Ni Jesus iti panagparangna kadagiti Nephite

Siak ti Silaw ti Lubong, ni James Fullmer

Septiembre 14–20

3 Nephi 8–11

“Bumangon ket Umaykayo Kaniak”

Iti pananglagip kadagiti parikna wenno impresion nga insuratmo kabayatan ti bukodmo a panagadal iti 3 Nephi 8–11 ket mabalin a mangparegta kadagiti kapanunotan iti panangisuro. Dagiti singasing iti baba ket makaited kenka kadagiti nayon a kapanunotan.

Isuratmo Dagiti Impresionmo

icon iti panagbibinninglay

Yawis ti Panagbibinninglay

No dadduma nalabit nga ad-adda a makaibinglay dagiti tao no agsaludsodka iti maysa a maitudo a banag. Kas pagarigan, mabalinmo nga awisen dagiti miembro ti klase mangibinglay iti maysa a banag manipud iti 3 Nephi 8–11 a nangisuro kadakuada maipapan iti kababalin ni Jesucristo. Mabalinmo nga ited daytoy nga awis iti sumgmamano nga aldaw a nasapsapa tapno makaumayda a nakasagana a mangibinglay.

icon iti panangisuro

Isuro ti Doktrina

3 Nephi 8–10

No agbabawitayo, ummongen, salakniban, ken paimbagennatayonto ti Mangisalakan.

• Naglaon dagitoy a kapitulo kadagiti pakaammuan maipapan iti pannakaperdi ken pannakadadael, ngem magisuroda pay kadagiti naespirituan nga adalen a makatulong kadatayo nga umas-asideg ken ni Jesucristo. Nalabit a mabalinmo a bingayen ti klase iti tallo a grupo ket dutokam ti tunggal grupo a mangsukisok iti maysa a kapitulo manipud iti 3 Nephi 8–10, a mangsapsapul kadagiti balikas wenno ragup ti balikas a mangiladawan no ania ti nasursuro wenno napadasan dagiti tao. Kalpasanna mabalin nga ibinglay ti maysa a tao manipud iti tunggal grupo iti dadduma pay iti klase no ania ti natakuatan ti grupoda. Allukoyem dagiti miembro ti klase a mangilawlawag no kasano a makatulong kadatayo dagiti naespirituan nga adalen nga umas-asideg iti Mangisalakan.

• Ti napateg a mensahe kadagitoy a kapitulo isu ti panangtulong ti Mangisalakan kadatayo nga addaan iti ayat ken asi uray no kabayatan dagiti karirigatan a pannubok. Mabalinmo nga awisen dagiti miembro ti klase a mangpanunot iti maysa a tao nga am-ammoda a maipaspasango iti mapannubok a panawen ket kalpasanna sukisoken dagiti balikas ti Mangisalakan iti 3 Nephi 9:13–22 ken 10:1–10 tapno mangsapul kadagiti ragup ti balikas a mabalin a makatulong iti dayta a tao. Nalabit a mabalin pay a mangibinglay dagiti miembro ti klase kadagiti bukod a padas idi nariknada a tinulongan ida ti Mangisalakan.

3 Nephi 9:19–22

Kasapulan ti Apo ti “nasneban a puso ken napnuan babawi nga espiritu.”

• Sakbay ti yaay ti Mangisalakan, tinungpal dagiti napudno iti naikari a daga ti linteg ni Moises, a pakairamanan ti panangisakripisio dagiti ayup. Tapno matulongan dagiti miembro ti klase a maawatan a nasaysayaat daytoy a linteg, mabalinyo nga irebyu biit ti Moises 5:5–8. Apay a nabilin dagiti tao ti Dios a mangisakripisio kadagiti ayup idi un-unana? Ania ti baro a bilin nga inted ti Mangisalakan iti 3 Nephi 9:20, ken kasano nga iturongnatayo daytoy Kenkuana ken ti sakripisiona? Makatulong dagiti adaw maipapan iti linteg ti panagsakripisio iti “Dagiti Nainayon a Resources.”

• Kasano a matulongam a maawatan dagiti miembro ti klase no ania ti kayat a sawen ti maaddaan iti nasneban a puso ken napnuan babawi nga espiritu? Nalabit a mabalinmo a rugian babaen ti panangisurat iti pisarra kadagiti balikas a nasneban, sibababawi, ken sakripisio. Kalpasanna mabalinmo nga idawat kadagiti miembro ti klase a mangidrowing kadagiti ladawan a mangibagi no ania ti kaipapanan dagitoy a balikas kadakuada wenno isurat dagiti balikas ken ragup ti balikas a mainaig kadagitoy a termino. Bayat ti panangibinglay dagiti miembro ti klase kadagiti ladawan, balikas, ken ragup ti balikas, mabalinda nga ilawlawag no kasano a mainaig dagitoy iti no ania ti dawdawaten ti Mangisalakan kadatayo iti 3 Nephi 9:19–22. Makatulong pay ti adaw ni Elder D Todd Christofferson iti “Dagiti Nainayon a Resources.”

3 Nephi 11:1–17

Ni Jesucristo ti Silaw ti Lubong.

• Dagiti pasamak a nailadawan iti 3 Nephi 11:1–17 ket maibilang a kasagraduan iti Libro ni Mormon. Ibilang ti panangipalubos kadagiti miembro ti klase iti sumagmamano a kanito a mangbasa kadagitoy a bersikulo iti naulimek. Nalabit a mabalinmo nga isurat ti sumagmamano a saludsod iti pisarra nga utobenda bayat ti panagbasada, kas kadagitoy: Kasano koma ti nariknam no naibilangka kadagitoy a tattao? Ania ti makaawis iti imatangmo maipapan iti Mangisalakan kadagitoy a bersikulo? Ania ti masursurom manipud iti pagwadan ni Jesus? wenno Ania dagiti padas a naited kenka kas maysa a saksi ni Jesucristo kas Mangisalakanmo? Mabalinmo a palugodan dagiti miembro ti klase a mangibinglay iti sumagmamano kadagiti kapanunotan wenno impresionda.

  Ni Jesus a mangipakpakita kadagiti lamma iti imana kadagiti Nephite

  Saggaysa, ni Walter Rane

3 Nephi 11:10–41

Impasdek ni Jesucristo ti doktrinana ken ti Simbaanna.

• Mabalin a makatulong a mangdakamat kadagiti umuna a banag a pinili a sawen ken aramiden ti Mangisalakan idi nagparang Isuna iti daga a Bountiful. Mabalin a markaan wenno isurat dagiti miembro ti klase dagiti kinapudno nga ilasinda manipud kadagiti balikas ken tignay ti Mangisalakan iti 3 Nephi 11:10–41. Awisem ida a mangibinglay no ania ti nasarakanda. Ania ti masursurotayo maipapan iti Mangisalakan manipud kadagitoy a bersikulo? Ania ti masursurotayo maipapan iti Simbaanna?

• Tapno maigibus dagiti madlaw a di panagkikinnaawatan kadagiti tao a mainaig iti panagbuniag, impalgak ti Mangisalakan dagiti napapateg a kinapudno maipapan iti ordinansa iti 3 Nephi 11. Tapno matulongan dagiti miembro ti klase a mangtakuat kadagitoy a kinapudno, mabalinmo nga isurat dagiti sumaganad a numero ti bersikulo iti pisarra: 21–25, 26–27, 33–34. Mangawis iti tunggal miembro ti klase a mangpidut iti maysa wenno dua a bersikulo ket ibinglayna ti maysa a kinapudno nga isuro daytoy maipapan iti panagbuniag.

icon iti panagsursuro

Yallukoy ti Panagsursuro iti Pagtaengan

Mabalin nga interesado a maammuan ti klasem a ti isasarungkar ti Mangisalakan kadagiti Nephite ken Lamanite ket nalaus unay a mangapekto kadakuada gapu ta dagitoy sigud a mannakisinnupanget a tattao ket nagbiag iti talna iti uneg dagiti sumaruno a 200 a tawen (kitaen iti 4 Nephi 1). Mabalin a daytoy ti mangparegta kadagiti miembro ti klase a mangadal iti 3 Nephi 12–16 tapno maadal no ania ti insuro ti Mangisalakan a mabalin a nangiturong iti kasta a naindaklan a panagbalbaliw.

resources icon

Dagiti Nainayon a Resources

Ti linteg ti apagkapullo.

Inlawlawag ni Presidente M. Russell Ballard ti maysa a wagas a pakatungpalantayo iti linteg ti panagsakripisio iti agdama:

“Kalpasan ti kangrunaan a panagsakripisio ti Mangisalakan, naaramid ti dua a panagbalbaliw iti aramid [ti linteg ti panagsakripisio]. Umuna, ti ordinansa ti sakramento ti mangsukat iti ordinansa ti panagsakripisio; ken maikadua, daytoy a panagbalbaliw ti mangtignay iti panangipamaysa iti sakripisio manipud iti ayup ti tao iti tao mismo. Iti maysa a kaipapanan, nabaliwan ti sakripisio manipud iti panangidaton iti agidatdaton. …

“… Imbes a dawaten ti Apo dagiti ayup wenno bukbukeltayo, itan kayatna nga isardengtayo ti amin a saan a nadiosan. …

“… No parmekentayo dagiti managimbubukod a tarigagaytayo ket ipangrunatayo nga umuna ti Dios iti biagtayo ket makitulag nga agserbi Kenkuana ania man ti panagkagumaan, ngarud agtungtungpaltayo iti linteg ti panagsakripisio” (“The Law of Sacrifice,” Ensign, Okt. 1998, 10).

Imbaga ni Elder Neal A. Maxwell ti Korum dagiti Sangapulo-ket-dua nga Apostol: “Ti pudno, bukod a panagsakripisio ket saan iti kaano man a panangipan iti maysa nga ayup iti altar. Ketdi, daytoy ti panagtallugod a panangikabil ti kinaayuptayo iti altar ken panangpalugod iti daytoy a makunsumo!” (“Deny Yourselves of All Ungodliness,” Ensign, Mayo 1995, 68).

Nasneban a puso ken napnuan babawi nga espiritu.

Inladawan ni Elder D. Todd Christofferson ti kaipapanan ti nasneban a puso ken napnuan babawi nga espiritu:

“Mairuknoymo iti Apo ti sagut ti nasneban, wenno sibababawi, a pusom ken ti napnuan babawi, wenno managtungpal, nga espiritum. Iti kinaagpaysona, daytoy ti sagut ti bagim—no aniaka ken no ania ti pagbalinam.

“Adda kadi maysa a banag kenka wenno iti biagmo a saan a natarnaw wenno saan a maikari? No maliklikam daytoy, dayta ti sagut ti Mangisalakan. Adda kadi nasayaat nga ugali wenno kababalin a kurkurang iti biagmo? No ipaugalim daytoy ket aramidem daytoy a paset ti kinataom, mangmangtedka iti sagut iti Apo” (“When Thou Art Converted,” Ensign wenno Liahona, Mayo 2004, 12).

Panangpadur-as iti Panangisurotayo

Makitinnulongka kadagiti miembro ti pamilia. “Dagiti tao nga addaan iti kabilgan nga impluensia iti maysa a tao—para iti pagsayaatan wenno pagdaksan—ket gagangay a dagiti tao a kaduana iti pagtaenganna. Gapu ta ti pagtaengan ti sentro ti panagbiag ken pagsursuruan iti ebanghelio, dagiti panagkagumaanam a mangpatibker iti maysa a miembro ti klase ket agbalinto a kasamayan no makitinnulongka kadagiti … miembro ti pamilia” (Panangisuro iti Wagas ti Mangisalakan, 8–9).