Ni Nephi nga agkarkararag iti torre ti minuyongan

Ladawan ni Nephi iti torre ti minuyongan ni Jerry Thompson

Agosto 24–30

Helaman 7–12

“Manglagip iti Apo”

Inallukoy ni Nephi dagiti taona a manglagip iti Apo. Mabalin nga aramidem ti isu met laeng kadagiti ubbing a sursuruam. Bayat ti panangbasam iti Helaman 7–12, isuratmo dagiti impresion maipapan no kasano a matulongam dagiti miembro ti klase a manglagip iti Apo.

Isuratmo Dagiti Impresionmo

icon iti panagbibinninglay

Yawis ti Panagbibinninglay

Awisem dagiti miembro ti klase a mangisurat iti pisarra ti sumagmamano a pagbatayan ti ebanghelio a masarakanda iti Helaman 7–12, kasta met dagiti reperensia a pakasarakan kadagitoy a pagbatayan. Kalpasanna mabalinmo nga ikeddeng kas maysa a klase no ania kadagitoy a pagbatayan ken bersikulo ti ilawlawagmo.

icon iti panangisuro

Isuro ti Doktrina

Helaman 7–11

Ipalgak dagiti propeta ti pagayatan ti Dios kadagiti tao.

• Tapno matulongan ti klasem a makasursuro manipud iti Helaman 7–11 maipapan kadagiti akem ken pagrebbengan dagiti propeta, mabalinmo nga irugi babaen ti panangbasayo nga aggigiddan iti naiserrek [entry] para iti “Propeta” iti Pangiwanwan iti Nasantuan a Kasuratan (scriptures.ChurchofJesusChrist.org). Mabalin nga ilasin dagiti miembro ti klase dagiti akem dagiti propeta a nadakamat ken ilista dagitoy iti pisarra. Kalpasanna mabalinmo nga idawat kadagiti miembro ti klase a tunggal maysa a mangrebyu iti maysa a kapitulo manipud iti Helaman 7–11. Idawat kadakuada a mangsapul iti no kasano nga impatungpal ni Nephi dagiti akem a nailista iti pisarra. Kasano nga ipatungpal dagiti sibibiag a propeta ken apostol dagitoy nga akem? Kasano a makanunongantayo ida kadagiti pagrebbenganda?

• Apay a no dadduma a nasken nga agsarita dagiti propeta a situtured a kas iti inaramid ni Nephi? Ibilang ti panangawis kadagiti miembro ti klase a mangbasa iti Helaman 7:11–29, a mangsapsapul kadagiti ballaag nga inted ni Nephi ken dagiti rason iti panagbalinna a natured unay iti panangted kadagitoy. Ania dagiti napadtuan a ballaag a nangparegta kadatayo tapno agbabawi ken umasideg iti Apo? Iti “Dagiti Nainayon a Resources” masarakamto ti maysa a metapora nga inusar ni Elder Neil L. Andersen a mangtulong kadatayo a makaawat kadagiti peggad ti saan a panangikankano kadagiti napadtuan a ballaag.

Helaman 9:1–20; 10:1, 11–15

Nasken a mabangon ti pammati iti ad-adda pay ngem dagiti pagilasinan ken milagro.

• Maysa a wagas a pangilawlawag kadagitoy a bersikulo ket mangbingay iti klase iti dua a grupo ket awisem ti tunggal grupo a mangbasa iti Helaman 9:1–20 ket ipapanda iti bagbagida nga isuda dagiti lima a lallaki wenno panguluen nga ukom. Ania koma ti mabalin a narikna dagitoy a tao? Ania koma ti mabalin a nangimpluensia iti tunggal grupo iti aggidiat a panangresponde iti isu met a namilagruan a padto? Kasano a masiguradotayo a dagiti milagro ti mangbukel kadagiti pammaneknektayo ngem saanda nga agbalin a pundasion laeng para kadagitoy? Kasano a maikeddengtayo no pudno met laeng dagiti balikas ti propeta iti aldawtayo?

Helaman 10:1–12

Mangted ti Apo iti bileg kadagiti agkalikagum a manggun-od iti pagayatanna ken agtungpal kadagiti bilinna.

• Ti pakaammuan ti Apo a mangbembendision ken ni Nephi iti Helaman 10 ket makaparegta kadagiti miembro ti klasem nga agbalin a napaspasnek iti panagkalikagum a manggun-od ken panangaramid iti pagayatan ti Apo. Mabalin a basaen dagiti miembro ti klase dagiti bersikulo 1–12, a mangsapsapul iti no ania ti inaramid ni Nephi tapno magun-od ti panagtalek ti Apo ken no kasano a binendisionan isuna ti Apo. Kalpasanna mabalinda nga ibinglay dagiti dadduma pay a pagarigan dagiti tao a nagkalikagum a manggun-od ken mangaramid iti pagayatan ti Apo “iti di pannakabannog” (Helaman 10:4), manipud kadagiti nasantuan a kasuratan wenno iti bukodda a biag. Kasano a binendisionan ti Apo dagitoy a tao iti bileg a “mangkusukos” (Helaman 10:9) kadagiti bantay iti biagda? Mangted kadagiti miembro ti klase iti gundaway nga agutob kadagiti wagas a nasaysayaat a makapagkalikagumda a manggun-od iti pagayatan ti Apo ken agtungpal kadagiti bilinna.

Helaman 12

Kayat ti Apo a manglagiptayo Kenkuana.

• Adu a miembro ti klasem ti nakitulag a kanayon a manglagip ken ni Jesucristo. Nalabit a maibinglayda iti tunggal maysa ti sumagmamano a banag a mangtulong kadakuada a “kanayon a laglagipen isuna” (Moroni 4:3; DkK 20:77), iti agpada a panawen ti panagrang-ay ken panawen ti panagrigat. Kalpasanna mabalin a sukisoken dagiti miembro ti klase ti Helaman 12 para kadagiti rason no apay nga ayo dagiti tao ti manglipat iti Apo. Kasano a maparmektayo dagiti ayo a nailadawan iti daytoy a kapitulo? Kasano a nakatulong kadatayo ti rigat a manglagip iti Dios? (kitaen iti Helaman 11:4–7).

• Tapno maipakita ti panagkagumaan a kasapulan tapno manglagip iti maysa a banag, mabalinmo ti mangted kadagiti miembro ti klase iti sumagmamano a minuto a mangbasa ken mangadal iti Helaman 12. Kalpasanna mabalinmo ti agdamag kadagiti saludsod kadakuada maipapan iti kapitulo tapno makita no ania ti malagipda. Nalabit a mabalinda nga ibinglay no ania ti aramidenda a manglagip iti impormasion para iti maysa a pannubok. Kasano a maipada daytoy iti panagkagumaan a kasapulan a “manglagip iti Apo”? (Helaman 12:5). Kasano a maiduma daytoy? Awisem ti klase a mangsapul iti maysa a bersikulo wenno ragup ti balikas manipud iti Helaman 12 a mabalinda nga ipaskil iti pagtaenganda wenno mayulo tapno mangipalagip kadakuada a manglagipen iti kinaimbag ken bileg ti Dios.

icon iti panagsursuro

Yallukoy ti Panagsursuro iti Pagtaengan

Tapno mayallukoy dagiti miembro ti klase a mangbasa iti Helaman 13–16, mabalinmo nga ilawlawag a dagiti padto ni Samuel a Lamanite maipapan kadagiti pasamak a mainaig iti pannakayanak ken Pannakailansa iti krus ti Mangisalakan ket mabalin a maidasig kadagiti pasamak iti panawentayo nga umunanto sakbay ti Maikadua a Yaay ti Mangisalakan.

resources icon

Dagiti Nainayon a Resources

Dumngeg iti pannarabay dagiti propeta.

Imbinglay ni Elder Neil L. Andersen ti sumaganad a padas:

“Dagiti mangpili nga agserbi iti Apo ket kanayonto a dumngeg a sipapasnek ken sipapangruna iti Propeta. …

“… Bay-andak a mangilawlawag iti maysa a padas. Nagnaed ti pamiliami iti adu a tawen iti estado ti Florida. Gapu ta addaan ti Florida iti nangato a konsentrasion ti darat, namulaan dagiti karuotan iti dadakkel ti bulongna a ruot nga awaganmi iti Saint Augustine. Ti dakkel a peggad ti karuotan ti Florida ket maysa a bassit, kayumanggi nga insekto a maawagan ti kuriat [mole cricket].

“Maysa a sardam bayat ti panagtakdermi iti kaarrubak iti akinsango nga agdan, nadlawna ti maysa a bassit a surot a limmabas iti pagnaak. ‘Nasaysayaat no agispreyka iti karuotam,’ imbalaagna. ‘Nagturong idiay ti maysa a bassit a kuriat.’ Inispreyak idin ti karuotan iti insecticide iti saan pay a nabayag kalpasan dagiti lawas, ket marigatanak a maaddaan iti gundaway wenno kuarta tapno aramidek manen daytoy iti nasapa unay.

“Iti kabigatanna, inamirisko a naimbag ti karuotak. Nalasbang daytoy ken napintas ti marisna a berde. Simmiripak kadagiti ruot tapno penken no makakitaak iti ania man a babassit a surot. Awan ti nakitak. Malagipko a pampanunotek, ‘Bueno, mabalin a lumablabas laeng dayta bassit a kuriat iti arubayanko nga agturong iti arubayan ti kaarrubak.’ …

“Nupay kasta, naliday ti naggibusan ti estoria. Rimmuarak iti akinsango a ridaw iti maysa a bigat, agarup 10 nga aldaw kalpasan ti panagsarsaritami iti kaarrubak. Makapakigtot, a kasla napasamak laeng daytoy iti agpatnag, linukoban dagiti kayumanggi a labang ti karuotak. Nagdardarasak a napan iti tiendaan ti minuyongan, ket gimmatangak iti insecticide, ket nagispreyak a dagus, ngem naladawen. Nadadael ti karuotak, ket tapno maisubli ti sigud a kasasaadna masapul a mamulaan iti baro a mula, napaut nga oras a panagbannog, ken dakkel a gastos.

“Napateg ti pammalaag ti kaarrubak iti pagsayaatan ti karuotak. Nakitana dagiti banag a diak nakita. Ammona ti maysa a banag a diak ammo. Ammona nga agbibiag dagiti kuriat iti uneg ti daga ket aktiboda laeng iti rabii, a saan nga epektibo dagiti panangamirisko iti aldaw. Ammona a saan a mangan dagiti kuriat iti bulong ti ruot ngem agpannurayda iti pannakataraonda kadagiti ramut. Ammona a dagitoy babassit a sangapulgada a parsua ket mangan iti adu a ramut sakbay a makitak ti epektona iti rabaw ti daga. Napasarak ti nakaro a nagbanagan iti panagpannurayko iti bukodko a pannakaammo. …

“… Adda dagiti naespirituan a kuriat nga agnanaed iti uneg dagiti mangsalsaluad a padertayo ket agsaknapna kadagiti nakain-inaka a ramuttayo. Adu kadagitoy nga insekto ti kinadangkes ti agparang a kasla babassit, no dadduma dumani saanda a makita. …

“Surotentayo koma ti pagtuladan nga impakitak iti pannakaipasangok kadagiti kuriatko iti Florida. Ditayo kaano man supringen dagiti ballag. Ditayo kaano man agpannuray iti bukodtayo a pannakaammo. Kanayon koma nga agbalintayo a managdengngeg ken managsursuro iti kinapakumbaba ken pammati, aggagar nga agbabawi no kasapulan daytoy” (“Prophets and Spiritual Mole Crickets,” Ensign, Nob. 1999, 16–18).

Panangpadur-as iti Panangisurotayo

Ipeksam ti ayat. “Depende kadagiti kasasaadmo, ti panangipakita iti ayat kadagiti sursuruam ket mabalin a kaipapanan ti panangted kadakuada kadagiti naimpusuan a panangdayaw, panagbalin nga interesado iti biagda, panangdengngeg a nasayaat kadakuada, panangiraman kadakuada iti adalen, panagserbi kadakuada, wenno sidudungngo a panangkablaaw kadakuada no makitam ida” (Panangisuro iti Wagas ti Mangisalakan, 6).