Ni Moroni ken ti Wagayway ti Wayawaya

Para kadagiti Bendision ti Wayawaya, ni Scott M. Snow

Agosto 3–9

Alma 43–52

“Makapagbayag iti Pammati ken ni Cristo”

Kas nayon iti panangrebyu kadagiti aktibidad a naisingasing ditoy, dumawat iti inspirasion bayat ti nainkararagan a panagadalmo iti Alma 43–52 ket panunotem maipapan no kasano a matulongam dagiti miembro ti klase a mangtakuat iti doktrina a maisursuro.

Isuratmo Dagiti Impresionmo

icon iti panagbibinninglay

Yawis ti Panagbibinninglay

Tapno maawis dagiti miembro ti klase a mangibinglay no ania ti masursuroda manipud iti Alma 43–52, mabalinmo a saludsoden kadakuada no kasano ti isusungbatda iti maysa a tao nga agkuna, “Diak laeng makita no kasano nga adda pakainaigan iti biagko dagiti gubat a nailadawan iti Libro ni Mormon.”

icon iti panangisuro

Isuro ti Doktrina

Alma 43–52

Dagiti gubat iti Libro ni Mormon ti mangisuro kadatayo maipapan kadagiti gubat a maibusor iti dakes.

• Iti bukod ken sangapamiliaan a panagadalda iti daytoy a lawas, mabalin a nautob wenno naisurat dagiti miembro ti klase dagiti kapanunotanda maipapan no kasano a sibaballigi dagiti Nephite a nangsaluad iti bagbagida a maibusor kadagiti Lamanite ken no kasano a dinarup dagiti Lamanite dagiti Nephite. No inaramid dagiti miembro ti klase daytoy iti pagtaengan, awisen ida a mangibinglay no ania ti nasarakanda. Wenno mabalinmo nga ikkan dagiti miembro ti klase iti oras a mangsapul kadagitoy a nalawag a pannakaammo ken pannakaawat [insights] kabayatan ti klase nga us-usaren dagiti nasantuan a kasuratan kas kadagiti masarakan iti balabala iti daytoy a lawas iti Umaykayo, Sumurot Kaniak—Para Kadagiti Indibidual ken Pamilia. Bayat ti panangibinglay dagiti miembro ti klase no ania ti nasarakanda, allukoyem ida a mangilawlawag no kasano a masurottayo ti pagwadan dagiti Nephite iti panangsaluad iti bagbagida a maibusor iti dakes ken no kasano a mailasintayo dagiti naespirituan a panagdarup ni Satanas kadatayo.

Alma 46:11–22

No naturedtayo iti panangsaluad iti pammatitayo, maparegtatayo dagiti dadduma nga agbalin a napudno.

• Kasano a matulonganyo dagiti miembro ti klase a mangsurot iti pagwadan ni Moroni iti situtured a panangsaluadna iti pammatida iti naisubli nga ebanghelio ni Jesucristo? Mabalin a basaen dagiti miembro ti klase ti Alma 46:11–22 ket ilasinda no ania ti inaramid ni Moroni ken no ania ti insurona a nangparegta kadagiti taona nga agbalin a napudpudno. Mabalinmo nga isurat dagitoy a banag iti pisarra iti baba ti paulo a Pagwadan ni Moroni. Kalpasanna mabalinmo nga idawat kadagiti miembro ti klase a mangutob kadagiti tignay ni Moroni ket mangisingasing no ania ti maaramidtayo ita a mangsaluad kadagiti pammatitayo. Mabalinmo nga isurat dagiti nalawag a pannakaammo ken pannakaawatda iti baba ti paulo Situtured a Panangsaluad iti Ebangehlio Ita. Ania dagiti kinapudno ken ik-ikkan pateg nga insuro ti propetatayo kadatayo itay nabiit a nasken nga isuro ken saluadantayo?

• Kasano a matulonganyo dagiti miembro ti klase a mangyaplikar no ania ti inaramid ni Moroni iti wagayway ti wayawaya iti bukodda a biag? Awisem ida a mangbasa iti Alma 46:11–22 ket ilasinda dagiti kinapudno nga insursuro ken indawdawat ni Moroni kadagiti taona a mangsuporta. Ania dagiti kinapudno ken ik-ikkan pateg nga inyunay-unay dagiti dadaulotayo iti Simbaan iti aldawtayo? (Mabalinmo nga irebyu ti sumagmamano kadagitoy iti Para iti Pigsa dagiti Agtutubo, “Ti Kaamaan: Maysa a Waragawag iti Lubong,” wenno dagiti kallabes a mensahe iti sapasap a komperensia.) Ania dagiti karit nga adda kadatayo iti panangsaluad kadagiti pammatitayo iti lubong ita? Ania dagiti masursurotayo manipud iti pagwadan ni Moroni? Ikkam dagiti miembro ti klase iti gundaway a mangparnuay iti bukodda a wagayway iti wayawaya a makaipalagip kadakuada a situtured nga agbiag ken mangsaluad kadagiti pammatida.

  Dagiti Nephite a mangsarsaranget kadagiti Lamanite

  Minerva K. Teichert (1888–1976), Saluad ti Siudad ti Nephite, 1935, oil iti masonite, 36 x 48 a pulgada. Brigham Young University Museum of Art

Alma 47

Sulisogen ken allilawennatayo nga in-inut ni Satanas.

• Mabalin a pagimbagan ti klasem manipud iti panagadalda iti Alma 47, a mangipakita no kasano a mayasping ti panagallilaw ni Amalickiah iti ar-aramiden ni Satanas a pangallilaw kadatayo. Mabalinmo nga irugi babaen ti panangidawat iti maysa a tao a manggupgop iti pakaammuan a masarakan iti Alma 47. Tapno mainayon ti panagessem, mabalinmo nga awisen ti dua a miembro ti klase a mangipapan nga isuda da Amalickiah ken Lehonti ket isaritam ti estoria. Ania ti inaramid ni Amalickiah a mangipalagip kadatayo kadagiti banag nga ar-aramiden ni Satanas a mangsulisog ken mangallilaw kadatayo? Allukoyem dagiti miembro ti klase a mangibasar kadagiti naipangpangruna a bersikulo bayat ti panangilawlawagda iti daytoy a saludsod. Ti adaw iti “Dagiti Nainayon a Resources” ket naglaon iti sabali pay a nasayaat a pagarigan no kasano nga allilawennatayo ni Satanas. Ania a balakad ti maitedtayo iti tunggal maysa a makatulong kadatayo nga agbalin a mannakaammo no kasano a sulisogennatayo ni Satanas ita? Ania ti maaramidtayo a mangsalaknib iti bagbagitayo?

Alma 48:7–17

No agkagumaantayo nga agbalin a kas ken ni Moroni, agbalintayonto nga ad-adda pay a kas iti Mangisalakan.

• Maysa a panaglilinnawag maipapan kadagiti kababalin ni Moroni ket mabalin a mangparegta kadagiti miembro ti klase nga agkagumaan a mangsurot iti pagwadanna. Mabalinmo a rugian babaen ti panangipakita iti ladawan ni Moroni, kas iti maysa iti balabala iti daytoy a lawas iti Umaykayo, Sumuror Kaniak—Para kadagiti Indibidual ken Pamilia. Kalpasanna awisem dagiti miembro ti klase a mangadal iti Alma 44:3–4 ken 48:7–13 ken isurat iti pisarra dagiti balikas ken ragup ti balikas [phrases] a mangiladawan ken ni Moroni. Kalpasanna mabalinyo a basaen nga aggigiddan ti Alma 48:17 ket ilawlawag no kasano a dagiti kababalin ni Moroni, kas kadagiti nakalista iti pisarra, ket nangpalugod kenkuana a mangparmek iti impluensia ni Satanas ket agbalin a kas ken ni Jesucristo. Kasano a makapagbalintayo nga ad-adda a kas ken ni Moroni?

Alma 48:7–9; 49:1–9; 50:1–6

Mapatibkertayo ti bagbagitayo ken dagiti pamiliatayo a maisupiat iti kabusor.

• Mabalin a pagimbagan dagiti miembro ti klasem manipud iti idedengngegda iti tunggal maysa nga agsarita maipapan iti no kasano a masaluadanda ti bagbagida ken dagiti pamiliada maibusor kadagiti pangallilaw ken pannulisog ni Satanas. Tapno maparegta ti kasta a panaglilinnawag, mabalin nga aggigiddan a basaenyo ti Alma 48:7–9; 49:1–9; ken 50:1–6. No panunotentayo maipapan iti panagkasapulantayo kadagiti naespirituan a saluad a maibusor iti basol, ania ti masursurotayo manipud kadagiti panagkagumaan dagiti Nephite a mangsaluad iti bagbagida? Kasano a mabangontayo dagiti naespirituan a saluad a mangsalaknib iti bagbagitayo ken dagiti pamiliatayo a maibusor iti basol ken dagiti dakes nga impluensia? Allukoyem dagiti miembro ti klase a mangibinglay kadagiti kapanunotan a naaramat para kadakuada. Apay a nasken a “saan nga agsardeng nga agaramid kadagiti panagsagana”? (Alma 50:1).

icon iti panagsursuro

Yallukoy ti Panagsursuro iti Pagtaengan

Maysa a wagas tapno maallukoy dagiti miembro ti klase a mangbasa iti Alma 53–63 ket mabalin a mangibaga kadakuada a dagiti pakaammuan kadagitoy a kapitulo ket mabalin a mangparegta kadakuada ken dagiti pamiliada nga agbalin a natultulnog ken mangpadur-as iti napigpigsa a pammati.

resources icon

Dagiti Mainayon a Resources

Dagiti ibunga ti panagtulnog kadagiti babassit a pannulisog.

Tapno maisuro a “sumrek ti nadagsen a basol iti biagtayo no agtulnogtayo nga umuna kadagiti babassit a pannulisog,” imbinglay ni Presidente Spencer W. Kimball daytoy a pabula:

“[Maysa] a kamelio ken ti akinkukua kenkuana … ti dumaldaliasat iti bangir ti kadaratan a disierto idi dumteng ti bagyo ti angin. Dagus nga impatakder ti biahero ti toldana ket simrek ditoy, a sinerraanna tapno masalakniban ti bagina manipud iti makadadael a kadaratan nga isangbay ti narungsot a bagyyo. Siempre nabati iti ruar ti kamelio, ket idi pinuruakan ti nadawel nga angin iti darat iti bagina ken dagiti matana ken ti agongna naammuanna a dinan kabaelan ti agibtur ket iti kamaudianan nagpakaasi a sumrek iti tolda.

“‘Umanay laeng a pagyanan ti bagik,’ kinuna ti biahero.

“‘Ngem mabalin kadi nga iserrekko laeng daytoy agongko tapno makaangesak nga awan ti sumrek a darat?’ indawat ti kamelio.

“‘Bueno, nalabit a mabalinmo nga aramiden dayta,’ insungbat ti biahero, ket linuktanna ti tolda iti bassit usit ket naiserrek ti atiddog nga agong ti kamelio. Komportable itan ti kamelio! Ngem di nagbayag kimmapuy ti kamelio iti maisabsabuag a darat kadagiti mata ken lapayagna … :

“‘Kasla maikuskos iti ulok ti mayang-angin a darat. Mabalin kadi nga iserrekko laeng ti ulok?’

“Manen, inkeddeng ti biahero a ti panangpalugodna ket saan a mangperdi kenkuana, gapu ta malaon ti ulo ti kamelio ti giwang iti ngato ti tolda a dina mismo ur-usaren. Isu nga inserrek ti kamelio ti ulona ket naragsakan manen ti ayup—ngem iti apagkanito laeng.

“‘Uray ti laeng akinsango a bagik ti sumrek,’ impakaasina, ket naasian manen ti biahero ket iti di nabayag naiserrek iti tolda dagiti akinsango nga abaga ken luppo ti kamelio. Iti kamaudianan, babaen dagiti isu met laeng a wagas ti panagpakaasi ken panangtulnog, ti bagi ti kamelio, ken ti akinlikud a paset ti bagina ket naiserrek iti tolda. Ngem nailet unay daytoy para iti dua, ket kinugtaran ti kamelio ti biahero a naitapuak iti angin ken bagyo” (Teachings of Presidents of the Church: Spencer W. Kimball [2006], 106–7).

Panangpadur-as iti Panangisurotayo

Naparegta ti awagmo. “Ti pannakaawagmo a mangisuro ket aggapu iti Apo. … Malaksid iti daytoy, na-set apartka iti babaen ti panangiturong dagiti agig-iggem kadagiti tulbek ti priesthood; ngarud addaanka iti karbengan iti bukodmo a paltiing a kasapulam tapno agballigi. Kukuam dagitoy a bendision no kalikagumam a gun-oden dagitoy, agtalinaedka a napudno, ken ikarigatam ti agbalin a maikari” (Mangisalakan, 5).