“Nobiembre 2–8. Mormon 7–9: ‘Agsaritaak Kadakayo a Kasla Addakayo,’” Umaykayo, Sumurot Kaniak—Para kadagiti Indibidual ken Pamilia: Libro ni Mormon 2020 (2020)
“Nobiembre 2–8. Mormon 7–9,” Umaykayo, Sumurot Kaniak—Para kadagiti Indibidual ken Pamilia: 2020
Nobiembre 2–8
Mormon 7–9
“Agsaritaak Kadakayo a Kasla Addakayo”
Adaan pammati da Mormon ken ni Moroni a ti kasuratanda ti mangparegta kadagiti agbibiag kadagiti ud-udina nga aldaw. Bayat ti panangbasam iti Alma 7–9, ilistam dagiti parikna nga umay kenka maipapan no kasano a mayaplikarmo ti no ania ti masursurom.
Isuratmo dagiti Impresionmo
Ammo da Mormon ken Moroni no ania ti rikna ti agmaymaysa iti nadangkes a lubong. Para ken ni Moroni mabalin a napalalo unay ti panaglidayna kalpasan ti ipapatay ti amana iti paggugubatan ken nadadael dagiti Nephite. “Natdaak a maymaysa,” insuratna. “Awan gagayyemko wenno asino man a papanak” (Mormon 8:3, 5). Mabalin a kasla awanen ti namnama dagiti banag, ngem nasarakan ni Moroni ti namnama iti pammaneknekna maipapan iti Mangisalakan ken ti pannakaammona nga “agtultuloyto dagiti agnanayon a panggep ti Apo” (Mormon 8:22). Ket ammo ni Moroni a ti kangrunaan a papel kadagita nga agnanayon a panggep ket akmento ti Libro ni Mormon—ti kasuratan a sipapasnek nga ilepleppasnan, ti kasuratan nga iti maysa nga aldaw “agranniagto manipud iti kasipngetan” ket mangisubli iti adu a tattao “iti pammatida ken Cristo” (Mormon 8:16; 9:36). Ti pammati ni Moroni kadagitoy a kari ti namagbalin a posible tapno ipakdaarna kadagiti masakbayan nga agbasbasa iti daytoy a libro, “Agsaritaak kadakayo a kasla addakayo” ken “Ammok a denggenyonto dagiti balikasko” (Mormon 8:35; 9:30). Ita adda kadatayon dagiti balikasna, ket ti aramid ti Apo ket agtultuloy a maaramid, gapu ta nagtalinaed da Mormon ken Moroni a napudno iti misionda, uray no agmaymaysada.
Dagiti Kapanunotan para iti Bukod a Panagadal iti Nasantuan a Kasuratan
Nasken a mamatiak ken ni Jesucristo ken “agtalekak” iti ebangheliona.
Dagiti naudi a naisurat a balikas ni Mormon, a masarakan iti Mormon 7, ket maiturong kadagiti an-annabo dagiti Lamanite iti ud-udina nga aldaw, kasta met a naglaonda kadagiti kinapudno a para kadatayo amin. Ania ti isuro kenka ti mensahe ni Mormon maipapan ken ni Jesucristo ken ti ebangheliona? Apay ngata a pinili ni Mormon daytoy a mensahe a mangileppas kadagiti sinuratna?
Mormon 7:8–10; 8:12–22; 9:31–37
Naindaklan ti pateg ti Libro ni Mormon.
Sinaludsod ni Presidente Russell M. Nelson: “No naidiaya kenka dagiti diamante wenno rubi wenno ti Libro ni Mormon, ania koma ti piliem? Kinapudnona, ania ti nain-indaklan ti pategna kenka?” (“The Book of Mormon: What Would Your Life Be Like without It?” Ensign wenno Liahona, Nob. 2017, 61).
Ammo da Mormon ken Moroni a ti kasuratan nga iduldulinda ket addaanto iti naindaklan a pateg iti aldawtayo, isu a nagaramidda iti dadakkel a sakripisio a mangisagana ken mangsalaknib iti daytoy. Bayat ti panangbasam iti Mormon 7:8–10; 8:12–22; and 9:31–37, ibilang no apay a nakapatpateg ti kasuratan iti panawentayo. Masarakam dagiti mainayon a nalawag a pannakaammo ken pannakaawat iti 1 Nephi 13:38–41; Nephi 3:11–12; ken Doktrina ken Katulagan 33:16; 42:12–13. Ania dagiti padas a nakatulong kenka a nangammo nga addaan iti naindaklan a pateg ti Libro ni Mormon?
Dagiti sinurat dagiti propeta iti Libro ni Mormon ket mayaplikar kadatayo.
Naisurat ti Libro ni Mormon para iti aldawtayo.
Impakita ni Jesucristo ken ni Moroni no ania ti napasamak idi dumteng ti Libro ni Mormon (kitaen iti Mormon 8:34–35), ken no ania ti nakita ni Moroni a nangiturong kenkuana tapno mangted kadagiti nawada a ballaag para iti aldawtayo. Bayat ti panangbasam iti Mormon 8:26–41 ken 9:1–30, utobem no adda dagiti ania man a tanda kadagitoy a galad ken tignay iti biagmo. Ania ti mabalinmo nga aramidem a maiduma?
Kas pagarigan, naglaon ti Mormon 9:1–30 iti mensahe ni Moroni kas sungbat iti naisaknap a kinaawan iti pammati ken ni Jesucristo a nasirmatana iti aldawtayo. Ibilangmo ti panangisurat iti no ania ti masursurom manipud kadagiti balikasna maipapan iti sumaganad:
-
Dagiti bunga ti saan a panamati ken Cristo (dagiti bersikulo 1–6, 26).
-
Ti kapateg ti panamati iti maysa a Dios ti paltiing ken dagiti milagro (dagiti bersikulo 7–20)
-
Ti balakad ni Moroni kadatayo (dagiti bersikulo 21–30)
Ania ti masursurom ken ni Moroni a makatulong kenka a mangyas-asideg kadagiti dadduma iti Nailangitan nga Ama ken ni Jesucristo?
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.
Mormon 7:5–7, 10; 9:11–14
Ania ti isuro kadatayo dagitoy a bersikulo maipapan iti plano ti Nailangitan nga Ama ken apay a kasapulantayo ti Mangisalakan?
Mormon 7:8–10
Ania ti nasursurotayo iti panagadaltayo iti Libro ni Mormon itoy a tawen a nakatulong a mangpatibker iti pammatitayo iti Biblia? Tapno mangirugi iti panaglilinnawag, mabalin a aggigiddankayo nga agbasa iti sumagmamano a nasantuan a kasuratan manipud iti Libro ni Mormon ken ti Biblia a mangisuro kadagiti agpadpada a kinapudno, kas iti Alma 7:11–13 ken Isaias 53:3–5 wenno 3 Nephi 15:16–24 ken Juan 10:16
Mormon 8:1–9
Kasano koma a marikna ti panagmaymaysa a kas iti narikna idi ni Moroni? Ania ti makaawis iti imatangtayo maipapan iti aramid a naileppasna?
Mormon 8:12,17–21; 9:31
Ibilang ti panagbasa kadagitoy a bersikulo kas pamilia ken kalpasanna basaen dagiti sumaganad a palawag ni Elder Jeffrey R. Holland: “Malaksid iti kasasaad ti kakaisuna a perpekto a Bugbugtong nga Anakna, dagiti saan a perpekto a tao ket katrabaho amin ti Dios. … No adda makitam a pagkurangan, laglagipem a ti limitasion ket saan nga iti kinanadiosan ti aramid” (“Lord, I Believe,” Ensign wenno Liahona, Mayo 2013, 94). Apay a napeggad ti agpokus kadagiti pagkurangan ti dadduma, karaman dagiti nagsurat iti Libro ni Mormon?
Mormon 8:36–38
Ania ti kayat a sawen ti mangaklon iti nagan ni Jesucristo kadatayo? Apay a mabain ti maysa a tao a mangaklon iti bagina ti nagan ni Jesucristo? Kasano a makapagbalintayo a natured iti pammaneknektayo maipapan iti Mangisalakan?
Mormon 9:16–24
Kasapulan dagiti masinunuo nga ingrediente tapno agbalin a naballigian ti maysa nga eksperimento wenno recipe). Ibilangmo ti panangaramid iti maysa nga eksperimento wenno panagluto iti maysa a paborito a recipe kas pamilia sakbay ti panangbasa iti Mormon 9:16–24. Bayat ti panangbasam kadagiti bersikulo (nangnangruna dagiti bersikulo 20–21), sapulem dagiti “ingrediente” a mamagbalin a mapasamak dagiti milagro. Ania dagiti milagro a makitatayo iti lubong iti lawlawtayo ken iti pamiliatayo?
Para iti ad-adu pay a kapanunotan iti panangisuro kadagiti ubbing, kitaen iti balabala itoy a lawas iti Umaykayo, Sumurot Kaniak—para iti Primary.
Panangpadur-as iti Bukod a Panagadal
Agibasar kadagiti opisial a resources iti Simbaan. No adda dagiti saludsodmo iti ebanghelio, dagiti kasasayaatan a pagalaan kadagiti sungbat ket kararag, dagiti nasantuan a kasuratan, dagiti balikas dagiti sibibiag a propeta, ken dadduma pay nga opisial a publikasion ti Simbaan (kitaen iti Panangisuro iti Wagas ti Mangisalakan, 17–18, 23–24).
Ni Mormon a Mangyab-ababa kadagiti Pinanid, ni Jon McNaughton