Disyembre 30–Enero 5

Pasiuna nga mga pahina sa Basahon ni Mormon

“Lain nga Tugon ni Jesukristo”

Sugdi ang imong pagpangandam sa pagtudlo pinaagi sa pagbasa sa ulohan nga pahina ug pasiuna sa Basahon ni Mormon; ang mga pagpamatuod sa Tulo ka mga Saksi, sa Walo ka mga Saksi, ug ni Propeta Joseph Smith; ug “Mubo nga Pagpasabut mahitungod sa Basahon ni Mormon.” Pamalandungi kon unsaon nimo sa pagdasig sa mga bata nga magkat-on gikan sa Basahon ni Mormon.

Irekord ang Imong mga Impresyon

Dapita ang Pagpaambit

Dapita ang mga bata sa pagpaambit og mga istorya nga ilang nahibaloan gikan sa Basahon ni Mormon, gamit ang mga litrato 67–86 sa Libro sa mga Hulagway sa Ebanghelyo o ubang mga litrato nga aduna ka.

Itudlo ang Doktrina: Mas Gagmay nga mga Bata

Ulohan nga pahina sa Basahon ni Mormon

Ang Basahon ni Mormon makatabang kanako nga makabaton og pagtuo kang Jesukristo.

Tabangi ang mga bata nga makakita nga ang katuyoan sa Basahon ni Mormon mao ang pagpamatuod mahitungod ni Jesukristo.

Posible nga mga Kalihokan

• Pagpakita og kopya sa Basahon ni Mormon, ug itudlo ang ubos nga ulohan [subtitle] nga, Lain nga Tugon ni Jesukristo. Papuli-puliha ang mga bata sa pagsulti og, “Lain nga tugon ni Jesukristo.” Sultihi kadiyot ang mga bata kon sa unsang paagi ang Basahon ni Mormon nakapalig-on sa imong pagtuo diha ni Jesukristo.

• Pag-asoy og istorya gikan sa Basahon ni Mormon nga nagtudlo mahitungod ni Jesukristo, sama sa istorya ni Samuel ang Lamanite nga nanagna mahitungod kang Kristo (tan-awa sa Helaman 14–16), ang Manluluwas nga nanalangin sa mga bata (tan-awa sa 3 Nephi 17), o ang Igsoong Lalaki ni Jared nga nakakita ni Jesukristo (tan-awa sa Ether 2–3). Ang mga kapitulo gikan sa Mga Sugilanon sa Basahon ni Mormon makatabang. Itudlo sa mga bata kon unsa ang atong makat-unan mahitungod ni Jesus gikan niini nga mga istorya. Sultihi sila nga daghan sila og makat-unan mahitungod ni Jesukristo gikan sa Basahon ni Mormon karong tuiga.

• Pagkanta og usa ka awit mahitungod sa Basahon ni Mormon, sama sa “Mga Istorya sa Basahon ni Mormon” (Songbook sa mga Bata, 62). Kantaha og dungan ang awit sa pipila ka higayon, ug papuli-puliha ang mga bata sa paggunit og litrato sa Manluluwas samtang manganta mo.

Pasiuna sa Basahon ni Mormon

Ang Basahon ni Mormon mao ang sukaranan sa atong tinuohan.

Si Presidente Thomas S. Monson mipasabut: “Kon [ang Basahon ni Mormon] tinuod—ug ligdong akong mopamatuod nga kini tinuod—nan si Joseph Smith usa ka propeta … , Ang Simbahan ni Jesukristo sa mga Santos sa Ulahing mga Adlaw mao ang Simbahan sa Ginoo dinhi sa yuta, ug ang balaan nga priesthood sa Dios gipahiuli ”(“Ang Gahum sa Basahon ni Mormon,” Liahona, Mayo 2017, 86–87).

Posible nga mga Kalihokan

• Basaha ngadto sa mga bata ang mosunod nga pamahayag ni Joseph Smith diha sa pasiuna sa Basahon ni Mormon: “Ang Basahon ni Mormon [mao] ang sukaranan sa atong tinuohan.” Ipasabut nga sama nga ang sukaranang bato nagsuporta sa tibuok arko, ang atong pagpamatuod sa Basahon ni Mormon nagsuporta ug naglig-on sa atong pagpamatuod sa ubang mga butang, sama kang Joseph Smith ug sa ebanghelyo.

• Dapita ang usa ka ginikanan sa usa sa mga bata sa pagpaambit kon giunsa niya sa pagkaangkon og pagpamatuod mahitungod sa Basahon ni Mormon. Basaha uban sa mga bata ang imbitasyon diha sa katapusan sa pasiuna sa Basahon ni Mormon, ug tabangi sila sa pag-aksyon sa mga butang nga ilang mahimo aron makaangkon og ilang kaugalingon nga pagpamatuod.

“Ang Pagpamatuod ni Propeta Joseph Smith”

Ang Basahon ni Mormon gihatag kanato pinaagi sa gahum sa Dios.

Ang pagpamatuod ni Joseph Smith makatabang sa mga bata nga makasabut sa balaang katuyoan sa Basahon ni Mormon.

Posible nga mga Kalihokan

• Isulti kadiyot sa mga bata ang istorya kabahin sa pagtungha sa Basahon ni Mormon ingon nga gihulagway diha sa “Ang Pagpamatuod ni Propeta Joseph Smith.” Mahimo usab nimong gamiton ang “Kapitulo 1: Giunsa Nato Pagkuha ang Basahon ni Mormon” (Mga Sugilanon sa Basahon ni Mormon, 2–4). Tabangi ang mga bata nga i-aksyon ang istorya sa pipila ka higayon samtang isaysay nimo kini pag-usab.

• Pakit-a ang mga bata og hulagway sa mga sinulat gikan sa bulawan nga mga palid. Ipasabut nga ang Dios mitabang kang Joseph sa paghubad niini nga mga sinulat ngadto sa mga pulong nga atong mabasa ug masabtan.

  

  Gihubad ni Joseph Smith ang mga sinulat nga anaa sa bulawang mga palid.

Itudlo ang Doktrina: Mas Dagko nga mga Bata

Ulohan nga pahina sa Basahon ni Mormon

Ang Basahon ni Mormon makatabang kanato sa pagbaton og pagtuo kang Jesukristo.

Hinumdumi nga ang imong katuyoan sa pagtudlo sa mga bata mahitungod sa Basahon ni Mormon mao ang pag-ugmad sa ilang pagtuo sa Manluluwas.

Posible nga mga Kalihokan

• Ipares-pares ang klase. Dapita ang matag parisan sa pagbasa sa ikaduha nga parapo [paragraph] sa ulohan nga pahina sa Basahon ni Mormon, nga mangita og usa ka butang nga nagsulti kanila kon unsay tuyo nga mabuhat sa Basahon ni Mormon. Dayon dapita ang matag parisan sa pagpaambit diha sa klase.

• Tabangi ang mga bata nga makita diha sa ulohang pahina ang mga pulong nga “sa pagpamatuod ngadto sa Judeo ug Hentil nga si Jesus mao ang Kristo.” Sa unsang paagi ang Basahon ni Mormon makakumbinser kanato nga si Jesus mao ang Kristo? Dapita sila sa pagpaambit og istorya gikan sa Basahon ni Mormon nga nakapalig-on sa ilang pagtuo diha kang Kristo, o pagpaambit og usa sa imong kaugalingong istorya.

Pasiuna sa Basahon ni Mormon

Ang Basahon ni Mormon mao ang sukaranan sa atong tinuohan.

Ang pagkaangkon og pagpamatuod mahitungod sa Basahon ni Mormon makatabang sa mga bata nga masayud nga Ang Simbahan ni Jesukristo sa mga Santos sa Ulahing mga Adlaw mao ang tinuod nga Simbahan sa Dios.

Posible nga mga Kalihokan

• Hangyoa ang mga bata nga magpakaaron-ingnon nga wala ka pa sukad makadungog sa Basahon ni Mormon. Dapita sila sa pagtrabaho kauban ang laing bata sa paghunahuna og mga paagi nga ilang mapasabut kanimo kon unsa ug asa kini gikan, gamit ang mga detalye diha sa pasiuna. Dayon papuli-puliha ang matag parisan sa pagtudlo nimo.

• Dapita ang usa ka bata sa pagbasa sa pamahayag ni Joseph Smith diha sa ikaunom nga parapo sa pasiuna. Gamit ang pahina sa kalihokan niining semanaha, ipasabut kon sa unsang paagi ang sukaranang bato nagsuporta sa usa ka arko. Sumala sa katapusang parapo sa pasiuna, unsa pa ang pipila ka butang nga atong masayran sa higayon nga aduna kitay pagpamatuod nga ang Basahon ni Mormon tinuod?

“Ang Pagpamatuod sa Tulo ka mga Saksi”; “Ang Pagpamatuod sa Walo ka mga Saksi”

Mamahimo akong saksi sa Basahon ni Mormon.

Unsaon nimo pagtabang ang mga bata nga makaangkon ug makapaambit sa ilang kaugalingong pagpamatuod sa Basahon ni Mormon?

Posible nga mga Kalihokan

• Dapita ang mga bata sa paghulagway og usa ka butang nga ilang nakita nga walay laing nakakita diha sa klase. Ipasabut nga ang Basahon ni Mormon naglakip sa mga pagpamatuod sa 11 ka tawo gawas ni Joseph Smith kinsa nakakita sa bulawang mga palid diin diha gikan gihubad ang Basahon ni Mormon. Basaha og dungan ang mga pagpamatuod. Nganong gusto man niini nga mga saksi nga ang ubang mga tawo masayud mahitungod sa ilang mga pagpamatuod?

• Pangutana kon duna bay gusto sa mga bata nga mopaambit kon giunsa nila pagkasayud nga ang Basahon ni Mormon tinuod. Basaha og dungan ang Moroni 10:3–5, ug dapita ang matag bata sa pagbasa sa Basahon ni Mormon karong tuiga ug pag-angkon o paglig-on sa iyang pagpamatuod nga kini tinuod. Sultihi ang mga bata kon giunsa nimo sa pagkaangkon og pagpamatuod sa Basahon ni Mormon.

Awhaga ang Pagkat-on diha sa Panimalay

Kon mahimo, siguroha nga ang matag bata adunay kopya sa Basahon ni Mormon, ug dapita sila sa pagbasa niini sa ilang kaugalingon ug uban sa ilang mga pamilya.

Pagpalambo sa Atong Pagtudlo

Pagtinguha og imong kaugalingon nga inspirasyon. Imbis nga motan-aw niini nga mga outline isip mga instruksyon nga kinahanglan nimong sundon samtang magtudlo ka, gamita kini isip tinubdan sa mga ideya nga makaawhag og imong kaugalingong inspirasyon samtang mamalandong ka sa mga panginahanglan sa mga bata nga imong gitudloan.