“Nobiembre 23–29. Ether12–15: ‘Babaen ti Pammati, Maipatungpal ti Amin a Banag’” Umaykayo Sumurot Kaniak—Para kadagiti Indibidual ken Pamilia: Libro ni Mormon 2020 (2020)
“Nobiembre 23–29. Ether 12–15,” Umaykayo, Sumurot Kaniak—Para kadagiti Indibidual ken Pamilia: 2020
Nobiembre 23–29
Ether 12–15
“Babaen ti Pammati Maipatungpal ti Amin a Banag”
Ti panagsurat kadagiti impresion ket mangyawis iti ad-adu pay a paltiing ken mangpatibker iti pammaneknekmo. Tulongannaka pay a manglagip kadagiti impresionmo ken mangibinglay ida kadagiti dadduma iti masakbayan.
Isuratmo dagiti Impresionmo
Dagiti padto ni Ether kadagiti Jaredite ket “naindaklan ken datdatlag” (Ether 12:5). “Imbagana kadakuada amin a banag, manipud iti punganay ti tao” (Ether 13:2). Nakitana “dagiti aldaw ni Cristo” ken ti Baro a Jerusalem iti ud-udina nga aldaw (Ether 13:4). Ket insaona ti “namnama iti nasaysayaat a lubong, wen, uray pay iti lugar iti makanawan ti Dios” (Ether 12:4). Ngem sinupring dagiti Jaredite ti sasaona, iti isu met laeng a gapu masansan a supringen ti tattao dagiti padto dagiti katulongan ti Dios iti agdama—“gapu ta dida ida [nakita]” (Ether 12:5). Masapul ti pammati tapno mamati kadagiti kari wenno ballaag maipapan ti bambanag a ditayo makita, a kas iti pannakasapul ni Ether iti pammati nga agipadto maipapan “dagiti naindaklan ken datdatlag a banag” kadagiti di mamatpati a tao. Kinasapulan ni Moroni ti pammati nga agtalek nga alaen ti Apo ti “kinakapsutna nga agsurat” ket aramidenna daytoy a pagpigsaanna (kitaen iti Ether 12:23–27). Isu daytoy ti kita ti pammati a mamagbalin kadatayo a “mangikkat iti duadua[da] ken mamatibker [kadakuada], a kanayon a mangsursurot kadagiti naimbag nga aramid, ta naibagnos[da] a mangigloria iti Dios” (Ether 12:4). Ken daytoy ti kita ti pammati a babaen itoy “mapasamak amin a banag” (Ether 12:4).
Dagiti Kapanunotan para iti Bukod a Panagadal iti Nasantuan a Kasuratan
Makaiturong ti pammati ken ni Jesucristo kadagiti nabileg a milagro.
Adu dagiti tao iti agdama, kas kadagiti Jaredite iti aldaw ni Ether, a kalikagumda ti makakita iti pammaneknek sakbay a mamatida iti Dios ken iti bilegna. Nupay kasta, insuro ni Moroni a “bambanag ti pammati a mabalin a namnamaen ken saan a makita” ket “awan ti maawatyo a saksi agingga iti pannakasuot ti pammatiyo”(Ether 12:6).
Markaam ti tunggal masarakam a balikas a “pammati” iti Ether 12, ket isuratmo no ania ti masursurom maipapan iti pammati. Agsapul kadagiti sungbat kadagiti saludsod a kas kadagitoy: Ania ti pammati? Ania dagiti bunga ti panagbiag a napnuan pammati? Mabalinmo pay nga isurat dagiti kapanunotam maipanggep kadagiti saksi a nagun-odmo “kalpasan ti pannakasuot ti pammatim” (Ether 12:6).
Kitaen met iti Dagiti Hebreo 11; Alma 32.
Mangted kadatayo ni Jesucristo iti “mabilbilega namnama.”
Kas nayon dagiti nauneg a nalawag a pannakaammo ken pannakaawat maipapan iti pammati, aduan met ti Ether 12 iti maisao maipapan iti namnama—nalabit a mabalinmo a markaan ti tunggal balikas a “namnama” a masarakan. Ania ti kayat a sawen ti namnama kenka? Ania dagiti gapu ken ni Ether tapno “mangnamnama iti nasaysayaat a lubong” (kitaen iti “Ether 12:2–5). Kasano a nangyeg kenka ti ebanghelio ni Jesucristo iti “nabilbileg a namnama”? (Ether 12:32).
Kitaen met iti Moroni 7:40–41; Dieter F. Uchtdorf, “The Infinite Power of Hope,” Ensign wenno Liahona, Nob. 2008, 21–24; Preach My Gospel, 117.
Maramid ni Jesucristo a napigsa dagiti nakapsut a banag.
No basaentayo dagiti nabileg a sinurat ni Moroni, nalaka a lipaten a nariribukan isuna maipanggep iti “kinakapsutna nga agsurat” ket nagamak a laisento dagiti tao dagiti balikasna (kitaen iti Ether 12:23–25). Ngem inkari ti Dios nga Isu ket “aramidenna a napigsa dagiti nakapsut a banag” kadagiti napakumbaba (bersikulo 27), ket ti naespirituan a bileg kadagiti sinurat ni Moroni ket nakappapati a pakakitaan nga impatungpal ti Apo daytoy a kari.
Kalpasan ti panangbasam iti Ether 12:23–29, utobem dagiti panawen idi tinulongannaka ti Apo a mangbigbig kadagiti pagkapsutam ket pinagbalinnaka a natibker iti laksid dagitoy. Mabalin a daytoy pay ti nasayaat a gundaway a panangpanunot maipapan dagiti pagkapsutan a pagrigrigatam iti agdama. Ania ti mariknam a kasapulam nga aramiden a mangipakumbaba iti bagim iti Apo ket ipakitam ti pammati Kenkuana nga awatem ti karina nga “aramiden a napigsa dagiti nakapsut a banag”? (Ether 12:27).
Bayat ti panangutobmo kadagitoy a bersikulo, ti sumaganad a nalawag a pannakaammo ken pannakaawat manipud ken ni Elder Neal A. Maxwell ket nalabit a makatulong: “No mabasatayo ti ‘pagkapsutan’ ti tao kadagiti nasantuan a kasuratan, iraman daytoy a termino ti … nakaisigudan a pagkapsutan iti sapasap a kasasaad dagiti tao a ti lasag ket awan sarday ti epektona iti espiritu (kitaen iti Ether 12:28–29). Nupay kasta, iraman pay ti pagkapsutan dagiti naipangruna, bukod a pagkapsutantayo, a namnamaen a maparmektayo (kitaen iti Doktrina ken Katulagan 66:3; Jacob 4:7)” (Lord, Increase Our Faith [1994], 84).
Kitaen met iti “Grace,” Gospel Topics, topics.ChurchofJesusChrist.org.
Mangyeg iti naespirituan a peggad ti saan a panangawat kadagiti propeta.
Ti panagbalin nga ari dagiti Jaredite, iti pakasaritaan, ket maysa a napeggad a posision. Nangnangruna a pudno daytoy para ken ni Coriantumr, ta adu a “maingel a lallaki ket kayatda a dadaelen” (Ether 13:15–16). Iti Ether 13:15–22, kitaen no ania ti inaramid ni Coriantumr a mangsalaknib iti bagina ken no ania ti imbalakad ni propeta Ether kenkuana nga aramiden ketdi. Bayat ti panagbasam iti dadduma pay iti libro ni Ether, utobem dagiti bunga ti saan a panangawat kadagiti propeta. Ania ti mapasamak kadagiti tao no “[insardengen] ti Espiritu ti Apo ti nangtarabay kadakuada”? (EEther 15:19).
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.
Ether 12:7–22
Kalpasan ti aggigiddan a panangbasayo kadagitoy a bersikulo, mabalinyo nga irebyu ti sumagmamano a makaparegta a pagarigan ti pammati a nabasayon maipapan iti Libro ni Mormon. Daytoy ti mabalin a mangiturong iti panaglilinnawag maipapan kadagiti pagarigan ti pammati iti pakasaritaan ti pamiliam wenno ti bukodyo a biag—ibilang ti panangisurat kadagitoy a padas no awan pay kenka.
Ether 12:27
Apay a mangted ti Apo kadatayo iti pagkapsutan? Ania ti pasettayo iti panangaramid a “napigsa dagiti nakapsut a banag”? Ania ti paset ti Mangisalakan?
Ether 12:41
Adda kadi naragsak a wagas a pakaisuruam kadagiti annakmo tapno “sapulen[da] … ni Jesus”? Nalabit a ti maysa a wagas ket mangilemmeng iti maysa a ladawan ni Jesus ket awisem dagiti miembro ti pamiliam tapno “sapulen” ken birokenda ti ladawan. Kasano a sapulentayo ni Jesus, ken no kasano a mabendisionantayo no masarakantayo Isuna?
Ether 13:13–14; 15:19, 33–34
Nalabit a makaay-ayo para kadagiti miembro ti pamiliam a mangidasig iti padas ni Ether kadagiti padas da Mormon ken Moroni (kitaen iti Mormon 6; 8:1–10). Kasano nga agpada dagitoy? Kasano a maipada ti dana dagiti Nephite iti pannakadadael iti dana dagiti Jaredite? (idasig ti Ether 15:19 iti Moroni 8:28). Ania dagiti kinapudno a masursurotayo a makatulong kadatayo a mangliklik no ania ti napasamak kadakuada?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Panangisurotayo
Yallukoy dagiti saludsod. Gagangay a managusisa dagiti ubbing. No dadduma nalabit nga ibilangmo dagiti saludsodda kas pakasingaan ti no ania ti padpadasem nga isuro. Ketdi, ibilangmo dagitoy a saludsod kas gundaway. Dagitoy ti pakakitaan a nakasagana dagiti ubbing nga agsursuro—mangtedda kenka iti nalawag a pannakaammo ken pannakaawat kadagiti pakaseknan dagiti ubbingmo ken no kasano ti mariknada maipapan iti no ania ti masursuroda (kitaen iti Panangisuro iti Wagas ti Mangisalakan, 25–26).
Nakaskasdaaw dagiti Padto ni Ether, ni Walter Rane