Ni Jesus a mangtultulong iti maysa a babai

Kibinen nga Iturongnakanto, ni Sandra Rast

Pebrero 24–Marso 1

2 Nephi 26–30

“Datdatlag nga Aramid ken Pagsidsiddaawan ”

Kinuna ti Apo, “Bilinek ti amin … nga isuratdanto dagiti sao a sawek kadakuada” (2 Nephi 29:11). Babaen ti Espiritu, ti Apo agsaonto kenka bayat ti panagadalmo iti balikasna. Isuratmo no ania dagiti maawatmo.

Isuratmo dagiti Impresionmo

“Ipadtok kadakayo ti maipanggep kadagiti maudi nga aldaw,” insurat ni Nephi (2 Nephi 26:14). Iti sabali a pannao, isu ket agsursurat maipapan iti aldawtayo. Ket adda gapu tapno maseknan maipapan iti no ania ti nakitana: dagiti tattao a mangiliblibak iti bileg ken dagiti milagro ti Dios, napalalo nga apal ken panagririri, pungpunguen ti sairo dagiti tattao iti natibker a galut. Ngem kas mainayon kadagitoy nga“aramid iti kasipngetan” iti ud-udina nga aldaw (2 Nephi 26:10, 22) nga inturong ti kabusor, nagsao met ni Nephi maipapan iti “datdatlag nga aramid ken pagsidsiddaawan” nga inturong ti Apo Mismo (2 Nephi 27:26). Ket iti tengnga dayta nga aramid ket agbalinto a maysa a libro—maysa a libro nga agsarita manipud iti tapok, a mangibutaktak kadagiti kinaulbod ni Satanas, ket mangummong kadagiti nalinteg a kas maysa a pagrukodan. Dayta a libro ket ti Libro ni Mormon, ti nakaskasdaaw nga aramid ket ti aramid ti Simbaan ti Apo kadagiti ud-udina nga aldaw, ket ti pagsidsiddaawan ket ti panangawisna kadatayo amin, iti baet dagiti pagkapsutantayo, tapno makiraman.

icon iti bukod a panagadal

Dagiti Kapanunotan para iti Bukod a Panagadal iti Nasantuan a Kasuratan

2 Nephi 26:20–33

Awisen ni Jesucristo ti amin nga umay Kenkuana.

Insuro ni Propeta Joseph Smith a ti Nailangitan nga Ama ket ad-adda nga “awan beddengna kadagiti asi ken paraburna, ngem iti kinamanagsaganatayo a mamati wenno umawat” (The Joseph Smith Papers, “History, 1838–1856, volume D-1,” p. 4 [addenda], josephsmithpapers.org). Basaem no ania ti nasirmata ni Nephi iti 2 Nephi 26:20–22 ken itino ania ti insurona maipapan iti Mangisalakan kadagiti bersikulo 23–33, ken idilig daytoy iti palawag ni Joseph Smith. Ania ti masursurom maipanggep iti awan beddengna nga asi ti Apo? Ania ti maaramidmo kas maysa a miembro iti Simbaan Ni Jesucristo tapno agbalinka nga ad-adda pay a kas ken ni Cristo iti wagas a panangtratom kadagiti annak ti Dios?

Kitaen met iti 3 Nephi 18:30–32.

2 Nephi 26–27

Ania ti libro a nadakamat kadagitoy a kapitulo?

Iti pammadto ni Nephi iti 2 Nephi 26–27, a naadaw manipud iti immun-una a padto ni Isaias (kitaen ti Isaias 29), immunan nga imbagana idin ti idadateng ti Libro ni Mormon. Daytoy a padto ti mangiladawan iti sumaganad:

• Dagiti balikas dagiti bukel ni Lehi (dagiti an-annabona) nga agsarsarita “nga agtaudto ti timekda iti katapukan” nga addaan iti “am-ammo nga espiritu” ken “naitalimeng iti libro” (2 Nephi 26:14–17; kitaen met iti Isaias 29:4).

• Maysa a paset ti libro a maited iti maysa a masirib a lalaki, nga agkuna, “diak mabasa daytoy” (2 Nephi 27:15–20; Joseph Smith—Pakasaritaan 1:64–65; kitaen met iti Isaias 29:11).

Mainayon pay iti Isaias, dakamaten dagiti dadduma pay a propeta iti biblia ti Libro ni Mormon, nupay saanda a dakamaten daytoy babaen iti nagan. Kas pagarigan,saritaen ti Ezekiel 37:15–20 maipapan iti “ sarukod ni Jose,” a mabalin a mangitudo iti kasuratan dagiti Nephite, nga an-annabo ni Jose. Agbalin daytoy a kasuratan a maysa a kadua ti “sarukod ni Juda,” a kayatna a sawen ti Biblia.

Masarakan dagiti dadduma pay a pagarigan iti Pangiwanwan iti Nasantuan a Kasuratan, “Libro ni Mormon” (scriptures.ChurchofJesusChrist.org).

2 Nephi 28

Kalikaguman ni Satanas ti mangallilaw.

Adu dagiti kinaulbod ken taktika ni Satanas a naipakita kadagiti panangiladawan ni Nephi kadagiti maudi nga aldaw iti 2 Nephi 28. Kitaem no masarakam dagitoy (kas pagarigan, kitaen kadagiti bersikulo 6, 8, 2–23, 29). Apay a masapul a maammuam ti maipapan kadagiti kinaulbod ni Satanas? Anianto iti aramidem no gandatennaka nga allilawen ti kabusor?

2 Nephi 28:27–31; 29

Agtultuloy ti Dios a mangted iti paltiing a mangidalan kadagiti annakna.

Kas dagiti Santo iti Ud-udina nga Aldaw mabendisionantayo iti adu a balikas ti Dios, isu a dagiti ballaag ni Nephi ket mayaplikar kadatayo: nasken a ditay marikna nga “addan umdas kadakami!” Bayat ti panangbasam kadagiti ballaag iti 2 Nephi 28 ken 29, utobem dagiti saludsod a kas kadagitoy:

• Kasano a kayat ti Apo a riknaek ken sungbatak ti balikasna?

• Apay a “makapungtot” no dadduma dagiti tattao maipapan iti panangawat iti ad-adu pay a kinapudno manipud iti Dios? (2 Nephi 28:28). Mariknak kadi ti kastoy? No kasta, kasano nga agbalinak nga ad-adda pay a managawat iti kinapudno?

• Ania ti kayat a sawen ti umawat iti balikas ti Dios? Kasano a maipakitak Kenkuana a kayatko ti umawat iti ad-adu pay a balikasna?

Kitaen met iti Alma 12:10–11; 3 Nephi 26:6–10.

2 Nephi 29–30

Insagana ti Dios ti Libro ni Mormon para iti aldawtayo.

Naammuan ni Nephi babaen ti paltiing, sakbay a naan-anay a naisurat ti Libro ni Mormon, nga iti maysa nga aldaw “napategto unay kadagiti annak ti tattao” (2 Nephi 28:2). Kasano a dakkel ti pateg kenka ti Libro ni Mormon ? Panunotem maipapan iti daytoy a saludsod bayat ti panangbasam iti 2 Nephi 29–30. Ania dagiti sumagmamano a “nakaskasdaaw” nga aramid nga ipatpatungpal ti Dios iti lubong ken iti biagmo babaen ti Libro ni Mormon?

icon iti sangapamiliaan a panagadal

Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening

Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.

2 Nephi 26:12–13

Insuro ni Nephi nga iparikna ni Jesucristo ti bagina babaen ti Espiritu Santo. Ania dagiti padas a mabalin nga ibinglay dagiti miembro ti pamilia iti tunggal maysa idi pinatibker ti Espiritu Santo dagiti pammaneknekda maipapan iti Mangisalakan ?

2 Nephi 26:22; 28:19–22

Mabalin a magustuan ti pamiliam ti maysa nga adalen a banag [object lesson] a mangiladladawan no ania ti isuro ti 2 Nephi 26:22 maipapan ti sairo. Bayat ti panangbasam maipapan kadagiti taktika ni Satanas iti 2 Nephi 28:19–22, mabalinmo a pulipolan iti sumagmamano a panait dagiti pungupunguan ti maysa a tao tapno mangibagi iti “maysa a nalamuyot a lubid.” Kasano a mayarig ti maysa a nalamuyot a lubid kadagiti sulisog ni Satanas? Kasano a makapagbalin daytoy a natibker a lubid? Kasanotayo a mailasintayo dagiti panagulbod ni Satanas?

nakunikon a pedaso ti linas

Indilig ni Nephi dagiti sulisog ti sairo iti maysa a “nalamuyot a lubid.”

2 Nephi 27:20–21

Ania koma ti mabalin a kayat a sawen ti Apo idi kunana ti, “nabaelak nga inaramid ti trabahok”? Kasano nga impluensiaan daytoy a kinapudno ti wagas a panagserbitayo iti Simbaanna?

2 Nephi 28:30–31

Makapanunot kadi ti pamiliam iti maysa a banag a, kas iti paltiing manipud iti Dios, a kasayaatan a maawat iti bassit iti maysa a panawen? Apay nga ipalgak ti Dios ti kinapudno kadatayo nga “ibinsabinsa, bilin iti bilin, sangkabassit ditoy ken sangkabassit idiay” imbes a mamimpinsan amin?

2 Nephi 29:7–9

Ania ti panggep ti Apo a paneknekan wenno ipakita iti Libro ni Mormon?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Panangpadur-as iti Bukod a Panagadal

Ibinglay dagiti nalawag a pannakaammo ken pannakaawat [insights]. Ti panangilawlawag kadagiti dadduma no ania ti nasursurom ket makapapigsa iti bukodmo a pannakaawat. Kalpasan ti panangbasa iti 2 Nephi 29:6–14, mabalin a mariknam a naparegtaka a mangilawlawag iti maysa a gayyem no apay a kasapulantayo ti Libro ni Mormon.

Ni Nephi nga agsursurat kadagiti balitok a pinanid

Impadto dagiti sinurat ni Nephi ti “datdatlag nga aramid ken pagsidsiddaawan” a mapasamak kadagiti maudi nga aldaw (2 Nephi 27:26).