“Agosto 3–9. Alma 43–52: ‘Makapagbayag iti Pammati ken ni Cristo,’” Umaykayo, Sumurot Kaniak—Para iti Primary: Libro ni Mormon 2020 (2020)
“Agosto 3–9. Alma 43–52,” Umaykayo, Sumurot Kaniak—Para iti Primary: 2020
Para kadagiti Bendision ti Wayawaya, ni Scott M. Snow
Agosto 3–9
Alma 43–52
“Makapagbayag iti Pammati ken ni Cristo”
Bayat ti panagplanom kadagiti aktibidad, mabalin a masarakam dagiti kapanunotan kadagiti singasing para iti panangisuro iti agpada nga in-inaudi ken in-inauna nga ubbing.
Isuratmo Dagiti Impresionmo
Yawis ti Panagbibinninglay
Kiddawem kadagiti ubbing nga ibinglayda no ania ti malagipda maipapan iti sumagmamano a tattao ken estoria iti Alma 43–52, kas ken ni Kapitan Moroni wenno ti wagayway ti wayawaya. Tapno matulongam ida a manglagip, ipakitam dagiti ladawan manipud iti Dagiti Estoria iti Libro ni Mormon, ti Libro ti Arte ti Ebanghelio, wenno Umaykayo, Sumurot Kaniak—Para kadagiti Indibidual ken Pamilia.
Isuro ti Doktrina: In-inaudi nga Ubbing
Alma 43:17–21; 48:7–8; 49:1–5; 50:1–6
Masarakak ti naespirituan a pannakasalaknib iti ebanghelio.
Tapno masalakniban dagiti Nephite a maibusor kadagiti Lamanite, insagana ni Moroni dagiti taona nga addaan itikabal, ken dagiti sarikedked. Isuronatayo dagiti panagkagumaanna no kasano a makasaraktayo iti naespirituan a kinatalged.
Dagiti Mabalin nga Aktibidad
-
Isaritam bassit kadagiti ubbing maipapan iti gubat iti nagbaetan dagiti Nephite ken Lamanite (kitaen iti Alma 43), a mangyunay-unay a nagkawes dagiti Nephite ti kabal a mangsalaknib iti bagida. Mabalinmo nga usaren ti “Kapitulo 31: Inabak ni Kapitan Moroni ni Zerahemnah” (Dagiti Estoria iti Libro ni Mormon, 85–88 wenno iti maitutop a video iti ChurchofJesusChrist.org). Basaem ti Alma 43:19, ket awisem dagiti ubbing a mangitudo iti nadumaduma a paset ti bagida no mangngeganda dagitoy iti nasantuan a kasuratan.
-
Ilawlawag a kas met laeng iti pannakaipasango iti pannakigubat dagiti Nephite, maipasangotayo met iti naespirituan a pannakigubat a maibusor ken ni Satanas, a saan nga agtungpal kadagti bilin ti Dios. Mangidrowing iti maysa nga ubing iti pisarra, ken tulongam dagiti ubbing nga agpanunot kadagiti banag a naespirituan a mangsalaknib kadatayo a kas iti kabal a mangsalaknib iti bagitayo (kas pagarigan, kararag, panagbasa ti nasantuan a kasuratan, wenno panagtungpal kadagiti bilin.) Iti tunggal madakamat ti maysa a banag, mangidrowing iti maysa a kabal iti ubing iti pisarra.
Ti Pannakasalaknib ti maysa a Siudad ti Nephi, ni Minerva K. Teichert
Alma 46:11–16; 48:11–13, 16–17
Makapagbalinak a napudno a kas ken ni Kapitan Moroni.
Naindaklan a pagwadan ni Moroni iti pammati, tured, ken panagserbi. Ibilang no kasano a maparegtam dagiti ubbing a sumurot iti pagwadanna.
Dagiti Mabalin nga Aktibidad
-
Ipakita ti ladawan ni Moroni iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia. Isaritam kadagiti ubbing maipapan iti wagayway iti waywaya ken no ania ti naisurat iti daytoy, babaen iti panangusar ti ragup dagiti balikas manipud iti Alma 46:11-16. Mabalinmo nga ibasar iti “Kapitulo 32: Ni Kapitan Moroni ken ti Wagayway ti Wayawaya” (Dagiti Estoria iti Libro ni Mormon, 89–90 wenno ti maitutop a video iti ChurchofJesusChrist.org). Agpatulong kadagiti ubbing a mangisalaysay iti estoria agingga a mabalin. Ilawlawag nga inusar ni Moroni ti wagayway ti wayawaya tapno makatulong kadagiti Nephite a manglagip no ania ti napateg kadakuada.
-
Tulongam dagiti ubbing nga agaramid ti wagayway ti waywaya para kadakuada wenno para iti klasem. Tulongam dagiti ubbing a mangpanunot kadagiti banag a patienda wenno dagiti banag a kayat ti Nailangitan nga Ama a laglagipenda. Bay-am a mangidrowingda kadagitoy a ladawan iti dakkel a papel, wenno mabalinmo ti mangitugot kadagiti ladawan a maipigket iti papel.
-
Kiddawem kadagiti ubbing nga ibagada kenka maipapan kadagiti sumagmamano a tao nga kayatda a tuladen ken no apay a kayatda a tuladen ida. Kalpasanna ibinglaymo kadakuada dagiti sumagmamano a balikas maipud iti Alma 48:11–13 a magiladawan ken ni Moroni, ken awisem ida a patangan no asino ti iladladawan dagitoy a balikas. Ipakitam ti ladawan ni Moroni, ket pagsasaritaan maipapan kadagiti wagas a pakapagbalinantayo a kas kenkuana.
Isuro ti Doktrina: In-inauna nga Ubbing
Alma 43:17–21; 48:7–8; 49:1–5; 50:1–6
Masarakak ti naespirituan a pannakasalaknib iti ebanghelio.
Adu dagiti naespirituan a peggad iti lubong, ngem adu ti mabalin a maadal dagiti ubbing manipud kadagiti Nephite maipapan iti no kasano a masalaknibanda ti bagbagida.
Dagiti Mabalin nga Aktibidad
-
Awisem ti tunggal ubing nga siuulimek nga agbasa ti maysa kadagiti sumaganad a bersikulo a mangiladawan iti no kasano a nagsagana dagiti Nephite a makigubat kadagiti Lamanite: Alma 43:19; 48:8; 49:1–5; ken 50:2–4. Kiddawen kadagiti ubbing a mangibinglay no ania ti nasursuroda (mangipaay ti tulong no kasapulan). Ilawlawag a naespirituantayo a makigubat ken ni Satanas, ket nasken a naespirituan a salaknibantayo ti bagitayo, a kas iti panagsalaknib dagiti Nephite iti bagbagida manipud kadagiti Lamanite. Ania dagiti kita ti naespirituan a kabal wenno sarikedked a mabalintayo nga aramiden tapno masalaknibantayo ti bagbagitayo kadagiti naespirituan a pannakigubattayo?
-
Tulongam dagiti ubbing nga agaramid iti kabal nga usaren ti dakkel a papel wenno karton, ket kiddawem kadakuada nga isurat ditoy dagiti banag a naespirituan a mangsalaknib kadatayo. Ikkam ti tunggal ubing iti maysa a papel, ket pasuratam kadagiti ubbing iti dakes a banag a mabalin nga isulisog ni Satanas nga aramidentayo. Kiddawem kadakuada a kumolenda dagiti papelda tapno agbalin a bola ken ipuruakda dagitoy iti kalasag tapno mailadawan no kasano a masalaluadannatayo ti ebanghelio manipud ken ni Satanas (kitaen met iti Taga Efeso 6:16).
Alma 46:11–16; 48:11–13, 16–17
Makapagbalinak a napudno a kas ken ni Kapitan Moroni.
Matalek ken nabileg a disipulo ni Jesucristo ni Moroni, a nangparegta kadagiti Nephite nga agbiag iti ebanghelio (kitaen ti Alma 48:17). Ania ti masursuro dagiti ubbing iti klasem manipud iti pagwadanna?
Dagiti Mabalin nga Aktibidad
-
Aggigiddan a basaen ti Alma 46:11–16. Ania ti kayat ni Moroni a laglagipen dagiti Nephite? (Kitaen ti verse 12). Kasano a tinulonganna ida a manglagip kadagitoy a banag? Pailistam kadagiti ubbing dagiti sumagmamano a banag a kayat ti Nailangitan nga Ama a laglagipentayo. Bay-am nga agdisenio dagiti ubbing iti bukodda a “wagayway ti wayawaya” nga addaan iti ragup dagiti balikas wenno ladawan a mangtulongto kadakuada a manglagip kadagitoy a banag.
-
Kiddawem iti maysa nga ubing a mangbasa iti Alma 48:17. Tapno matulongam dagiti ubbing a makaawat no apay a maawistayo nga agbalin a kas ken ni Moroni, awisem ida nga adalen ti Alma 48:11–13, 16. Pasapul kadakuada dagiti balikas ken ragup dagiti balikas a makatulong kadatayo a makaawat no apay a naindaklan a disipulo ni Jesucristo ni Moroni. Bayat ti panangibinglayda iti masarakanda, allukoyen ida nga agpanunot kadagiti nalawag a banag a mabalinda nga aramiden tapno agbalinda nga ad-adda a kas ken ni Morroni.
In-inut a sulisogen ken allilawennatayo ni Satanas.
Naseken a maammuan dagiti ubbing a padasento a sulisogennatayo ni Satanas nga agaramid iti babassit a basol tapno maiturongnatayo iti nadagdagsen a basol.
Dagiti Mabalin nga Aktibidad
-
Aggigiddan a basaen dagiti napili a bersikulo manipud iti Alma 47:4–19, ken ilawlawag kadagiti ubbing no kasano a nagun-od ni Amalickiah ti panangkontrol iti buyot ni Lehonti, nupay dagiti miembro ti buyot ket “niseksek iti pampanunotda” a saanda mapilit a makiranget kadagiti Nephite. Ania koma ti napasamak no imbaga ni Amilickiah ken ni Lehonti no ania ti planona manipud pay idi damona? Ania ti isuro kadatayo dagitoy a bersikulo maipapan iti no kasano a padasen ni Satanas nga allilawennatayo?
-
Ipakita ti maysa a ladawan ti maysa a balay a nasayaat ti pannakamentenirna ken ti maysa a balay a nabaybay-an, wenno ipakita ti maysa a ladawan ti nalasbang a minuyongan ken maysa a minuyongan a napno kadagiti ruruot. Pagsaritaen dagiti ubbing maipapan iti nakitada kadagiti ladawan ken no kasano a mabalin a napasamak dagitoy a panagbalbaliw iti panaglabas ti panawen. Ania ti mabalin nga inaramid ti akinkukua iti balay wenno minuyongan tapno nalapdan koma daytoy? Ilawlawag a mabalin nga in-inut nga agbalin a manangbasol dagiti tao no saanda a liklikan dagiti sulisog ni Satanas nga agaramid iti babassit a basbasol (kas iti panagulbod wenno panagbuya iti pornograpia) ket kalpasanna agaramid iti nadagdagsen a basbasol. Ania dagiti sumagmamano a dakes a banag a masapul a liklikantayo nga aramiden iti biagtayo?
Yallukoy ti Panagsursuro iti Pagtaengan
Kiddawem iti tunggal ubing a manginagan ti maysa a banag a nangngegna wenno nariknana ita nga aldaw ket kayatna nga ibinglay iti maysa a miembro ti pamilia. Allukoyem ida a mangipatungpal kadagiti planoda.
Panangpadur-as iti Panangisurotayo
Tulongam dagiti ubbing a mangpatibker iti panagtalekda. Mabalin a marikna dagiti sumagmamano nga ubbing a saanda a kabaelan ti agsursuro iti ebanghelio iti bukodda. Ti maysa a wagas tapno mapatibker ti panagtalekda isu ti panagdayaw kadakuada no makiramanda iti klase.