Oktubre 26–Nobiembre 1. Mormon 1–6: ‘Kayatko a Magutugotkayo Amin … nga Agbabawi,’” Umaykayo Sumurot Kaniak—Para kadagiti Indibidual ken Pamilia: Libro ni Mormon 2020 (2020)
Oktubre 26–Nobiembre 1. Mormon 1–6,” Umaykayo, Sumurot Kaniak—Para kadagiti Indibidual ken Pamilia: 2020
Ni Mormon a Mangyab-ababa kadagiti Pinanid, ni Tom Lovell
Oktubre 28–Nobiembre 1
Mormon 1–6
“Kayatko a Magutugotkayo Amin … nga Agbabawi ”
Bayat ti panangbasam iti Mormon 1–6, utobem no ania ti masursurom manipud iti pagwadan ni Mormon. Isuratmo no ania ti nariknam a makaparegta nga aramidem.
Isuratmo dagiti Impresionmo
Saan nga insurat ni Mormon ti “sangabukel a pakaammuan” ti “nakaal-alingget a buya” ti kinadangkes ken panagpapatay a nakitana kadagiti Nephite (Mormon 2:18; 5:8). Ngem no ania ti insuratna iti Mormon 1–6 ket umdas a mangipalagip kadatayo no kasano ti kapaut ti panagbalin a nadangkes dagiti nalinteg a tao. Iti baet ti kasta a napalalo a kinadangkes, awan maysa a makababalaw ken ni Mormon iti pannakabannogna ken kasta met iti pannakaupayna. Ngem babaen iti amin a nakita ken napadasanna, dina kaano man napukaw ti riknana iti naindaklan nga asi ti Dios ken ti natibker a pammatina a ti panagbabawi ket ti wagas a pangawatan iti daytoy. Ket nupay saan nga inawat dagiti bukodna a tao ni Mormon ti agpakpakaasi nga awisna nga agbabawida, ammona nga adda dakdakkel nga ummong a nga allukoyenna. “Adtoy,” impakdaarna, “agsuratak kadakayo amin nga adda iti igid ti daga.” Iti sabali a pannao, nagsurat kadakayo (kitaen iti Mormon 3:17–20). Ket ti mensahena kadakayo, itiagdama, ket ti isu met la a mensahe a nakaisalakanan koma dagiti Nephite iti panawenda: “Mamati iti ebanghelio ni Jesucristo. … “Agbabawi ken agsagana a dumatag iti pangukoman ni Cristo” (Mormon 3:21–22).
Dagiti Kapanunotan para iti Bukod a Panagadal iti Nasantuan a Kasuratan
Makapagbiagak a nalinteg iti laksid ti kinadangkes iti aglawlawko.
Iti rugi ti umuna a kapitulo ti Mormon, madlawmonto dagiti kangrunaan a paggigiddiatan iti nagbaetan ni Mormon ken dagiti tao iti aglawlawna. Bayat ti panangbasam iti Mormon 1, ibilangmo a paggigidiaten dagiti kababalin ken tarigagay ni Mormon kadagiti kababalin ken tarigagay dagiti taona. Kitaen dagiti bunga a simmangbay kenkuana ken kadakuada (masarakamto ti maysa a pagarigan kadagiti bersikulo 14–15). Ania ti masursurom a mangparegta kenka nga agbiag a sililinteg iti nadangkes a lubong?
Bayat ti panangbasam iti Mormon 2–6, ituloymo a kitaen no kasano nga impakita ni Mormon ti pammatina iti Nailangitan nga Ama ken ni Jesucristo iti laksid dagiti dakes nga impluensia iti aglawlawna.
Dangadang, ni Jorge Cocco
Ti nadiosan a panagleddaang ket mangiturong iti pudno ken agnanayon a panagbalbaliw.
Idi nakita ni Mormon ti panagleddaang dagiti tattaona, ninamnamana nga agbabawida. Ngem saan a panagbabawi ti pagledleddaanganda” (Mormon 2:13)—saan a ti kita ti nadiosan a panagleddaang ti mangiturong iti pudno a panagbalbaliw (kitaen iti 2 Taga Corinto 7:8–11). Ketdi, narikna dagiti Nephite ti nainlubongan a panagleddaang (kitaen iti Mormon 2:10–11). Tapno maawatan ti paggiddiatan ti nadiosan a panagleddaang ken nainlubongan a panagleddaang, ibilang ti panagaramid iti tsart a pangisuratam no ania ti masursurom manipud iti Mormon 2:10–15 maipapan kadagitoy dua a kita ti panagleddaang. Mabalin a kastoy ti langa ti tsartmo:
|
Nadiosan a panagleddaang |
Nainlubongan a panagleddaang |
|---|---|
Nadiosan a panagleddaang Umasideg ken ni Jesus (bersikulo 14) | Nainlubongan a panagleddaang Mangilunod iti Dios (bersikulo 14) |
Nadiosan a panagleddaang | Nainlubongan a panagleddaang |
Nadiosan a panagleddaang | Nainlubongan a panagleddaang |
Bayat ti panangpanunotmo no ania ti masursurom, ibilang no kasano a makaimpluensia daytoy kadagiti panagkagumaanmo a mangparmek iti basol ket agbalin nga ad-adda a kas iti Nailangitan nga Ama ken ti Mangisalakan.
Kitaen met ti Dieter F. Uchtdorf, “You Can Do It Now!” Ensign wenno Liahona, Nob. 2013, 55–57.
Nasken a kanayon a bigbigek ti impluensia ti Dios iti biagko.
Insurat ni Mormon ti maysa a pagkapsutan a nakitana kadagiti Nephite: napaayda a nangbigbig kadagiti wagas a nangbendisionan kadakuada ti Apo. Inggunamgunam kadatayo ni Presidente Henry B. Eyring “a mangsapul iti wagas a pakabigbigan ken pakalagipan iti kinasayaat ti Dios. … Agkararag ken agutob, agdamag kadagiti saludsod: Nangted kadi ti Dios iti maysa a mensahe a para laeng kaniak? Nakitak kadi ti Imana iti biagko wenno iti biag dagiti annakko? … Paneknekak nga ay-ayatennatayo ken bendisionannatayo, iti nawadwadwad ngem iti nabigbig pay laeng ti kaaduan kadatayo” (O Remember, Remember,” Ensign wenno Liahona, Nob. 2007 , 2007, 67, 69).
Bayat ti panangbasam iti Mormon 3:3, 9, mabalinmo nga utoben no kasano a bigbigbigem ti impluensia ti Dios iti biagmo. Ania dagiti bendision a sumangbay no bigbigenyo ti impluensiana? Ania dagiti bunga ti saan a panangbigbig Kenkuana? (kitaen iti Mormon 2:26).
Agtakder ni Jesucristo a sitatanggaya dagiti takiagna a mangawat kaniak.
Saan nga inawat dagiti Nephite dagiti pannursuro ni Mormon, ngem adda namnamana a mangimpluensia kenka ti kasuratanna. Bayat ti panangbasam iti Mormon 5:8–24 ken 6:16–22, ania ti masursurom maipapan kadagiti bunga ti basol? Ania ti masursurom manipud kadagitoy a binatog maipapan iti rikna kenka ti Nailangitan nga Ama ken ni Jesus, uray no agbasolka? Kasano ti nariknam ken ni Jesucristo nga umay kenka a nakatanggaya dagiti takiagna? Ania ti mariknam a makaparegta nga aramidem kas bungana?
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.
Mormon 1:2
Ania ti kaipapanan ti panagbalin a “napardas nga agpaliiw”? Masarakam dagiti nalawag a pannakaammo ken pannakaawat iti artikulo ni Elder David A. Bednar a “Quick to Observe” (Ensign, Dis. 2006, 30–36). Kasano a ti sagut ti panagbalin a napardas nga agpaliiw ket maysa a bendision ken ni Mormon? Kasano a makapagbalin daytoy a bendision kadatayo?
Mormon 1:1–6, 15; 2:1–2
Maawatan kadi dagiti ubbing iti pamiliam a mabalinda a padur-asen dagiti naindaklan a naespirituan a kababain ken bileg uray no ubbingda pay laeng? Matulongan ida ti pagwadan ni Mormon. Ibilang ti panangaramid iti linia ti panawen [timeline] ti kinaubing ken kinaagtutubo ni Mormon, nga aramaten dagiti tawen ken pasamak a naited iti Mormon 1:1–6, 15 ken 2:1–2. Bayat ti panangilawlawagmo kadagiti kababalin ken padas ni Mormon, isaritam dagiti kababalin nga adda kadagiti annakmo a mangparegta kenka ken dagiti dadduma nga adda iti aglawlawda.
Mormon 2:18–19
Ania dagiti inaramat ni Mormon a balikas a mangiladawan ti lubong a nagnaedanna? Kasano a napagtalinaedna ti namnama iti laksid ti kinadangkes iti aglawlawna? Kasano a maaramid ti pamiliatayo ti isu met laeng?
Mormon 3:12
Kasano ti narikna ni Mormon maipapan kadagiti tao iti aglawlawna, uray no nadangkesda? Ania ti maaramidtayo tapno mapadur-as ti kita ti ayat nga adda kenkuana?
Mormon 5:2
Apay a mabalin nga agkedkedtayo nga umawag iti Nailangitan nga Ama no agkarkarigatantayo? Ania ti mabalin nga aramidentayo tapno ad-adda a makapagpannuray iti Nailangitan nga Ama?
Mormon 5:16–18
Tapno matulongam ti pamiliam a mangiladawam iti panunotda no ania ti kaipapanan ti “ mapapanawda a kasla taep iti angin” (bersikulo 16), mangpigis iti papel iti babassit a pedaso ket papuyotam dagitoy kadagiti miembro ti pamilia. Ilawlawag kadakuada a ti taep ket ukis a naggapu iti bukel, ket nalag-an unay daytoy tapno mayangin. Kasano ti panagbalin nga “awan Cristo ken Dios iti lubong” (bersikulo 16) ket maipada iti taep iti angin?
Para iti ad-adu pay a kapanunotan iti panangisuro kadagiti ubbing, kitaen iti balabala itoy a lawas iti Umaykayo, Sumurot Kaniak—Para iti Primary.
Panangpadur-as iti Panangisurotayo
Mangisuro iti nalawag ken simple a doktrina. Ti ebanghelio ti Apo ket napintas iti kinasimplena (kitaen iti DK 133:57). Imbes a padpadasem a mangliwliwa iti pamiliam kadagiti adalen nga agkasapulan iti adu a panagsagana, penkem a no ania ti isurom ket nakapamaysa iti natarnaw ken simple a doktrina.
Ti Namilagruan a Libro ni Mormon, ni Joseph Brickey