“Agosto 3–9. Alma 43–52: ‘Makapagbayag iti Pammati ken ni Cristo,’” Umaykayo, Sumurot Kaniak—Para kadagiti Indibidual ken Pamilia: Libro ni Mormon 2020 (2020)
“Agosto 3–9. Alma 43–52,” Umaykayo, Sumurot Kaniak—Para kadagiti Indibidual ken Pamilia: 2020
Para kadagiti Bendision ti Wayawaya, ni Scott M. Snow
Agosto 3–9
Alma 43–52
“Makapagbayag iti Pammati ken ni Cristo”
Mabalin a dagiti pasamak a nailadawan iti Alma 43–52 ket kasla awan ti pakainaiganna kenka. Ngem kas iti amin a nasantuan a kasuratan, adda mensahe ti Apo kenka. Sikakararag a kalikaguman a gun-oden daytoy.
Isuratmo dagiti Impresionmo
No basaentayo dagitoy a balikas iti rugi ti Alma kapitulo 43—“Ket ita agsubliak iti pakaammuan iti gubgubat iti nagbaetan dagiti Nephite ken dagiti Lamanite”—gagangay a masdaaw no apay inraman ni Mormon dagitoy estoria ti gubat idinto a limitado ti espasiona kadagiti pinanid (kitaen iti Dagiti Balikas ni Mormon 1:5). Agpayso nga adu ti gubgubattayo kadagiti ud-udina nga aldaw, ngem adda pateg kadagiti balikasna a nalablabes pay kadagiti panangiladawanna iti istratehia ken trahedia ti gubat. Isagananatayo met dagiti balikasna para iti gubat a “nagpailistaantayo amin”(Hymns, no. 250), ti gubat a pakidangdangadangantayo iti inaldaw a maibusor kadagiti puersa ti dakes. Agpaypayso daytoy a gubat, ket ti nagbanaganna apektuanna dagiti agnanayon a biagtayo. Kas kadagiti Nephite, “naparegta[tayo] babaen ti nasaysayaat a gapu,” a daytoy ti “Diostayo, relihiontayo, ken wayawaya, ken talnatayo, [pamilia]tayo. Inawagan ni Moroni daytoy a “ti pagsayaatan dagiti Kristiano, ti isu met la ti pagsayaatan nga ilablabantayo iti agdama (Alma 43:45; 46:12, 16).
Dagiti Kapanunotan para iti Bukod a Panagadal iti Nasantuan a Kasuratan
Dagiti dangadang iti Libro ni Mormon ti mangisuro kaniak maipapan kadagiti dangadangko a maibusor iti dakes.
Ti panagbasa maipapan kadagiti gubat iti nagbaetan dagiti Nephite ken Lamanite ket mabalin a napatpateg kenka no kitaem dagiti pagpadaanda kadagiti bukodmo a naespirituan a dangadang. Bayat ti panangbasam iti Alma 43–52, ammuem no ania ti inaramid dagiti Nephite a namagballigi kadakuada (wenno saan a nagballigi). Kalpasanna utobem no kasano a mausarmo ti nasursurom a mangtulong kenka nga agballigi kadagiti naespirituan a dangadangmo. Bayat ti panangadalmo kadagiti bersikulo kas iti sumaganad, isuratmo dagiti kapanunotam maipapan no kasano a masurotmo ti pagwadan dagiti Nephite.
-
Alma 43:19. Nagsagana dagiti Nephite nga addaan iti kalasag. (Makapagkagumaanak a mangisagana iti bagik nga addaan iti naespirituan a kalasag
-
Alma 43:23–24. Kalikagumanda a gun-oden ti pannarabay ti propeta.
Ammuem pay no kasano a pinadas dagiti Lamanite ken bimmaliktad a Nephite a parmeken dagiti Nephite. Maballaagannaka dagitoy a bambanag maipapan iti no kasano a mabalin a darupennaka ti kabusor. Bayat ti panagadalmo, isuratmo no kasano a mabalinnaka a darupen ni Satanas kadagiti isu met la a wagas:
-
Alma 43:8. Kinalikaguman ni Zarahemnah a gumura dagiti tattaona tapno adda bilegna kadakuada. (No kagurak dagiti dadduma a tao, ikkak ni Satanas iti bilegna kaniak.)
-
Alma 43:29. Tinarigagayan dagiti Lamanite nga adipenen dagiti Nephite.
Panangsaluad iti Siudad a Nephite, ni Minerva K. Teichert
Bayat ti panagkagumaanko nga agbalin a napudno kas ken ni Moroni, agbalinakto nga ad-adda pay a kas iti Mangisalakan.
Tarigagayam kadi a makapagbalinka nga ad-adda a kas iti Mangisalakan ken mangpabassit iti bileg ti kabusor iti biagmo? Maysa a wagas ket ti sumurot iti ballaag iti Alma 48:17 tapno agbalin a “kas ken ni Moroni.” Ikasom dagiti kababalin ken tignay ni Moroni a nailadawan iti intero nga Alma 43–52 ngem nangnangruna iti 46:11–28 ken 48:7–17. Ania ti makaawis iti riknam maipapan iti daytoy “napigsa a tao”? Kasano a pakapsuten dagiti kababalin ken tignay a kas iti adda kenkuana ti bileg ti sairo iti biagmo? Utobem no ania ti mariknam a makaparegta nga aramiden a mangsurot iti pagwadan ni Moroni ket agbalin nga ad-adda a kas iti Mangisalakan.
Sulisogen ken allilawennatayo ni Satanas iti saggabassit.
Ammo ni Satanas a kaaduan kadatayo ti saan a natallugod nga agaramid kadagiti dadakkel a basol wenno mamati kadagiti dadakkel a kinaulbod. Ngarud, aramatenna dagiti nalinis a panagulbod ken pannulisog tapno iturongnatayo kadagiti kasla nalag-an a basol—agingga iti kaadu ti ipagarupna nga awatentayonto. Agtultuloy nga aramidenna daytoy agingga a nayaw-awantayo nga umadayo manipud iti kinatalged ti nalinteg a panagbiag.
Masarakam daytoy a pagtuladan iti pakaammuan ni Amalickiah a mangal-allilaw ken ni Lehonti, a masarakan iti Alma 47. Bayat ti panagadalmo, utobem no kasano a mabalin a padpadasen nga allilawennaka ni Satanas, kas inladawan ni Elder Robert D. Hales:
“Ginuyugoy ni mangliliput nga Amalickiah ni Lehonti a ‘bumaba’ ket sumango kenkuana iti tanap. Ngem idi bumaba ni Lehonti iti nangato a daga, nasabidongan ‘iti in-inut’ agingga a natay, ket natnag ti buyotna kadagiti ima ni Amalickiah (kitaen iti Alma 47). Babaen kadagiti sinnupiat ken pammabasol, sumagmamano a tattao ti mangallilaw kadatayo a bumaba iti nangato a daga. Ti nangato a daga isu ti ayan ti lawag. … Daytoy ti natalged a daga” (“Christian Courage: The Price of Discipleship,” Ensign wenno Liahona, Nob. 2008, 74).
Kitaen met iti 2 Nephi 26:22; 28:21–22.
Mangyeg ti panagkaykaysa iti kinatalged.
Dagiti kasasaad a naisurat iti rugi ti Alma 50, makita a kasla awan gundaway dagiti Lamanite a maibusor kadagiti Nephite. Ti kalasag dagiti trinsera, ken nagkaykaysa a panagkagumaan dagiti Nephite ti namagbalin kadakuada a kasla di masakup (kitaen iti Alma 49:28–30 ken 50:17–20). Ngem iti di nabayag, adu kadagiti siudadda ti inagaw dagiti Lamanite—pakairamanan dagitoy trinensaraan ni Moroni (kitaen iti Alma 51:26–27). Kasano a napasamak dayta? Sapulem dagiti sungbat bayat ti panagbasam kadagitoy a kapitulo (kitaen nangnangruna iti Alma 51:1–12). Utobem no ania dagiti ballaag a mabalin nga adda iti daytoy a pakaammuan para kenka ken ti pamiliam.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.
Alma 45:2–8
Ti aggigiddan a panangbasa kadagitoy a bersikulo ket mabalin a mangparegta iti pamiliam a mangangay kadagiti maysa ken maysa a panagsasarita iti ebanghelio kadagiti miembro ti pamiliam, kas iti inaramid ni Alma ken ni Helaman.
Alma 46:12–22
Pinaregta ti wagayway ti wayawaya dagiti Nephite nga agtungpal kadagiti bilin ti Dios ken mangdepensa iti pammatida. Ania ti mangparegta kadatayo a mangaramid iti kasta met laeng? Nalabit a makaaramid ti pamiliam ti bukodmo a wagayway ti wayawaya—maysa a bandera wenno bandirita nga addaan kadagiti balikas wenno imahe a mangipalagip kenka nga agtungpal kadagiti bilin ti Dios iti inaldaw.
Alma 48:7–9; 49:1–9; 50:1–6
Bayat ti panangbasa ti pamiliam maipapan iti trinsera dagiti Nephite, mabalinmo nga ilawlawag no kasano a trintrinseraam ti pagtaengam maisuppiat iti kabusor. Mabalin a magustuan dagiti ubbing ti mangipasdek iti pader nga usaren dagiti banag kas iti tugtugaw ken ul-ules, wenno mabalinda nga idrowing no ania ti mapanunotda a kasla maipada kadagiti trinsera ti Nephite.
Alma 51:1–12
Ania ti isuro dagitoy a bersikulo maipapan iti no ania ti mapasamak iti pamiliatayo no adda kadatayo ti panagsusupanget? Kasano a mapadur-astayo ti panagkaykaysatayo?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Bukod a Panagadal
Agdamag kadagiti saludsod bayat ti panagadalmo. Bayat ti panagadalmo kadagiti nasantuan a kasuratan, damagem iti bagim dagiti saludsod a makatulong kenka a mangutob no kasano ti kinasayaat ti panagbiagmo babaen ti basbasaem.
Wagayway ti Wayawaya, ni Larry Conrad Winborg.