“Agosto 24–30. Helaman 7–12: ‘Manglagip iti Apo,’” Umaykayo, Sumurot Kaniak—Para kadagiti Indibidual ken Pamilia: Libro ni Mormon 2020 (2020)

“Agosto 24–30. Helaman 7–12,” Umaykayo, Sumurot Kaniak—Para kadagiti Indibidual ken Pamilia: 2020

Ladawan

Ni Nephi nga agkarkararag iti torre iti minuyongan

Ladawan ni Nephi iti torre ti minuyongan ni Jerry Thompson

Agosto 24–30

Helaman 7–12

Manglagip iti Apo”

Addaan da Nephi, Lehi, ken dagiti dadduma pay iti “adu a paltiing iti inaldaw” (Helaman 11:23). Ti masansan a paltiing ket saan laeng a para kadagiti propeta—sidadaan pay a magun-odmo daytoy. Ti panangisuratmo kadagiti impresion ket makatulong kenka nga agtultuloy nga umawat iti paltiing.

Isuratmo dagiti Impresionmo

Ginuyugoy ti ama ni Nephi, a ni Helaman, dagiti annakna a “lagipen, lagipen”: tinarigagayanna a lagipenda dagiti kapuonanda, lagipenda dagiti sao dagiti propeta, ken kangrunaan iti amin lagipenda “ti Mannubbottayo, a ni Cristo” (kitaen iti Helaman 5:5–14). Nalawag a nalagip ni Nephi, gapu ta daytoy ti isu met la a mensahe nga impakdaarna kadagiti sumaruno a tawen “nga awanan pannakabannog” (Helaman 10:4) kadagiti tao. “Kasano a nalipatamon ti Diosmo?” (Helaman 7:20), sinaludsodna. Amin dagiti panagkagumaan ni Nephi—panangaskasaba, panagkarkararag, panagaramid kadagiti milagro, ken panagdawdawatna iti Dios para iti maysa a panagbisin—ket gandat a mangtulong kadagiti tao nga umasideg iti Dios ken manglagip Kenkuana. Iti adu a wagas, ti pananglipat iti Dios ket dakdakkel a problema ngem ti saan a panangammo Kenkuana, ket nalaklaka ti manglipat Kenkuana no mariribuk dagiti panunottayo “iti awan kaes-eskanna a banag iti daytoy a lubong” ken makullaapan iti basol (Helaman 7:21; kitaen met iti Helaman 12:2). Ngem, kas ipakita ti panagserbi ni Nephi, saan pay a pulos a naladaw ti manglagip ket agsublikayo … iti Apo a Diosyo” (Helaman 7:17).

Ladawan

icon iti bukod a panagadal

Dagiti Kapanunotan para iti Bukod a Panagadal iti Nasantuan a Kasuratan

Helaman 7–11

Ipalgak dagiti propeta ti pagayatan ti Dios.

Adu dagiti propeta a nailadawan iti intero a Libro ni Mormon, ngem ti Helaman 7–11 ket naipangpangruna a nasayaat a lugar a pagadalan no ania ti maysa a propeta, no ania ti aramidenna, ken no kasano nga awatentayo dagiti balikasna. Bayat ti panangbasam kadagitoy a kapitulo, ikasom dagiti tignay, pampanunoten, ken pannakipulapol ni Nephi iti Apo. Kasano a matulongannaka ti panagserbi ni Nephi tapno maawatan ti akem ti propeta iti aldawtayo? Adtoy ti sumagmamano a pagarigan. Ania pay dagiti masarakam?

Helaman 7:17–22:Ikasaba dagiti propeta ti panagbabawi ken iballaagda dagiti bunga ti basol.

Helaman 7:29; 9:21–36:Maammuan dagiti propeta babaen iti paltiing manipud iti Dios no ania ti kasapulan a denggen dagiti tao.

Helaman 10:7:Naikkan iti bileg dagiti propeta a mangilantip ditoy daga ken iti langit (kitaen met iti Mateo 16:19; DK 132:46).

Helaman 10:4–7, 11–12:

Kasano nga apektuan dagitoy a bersikulo no kasano ti riknam maipapan iti sibibiag a propetatayo? Ania ti insurona iti nabiit pay? Ania ti ar-aramidem tapno dumngeg ken sumurot iti panangiturongna?

Helaman 9–10

Makatulong dagiti tanda ken milagro ngem saan nga umdas a makaited iti naandur a pammati.

No umdasen dagiti tanda wenno milagro a mangbalbaliw iti puso ti maysa a tao, napasurot koma ti amin a Nephite babaen kadagiti nakaskasdaaw a tanda nga impakita ni Nephi iti Helaman 9. Imbes ketdi, “adda nariing a pannakabingay dagiti tao” (Helaman 10:1) gapu ta adu kadakuada “pinatangkenda pay la ti puspusoda” (Helaman 10:15). Kasano ti masansan a reaksion dagiti nadangkes kadagiti tanda ken milagro? (kitaen iti Helaman 10:12–15; kitaen met iti 3 Nephi 2:1–2). Ania ti peggad ti panagaramid kadagiti tanda a pamuon ti maysa a pammaneknek? (kitaen iti “Signs,” Gospel Topics, topics.ChurchofJesusChrist.org).

Helaman 10:2–4

Mangawis iti paltiing ti panagutob.

No nakariknaka idin iti pannakaikuspil, pannakadanag, wenno pannakatikaw, nalabit a masursurom ti maysa a napateg a leksion manipud iti pagwadan ni Nephi iti Helaman 10:2–4. Ania ti inaramidna idi nariknana ti “pannakauppapay”? (bersikulo 3).

Insuro ni Presidente Henry B. Eyring, “No agutobtayo, awisentayo ti paltiing babaen iti Espiritu. Ti panagutob, para kaniak, ket ti panagpampanunot ken panagkarkararag nga aramidek kalpasan ti naannad a panagbasak ken panagadalko kadagiti nasantuan a kasuratan” (“Serve with the Spirit,” Ensign wenno Liahona, Nob. 2010, 60). Kasano a maaddaanka iti galad a managutob? Tapno mabasa ti maipapan iti maysa a wagas a panangutob iti balikas wenno sao ti Dios, kitaen ti mensahe ni Brother Devin G. Durrant “My Heart Pondereth Them Continually” (Ensign wenno Liahona, Nob. 2015, 112–15).

Kitaen met iti Proverbio 4:26; Lucas 2:19; 1 Nephi 11:1; 2 Nephi 4:15–16; 3 Nephi 17:3; Moroni 10:3; DK 88:62.

Helaman 12

Tarigagayan ti Apo a manglagipak Kenkuana.

Iti Helaman 12, ni Mormon,a a mangyab-ababa iti kasuratan, gupgopenna ti sumagmamano kadagiti adalen a mabalintayo a sursuruen manipud iti pakaammuan ni Nephi kadagiti kallabes a kapitulo. Ibilang ti panangaramat ti pananggupgopna kas maysa a gundaway a mangamiris ti bukodmo a puso. Mabalinmo pay ti agaramid iti listaan dagiti banag nga isao ni Mormon a makaigapu kadagiti tao tapno makalipat iti Dios. Ania ti makatulong kenka a manglagip Kenkuana? Ania dagiti panagbalbaliw a makaparegta kenka nga agaramid maibatay iti no ania ti nasursurom?

Ladawan

icon iti sangapamiliaan a panagadal

Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening

Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.

Helaman 7–9

Ania dagiti pagpapadaan a makitatayo iti nagbaetan dagiti bambanag nga inaramid ni Nephi ken ti no ania ti aramiden dagiti propeta iti agdama? Ania ti isursuro ti propetatayo iti agdama? Nalabit a mabalinmo a piliem ti sumagmamano a kallabes a pammagbaga nga inted ti propeta ket paglilinnawagan kas pamilia dagiti wagas a nasaysayaat a pakasurotanyo iti daytoy.

Helaman 10:4–5, 11–12

Kasano nga inladawan ni Nephi a sinapulnati pagayatan ti Apo ngem iti bukodna? Kasano a masurottayo ti pagwadanna? Ania ti sumagmamano a wagas tapno nasaysayaat a a makasapul ti pamiliatayo iti pagayatan ti Apo?

Helaman 11:1–16

Ania ti tinarigagayan ni Nephi ken no ania ti inaramidna maipapan itoy? Ania ti masursurotayo maipapan iti kararag manipud iti pagwadan ni Nephi?

Helaman 11:17–23

Ania ti masursurom maipapan iti kabsat ni Nephi, ni Lehi, iti Helaman 11:17–23? Asino ti am-ammotayo nga agbibiag iti nalinteg a panagbiag a saan nga umaw-awat iti adu a pammigbig?

Helaman 12:1–6

Makapanunotka kadi iti maysa a banag nga adalen a mabalinmo nga aramaten a mangtulong iti pamiliam tapno maawatanda no ania ti kaipapanan ti “di pannakaidna”? Kas pagarigan, mabalinmo nga awisen ti maysa a miembro ti pamilia a mangpadas a mangbalanse iti maysa a banag it ulona. Kalpasanna mabalinmo nga awisen dagiti miembro ti pamilia a mangsapul iti Helaman 12:1–6 dagiti gapu ti di pannakaidna dagiti tao a mangsurot iti Apo. Kasano nga agtalinaedtayo a kumpet a naespirituan?

Para iti nayon a kapanunotan iti panangisuro kadagiti ubbing, kitaen iti balabala itoy a lawas iti Umaykayo, Sumurot Kaniak—Para iti Primary.

Panangpadur-as iti Panangisurotayo

Agrebyu. Adtoy ti maysa a kapanunotan a makatulong kadagiti miembro ti pamilia a manglagip kadagiti nasantuan a kasuratan nga ad-adalenda: Pumilika iti maysa a bersikulo a makitam a napnuan iti kaipapanan, ket i-display daytoy iti pagtaenganyo iti lugar a masansan a makitanto daytoy dagiti miembro ti pamilia. Awisem dagiti dadduma pay a miembro ti pamilia nga agsisinnublat a mangpili iti maysa a nasantuan a kasuratan nga i-display, ket paglilinnawagan daytoy no kasta nga aguummong ti pamilia, iti pannangan wenno panagkararag ti pamilia.