“Agosto 10–16. Alma 53–63: ‘Nataginayon babaen ti Datdatlag a Bilegna,’” Umaykayo, Sumurot Kaniak—Para kadagiti Indibidual ken Pamilia: Libro ni Mormon 2020 (2020)

“Agosto 10–16. Alma 53–63,” Umaykayo, Sumurot Kaniak—Para kadagiti Indibidual ken Pamilia: 2020

Ladawan

dua ribu nga agtutubo a lallaki a mannakigubat

Dua Ribu nga Agtutubo a Mannakigubat, ni Arnold Friberg

Agosto 10–16

Alma 53–63

“Nataginayon babaen ti Datdatlag a Bilegna”

Dagiti pakaammuan iti Alma 53–63 ket makatulong kenka a mangkita kadagiti bunga ti panagbiag kadagiti kinapudno ti ebanghelio wenno panangsupring kadagitoy. Bayat ti panangbasam iti Alma 53–63, isuratmo dagiti parikna [promptings] ket utobem dagiti wagas a pakapagbiagam kadagiti kinapudno a masursurom.

Isuratmo dagiti Impresionmo

No maidasig kadagiti buyot ti Lamanite, ti “bassit a buyot” ni Helaman (Alma 56:33) a 2,000 nga agtutubo a Nephite ket awan koma ti gundawayda nga agballigi. Malaksid iti bassit a bilangda, dagiti soldado ni Helaman ket “nakaub-ubbingda amin,” ken “pulos a dida nakiranget” (Alma 56:46–47). Iti sabali a wagas, mabalin a kasla pamiliar ti situasionda kadatayo a no dadduma mariknatayo a basbassittayo ken maabaktayo iti pannakirangettayo iti ud-udina nga aldaw a maibusor ken ni Satanas ken dagiti puersa ti kinadakes ditoy lubong.

Ngem adda dagiti sumagmamano a pagsayaatan ti buyot ni Helaman kadagiti Lamanite nga awan pakainaiganna iti kaadu ti bilang dagiti soldado wenno paglaingan iti militar. Pinilida ni Helaman, maysa a propeta, a mangidaulo kadakuada (Alma 53:19); “insuro ida dagiti innada a no saanda nga agduadua, isalakan ida ti Dios” (Alma 56:47); ket addaanda iti “aglaplapusanan a pammati iti dayta a naisuro kadakuada.” Kas bungana, nasalaknibanda babaen iti “nakaskasdaaw a bileg ti Dios” (Alma 57:26). Nupay nasugatanda amin iti pannakigubat, “awan ti uray no maysa a kararua kadakuada a napukaw” (Alma 57:25). Isu a no naespirituan a mangsugat ti biag iti tunggal maysa kadatayo, makapagturedtayo—daytoy ti mensahe ti buyot ni Helaman “adda nalinteg a Dios, ket asino man a di agduadua, taginayonento ida ti datdatlag a bilegna” (Alma 57:26).

Ladawan

icon iti bukod a panagadal

Dagiti Kapanunotan para iti Bukod a Panagadal iti Nasantuan a Kasuratan

Alma 53:10–22; 56:43–48, 55–56; 57:20–27; 58:39–40

No aramatek ti pammatik iti Dios bendisionannakto iti datdatlag a bilegna.

Mabalin a narigat nga isalaysay dagiti namilagruan nga estoria a kas kadagiti balligi dagiti agtutubo a mannakigubat ni Helaman gapu ta kasla narigat a mapasamak. Ngem maysa a gapu ti kaadda dagiti kasta nga estoria kadagiti nasantuan a kasuratan ket tapno ipakita kadatayo a no adda pammatitayo, mabalin nga agaramid ti Dios kadagiti milagro iti biagtayo. Bayat ti panangbasam maipapan kadagiti agtutubo a lallaki a mannakigubat kadagiti sumaganad a bersikulo, sapulem dagiti pamugtuan [clue] maipapan iti no kasano nga inaramatda ti pammatida iti Dios, ania ti nangpapigsa iti pammatida, ken ania ti nangpapasamak kadagiti milagro: Alma 53:10–22; 56:43–48, 55–56; 57:20–27; ken 58:39–40). Isingasing ti sumaganad a tsart ti maysa a wagas a pakaisuratam iti no ania ti masarakam.

Dagiti kababalin dagiti mannakigubat ni Helaman:
Ania ti naisuro kadakuada:
Ania ti inaramidda:
Dagiti bendision a naawatda:

Kalpasan ti panangadalmo kadagitoy a bersikulo, ania ti mariknam a makaparegta nga aramidem a mangaramat iti pammatim?

Nadakamat ni Helaman ti akem dagiti inna iti pannakapatibker ti pammati dagiti agtutubo a lallaki a mannakigubat (kitaen iti Alma 56:47–48; 57:20–27). Ania dagiti papel nga ak-akmen dagiti miembro ti pamilia ken dagiti dadduma pay a mangpapigsa iti pammatim? Ania ti maaramidmo a mangpatibker iti pammati ti pamiliam ken dagiti gagayyemmo?

Alma 58:1–12, 31–37; 61

Mapilik a panunoten ti pagsayaatan dagiti dadduma ket saan a mapasakitan.

Addaan da Helaman ken Pahoran kadagiti nasayaat a gapu tapno mapasakitan. Saan nga umaw-awat ni Helaman iti umdas a suporta para kadagiti buyotna, ken sibibiddut a pinabasol ni Moroni ni Pahoran iti panangpengdanna iti dayta a suporta (kitaen iti Alma 58:4–9, 31–32; 60). Ania ti magustuam maipapan kadagiti reaksionda iti Alma 58:1–12, 31–37 ken Alma 61? Kasano a masurotyo dagiti pagwadanda iti kasta met la a situasion?

Insuro ni Elder David A. Bednar: “Iti sumagmamano a wagas ken iti sumagmamano nga oras, makaaramid wenno makaisaonto ti maysa a tao iti maysa a banag a maibilang a makapasakit. Awan duadua a maaramidto dayta a pasamak iti tunggal maysa kadatayo—ken awan duadua a mapasamakto dayta iti saan laeng a mammaminsan. … Ditayo mapengdan dagiti panggep wenno galad ti dadduma a tao. Nupay kasta, ikeddengtayo no kasano nga agtignaytayonto. Laglagipen a datayo dagiti pannakabagi a naikkan iti kinawaya nga agpili iti nasayaat [moral agency] ken mabalintayo a pilien ti saan a mapasakitan” (And Nothing Shall Offend Them,” Ensign wenno Liahona, Nob. 2006, 91).

Kitaen met iti Dagiti Proverbio 16:32; Moroni 7:45; David A. Bednar, “Meek and Lowly of Heart,” Ensign wenno Liahona, Mayo 2018, 30–33.

Ladawan

icon iti sangapamiliaan a panagadal

Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening

Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.

Alma 53:10–17

Nakitulag dagiti Anti-Nephi-Lehi a saandan nga agpaayus iti dara. Ania dagiti inaramidtayo a katulagan iti Dios? Ania ti mabasatayo iti Alma 53:10–17 a mangparegta kadatayo nga agbalin a napudpudno kadagiti katulagantayo?

Alma 53:20–21

Kasano a makapagbalintayo nga ad-adda a kas kadagiti agtutubo a lallaki ni Helaman? Makatulong a pagsasaritaan no ania ti kaipapanan ti sumagmamano kadagiti ragup ti balikas kadagitoy a bersikulo; kas pagarigan, ania ti kaipapanan ti “ingel … kasta met iti pigsa ken alibtak”? Ania ti kaipapanan ti “magna a sililinteg iti sango [ti Dios]”?

Alma 58:9–11, 33, 37

Iti oras ti dakkel a panagkasapulan, umasidegtayo kadi iti Nailangitan nga Ama, a kas iti inaramid dagiti soldado a Nephite? Kasano a sinungbatanna dagiti kararagda? Kasano a sinungbatanna dagiti kararagtayo?

Alma 61:2, 9, 19

Ania ti masursurotayo manipud ken ni Pahoran maipapan iti no kasano nga agresponde no mapabasoltayo?

Alma 62:39–41

Adtoy ti maysa a banag nga adalen [object lesson] a makatulong iti pamiliam a makaawat a mabalintayo a pilien ti agbalin a “mapatangken” wenno “mapalukneng” babaen kadagiti pannuboktayo: Mangikabil iti maysa a di pay naluto a patatas ken maysa a di pay naluto nga itlog iti maysa a banga ti agburburek a danum. Ti patatas ken ti itlog ti mangibagi kadatayo, ken ti danum ti mangibagi kadagiti pannubok a sangsanguentayo. Bayat ti pannakailuto ti patatas ken ti itlog, mabalinyo a pagsasaritaan ti maipapan kadagiti sumagmamano a pannubok a mapadpadasan ti pamiliayo. Ania dagiti sumagmamano a nadumaduma a wagas a pangsango kadagiti pannubok a kas dagitoy? Segun iti Alma 62:41, kasano nga apektuannatayo dagiti reaksiontayo kadagiti pannubok? Kalpasan a naluto a nasayaat ti patatas ken itlog, pisien ti patatas ken ukisan ti itlog tapno ipakita a maymaysa a “pannubok” ti nangpalukneng iti patatas ken nangpatangken iti itlog. Ania ti mabalin nga aramiden ti pamiliatayo tapno masigurado a pakumbabaennatayo dagiti pannuboktayo ken yas-asidegnatayo iti Dios?

Para iti ad-adu pay a kapanunotan para iti panagisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Panangpadur-as iti Panangisurotayo

Palugodam dagiti ubbing a mangipakita iti kinamanagpartuatda. No awisem dagiti ubbing[mo] nga agpartuat iti maysa a banag nga adda pakainaiganna iti maysa a pagbatayan ti ebanghelio, tulongam ida a makaawat a nasaysayaat ti pagbatayan, ket ikkam ida iti maigganan a palagip no ania ti nasursuroda. … Palubosam ida nga agipasdek, agdrowing, agkolor, agsurat, ken agpartuat” (Panangisuro iti Wagas ti Mangisalakan, 25).