“Nobiembre 23–29. Mosiah 12–15: ‘Mapasamak Amin a Banag Babaen ti Pammati,’” Umaykayo, Sumurot Kaniak—Para iti Primary: Libro ni Mormon 2020 (2020)
“Nobiembre 23–29. Ether 12–15,” Umaykayo, Sumurot Kaniak—Para iti Primary: 2020
Ni Ether nga Aglemlemmeng iti Ungib ti Bato, ni Gary Ernest Smith
Nobiembre 23–29
Ether 12–15
“Mapasamak Amin a Banag Babaen ti Pammati”
Bayat ti panangbasam ti Ether 12–15, panunotem dagiti ubbing a sursuruam. Makaparegta dagiti kapanunotan iti aktibidad iti daytoy a balabala iti dadduma pay a kapanunotan a makatulongto a mangipaay kadagiti kasapulan dagiti ubbing iti klasem.
Isuratmo Dagiti Impresionmo
Yawis ti Panagbibinninglay
Tulongam dagiti ubbing nga agpanunot kadagiti estoria iti nasantuan a kasuratan maipapan kadagiti tao a nangipakita iti dakkel a pammati. Masarakan dagiti sumagmamano a pagarigan iti Ether 12:11–22.
Isuro ti Doktrina: In-inaudi nga Ubbing
Ti pammati ket panangpati kadagiti banag a ditayo makita.
Nangibinglay ni Moroni iti sumagmamano a pagarigan dagiti tao a nakaaramid kadagiti naindaklan a banag gapu iti pammatida. Ibilang no kasano a mausarmo dagitoy a pagarigan iti panangisurom kadagiti ubbing no ania ti kaipapanan ti pammati.
Dagiti Mabalin nga Aktibidad
-
Ibasam kadagiti ubbing “Ti pammati ket dagiti bambanag a namnamaen ken saan a makita” manipud iti Ether 12:6, ken kiddawem kadagiti ubbing a mangulit kenka daytoy a ragup dagiti balikas. Isaritam kadagiti ubbing ti maipapan kadagiti banag a patiem uray pay a saanmo a makita ida, ken tulongam dagiti ubbing nga agpanunot kadagiti nayon paya pagarigan. Makatulong ti kanta a “Faith” (Children’s Songbook, 96–97) wenno ti sabali pay a kanta maipapan iti pammati.
-
Ipakitam dagiti ladawan a mangipakita kadagiti pagarigan ti pammati iti Ether 12:13–15, 20–21 (kitaen iti Libro ti Arte ti Ebanghelio, num. 78, 85, ken ti panid ti aktibidad itoy a lawas). Paibagam kadagiti ubbing kenka no ania ti makitada kadagiti ladawan ken no ania ti ammoda maipapan kadagiti estoria. Kasaritam dagiti ubbing maipapan ti no kasano nga impakita dagitoy a tao ti pammati ken no ania ti napasamak gapu iti pammatida.
-
Makiay-ayam kadagiti ubbing iti pinnugtuan nga ay-ayam. Ikkam ida ti pamugtuan maipapan kadagiti napudno a tao a nailadawan iti Ether 12:13–15, 19–20 agingga a mapugtuan dagiti ubbing no asinoda. Kalpasanna pagay-ayamem manen dagiti ubbing iti daytoy nga ay-ayam babaen ti panagsisinublatda iti panangted iti pamugtuan maipapan kadagiti isu met laeng a tattao (wenno dadduma pay a napudno a tattao) bayat ti panangpugto dagiti dadduma pay iti klase. Ibinglay no ania ti magusgustuam maipapan iti pammati dagitoy a tattao.
Matulongannak ni Jesucristo nga agbalin a napigsa.
No dadduma maipasango dagiti ubbing kadagiti kasasaad a pakariknaanda a nakapuyda, a kas iti inaramid ni Moroni. Tulongam ida a makasursuro iti nasursuro ni Moroni—a ti Mangisalakan mabalinna nga “aramiden a napigsa dagiti nakapsut a banag” (Ether 12:27).
Dagiti Mabalin nga Aktibidad
-
Iladawanmo kadagiti ubbing ti maysa nga aramid nga agkasapulan iti adu a pigsa ti bagi tapno maipatungpal. Awisem ida a mangibinglay kadagiti pagarigan dagiti banag a awan umdas a pigsada a mangaramid ita. Kasano a makapagbalintayo a napigsa tapno maipatungpal dagitoy nga aramid? Ilawlawag nga addaantayo met iti naespirituan a trabaho nga aramiden, ngem no dadduma mariknatayo a naespirituan a nakapsuttayo. Kasta met ti narikna ni Moroni maipapan kadagiti insursuratna kadagiti pinanid. Ibasam ti Ether 12:27 kadagiti ubbing. Ania ti inkari ti Apo kadagiti makarikna a nakapuyda?
-
Ibinglaymo ti maysa a padas a nangtulongan kenka ti Mangisalakan wenno ti maysa a tao nga am-ammom a nagaramid iti narigat a banag. Panenekam kadagiti ubbing a no kasapulanda ti tulongna, tulonganna ida ni Jesus nga agbalin a napigsa, uray pay no mariknada a nakapuyda.
Isuro ti Doktrina: In-inauna nga Ubbing
Ti pammati ket panangpati kadagiti banag a ditayo makita.
Mangibangbangon dagiti ubbing a sursuruam kadagiti pundasion ti pamaneknekda. Masarakan ti balakad ni Moroni maipapan iti pammati iti Ether 12:6, a makatulong kadakuada.
Dagiti Mabalin nga Aktibidad
-
Ilawlawag a pinadas ni propeta Ether nga isuro kadagiti Jaredite “dagiti naindaklan ken datdatlag a banag,” ngem saanda a namati ti imbagana. Awisem dagiti ubbing a mangbasa iti Ether 12:5 tapno maammuanda no apay a saanda a namati. Ania dagiti sumagmamano a banag a kayat ti Nailangitan nga Ama a patientayo uray no saantayo a makita dagitoy? Aggigiddan a basaen ti Ether 12:6. Ania ti insuro ni Moroni kadagiti tao a saan a mamati kadagiti naespirituan a kinapudno gapu ta saanda a makita dagitoy?
-
Ipakitam iti maysa nga ubing ti maysa a ladawan a saanmo nga ipakpakita kadagiti dadduma pay nga ubbing, ket kiddawem ti ubing a mangiladawan iti ladawan iti dadduma pay iti klase. No ipalubos ti oras, pagsisinublatem dagiti ubbing nga aramidenda met daytoy kadagiti sabali a ladawan. Kalpasanna awisem ida a mangbasa iti Ether 12:6 ket sarakenda ti ragup dagiti balikas: “Ti pammati ket dagiti bambanag a namnamaentayo ngem saantayo a makita.” Kasano nga ipakitatayo ti pammatitayo ken ni Jesucristo no saantayo a makita Isuna?
-
Kiddawem kadagiti ubbing a mangbasa iti ragup dagiti balikas iti Ether 12:6: “Awan ti maawatyo a saksi agingga iti pannakasuot ti pammatiyo.” Tulongam dagiti ubbing a makaawat a no tungpalentayo ti maysa a bilin, maammuantayo a pudno daytoy. Kiddawem kadagiti ubbing nga agpanunot kadagiti pagbatayan ti ebanghelio a kayat ti Dios a maadaantayo iti pamaneknek, kas iti panagbayad ti apagkapulo, panangngilin a nasantuan iti aldaw ti Sabbath, wenno panagtungpal ti Nainsiriban a Balikas [Word of Wisdom]. Isurat iti pisarra ti Tapno makagun-od iti pamaneknek iti , rumbeng a . Ibinglaymo no kasano ti inaramatmo ti pammatim tapno magun-odmo ti pamaneknekmo kadagitoy ken dagiti dadduma pay a kinapudno ti ebanghelio.
Ti namnama ket kasla maysa nga angkla iti kararuak.
Tulongam dagiti ubbing a sursuruam a makaawat a mabalintayo a “[mang]namnama iti nasaysayaat a lubong” gapu iti pammatitayo ken ni Cristo (Ether 12:4).
Dagiti Mabalin nga Aktibidad
-
Ibinglaymo dagiti ubbing ti kayulogan ti namnama a masarakan iti “Namnama,” (Pangiwanwan ti Nasantuan a Kasuratan, scriptures.ChurchofJesusChrist.org). Segun iti daytoy a kayulogan ken iti Ether 12:4, 32, ania koma ti namnamaentayo? (kitaen met ii Moroni 7:40–42). Tulongam dagiti ubbing nga agpanunot kadagiti sabali pay a balikas para iti namnama, agraman kadagiti balikas a kasungani ti kaipapanan ti namnama. Ibinglay kadakuada dagiti sumagmamano a kinapudno ti ebanghelio a mangted kenka iti namnama, ket awisem ida nga aramidenda met iti kastoy.
-
Ipakitam (wenno mangidrowing iti pisarra) ti maysa a ladawan ti barko ken ankla. Apay a kasapulan dagiti barko ti angkla? Ania ti mapasamak ti maysa a barko nga awan iti ankla? Aggigiddan a basaen ti Ether 12:4, ken saludsoden kadagiti ubbing no kasano a ti namnama ket kas iti maysa nga ankla. Awisem dagiti ubbing a mangidrowing kadagiti bukodda a ladawan ti maysa a barko ken ankla tapno mabalindanto nga isuro ti maipapan iti namnama kadagiti pamiliada.
Matulongannak ni Jesucristo nga agbalin a napigsa.
Bayat ti panagdakkel dagiti ubbing, ad-adda nga mabigbigda dagiti pagkapuyan. Usarem dagitoy a bersikulo tapno maisurom ida a ti Mangisalakan “aramiden a napigsa dagiti nakapsut a banag” (Ether 12:27).
Dagiti Mabalin nga Aktibidad
-
Awisem dagiti ubbing a basaen ti Ether 12:23–25 tapno maammuanda no apay a maseknan ni Moroni. Saludsodem kadakuada no napadasanda met dagitoy a rikna. Awisem dagiti ubbing a basaen ti bersikulo 26-27 tapno maammuanda no kasano nga inyallukoy ti Apo ni Moroni. Ania ti nasken nga aramidentayo tapno matulongannatayo ti Apo nga agbalin a napigsa no mariknatayo a nakapuytayo? Ibinglaymo ti maysa a padas a tinulongannaka ti Mangisalakan nga agbalin a napigsa tapno maaramidmo ti maysa a narigat a banag.
-
Awisem kadagiti ubbing a mangidrowing iti maysa a ladawan ti maysa a banag a nakapuy ken maysa a napigsa. Kalpasanna awisem ida a manginayon iti drowingda iti sumagmamano a balikas ken ragup dagiti balikas manipud iti Ether 12:23–29 a mangisuro kadakuada maipapan iti no kasano a matulongannatayo ti Mangisalakan a mangpagbalin a napigsa dagiti pagkapuyantayo. Allukoyem dagiti ubbing nga agpanunot maipapan ti maysa a pagkapuyan a mabalin nga adda kadakuada ken kalpasanna gun-odenda ti tulong ti Mangisalakan tapno agbalinda a napigsa.
Yallukoy ti Panagsursuro iti Pagtaengan
Awisem dagiti ubbing a mangisurat iti maysa a kinapudno a kayatda a pakagun-odan iti pammaneknek. Tulongam ida a mangituding iti maysa a panggep a tun-oyen a mangaramat iti pammati tapno makagun-odda iti saksi iti dayta a kinapudno.
Panangpadur-as iti Panangisurotayo
Ikalikagum a maawatam dagiti ubbing a sursuruam. “Sapulem dagiti wagas tapno maawatam dagiti nagtaudan, paggugusto, talento, ken kasapulan dagiti [ubbing] a sursuruam. Saludsodem, denggem a naimbag, ken paliiwem no ania ti ibaga ken aramiden dagiti agad-adal iti nadumaduma a situasion. … Saludsodem kadagiti nagannakda dagiti nalawag a pannakaammo ken pannakaawat [insights]. Kangrunaan ti amin, agkararagka para iti pannakaawat a ti laeng Espiritu ti makaited” (Panangisuro iti Wagas ti Mangisalakan, 7).