Saksian dagiti Nephite ti aldaw nga awan ti rabii

Maysa nga Aldaw, Maysa a Rabii, ken Maysa nga Aldaw, ni Jorge Cocco

Septiembre 7–13

3 Nephi 1–7

“Yangadmo ti Ulom ket Agragsakka”

Mabalin nga iparikna kenka ti Espiritu Santo a mangipamaysa kadagiti maitudo a pagbatayan manipud iti 3 Nephi 1–7 iti klase. Mabalin a dagita laeng dagiti pagbatayan a mangbendisionto iti maysa a tao nga agkasapulan.

Isuratmo Dagiti Impresionmo

icon iti panagbibinninglay

Yawis ti Panagbibinninglay

Tapno matulongan dagiti miembro ti klase a mangibinglay iti no ania ti masursuroda iti pagtaengan, idawat kadakuada a mangisurat kadagiti piraso ti papel ti sumagmamano a kinapudno a nasarakanda iti 3 Nephi 1–7 ken dagiti reperensia iti nasantuan a kasuratan para kadagiti kinapudno. Ikabil dagiti piraso ti papel iti maysa a container, ket mangala iti sumagmamano tapno paglilinnawagan iti klase. Bayat ti panangibinglay dagiti miembro ti klase, ibilang no adda dagiti mainaig a kapanunotan iti daytoy a balabala a mabalin a mangpauneg iti panaglilinnawag ken mangiraman kadagiti dadduma pay a miembro ti klase.

icon iti panangisuro

Isuro ti Doktrina

3 Nephi 1–7

Ti pannakapasurot ket maysa a proseso nga agkasapulan iti napasnek a panagkagumaan.

• i3 Nephi 1–7 iladawanna dagiti tao a napasurot ken ni Jesucristo ken iti ebangheliona ken dagiti dadduma pay a saan a napasurot. Tapno matulongan ti klasem a mangilasin no ania ti naaramid a pagdumaan dagitoy a grupo, mabalinmo ti mangaramid iti tsart iti pisarra nga addaan kadagiti sumaganad a paulo: Dagiti pammati ken tignay a mangpakapsut iti pannakapasurot ken Dagiti panamati ken tignay a mangpapigsa iti pannakapasurot. Bingayem dagiti sumaganad a reperensia iti nasantuan a kasuratan kadagiti miembro ti klase, ket awisem ida a mangpunno iti tsart iti no ania ti masarakanda (naited dagiti pagarigan para iti umuna a reperensia).

  • 3 Nephi 1:4–23, 29–30: Mangpakapsut iti pannakapasurot: saan a panamati kadagiti balikas ti propeta ken panangang-angaw kadagiti nalinteg a tao (dagiti bersikulo 5–6). Panangpapigsa iti pannakapasurot: kaadda ti pammati kadagiti balikas ti propeta ken panagkararag para iti tulong (dagiti bersikulo 8, 11).

  • 3 Nephi 2:1–3

  • 3 Nephi 3:12–16

  • 3 Nephi 4:8–10, 30–33

  • 3 Nephi 6:13–18

  • 3 Nephi 7:15–22

  Kasano a mapagtalinaedtayo a napigsa ti pannakapasurottayo iti baet ti pagsusupadian?

• Mabalin nga interesado ti klasem iti panangsukisok no kasano a mapapigsa ti aw-awagan ti 3 Nephi 1:27–30 a “ti tumantanor a kaputotan.” Mabalinmo nga idawat kadagiti miembro ti klase a mangsapul kadagiti rason kadagitoy a bersikulo no apay a saan a nakapagkedked dagiti agtutubo a Nephite ken Lamanite iti kinadangkes iti aglawlawda. Mabalin a daytoy ti mangiturong iti panaglilinnawag maipapan iti sumagmamano kadagiti karit a sangsanguen iti agdama ti tumantanor a kaputotan ken dagiti kasayaatan a wagas a mangtulong kadakuada a mangpadur-as iti pammati ken ni Cristo. (Masarakan ti sumagmamano a singasing iti “Dagiti Nainayon a Resources.”)

3 Nephi 1:4–21; 5:1–3

Ipatungpalto ti Apo ti amin a balikasna.

• Ti panangbasa kadagiti pakaammuan iti 3 Nephi 1:4–21 ken 5:1–3 ket makapagpapigsa iti pammati dagiti miembro ti klasem kadagiti kari ti Apo. Nalabit a makapagbasa nga aggigiddan dagiti miembro ti klase iti 3 Nephi 1:4–7 ket ilista iti pisarra no kasano ti mabalin a riknada no isuda dagiti mamatpati a nailadawan kadagitoy a bersikulo. Mabalin met a panunotenda dagiti isu met la a kasasaad a mabalin a sanguentayo iti agdama. Ania ti masursurotayo manipud iti 3 Nephi 1:8–21 ken 5:1–3 maipapan iti Apo ken dagiti karina? Tapno mapaatiddog ti panaglilinnawag, mabalinmo nga irebyu ti maysa a himno maipapan iti panagtalek iti Dios, kas iti “When Faith Endures” (Hymns, no. 128). Mabalin nga ibinglay dagiti miembro ti klase dagiti padas idi nagunggonaan ti pammati ken panagtalekda iti Dios, iti baet ti pagsusupadian.

3 Nephi 1:4–15; 5:12–26; 6:10–15; 7:15–26

Datayo dagiti disipulo ni Jesucristo.

• Impakdaar ni Mormon, “Adtoy, disipulonak ni Jesucristo” (3 Nephi 5:13). Tapno sukisokenyo iti klasem no ania ti kayat a sawen ti agbalin a maysa a disipulo, mabalinmo nga awisen dagiti miembro ti klase a mangsukisiok iti 3 Nephi 1:4–15; 5:12–26; 6:10–15; ken 7:15–26, a mangsapsapul kadagiti kababalin, kannawidan, ken aramid dagiti disipulo ni Cristo. Ibilang ti panangted kadagiti miembro ti klase iti sumagmamano a minuto tapno agutob ken agsurat iti mabalinda nga aramiden tapno agbalin a nasaysayaat a disipulo ni Jesucristo.

3 Nephi 2:11–12; 3:12–26; 5:24–26

No aguummong dagiti nalinteg, mapapigsa ken masaluadan ida ti Apo.

• Paset ti rason a nabaelan nga abaken dagiti Nephite dagiti mannanakaw ni Gadianton ket gapu ta nakitiponda iti puersa kadagiti napasurot a Lamanite ken sinurotda ti naparegta a direksion ni Lachoneus a “pangummonganda iti bagbagida” iti Zarahemla (3 Nephi 3:22). Ania dagiti adalen a mabalin nga isuro kadagiti miembro ti klasem? Mabalinmo nga idawat kadakuada a mangibinglay kadagiti padas iti pinapigsa ida dagiti nalinteg a tao iti aglawlawda. Kalpasanna mabalinmo nga awisen dagiti miembro ti klase a mangrebyu iti 3 Nephi 3:12–26, a mangsapsapul kadagiti rason a naguummong dagiti Nephite ken dagiti bendision a napadasanda. Kasano a mapadasantayo dagitoy isu met la a bendision no aguummongtayo a kaduatayo dagiti miembro ti pamilia wenno branch ken wardtayo? Ania pay dagiti masursurotayo maipapan iti panaguummong manipud iti 3 Nephi 5:24–26?

• Ti panangbasa iti 3 Nephi 3 ket maysa a gundaway a mangtulong kadagiti miembro ti klase a mangkita no kasano a napigpigsatayo no agguummongtayo a sangkamaysa iti kinalinteg. Nalabit a mabalinyo ti mangpanunot iti maysa nga adalen a banag [object lesson] a mangipakita no kasano nga agbalin a napigpigsa ti maysa a banag a nakapsut no makikaykaysa iti dadduma pay a banag. Awisem dagiti miembro ti klase a mangipapan a naidawat kadakuada a mangkumbinsi kadagiti Nephite maipapan kadagiti pagimbagan ti panangguummong a sangkamaysa, kas nailadawan kadagiti bersikulo 12–26. Nalabit a makapagtrabahoda iti kada grupo tapno mangilawlawag no kasano nga aramiden daytoy, maibatay iti no ania ti nabasada kadagitoy a bersikulo. Paibinglay kadakuada dagiti kapanunotanda. Kas maysa a klase, mabalinyo a paglilinnawagan dagiti saludsod kas kadagitoy: Ania dagiti karit a sangsanguentayo a mabalin a mayarig kadagiti mannanakaw ni Gadianton? Kasano a mapagbalintayo dagiti pagtaengan ken wardtayo a lugar a pagkamangan?

3 Nephi 3:1–13

Masapul a ditayo agbuteng ken ni Satanas.

• Ti surat nga insurat ni Giddianhi, ti dadaulo dagiti mannanakaw ni Gadianton, ket maysa a gandat a pangbutbuteng ken pangallilaw kadagiti Nephite. Nalabit a mabalin nga irebyu dagiti miembro ti klase dagiti balikasna a masarakan iti 3 Nephi 3:2–10 ket idasig dagitoy kadagiti wagas a mabalin a pangpadasan ni Satanas a mangallilaw kadatayo iti agdama. Ania ti masursurotayo manipud iti reaksion ni Lachoneus, ti pangulo nga ukom dagiti Nephite?

icon iti panagsursuro

Yallukoy ti Panagsursuro iti Pagtaengan

Tapno maparegta dagiti miembro ti klasem a mangbasa iti 3 Nephi 8–11 para iti klase iti sumaruno a lawas, isaritam kadakuada a ti 3 Nephi 11 ket naglaon iti “kangrunaan a pasamak” ti Libro ni Mormon—ti personal a panagministro ni Jesucristo kadagiti Nephite (kitaen iti pakauna iti Libro ni Mormon).

resources icon

Dagiti Nainayon a Resources

Pannangtulong a mangpadur-as iti pammati iti tumantanor a kaputotan.

Insingasing ni Elder Valeri V. Cordón ti Pitupulo ti tallo a wagas a pangtulong iti tumantanor a kaputotan nga agtalinaed a napudno iti ebanghelio:

1. “Panagbalin a Napaspasnek ken Masekseknan iti Pagtaengan. … Ti nabileg a panangisuro ket napateg unay iti panangtaginayon iti ebanghelio kadagiti pamiliatayo, ket agkasapulan daytoy iti kinapasnek ken panagkagumaan. Naawistayon iti adu a gundaway a mangipaugali iti inaldaw a sangapamiliaan ken bukod a panagadal iti nasantuan a kasuratan. Adu a pamilia nga agar-aramid iti daytoy ti naparaburan iti tunggal aldaw iti dakdakkel a panagkaykaysa ken nasingsinged a relasion iti Apo.”

2. “Natibker a Panangipagwadan iti Pagtaengan. … Saan nga umdas a kasarita laeng dagiti annaktayo maipapan iti kinapateg ti kallaysa iti templo, panagayuno, ken panangngilin a nasantuan iti aldaw ti Sabbath. Nasken a makitada nga adda orastayo kadagiti iskediultayo a dumar-ay iti templo a masansan agingga a kabaelantayo. Nasken a makitada ti panagkumittayo iti panagayuno a masansan ken panangngilin a nasantuan iti sibubukel nga aldaw ti Sabbath.

3. “Dagiti kannawidan. … Kas pamilia, nasken a liklikantayo ti ania man a kannawidan a manglappedto kadatayo iti panangngilin a nasantuan iti aldaw ti Sabbath wenno kaadda iti inaldaw a panagadal iti nasantuan a kasuratan ken panagkararag iti pagtaengan. Nasken a saluadantayo ti pagtaengantayo iti pornograpia ken amin a dadduma pay a dakes nga impluensia. Tapno marimbawan dagiti nailubongan a kannawidan ti aldawtayo, nasken nga usarentayo dagiti nasantuan a kasuratan ken ti mensahe dagiti moderno a propeta tapno isuro kadagiti annaktayo maipapan iti nadiosan a mision ni Jesucristo” (“The Language of the Gospel,” Ensign wenno Liahona, Mayo 2017, 56–57; nainayon ti nagiray a balikas).

Panangpadur-as iti Panangisurotayo

Iramanmo dagiti tao nga agkarkarigatan. No dadduma kasapulan dagiti agkarkarigatan a miembro ti klase a maibilangda ken mariknada a maipatpategda. Ibilang ti panangidawat kadakuada a mangyakem iti sumaruno nga adalen wenno panangsigurado nga adda luganda nga umay iti simbaan. Saanka a sumuko no saanda nga agresponde kadagiti panagkagumaanmo iti damo. (Kitaen iti Panangisuro iti Wagas ti Mangisalakan, 8–9.)