yallukoy ti Panagsursuro iti Pagtaengan

Tapno mayallukoy dagiti miembro ti kalse a mangbasa iti 3 Nephi 1–7 iti sumaruno a lawas, mabalinmo nga ibaga kadakuada nga adu kadagiti padto a mabasada maipapan iti daytoy a lawas ti maipatungpalto kadagitoy a bersikulo.

resources icon

Dagiti Mainayon a Resources

Dagiti panggep ti nadiosan a pannakadusa.

Imbinglay ni Elder D. Todd Christofferson ti tallo a panggep ti nadiosan a panagdusa (kitaen iti “As Many as I Love, I Rebuke and Chasten,” Ensign wenno Liahona, Mayo 2011, 97–100):

1. “Manguyot kadatayo nga agbabawi.” Kitaen iti Ether 2:14–15; Doktrina ken Katulagan 1:27; 93:41–50; 105:6.

2. “Mangubog ken mangpasanto kadatayo.” Kitaen iti Mosiah 23:21–22; Doktrina ken Katulagan 101:1–5; 136:31.

3. “Mangiturong iti dalantayo iti biag iti ammo ti Dios a nasaysayaat a dana.” Kitaen iti istoria ni President Hugh B. Brown ken ti bassit a mula iti mensahe ni Elder Christofferson (dagiti panid 98–99); “The Will of God” (video, ChurchofJesusChrist.org).

Agrag-otayo a maaddaan iti maysa a propeta.

Insuro ni Elder Neil L. Andersen:

“Saan nga agtakder ti maysa a propeta iti nagbaetanyo iti Mangisalakan. Ketdi, agtakder isuna iti abayyo ket iturongnakayo iti dalan a mapan iti Mangisalakan. Ti kangrunaan a pagrebbengan ti maysa a propeta ken ti kapatgan a sagutna kadatayo ket ti manamnama a saksina, ti awan duadua a pannakaammona, a ni Jesus ti Cristo. Kas ken ni Pedro idi un-unana, impakdaar ti propetatayo, ‘[Isu] ti Cristo, ti Anak ti sibibiag a Dios’ [Mateo 16:16; kitaen met iti Juan 6:69].

“Iti masakbayan nga aldaw, ti pananglagip iti biagtayo sakbay a nayanaktayo, agrag-otayonto gapu ta nagbiagtayo iti daga iti panawen ti maysa a sibibiag a propeta. Iti dayta nga aldaw, ikararagko a kabaelantayonto nga isao ti:

“Dimngegtayo kenkuana. Namatitayo kenkuana. Inadaltayo dagiti balikasna nga addaan anus ken pammati. Nagkararagtayo para kenkuana. Mangitakdertayo kenkuana. Napakumbabatayo a sumurot kenkuana. Nagayattayo kenkuana” (“The Prophet of God,” Ensign wenno Liahona, Mayo 2018, 27).

Panangpadur-as iti Panangisurotayo

Kaam-ammom dagiti sursuruam. Awan dua a tao nga eksakto nga agpadpada. Tunggal tao a sursuruam ket addaan iti naidumduma a nagtaudan, pannirigan, ken agduduma a kabaelan. Agkararagka a mangammo no kasano a mausarmo dagitoy a pagdudumaan a mangtulong kadagiti miembro ti klase a makasursuro. No nasaysayaat a maawatam dagiti sursuruam, makaparnuayka kadagiti napateg ken nakallalagip a kanito iti panangisuro. (Kitaen iti Panangisuro iti Wagas ti Mangisalakan, 7.)