Nobiembre 30–Disiembre 6. Moroni 1–6: ‘Tapno Maiturongda iti Umno a Dalan,’” Umaykayo, Sumurot Kaniak—Para kadagiti Indibidual ken Pamilia: Libro ni Mormon 2020 (2020)
Nobiembre 30–Disiembre 6. Moroni 1–6,” Umaykayo, Sumurot Kaniak—Para kadagiti Indibidual ken Pamilia: 2020
Minerva Teichert (1888–1976), Mamuniag ni Alma iti Dandanum ti Mormon, 1949–1951, oil on masonite, 35 x 48 inches. Brigham Young University Museum of Art, 1969
Nobiembre 30–Disiembre 6
Moroni 1–6
“Tapno Maiturongda iti Umno a Dalan”
Insurat ni Moroni no ania ti ninamnamana a “napategto … iti masanguanan nga aldaw” (Moroni 1:4). Ania ti masarakam iti Moroni 1–6 nga adda pategna kenka? Isuratmo no ania ti matakuatam, ket ibilang ti panangibinglay iti daytoy iti maysa a tao a makitana a napateg daytoy.
Isuratmo dagiti Impresionmo
Kalpasan ti panangileppasna iti kasuratananti amana maipanggep kadagiti Nephite ken panagyababana iti kasuratan dagiti Jaredite, immuna a napanunot ni Moroni a nalpasen ti aramidna a panangitalimeng iti kasuratan (kitaen iti Moroni 1:1). Ania pay ti masao maipanggep iti dua a pagilian a nakaro a nadadael? Ngem nakita ni Moroni ti panawentayo (kitaen iti Mormon 8:35), ket naparegta isuna nga “isurat ti sumagmamano pay a bambanag, a mabalin a napategto … iti masakbayan nga aldaw” (Moroni 1:4). Ammona nga umay idin ti nasaknap nga ikakalilis iti kinapudno, a mangyeg iti pannakatikaw maipanggep kadagiti ordinansa ti priesthood ken relihion iti sapasap. Mabalin a daytoy ti gapu no apay a nangyeg isuna kadagiti detalye a manglawlawag maipapan iti sakramento, panagbuniag, pannakaited ti sagut ti Espiritu Santo, ken dagiti bendision ti pannakiummong kadagiti pada a mamatpati tapno “maiturong [ti tunggal maysa] iti umno a dalan, … nga agtalek laeng iti kinapateg ni Cristo, nga isu ti akin-aramid ken nangpasantak iti pammati[tayo]” (Moroni 6:4). Dagiti napapateg a nalawag a pannakammo ken pannakaawat a kas kadagitoy ti mangted kadatayo iti rason tapno agyaman gapu ta tinaginayon ti Apo ti biag ni Moroni tapno mabalinna nga “isurat ti sumagmamano pay a banag”(Moroni 1:4).
Dagiti Kapanunotan para iti Bukod a Panagadal iti Nasantuan a Kasuratan
Agtalinaed a napudno dagiti disipulo ni Jesucristo iti laksid ti pannakasuppiat.
Para iti sumagmamano a tao, nalaklaka ti agbalin a napudno iti panawen ti gin-awaken liwliwa. Ngem kas disipulo ni Jesucristo, nasken nga agtalinaedtayo a napudno uray no maipasangotayo kadagiti pannubok ken pannakasupiat. Bayat ti panangbasam iti Moroni 1, ania ti mangparegta kenka maipapan iti kinapudno ni Moroni iti Apo ken iti takemna? Kasano a masurotmo ti pagwadanna?
Nasken a maannong dagiti ordinansa ti priesthood kas imbilin ti Apo.
Idi panawen ti panagserbina iti daga, naawat ken inannong ti Mangisalakan dagiti sagrado nga ordinansa, kas iti panagbuniag (kitaen iti Mateo 3:13–17; Patarus ni Joseph Smith, Juan 4:1–3 [iti Bible appendix]), pannakaorden iti priesthood (kitaen iti Marcos 3:13–19), ken ti sakramento (kitaen iti Mateo 26:26–28). Nupay kasta, gapu iti Dakkel nga Ikakalilis iti Kinapudno, matikaw ti adu a tattao iti agdama maipapan iti no kasano ti nasken a pannakaannong dagiti ordinansa—ken uray no kasapulan man dagitoy. Iti Moroni 2–6, nangted ni Moroni kadagiti napapateg a detalye maipapan kadagiti maitudo nga ordinansa ti priesthood a makatulong a malawlawagan ti sumagmamano iti dayta a pannakatikaw. Ania dagiti impresion a sumangbay bayat ti panagsursurom maipapan kadagiti ordinansa kadagitoy a kapitulo? Ti sumaganad ti sumagmamano a saludsod a mabalinmo a damagen a makatulong kenka nga agsursuro:
-
Pannakapatalged (Moroni 2; 6:4). Ania dagiti pangiturong ti Mangisalakan iti Moroni 2:2 a mangisuro kenka maipapan iti ordinansa ti pannakapatalged? Ania iti panagkunam a kaipapanan ti “naaramid ti pannakadalus babaen ti pannakabalin ti Espiritu Santo”? (Moroni 6:4).
-
Pannakaorden iti priesthood (Moroni 3).Ania ti masarakam iti daytoy a kapitulo a makatulong iti maysa a tao nga agsagana a maordenan iti priesthood? Ania ti masarakam a mangtulong ti maysa a tao a mangannong iti panagorden?
-
Ti sakramento (Moroni 4–5; 6:6).Tandaanam dagiti kari kadagiti kararag ti sakramento (kitaen iti Moroni 4:3; 5:2), ket utobem no ania ti ar-aramidem a mangtungpal kadagiti karim. Ania ti maaramidmo a mangawis iti impluensia ti Espiritu a nabilbileg bayat ti panakiramanmo iti sakramento?
-
Panagbuniag (Moroni 6:1–3).Ania ti mabalinmo nga aramiden nga agtultuloy a mangipaay kadagiti naidawat a kasapulan para iti panagbuniag a naited kadagitoy a bersikulo, uray kalpasan a nabuniaganka? Ania ti isingasing dagitoy a bersikulo maipapan iti no ania ti kayat a sawen ti panagbalin a miembro ti Simbaan ni Jesucristo?
Maibatay iti no ania ti nasursurom, kasano a balbaliwam dagiti wagas a pakapagpanunotam, pakairamanam, wenno pangisaganaam kadagiti dadduma para kadagitoy nga ordinansa? Apay a dagitoy nga ordinansa ket napateg a “maannong … babaen kadagiti bilin ni Cristo”? (Moroni 4:1).
Kitaen met iti “Ordinances,” Gospel Topics, topics.ChurchofJesusChrist.org.
Insuro ni Jesus no kasano ti nasken a pannakaannong dagiti ordinansa.
Kittaen dagiti disipulo ni Jesucristo ti pagsayaatan dagiti kararua ti tunggal maysa.
Idinto nga agpayso a datayo amin “turposen[tayo] ti bukod[tayo] a pannakaisalakan” (Mormon 9:27), insuro pay ni Moroni a ti “aggigimong a masansan” kadagiti pada a mamatpati ket makatulong kadatayo nga agtalined “iti umisu a dalan” (Moroni 6:4–5). Bayat ti panangbasam iti Moroni 6:4–9, utobem dagiti bendision a sumangbay manipud iti panagbalin a “naibilang kadagiti kameng ti simbaan ni Cristo” (Moroni 6:4). Kasano a makatulongka a mangpabalin kadagiti padas nga adda kenka ken kadagiti dadduma iti simbaan nga ad-adda pay a kas iti maysa nga iladawan ni Moroni, dadauloka man wenno makiramraman?
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.
Moroni 1; Moroni 6:3
Ania ti kaipapanan ti “panangtallikud iti Cristo”? (Moroni 1:2–3). Kasano a maipakitatayo ti “pangngeddeng[tayo] nga agpaay kenkuana agingga iti panungpalan”? (Moroni 6:3). Mangibinglay kadagiti pagarigan ti tattao nga am-ammom nga addaan iti daytoy a pangngeddeng nga agserbi Kenkuana.
Moroni 4:3; Moroni 5:2
Ti panangbasa kadagiti kararag ti sakramento kas maysa a pamilia ti makaiturong iti panaglilinnawag maipapan iti nararaem a pannakiraman iti sakramento. Nalabit mabalin a pagsasaritaan dagiti miembro ti pamilia dagiti ragup ti balikas manipud kadagitoy a kararag a nangnangruna a napateg kadakuada. Mabalinda pay nga isurat dagiti kapanunotanda maipapan kadagitoy a ragup ti balikas wenno agdrowing iti ladawan a mangtulong kadakuada a mangpanunot maipapan iti Mangisalakan. Mabalinda nga itugot iti miting ti sakramento no ania ti insurat wenno indrowingda tapno mangtulong kadakuada a mangipamaysa kadagiti pampanunotda Kenkuana. Ibagam iti pamiliam ti no kasano ti mariknam maipapan iti sakramento ken ti sakripisio ti Mangisalakan.
Moroni 6:1–4
Ania ti kaipapanan ti addaan iti “nasneban a puso ken napnuan babawi nga espiritu”? (Moroni 6:2). Kasano a mangtulong daytoy kadatayo nga agsagana para iti panagbuniag? Kasano a makatulong daytoy kadatayo kalpasan a nabuniagantayo?
Moroni 6:4–9
Segun kadagitoy a bersikulo, ania dagiti sumagmamano a bendision a sumangbay manipud iti “[pannaka]ibilang kadagiti kameng ti simbaan ni Cristo”? (Moroni 6:4). Apay a kasapulantayo ti Simbaan?
Moroni 6:8
Ania ti isuro daytoy a bersikulo maipapan iti panagbabawi? Ania ti kayat a sawen ti dumawat iti pammakawan nga addaan “naimpusuan a gandat”? (Moroni 6:8). Ibilang ti panagkansion iti maysa a kanta maipapan iti pammakawan, kas iti “Help Me Dear Father” (Children’s Songbook, 99).
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Bukod a Panagadal
Mangsapul iti pakakitaan iti ayat ti Dios. Insuro ni Presidente M. Russell Ballard, “[Ti] ebanghelio ket maysa nga ebanghelio ti ayat—ayat para iti Dios ken ayat para iti tunggal maysa” (God’s Love for His Children,” Ensign, Mayo 1988, 59). Bayat ti panangbasam kadagiti nasantuan a kasuratan, ibilangmo ti panangisurat wenno panangmarka kadagiti pakakitaan iti ayat ti Dios para kenka ken ti amin nga annakna.
Ni Moroni iti Kueba, ni Jorge Cocco