“Nobiembre 16–22. Ether 6–11: ‘Tapno Mapapanaw ti Dakes,’” Umaykayo, Sumurot Kaniak—Para kadagiti Indibidual ken Pamilia: Libro ni Mormon 2020 (2020)
“Nobiembre 16–22. Ether 6–11,” Umaykayo, Sumurot Kaniak—Para kadagiti Indibidual ken Pamilia: 2020
Ilung-awkayto Manen Manipud iti Tukot Baybay, ni Jonathan Arthur Clarke
Nobiembre16–22
Ether 6–11
“Tapno Mapapanaw ti Dakes”
No maipanggep iti kasuratan dagiti Jaredite, nagkomento ni Mormon “nasken unay a maammuan ti amin a tao dagiti banag a naisurat iti daytoy a pakaammo” (Mosiah 28:19). Laglagipem daytoy bayat ti panangbasam iti Ether 6–11. Apay a nasken dagitoy a banag—wenno pagsayaatan—kenka ken dagiti ay-ayatem?
Isuratmo dagiti Impresionmo
Ginasgasut a tawen kalpasan ti pannakadadael dagiti Jaredite, natakuatan dagiti Nephite dagiti nabati a nagkauna a sibilisasionda. Maibilang kadagitoy a nabati ket maysa a namilagruan a kasuratan—dagiti pinanid ti “puro a balitok” a “napno iti kitikit” (Mosiah 8:9). Narikna ni Limhi, ti ari a Nephite, a napateg daytoy a kasuratan: “Awan duadua a naglaon dagitoy a pinanid iti naindaklan a kinadatdatlag,” kinunana (Mosiah 8:19). Ita a panawen addaankayo iti daytoy nayababa a kasuratan, naipatarus iti pagsasaoyo, ket maaw-awagan daytoy iti libro ni Ether. Naggapu manipud iti isu met la a kasuratan a dagiti Nephite ket “saan a marukod ti tarigagayda” nga agbasa, ket idi inaramidda, “napnoda iti ladingit; nupay kasta naikkanda iti nawada a pannakaammo, ket iti dayta nagrag-oda” (Mosiah 28:12, 18). Bayat ti panangbasam maipapan iti ibabangon ken nakaam-ames a pannakadadael dagiti Jaredite, masarakamto dagiti adu a makapaladingit a kanito. Ngem saanmo a libtawan ti rag-o ti panagsursuro kadagiti adalen manipud iti daytoy a pakasaritaan. Kalpasan ti amin, kas insurat ni Moroni, “nakem ti Dios a maipakita kadakayo dagitoy a banag” (Ether 8:23), ta no makasursurotayo manipud kadagiti pannakapaay ken balligi dagiti Jaredite, “tapno mapapanaw ti dakes, ken … dumteng ti panawen nga awanton ti bileg ni Satanas iti puspuso dagiti annak ti tattao” (Ether 8:26).
Dagiti Kapanunotan para iti Bukod a Panagadal iti Nasantuan a Kasuratan
Idalannakto ti Apo nga agturong iti naikari a dagak.
Masarakam dagiti naespirituan a nalawag a pannakaammo ken pannakaawat no idasigmo ti panagdaliasat dagiti Jaredite iti taaw iti panagdaliasatmo iti biag iti daga. Kas pagarigan, ania ti impaay ti Apo a nangsilaw ti dalanmo kas dagiti bato dagiti bilog dagiti Jaredite? Ania ti mabalin nga ibagi dagiti bilog, wenno dagiti angin a “nangipugso nga agturong iti naikari a daga”? (Ether 6:8). Ania ti masursurom manipud kadagiti tignay dagiti Jaredite kasakbayan, kabayatan, ken kalpasan ti panagdaliasat? Kasano nga indaldalannaka ti Apo nga agturong iti naikari a daga?
Panagdaliasat dagiti Jaredites iti bangir ti Asia, ni Minerva Teichert
Ether 6:5–18, 30; 9:28–35; 10:1–2
Bendisionannak ti Apo no napakumbabaak.
Numan kasla rimbawan ti kinatangig ken kinadangkes ti pakasaritaan dagiti Jaredite, add met dagiti pagarigan ti kinapakumbaba kadagitoy a kapitulo—nangnangruna iti Ether 6:5–18, 30; 9:28–35; ken 10:1–2. Ti panangutob kadagiti sumaganad a saludsod ket makatulong kenka a makasursuro manipud kadagitoy a pagarigan: Apay nga impakumbaba dagitoy a Jaredite ti bagbagida kadagitoy a kasasaad? Ania ti inaramidda a mangipakita iti kinapakumbabada? Kasano a naparaburanda kas bungana? Makita nga iti sumagmamano a kasasaad, napilit dagiti tao nga agbalin a napakumbaba babaen kadagiti kasasaadda. Ibilangmo no ania ti maaramidmo a sitatallugod a “magna a sipapakumbaba iti sango ti Apo” (Ether 6:17) imbes a mapilpilit nga agbalin a napakumbaba (kitaen iti Mosiah 4:11–12; Alma 32:14–18).
Kitaen met iti “Humility,” Gospel Topics, topics.ChurchofJesusChrist.org.
Bendisionan dagiti nalilinteg a dadaulo dagiti tao nga idauluanda.
Dagiti kapitulo 7–11 iti Ether ket mangsakup iti 28 a kaputotan. Numan pay awan unay ti adu a detalye a maited iti kasta a kailetna nga espasio, maysa a pagtuladan ti alisto nga agtaud: ti nalinteg a panangidaulo ti mangiturong kadagiti bendision ken kinarang-ay, idinto a ti nadangkes a panangidaulo ti mangiturong ti pannakaadipen ken pannakadadael.
Iti baba dagiti sumagmamano kadagiti ari a nadakamat kadagitoy a kapitulo. Basaen dagiti mainaig a bersikulo, ket kitaen no ania ti masursurom manipud kadagiti pagariganda—positibo ken negatibo—maipapan iti panangidaulo. Bayat ti panangaramidmo, panunotem ti maipapan kadagiti gundaway a mabalin nga adda kenka a mangidaulo wenno mangimpluensia iti dadduma iti pagtaengam, iti komunidadmo, iti takemmo iti Simbaan, ken dadduma pay.
-
Orihah—Ether 6:30–7:1
-
Shule—Ether 7:23–27
-
Jared—Ether 8:1–7, 11–15
-
Emer ken Coriantum—Ether 9:21–23
-
Heth—Ether 9:26–30
-
Shez—Ether 10:1–2
-
Riplakish—Ether 10:5–8
-
Morianton—Ether 10:10–11
-
Lib—Ether 10:19–28
-
Ethem—Ether 11:11–13
Ania ti nalimed a kinnunsabo?
No agkumplot ti dua wenno ad-adu pay a tattao tapno mangipatungpal a nalimed kadagiti nadangkes nga aramidda, mairamanda iti nalimed a kinnunsabo. Masansan a maguyugoyda babaen ti panagtarigagay iti bileg ken kinabaknang. Kas nayon iti nalimed a kinnunsabo a nailadawan iti Ether 8:7–18, masarakan ti dadduma pay a pagarigan iti Helaman 1:9–12; 2:2–11; 6:16–30, ken Moises 5:29–33. Iti Ether 8:18–26, iladawan ni Moroni dagiti bunga dagiti nalimed a kinnunsabo (kitaen met iti Ether 9:4–12) ket ballaagannatayo a saan a mangsuporta kadagitoy.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.
Ether 6:2–12
Magustuan ngata ti pamiliam a mangyakem iti panagdaliasat dagiti Jaredite iti naikari a daga? Mabalin nga aramatem ti maysa a nasipnget a kuarto a kas bilog ket dagiti flashlight a mangibagi kadagiti agan-andap a bato. Mabalinyo a pagsasaritaan ti maipapan no kasano nga impakita dagiti Jaredite ti pammatida iti Apo babaen ti ipapanda kadagiti bilog, iti laksid ti pannakaammoda a “mairarebda iti tukot ti baybay” (Ether 6:6). Kalpasan ti panangbasa iti bersikulo 9, mabalin nga ibinglay dagiti miembro ti pamilia dagiti paboritoda a himno a pagdaydayaw ket aggigiddan a kantaenda dagitoy. Kasano a maidasig dagiti pagtaengantayo kadagiti bilog dagiti Jaredite? Ania ti naikari a daga a pangiturongan ti Apo a papanan ti pamiliatayo?
Ether 6:22–23
Iti unos daytoy a lawas, mabalin a buyaen ti pamiliam no kasano a naipatungpal ti ballaag ti propeta ti kabsat ni Jared maipapan iti pannakaadipen. Ania dagiti ballaag nga inted dagiti dadaulo ti Simbaan kadatayo? Iti ania a wagas a ti saan a panangtungpal iti balakadda ket mangiturong iti pannakaadipen?
Ether 8:23–26
Segun kadagitoy a bersikulo, apay a nabilin ni Moroni a mangisurat “kadagitoy a banag” maipapan kadagiti nalimed a kinnunsabo? (Ether 8:23). Ania ti nasursurotayo manipud iti libro ni Ether a makatulong kadatayo a manggun-od kadagiti bendision a nailadawan iti bersikulo 26?
Ether 9:11
Kasano nga apektuan dagiti tarigagaytayo dagiti pilitayo? Ania ti maaramidtayo kas pamilia tapno mapennek a tarigagayantayo dagiti banag ti Dios?
Ether 11:8
Tapno ad-adu ti masursurom maipapan iti asi ti Dios kadagiti agbabawi, mabalinmo a basaen ti Mosiah 26:29–30; 29:18–20; Alma 34:14–16; wenno Moroni 6:8. Nalabit a mabalin nga ibingay dagiti miembro ti pamilia dagiti pagarigan ti asi ti Dios manipud kadagiti nasantuan a kasuratan wenno manipud iti bukodda a biag.
Para iti ad-adu pay a kapanunotan iti panangisuro kadagiti ubbing, kitaen iti balabala itoy a lawas iti Umaykayo, Sumurot Kaniak—Para iti Primary.
Panangpadur-as iti Bukod a Panagadal
Agtignayka iti no ania ti masursurom. Ti panagsursuro iti ebanghelio ket mangiraman iti ad-adda pay ngem iti panagbasa ken panagutob. Masansan nga ad-adu ti masursurotayo babaen ti panagtignay a mayannurot kadagiti kinapudno iti nasantuan a kasuratan (kitaen iti Juan 7:17. Anianto ti aramidem a mangyaplikar iti no ania ti nabasam iti Ether 6–11?
Dagiti Bilog dagiti Jaredite, ni Gary Ernest Smith