dagiti bilog ti Jaredite iti baybay

Ilung-awkayonto Manen Manipud iti Tukot ti Baybay, ni Jonathan Arthur Clarke

Nobiembre 16–22

Ether 6–11

“Tapno Mapapanaw ti Dakes”

Saan a pangiturong dagiti kapanunotan iti daytoy a balabala a nasken a surotem. Makatulongda iti kabaelam iti panagparsua ken mangyawis iti pammaregta.

Isuratmo Dagiti Impresionmo

icon iti panagbibinninglay

Yawis ti Panagbibinninglay

Usarem dagiti ladawan manipud kadagiti balabala itoy a lawas ken napalabas a lawas iti Umaykayo, Sumurot Kaniak—Para kadagiti Indibidual ken Pamilia a mangtulong kadagiti ubbing a mangrebyu no ania dagiti nasursuroda maipapan kadagiti Jaredite a bumalbalasiw iti baybay. Pagsisinublaten ida a mangibinglay no ania ti ammoda.

icon iti panangisuro

Isuro ti Doktrina: In-inaudi nga Ubbing

Ether 6:2–12

Maliwliwanak ti Nailangitan nga Ama no mabutengak.

Nalabit a nakabutbuteng para kadagiti Jaredite a “maipuruak ti angin kadakuada kadagiti dalluyon ti baybay” (Ether 6:5). Ngem sinalakniban ken tinulongan ti Apo ida. Kasano a matulongam dagiti ubbing nga umasideg iti Apo no mariknada ti buteng?

Dagiti Mabalin nga Aktibidad

• Babaen iti panagusar kadagiti balikas ken ragup dagiti balikas manipud iti Ether 6:2–12, iladawanmo kadagiti ubbing ti panagdaliasat dagiti Jaredite iti baybay. Awisem dagiti ubbing nga agpammarang nga umul-ulida kadagiti bilog ken agpammarangda a magargaraw ti bilogda ken masabsabuagan kadagiti dalluyon. Kasano ti rikna ti adda iti pudno a bilog kadagiti nadawel a baybay? Ania ti mabalin nga aramidentayo no mabutengtayo? Aggigiddan a basaen ti bersikulo 7 ken 9 tapno makita no ania ti inaramid dagiti Jaredite idi nagbutengda.

• Isaritam ti maysa a panawen idi nagbutengka ket liniwlliwanaka ti Nailangitan nga Ama. Ibinglaymo kadagiti ubbing ti maysa a himno wenno maysa a kanta a makatulong kenka nga “agyaman ken agdaydayaw iti Apo” (Ether 6:9) iti tulongna. Paibinglay kadagiti ubbing dagiti paboritoda a kanta iti Primary, ken aggigiddan a mangkanta iti sumagmamano kadagitoy.

• Usarem ti panid ti aktibidad itoy a lawas a mangtulong kadagiti ubbing nga agaramid kadagiti papel a bilog. Ilawlawag a nakatulong dagiti bilog kadagiti Jaredite nga agtalinaed a natalged idi nalikmutanda iti danum (kitaen ti Ether 6:7, 10). Ania ti inted ti Nailangitan nga Ama kadatayo tapno agtalinaedtayo a natalged iti panagdaliasattayo nga agsubli Kenkuana?

Ether 6:9, 12, 30; 7:27; 10:2

Makapagyamanak.

Kalpasan ti natalged nga isasangpetda iti naikari a daga, nagyaman unay dagiti Jaredite ta “nagarubos ti luada iti ragsakda” (Ether 6:12). Kasano a mayallukoymo ti naespirituan a panagyaman kadagiti ubbing a sursuruam?

Dagiti Mabalin nga Aktibidad

• Ibasam kadagiti ubbing dagiti ragup ti balikas manipud iti Ether 6:9 ken 12 tapno maisurom kadakuada no kasano nga impakitada dagiti Jaredite ti panagyamanda iti Apo iti panangtulongna kadakuada a makadanon iti naikari a daga. Kiddawen kadagiti ubbing a manginagan iti sumagmamano a banag a pagyamananda. Aggigiddan a mangkansion, kas iti inaramid dagiti Jaredite, iti maysa a kanta a mangipeksa iti panagyaman, kas iti “I Thank Thee, Dear Father” (Children’s Songbook, 7).

• Ibasam kadagiti ubbing ti Ether 10:2 tapno maipakita nga uray kalpasan ti adu a tawen, nalagip dagiti Jaredite no kasano a tinulongan ti Apo dagiti kapuonanda nga agballasiw iti baybay. Tulongam dagiti ubbing nga agpanunot kadagiti wagas a nangbendisionan kadakuada ti Apo. Kalpasanna pagdrowingem dagiti ubbing kadagiti ladawan a mangipalagip kadakuada maipapan kadagitoy a bendision (wenno tulongam ida nga agpili manipud iti sumagmamano a ladawan nga itugotmo, nalabit manipud iti maysa a magasin ti Simbaan).

Ether 7:24–27

Mabendisionannak no surotek ti propeta.

Nalawag nga ipakita ti Libro ni Ether a no suroten dagiti Jaredite dagiti propeta, mabendisionanda, ken no dida awaten dagiti propeta, ad-adda nga agrigat ti panagbiagda. Agpanunot kadagiti wagas a pakatulongam kadagiti ubbing a mangkita a pumudno ti kasta met laeng kadatayo.

Dagiti Mabalin nga Aktibidad

• Ipakita ti ladawan ti maysa a sibibiag a propeta, ken saludsodem kadagiti ubbing no ania ti ammoda maipapan kenkuana. Ania ti aramiden ti maysa a propeta? Ilawlawag nga addaan met dagiti Jaredite kadagiti propeta, ket no surotenda ti propeta, mabendisionan ken naragsakda (kitaen iti Ether 7:24–27). Kasano a masurottayo ti propeta?

• Aggigiddan nga agkansion iti maysa a kanta maipapan kadagiti propeta, kas iti “Follow the Prophet” (Children’s Songbook, 110–11; kitaen met iti Libro ti Arte ti Ebanghelio, num. 4–27, 67–87). Kasaritam dagiti ubbing maipapan kadagiti banag nga insuro dagiti propeta nga aramidentayo (kas pagarigan, panagbasa kadagiti nasantuan a kasuratantayo iti inaldaw, panangngilin a nasantuan iti aldaw ti Sabbath, wenno panangserbi kadagiti dadduma), ken awisem ida a mangyakem iti panagtungpal iti dayta a balakad no isaom ti “Surotem ti propeta!”

icon iti panangisuro

Isuro ti Doktrina: In-inauna nga Ubbing

Ether 6:2–12

Makapagtalekak iti Nailangitan nga Ama nga iturongnak iti agnanayon a biag.

Mayasping ti pakaammuan maipapan iti panagdaliasat dagiti Jaredite iti baybay iti panagdaliasattayo iti mortal a biag. No dadduma agpada a napeggad ti panagdaliasat ket agkasapulan iti pammati a tarabayen ken saluadannatayonto ti Apo.

Dagiti Mabalin nga Aktibidad

• Aggigiddan a basaen ti Ether 6:2–12, a masansan nga agsardeng tapno makadrowing dagiti ubbing kadagiti ladawan ti basbasaenda. Kasano a maipada ti panagdaliasat dagiti Jaredite iti biagtayo? Tulongam dagiti ubbing a mangbigbig ken mangnagan no ania dagiti nadumaduma a paset dagiti drowingda ti mabalin a mangibagi iti biagtayo. Kas pagarigan, mabalin a mangibagi kadatayo dagiti Jaredite. Mabalin a dagiti bilog ti mangibagi kadagiti pagtaengantayo, ti Simbaan, wenno ti ebanghelio. Ania ti mabalin a mangibagi ti angin, ti danum, ti agsilsilnag a bato, ken iti naikari a daga?

• Tulongam dagiti ubbing a mangsarak kadagiti balikas ken ragup dagiti balikas iti Ether 6:2–12, a mangipakita no kasano a nagtalek dagiti Jaredite iti Dios. Mangibinglay kadagiti pagarigan no kasano a ti panagtalek iti Dios ket nakatulong kenka kabayatan dagiti naririgat a panawen iti biagmo. Allukoyem dagiti ubbing a mangibinglay kadagiti kasta met la a padas a napasaranda.

  Dagiti Jaredites nga agdaldaliasat a kakuyog dagiti ayup

  Panagdaliasat dagiti Jaredite iti Asia, ni Minerva Teichert

Ether 6:30; 7:27; 10:2

Mangisangbay iti kapia ti pananglagip iti iti inaramid ti Apo kaniak.

Ti maysa a banag a nakaidumaan dagiti nalinteg nga ari a Jaredite kadagiti nadangkes ket dagiti nalinteg nga ari “nalagipda dagiti naindaklan a banag nga inaramid ti Apo” para kadakuada (Ether 7:27). Kasano a maparegtam dagiti ubbing a manglagip iti inaramid ti Apo para kadakuada?

Dagiti Mabalin nga Aktibidad

• Kiddawem dagiti ubbing a mangbasa iti Ether 6:30; 7:27; ken 10:2 saggaysa wenno iti babassit a grupo ket mangsarak iti maysa a banag nga adda pagpapadaan dagitoy a bersikulo. Ibinglaymo dagiti riknam maipapan iti no ania ti inaramid ti Apo para kenka, ken awisem dagiti ubbing nga aramidenda met ti kastoy.

• Ibinglay kadagiti ubbing ti maipapan iti no kasano a pinadasmo a lagipen dagiti wagas a nangbendisionan kenka ti Apo ken ti pamiliam. Tulongam dagiti ubbing a mangpanunot kadagiti wagas a mangipalagip iti bagbagida iti no ania ti inaramid ti Apo para kadakuada. Ikkam ti tunggal maysa kadakuada iti papel, ken awisem ida nga agutob ken agsurat iti maysa a banag a naaramidna para kadakuada itay nabiit. Isingasing nga ipaugalida ti masansan a panangisurat kadagiti bendision a nadlawda a naggapu iti Apo (kitaen iti “O Remember, Remember” [video, ChurchofJesusChrist.org]).

Ether 9:28–35; 11:5–8

Manangngaasi ti Apo no agbabawiak.

Nupay masansan a di inawat dagiti Jaredite dagiti propeta ken nagbalinda a nadangkes, kanayon a pinakawan ida ti Apo no ipakumbabada ti bagbagida ken agbabawida.

Dagiti Mabalin nga Aktibidad

• Aggididdan a basaen ti Ether 9:28–35, ken tulongam dagiti ubbing nga agpanunot iti tallo wenno uppat nga ababa a binatog a manggupgop no ania ti napasamak kadagitoy a bersikulo. Kalpasanna basaen ti Ether 11:5–8, ken tulongam dagiti ubbing a mangilasin kadagiti pagpapadaan ti dua a pakaammuan. Ania ti masursurotayo manipud kadagitoy nga estoria?

• Kiddawen kadagiti ubbing a mangpanunot kadagiti dadduma pay a tao iti Libro ni Mormon a nangipakumbaba iti bagbagida ken napakawan. Usarem dagiti ladawan manipud iti Libro ti Arte ti Ebanghelio wenno Umaykayo, Sumurot Kaniak—Para kadagiti Indibidual ken Pamilia tapno makatulong kadakuada a manglagip. Ibinglaymo ti pammaneknekmo a pakawanennatayo ti Apo no sipupudno nga agbabawitayo.

icon iti panagsursuro

Yallukoy ti Panagsursuro iti Pagtaengan

Awisem dagiti ubbing a mangibinglay kadagiti pamiliada ti maysa a banag nga inaramid para kadakuada ti Nailangitan nga Ama a pagyamyamananda.

Panangpadur-as iti Panangisurotayo

Tulongam dagiti ubbing nga agbalin a managpartuat. “Kabayatan ti panangisurom kadagiti ubbing, palubosam ida nga agbukel, agdrowing, agkolor, agsurat, ken agpartuat. Ad-adda a naragsak dagitoy a banag ngem dagiti naragsak nga aktibidad—napateg dagitoy iti panagsursuro” (Panangisuro iti Wagas ti Mangisalakan, 25).

panid ti aktibidad: tumulong kadagiti Jaredite ti Nailangitan nga Ama nga agaramid kadagiti bilog.