Ang Damgo ni Lehi, ni Steven Lloyd Neal

Enero 13–19

1 Nephi 8–10

“Moduol ug Mokaon … sa Bunga”

Agig dugang sa pagtan-aw sa imong kaugalingon diha sa panan-awon ni Lehi, paningkamoti ang pagtan-aw sa mga bata nga imong gitudlo. Sa unsang paagi kini nga panan-awon magamit diha kanila?

Irekord ang Imong mga Impresyon

Dapita ang Pagpaambit

Kontaka daan ang pipila ka mga bata ug hangyoa sila sa paghunahuna og mga kasinatian o kasulatan nga mahimo nilang mapaambit nga nakatabang kanila nga mobati sa gugma sa Dios.

Itudlo ang Doktrina: Mas Gagmay nga mga Bata

1 Nephi 8:2, 5–34

Ang pulong sa Dios mogiya kanako ngadto sa Dios ug motabang kanako nga mobati sa Iyang gugma.

Sa panan-awon ni Lehi, gidapit kita sa pag-ambit sa gugma sa Dios, nga gisimbolohan sa kahoy ug sa bunga niini. Unsaon nimo pagtabang ang mga bata sa pagdawat niini nga pagdapit?

Posible nga mga Kalihokan

• Dapita ang mga bata sa pagtabang nimo sa pagsugilon sa istorya sa panan-awon ni Lehi gikan sa 1 Nephi 8:10–34. Aron matabangan sila sa paghanduraw sa istorya, mahimong mopakita ka og hulagway sa panan-awon ni Lehi (tan-awa ang outline niini nga semana sa Dali, Sunod Kanako—Alang sa mga Indibidwal ug mga Pamilya) o ang mga hulagway sa “Kapitulo 6: Ang Damgo ni Lehi” (Mga Sugilanon sa Basahon ni Mormon, 18–20). Siguroha nga mahibalo ang mga bata nga ang gunitanan nga puthaw nagrepresentar sa pulong sa Dios, nga atong mabasa diha sa mga kasulatan ug madungog gikan sa buhing mga propeta. Tabangi sila nga makasabut nga ang kahoy nagrepresentar sa gugma sa Dios alang kanato.

• Pagdala og pisi aron morepresentar sa gunitanan nga puthaw diha sa panan-awon ni Lehi. Hangyoa ang mga bata sa paggunit niini samtang imo silang giyahan libut sa kwarto padulong sa hulagway sa usa ka kahoy. Tabangi sila nga makasabut nga ang pulong sa Dios modala kanato paduol Kaniya, sama nga ang pisi nga nagrepresentar sa gunitanan nga puthaw modala kanato padulong sa kahoy. Aron mapakita nga ang kahoy nagrepresentar sa gugma sa Dios, mahimong mopakita ka og mga hulagway sa mga butang nga gihatag sa Dios kanato nga nagpakita sa Iyang gugma kanato, sama sa Manluluwas, atong mga pamilya, ug sa maanindot nga kalibutan.

• Pagdala og pipila ka prutas nga adunay kasingkasing nga gipapilit niini. Patilawa ang mga bata og piraso sa prutas ug pangutan-a sila mahitungod sa ilang paborito nga prutas. Ipasabut nga ang bunga [prutas] diha sa panan-awon ni Lehi mao ang kinatam-isang prutas nga iyang natilawan sukad, ug mipuno kini sa iyang kalag uban sa hingpit nga kalipay. Sama nga ang tam-is nga prutas makapalipay kanato, kita mobati og kalipay kon mosunod kita ni Jesus ug makapuyo og balik uban sa Langitnong Amahan.

• Basaha ang 1 Nephi 8:12, ug dapita ang mga bata sa pagpaminaw og maayo sa unsay gustong buhaton ni Lehi human siya makatilaw sa bunga. Papuli-puliha ang mga bata nga magpakaaron-ingnon nga mao si Lehi nga nagdapit sa uban nga moduol ug mokaon sa bunga. Unsay atong mabuhat aron sa pagdapit sa uban sa pagduol ug pagtagamtam sa mga panalangin sa ebanghelyo uban kanato?

  Gidapit ni Lehi ang Iyang Pamilya sa Pagkaon sa Bunga sa Kahoy | 1 Nephi 8:12–18

1 Nephi 10:17, 19

Ang Dios mopadayag og kamatuoran ngari kanako pinaagi sa gahum sa Espiritu Santo.

Human makadungog kabahin sa panan-awon sa iyang amahan, si Nephi nakabaton og tinguha nga angay nga anaa usab kanato—ang tinguha nga masayud sa kamatuoran alang sa iyang kaugalingon.

Posible nga mga Kalihokan

• Basaha ang 1 Nephi 10:19, ug dapita ang mga bata sa pagpataas sa ilang mga kamot kon madungog nila ang mga pulong nga “ipadayag” ug “Espiritu Santo.” Tabangi ang mga bata nga makasabut niini nga kasulatan, nga nagtudlo nga ang Espiritu Santo motabang kanato nga masayud sa mga tubag sa atong mga pangutana. Aron matabangan ang mga bata sa paghanduraw kon unsay gipasabut nga ang kamatuoran “ipadayag”, pagdala og gipilo nga habol nga adunay hulagway sa Manluluwas diha sa sulod, ug hangyoa ang mga bata sa pagbukhad niini.

• Pagkanta og usa ka awit uban sa mga bata mahitungod sa pagpangita sa kamatuoran, sama sa “Pagsiksik, Pamalandong, ug Pag-ampo” (Songbook sa mga Bata, 66). Pagpakita og mga litrato nga naghulagway sa mga pulong diha sa awit aron matabangan ang mga bata sa paghinumdom kon sa unsang paagi ang Espiritu Santo motudlo kanato.

• Ikonsiderar ang pagpaambit og usa ka kasinatian sa diha nga ang Espiritu Santo mitabang kanimo nga mahibalo nga ang usa ka butang tinuod. Sultihi ang mga bata kon sa unsang paagi ang Espiritu Santo namulong kanimo.

Itudlo ang Doktrina: Mas Dagko nga mga Bata

1 Nephi 8:2, 5–34

Ang pulong sa Dios mogiya kanako ngadto sa Dios ug motabang kanako nga mobati sa Iyang gugma.

Samtang ang mga bata sa imong klase makakat-on kabahin sa panan-awon ni Lehi, awhaga sila sa pagtuon sa pulong sa Dios ug sa pagpaambit sa gugma sa Dios ngadto sa uban.

Posible nga mga Kalihokan

• Samtang ang mga bata mobasa og pinili nga mga bersikulo gikan sa 1 Nephi 8, dapita sila sa pagpangita og mga detalye gikan niini nga mga bersikulo diha sa hulagway sa panan-awon ni Lehi (sama sa anaa sa outline niini nga semana sa Dali, Sunod Kanako—Alang sa mga Indibidwal ug mga Pamilya). O dapita sila sa pagdrowing diha sa pisara sa mga detalye nga ilang nabasahan. Dayon tabangi ang mga bata sa pagdiskubre kon unsa ang girepresentahan sa mga simbolo diha sa damgo (tan-awa sa 1 Nephi 11:21–22; 12:16–18; 15:23–33, 36).

• Kon mahimo, pagdala og usa ka piraso sa puthaw o ubang metal nganha sa klase ug dapita ang mga bata sa paghulagway sa mga kinaiya niini ug sa posibleng kagamitan niini. Sa unsang paagi nga ang pulong sa Dios sama sa usa ka gunitanan nga puthaw? Asa nato makita ang pulong sa Dios? Nganong importante man kaayo ang gunitanan nga puthaw diha sa panan-awon ni Lehi?

  

  Si Lehi nga nagkaon sa bunga sa kahoy sa kinabuhi. Kahoy sa Kinabuhi, ni Marcus Alan Vincent

• Dapita ang mga bata sa pagsulat og kasinatian diha sa usa ka piraso nga papel sa dihang ang pulong sa Dios nakatabang kanila nga mahibalo kon unsay ilang buhaton o nakatabang nila nga mobati nga mas duol sa Langitnong Amahan. Samtang mopaambit sila sa unsay ilang gisulat, dapita sila sa paglukot sa ilang papel nga moporma og gunitanan nga puthaw. Mahimo gani nimong ipapilit nga magsumpay ang “mga gunitanang puthaw” sa mga bata isip representasyon sa gunitanan nga puthaw sa damgo ni Lehi.

• Dapita ang pipila sa mga bata sa pagbasa sa 1 Nephi 8:10–12 ug sa paghulagway kon unsa ang nakita ni Lehi. Hangyoa ang uban sa pagbasa sa 1 Nephi 11:20–23 ug sa paghulagway kon unsa ang nakita ni Nephi. Nganong gipakita man sa anghel kang Nephi ang batang Jesus aron sa pagtudlo kaniya mahitungod sa gugma sa Dios? Aron makatabang sa pagtubag niini nga pangutana, basaha og dungan ang Juan 3:16 o kantaha og dungan ang usa ka kanta mahitungod sa Manluluwas, sama sa “Mipadala sa Bugtong Anak” (Songbook sa mga Bata, 20–21). Sultihi ang mga bata kon sa unsang paagi nimo nabati ang gugma sa Langitnong Amahan ug sa Iyang Anak nga si Jesukristo diha sa imong kinabuhi.

• Isulat diha sa pisara: Unsay atong makat-unan gikan sa ehemplo ni Lehi? Dapita ang mga bata sa paghunahuna kabahin sa panan-awon ni Lehi ug sa pagsulat og mga tubag sa labing daghan nga ilang mahimo. Hangyoa sila sa pagpaambit sa ilang mga tubag diha sa klase. Dayon hangyoa ang mga bata sa paghunahuna og usa ka tawo nga mahimo nilang ipaambit ang kalipay sa ebanghelyo.

1 Nephi 10:17–19; 11:1

Ang Dios mopadayag og kamatuoran ngari kanako pinaagi sa gahum sa Espiritu Santo.

Kon mangayo kita sa Langitnong Amahan uban sa hugot nga pagtuo, ang kamatuoran “ipadayag [ngari kanato] pinaagi sa gahum sa Espiritu Santo” (1 Nephi 10:19). Unsaon nimo sa pagtabang ang mga bata nga imong gitudloan nga makasabut niini nga kamatuoran?

Posible nga mga Kalihokan

• Dapita ang mga bata sa paghisgot og mga paagi nga makakita sila og mga tubag sa usa ka pangutana. Awhaga ang mga bata sa pagbasa sa 1 Nephi 10:17–19 ug 11:1. Unsa kaha ang isulti ni Nephi kon dunay mangutana kaniya kon unsaon sa pagpangita og mga tubag sa usa ka pangutana mahitungod sa ebanghelyo? Sa unsang paagi ang Dios motudlo kanato pinaagi sa Espiritu Santo? (tan-awa sa D&C 8:2).

• Hangyoa ang mga bata sa paghisgot og usa ka higayon sa dihang ang Espiritu Santo mitabang kanila nga mahibalo nga ang usa ka butang tinuod. Hangyoa sila sa paghanduraw nga aduna silay higala kinsa naghunahuna nga dili siya makadawat og tubag pinaagi sa Espiritu Santo. Unsay ilang mapaambit gikan sa 1 Nephi 10:17–19 ug 11:1 aron sa pagtabang niana nga higala?

Awhaga ang Pagkat-on diha sa Panimalay

Awhaga ang mga bata sa paggamit sa pahina sa kalihokan niini nga semana aron mapaambit sa ilang mga pamilya ang ilang nakat-unan mahitungod sa panan-awon ni Lehi sa kahoy sa kinabuhi.

Pagpalambo sa Atong Pagtudlo

Ang mga bata makakat-on sa daghang paagi. Ang mga bata malingaw sa pagkat-on pinaagi sa lain-lain nga mga kasinatian. Gamita ang mga kalihokan nga makatabang kanila nga molihok, mogamit sa tanan nilang mga balatian, ug mosulay og bag-ong mga butang. (Tan-awa sa Pagtudlo sumala sa Pamaagi sa Manluluwas, 25–26.)