maipugpugso a dalluyon kadagiti bato

Agosto 17–23

Helaman 1–6

“Ti Bato ti Mannubbottayo”

Pudno kadi nga am-ammom ti klasem? Padasem a kaam-ammom a nasaysayaat ti maysa a miembro ti klase iti tunggal lawas. No aramidem, nasaysayaat a mapanunotmo dagiti kasapulanda kabayatan ti panagsaganam a mangisuro.

Isuratmo Dagiti Impresionmo

icon iti panagbibinninglay

Yawis ti Panagbibinninglay

Ibilang ti panangawis kadagiti miembro ti klase nga umay iti klase a nakasagana a mangibinglay iti maysa a banag a mabalinda nga usaren a mangisuro iti maysa a prinsipio a nasursuroda kadagitoy a kapitulo. Ania dagiti dadduma pay a wagas a pakaisuruantayo kadagitoy a prinsipio kadagiti dadduma?

icon iti panangisuro

Isuro ti Doktrina

Helaman 1–6

Ti kinapalangguad ti mangisina kadatayo manipud iti Espiritu ken pigsa ti Apo.

• Ti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia iladawanna ti “siklo ti kinapalangguad” a nangdadael kadagiti Nephite. Nalabit a mabalin ti maysa a tao iti klase nga idayagram daytoy a siklo iti pisarra. Kalpasanna mabalin dagiti miembro ti klase ti mangsapul kadagiti bersikulo iti Helaman 1–6 a mariknada a mangiladawan kadagiti nadumaduma a paset ti siklo ket isurat dagitoy iti abay dagiti mainaig a paset iti dayagram. (No kasapulan dagiti miembro ti klase ti tulong, mabalinmo nga isingasing a sapulenda iti Helaman 3:24–36; 4:11–26.) Kasano a maipadatayo no dadduma kadagiti Nephite? Kasano a maliklikantayo ti ayoda iti panagbalin a napalangguad? Mabalimo met nga ibinglay dagiti paset ti “Chapter 18: Beware of Pride” (Teachings of Presidents of the Church: Ezra Taft Benson [2014], 229–40).

  ti siklo ti kinapalangguad

  Ti “siklo ti kinapalangguad.”

• Mabalinmo nga awisen dagiti miembro ti klase a mangbasa iti Helaman 4:13 ken 24–26 ket sapulem ti himno a mang isuro iti panagpannuraytayo iti Dios, kas iti “I Need Thee Every Hour” (Hymns, no. 98). Apay nga isinanatayo ti kinapalangguad manipud iti Dios? Kasano a mabigbigtayo ti panagpannuraytayo iti Dios? Mabalin nga ibinglay dagiti miembro ti klase no kasano a pinapigsada ida ti Espiritu ken bileg ti Apo gapu ta napakumbabada.

• Dagiti miembro ti Simbaan a nailadawan iti Helaman 3:33–34 ket mangparparigat kadagiti padada a miembro ti Simbaan. Gapu iti kinapalangguadda, inlupitlupitda dagiti marigrigat ken nagaramidda iti amin a kita ti dadduma pay a basbasol (kitaen iti Helaman 4:11–13). Ibilang ti aggigiddan a panangbasa iti Helaman 3:33–34 ken 4:11–13 ken panangkiddaw kadagiti miembro ti klase a paglilinnawaganda dagiti wagas a pakaipakitaantayo iti dakdakkel a kinasayaat ken respeto kadagiti dadduma, agraman kadagiti padatayo a miembro iti Simbaan a mabalin a maisabsabali kadatayo. Mabalinmo pay nga awisen dagiti miembro ti klase a mangpanunot iti maysa a tao nga am-ammoda a mabalin nga agsagsagaba gapu kadagiti natangsit a tignay dagiti dadduma ket utobenda no kasano a makatulongda a mangpapigsa ken mangparegta iti dayta a tao.

Helaman 3:33–35

Umay ti pannakapasanto manipud iti panangiturongtayo iti puspusotayo iti Dios.

• Helaman 3:33–35 mabalin a makaliwliwa unay kadagiti adda iti klasem a mangpadpadas kadagiti “pammarparigat … [wenno] adu a rigat” (bersikulo 34). Nalabit a mabalinmo nga awisen dagiti miembro ti klase a mangsukisok kadagitoy a bersikulo a mangsapul iti balakad a mabalinda nga ited iti maysa a tao a maparparigat. Wenno mabalin nga ibinglay dagiti miembro ti klase no kasano a nasarakanda ti “rag-o ken linglingay” iti panawen ti rigat babaen ti panangaramid kadagiti banag a nailadawan iti bersikulo 35.

• Ibilang ti panangawis iti klase a mangadal iti Helaman 3:33–35 ken dagiti palawag ken reperensia maipapan iti panagbalin a napasanto iti “Dagiti Nainayon a Resources.” Ania ti isuro dagitoy a bersikulo ken palawag maipapan iti pannakapasanto? Kasano a mangisangbay ti panangayuno ken panangkararag kadagiti bendision a nailadawan iti Helaman 3:35? Kasano nga iturongtayo dagiti puspusotayo iti Dios? (kitaen iti Helaman 3:35). Kasano a matulongannatayo daytoy nga agbalin a mapasanto? Mabalinmo pay ti mangisagana ken mangibunong kadagiti akikid a papel nga addaan iti maysa kadagiti palawag wenno reperensia manipud iti “Dagiti Nainayon a Resources” a nakaprenta kadagitoy ket awisem dagiti miembro ti klase mangpidut iti maysa a dina pilpilien tapno adalenda. Kalpasanna mabalinda nga ibinglay iti tunggal maysa no ania ti nasursuroda maipapan iti pannakapasanto.

Helaman 5:12

No aramidentayo ni Jesucristo a pamuontayo, saantayo a matuang.

• Ibaon ni Satanas dagiti “nabileg nga anginna” iti unos ti panagbiagtayo. Napadasanen ti adu a tattao iti klasem daytoy, ken ad-adu pay a bagyo ti manamnama a dumteng iti masakbayan. Ania ti maaramidmo a makatulong kadagiti miembro ti klasem nga agsagana para kadagitoy a bagyo babaen ti panangbangonda iti biagda ken ni Jesucristo?

  Mabalinmo a rugian ti panaglilinnawag babaen ti panangipakita kadagiti ladawan dagiti templo wenno dadduma pay a pasdek ken panangidilig iti biagtayo iti maysa a pasdek. Ania dagiti pili a nasken nga aramiden ti agbangbangon? Ania dagiti pili nga aramidentayo a mangapekto no kasano a mabangon ti biagtayo? Kalpasanna mabalin nga aggigiddan a basaenyo ti Helaman 5:12 ket paglilinnawagan no ania ti kayat a sawen ti bangonentayo ti biagtayo ken ni Jesucristo. Kasano a ti kaadda Isuna kas pamuontayo ket mangimpluensia iti dadduma pay a pili nga aramidentayo no bangonentayo ti biagtayo?

  Mabalin nga ibinglay dagiti miembro ti klase no kasano a ti kaadda ti Mangisalakan kas pamuonda ket nakatulong kadakuada a nangsarked kadagiti bagyo ti biag. Ikkam dagiti miembro ti klase iti gundaway a mangutob iti kita ti biag a bangbangonenda ken no kasano a masiguradoda a sititibker a nabangonda ken ni Cristo. Ti estoria maipapan iti Templo ti Salt Lake iti “Dagiti Nainayon a Resources” ket makatulong iti panangilawlawagmo.

Helaman 5:14–50

Ti pammatitayo ket mapapigsa babaen “ti kinaindaklan dagiti pakakitaan nga inawat[tayo].”

• Maysa kadagiti bendision ti panaguummong iti Sunday School ket ti gundaway a panangpapigsa iti pammati ti tunggal maysa—kas met laeng iti inaramid dagiti Lamanite iti Helaman 5:50. Nalabit a mabalin a basaenyo ti Helaman 5:50 nga aggigiddan ket idawat iti klase a mangilasin kadagiti “banag a nangngegan ken nakita [dagiti Lamanite]” kadagiti bersikulo 20–49. Kalpasanna mabalin nga ibinglay dagiti miembro ti klase iti tunggal maysa ti sumagmamano kadagiti naespirituan a padas a nangallukoy kadakuada a pudno ti ebanghelio—uray no saanda pay a nakita dagiti anghel wenno dagiti adigi ti apuy. Ania ti mangal-allukoy a pakakitaan a nakitadan iti naisubli nga ebanghelio ni Jesucristo?

icon iti panagsursuro

Yallukoy ti Panagsursuro iti Pagtaengan

Helaman 7–12 iladawanna no kasano a nagun-od ni Nephi ti panagtalek ti Apo ken naikkan iti naindaklan a bileg. Mabalinmo nga isingasing iti klasem a babaen ti panangbasa kadagitoy a kapitulo, masursuroda no kasano nga awaten ti dakdakkel a panagtalek ti Dios iti biagda.

resources icon

Dagiti Nainayon a Resources

Ti panagbalin a napasanto babaen ken ni Jesucristo.

• Ti pannakapasanto ket “ti wagas ti pannakawayawaya iti basol, natarnaw, nadalus, ken nasantuan babaen ti Pannubbot ni Jesucristo” (Pangiwanwan iti Nasantuan a Kasuratan, “Pannakapasanto,” scriptures.ChurchofJesusChrist.org).

• “Apaman a pudno a nakapagbabawitayon, ikkatenton ni Cristo ti dagsen dagiti basbasoltayo. Maammunatayo para iti bagbagitayo a napakawan ken nadalusantayon. Paneknekanto daytoy kadatayo ti Espiritu Santo; Isu ti Mangpaspasanto. Awan ti sabali pay a pammaneknek ti pannakapakawan ti mabalin a nain-indaklan pay” (Dieter F. Uchtdorf, “Point of Safe Return,” Ensign wenno Liahona, Mayo 2007, 101).

• “Ti pannakapasanto babaen ti dara ni Cristo ket panagbalin a nadalus, natarnaw, ken nasantuan. No ikkaten ti pannakapalinteg ti pannusa para iti napalabas a basol, ikkaten ti pannakapasanto ti mulit wenno dagiti epekto ti basol” (D. Todd Christofferson, “Justification and Sanctification,” Ensign, Hunio 2001, 22).

• “No ti pagayatan, pagesman, ken panagrikna ti maysa a tao ket naan-anay a natulnog iti Dios ken dagiti naidawat a kasapulanna, napasanto dayta a tao” (Brigham Young, “Discourse,” Deseret News, Sept. 7, 1854, 1).

• Napasantotayo babaen ti bileg ti Espiritu Santo gapu iti Pannubbot ni Jesucristo (kitaen iti Hebreo 13:12; Alma 13:10–12; 3 Nephi 27:19–20; Moroni 10:32–33; DK 76:40–42).

• Uray no kalpasan ti pannakapasantotayo, mabalin pay laeng a matnagtayo manipud iti nadiosan a parabur (kitaen iti DK 20:30–34).

Maysa a sigurado a pundasion.

Kabayatan ti pannakaipatakder ti Templo ti Salt Lake, nakita dagiti dadakkel a rekka kadagiti pundasion a bato. Nupay dumanin siam a tawen ti nabubos iti panagpatakder, imbilin ni Presidente Brigham Young a maikkat dagiti pundasion a bato ket masukatan kadagiti bato a nasaysayaat ti kalidadna. Nabubos ti sabali pay a lima a tawen ti panangikkat kadagiti dadael a pundasion a bato ket binangon manen agingga iti umuna a kadsaaran. “Kayatko a makita a nabangon dayta a templo,” kinuna ni Presidente Young, “iti wagas a makapagpautto daytoy agingga iti millenium” (“Remarks,” Deseret News, Okt. 14, 1863, 97).

Panangpadur-as iti Panangisurotayo

Paneknekam ti maipapan ken ni Jesucristo. Mabalin a saan a narikna ni Aminadab a kangrunaan a kualipikado a tao a mangisuro kadagiti Lamanite nga agbabawi ken maaddaan iti pammati ken ni Cristo (kitaen iti Helaman 5:35–41). Ngem imbinglayna no ania ti ammona, ken adda dakkel nga impluensia ti pammaneknekna. Ania dagiti masursurom manipud iti daytoy a pagarigan?