“Marso 2–8. 2 Nephi 31–33: ‘Daytoy ti Dalan,’” Umaykayo, Sumurot Kaniak—Para kadagiti Indibidual ken Pamilia: Libro ni Mormon 2020 (2020)
Marso 2–8. 2 Nephi 31–33,” Umaykayo, Sumurot Kaniak—Para kadagiti Indibidual ken Pamilia: 2020
Ni Cristo a Mangisursuro Kadagiti Disipulona, ni Justin Kunz
Marso 2–8
2 Nephi 31–33
“Daytoy ti Dalan”
Isingasing daytoy a balabala dagiti pagbatayan a mabalin a masarakam a napateg iti 2 Nephi 31–33. Ngem dagiti kapatgan a banag a masursuromto iti panagadalmo ket sumangbayto manipud kadagiti arasaas ti Espiritu. Agkalikagumka a manggun-od iti daytoy a pannarabay, ket isuratmo dagiti parikna a sumangbay.
Isuratmo dagiti Impresionmo
Kadagiti maudi a nairekord a balikas ni Nephi, masarakantayo daytoy a palawag: “Binilinnak ti Apo, ket masapul nga agtungpalak” (2 Nephi 33:15). Daytoy ket kasla maibagay a pakagupgopan ti biag ni Nephi. Kinalikagumanna a gun-oden ti pagayatan ti Apo ket situtured a nagkagumaan nga agtungpal iti daytoy—uray no kaipapananna ti panangipustana iti biagna a mangala kadagiti pinanid a gambang manipud ken ni Laban, panangaramidna iti maysa a bilog ken panagballasiw iti baybay, wenno sipupudno a panangisurona iti doktrina ni Cristo nga addaan iti kinalawag ken pannakabalin. Makapagsao ni Nephi nga addaan iti natured a pammati iti panagkasapulan nga “agtultuloy a sitatalingenngen ken ni Cristo,” iti panangsurot iti “nailet ken akikid a dalan nga agturong iti agnanayon a biag” (2 Nephi 31:20, 18), agsipud ta dayta ti dalan a sinurotna. Ammona babaen iti padas a daytoy a dalan, nupay narigat no dadduma, makaparag-o pay daytoy, ket “awan ti sabali a dalan wenno nagan a maited iti sirok ti langit a pakaisalakanan ti tao iti pagarian ti Dios” (2 Nephi 31:21).
Dagiti Kapanunotan para iti Bukod a Panagadal iti Nasantuan a Kasuratan
Ni Jesucristo ken ti doktrinana ti kakaisuna a dalan nga agturong iti agnanayon a biag.
No nasken a gupgopem ti dalan nga agturong iti agnanayon a biag iti sumagmamano laeng a sarita, ania ti maisaom? Ni Nephi, iti nalawag ken nalaka a maawatan a galadna, inaramidna iti kastoy: pammati ken ni Cristo, panagbabawi, panagbuniag, panangawat iti sagut ti Espiritu Santo, ken panagibtur agingga iti panungpalan. Kalpasan ti panangadalmo kadagiti pannursuro ni Nephi iti 2 Nephi 31–32, ibilangmo no kasano nga ilawlawagmo dagitoy iti maysa a tao kadagiti bukodmo a balikas. Panunotem maipapan no kasano a nabendisionannaka ti panagtungpalmo kadagitoy a pannursuro. Mabalin nga ibilangmo dagiti pannursuro ni Nephi iti 2 Nephi 31:18–20 ket amirisem dagiti bukodmo a panagkagumaan nga “agtultuloy” iti dana ti ebanghelio.
Kitaen met iti 3 Nephi 32–39; 27:13–22; D. Todd Christofferson, “The Doctrine of Christ,” Ensign wenno Liahona, Mayo 2012, 86–90; Brian K. Ashton, “The Doctrine of Christ,” Ensign wenno Liahona, Nob. 2016, 106–9.
Ti panangsurot kadagiti pannursuro ni Jesucristo ti mangiturong kadatayo iti biag nga agnanayon.
Impakita ni Jesucristo ti naan-anay a pagwadan ti panagtungpal idi nabuniagan Isuna.
Napasamak man ti pannakabuniagmo idi kalman wenno 80 a tawen ti napalabasen, maysa idi daytoy a napateg a kanito—simrekka iti tungpal biag a katulagan a mangsurot ken ni Jesucristo. Panunotem ti panagbuniagmo bayat ti panagbasam maipapan iti panagbuniag ti Mangisalakan iti 2 Nephi 31: 4–13. Apay a nabuniagan ti Mangisalakan? Kasano a maipada dagiti gapu no apay a nabuniagan Isuna kadagiti gapu no apay a nabuniaganka? Ania ti ar-aramidem ita a mangituloy iti panangsurot iti pagwadan ti Mangisalakan iti panagtulnog?
Ti ordinansa ti sakramento ti linawas a gundaway para kenka nga ulitem ti agkumit iti panangsurot ken ni Jesucristo. Iti sumaruno a gundaway a makiranudka iti sakramento, ibilangmo ti panangbasa iti 2 Nephi 31:13 ken panangutob iti determinasionmo a “surotem ti Anak, nga addaan puso a napnuan tarigagay” ken siaayatka “nga umawat iti nagan ni Cristo.”
Ti Espiritu Santo ti mangipakitanto kaniak no ania ti aramidek.
No ti panagbuniag ken kumpirmasion ket “ti ruangan a serkan[tayo]” iti nailet ken akikid a dana (2 Nephi 31:17), ania ti aramidentayo apaman nga addatayon iti dalan? Dayta ti napanunot dagiti tao ni Nephi (kitaen iti 2 Nephi 32:1). Ania dagiti inted a sungbat ni Nephi iti 2 Nephi 31:19–20 ken kapitulo 32? Ania dagiti sungbat a masarakam para iti bagim?
Kitaen met iti David A Bednar, “Receive the Holy Ghost,” Ensign wenno Liahona, Nob. 2010, 94–97; “Holy Ghost,” Gospel Topics, topics.ChurchofJesusChrist.org.
Allukoyen ti Libro ni Mormon ti amin a mamati ken ni Jesucristo.
Iti 2 Nephi 33, bayat ti panangileppas ni Nephi kadagiti sinuratna, inlawlawagna dagiti gapu no apay a nagsurat iti umuna a gundaway. Ania dagiti gapu a masarakam iti daytoy a kapitulo? Panunotem no ania ti nabasamon iti 1 Nephi ken 2 Nephi ken dagiti banag a mabalin nga insuratmo. Kasano a naipatungpal dagiti estoria ken pannursuro dagiti panggep ni Nephi para kenka? Kas pagarigan, no kasano nga inallukoydaka a “mamati ken ni [Cristo], ken agibtur agingga iti panungpalan”? (bersikulo 4). Ibilangmo ti panangisurat kadagitoy a padas wenno panangibinglay kadagitoy iti maysa a miembro ti pamilia wenno gayyem.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.
2 Nephi 31:5–13
Adda kadi dagiti miembro ti pamilia nga agsagsagana para iti panagbuniag, wenno asino man itay kallabes ti nabuniagan? Nalabit a makaibinglayda no apay nga inkeddengda ti mabuniagan. Babaen kadagiti pannursuro ni Nephi, ania dagiti sumagmamano a gapu no apay a nasken a mabuniagantayo? Ania dagiti sumagmamano a bendision a maawattayo no mabuniagantayo?
2 Nephi 31:17–21
Kasano a matulongam ti pamiliam a maawatanda ti pangngarig ni Nephi maipapan iti “nailet ken akikid a dalan”? (2 Nephi 31:18). Kas pagarigan, makapagtitinnulongkayo a mangidrowing iti ladawan ti dalan nga inladawan ni Nephi iti 2 Nephi 31:17–21, a suratan daytoy kadagiti bambanag a nasken nga aramidentayo tapno sumrek iti dalan ket agtultuloy nga agturong iti daytoy. Kasano ti panangtulong kadatayo ti Mangisalakan nga agprogreso kabayatan ti kaaddatayo iti dalan?
2 Nephi 31:20
No kayatmo a tulongan ti pamiliam a maawatanda a nasaysayaat no kasano nga agibturtayo agingga iti panungpalan, ti panid 6 iti Preach My Gospel ket addaan iti makatulong a pangilawlawag iti kayatna a sawen; a kas iti mensahe ni Elder Dale G. Renlund “Latter-day Saints Keep on Trying” (Ensign wenno Liahona, Mayo 2015, 56–58).
2 Nephi 32:8–9
Tapno makatulong kadagiti miembro ti pamilia a maawatanda a mabalintayo ti “agkararag a kanayon,” makaaramidka iti listaan dagiti kasasaad a pakapagkararagantayo (wenno idrowingmo dagiti ladawan a mangibagi kadagitoy). Kalpasanna mabalin nga agkansion ti pamiliam iti kanta a mangisuro maipanggep iti kararag, a kas iti “Nagkararagka Kadi?” (Dagiti Himno ken Kanta dagiti Ubbing, p. 48), a sukatan ti sumagmamano a balikas iti kanta kadagiti balikas manipud kadagiti listaanda. Kasano a bendisionannatayo ti Apo no agkararagtayo a kanayon?
2 Nephi 33:1–2
Ania ti mabalin a mangiturong kadagiti tao a “patangkenen dagiti pusoda a maibusor iti Nasantuan nga Espiritu”? Kasano a masiguradotayo a ti Espiritu Santo ket adda “lugarna [kadatayo]”?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Panangisurotayo
Tuladem ti pagwadan ti Mangisalakan. “Makatulong ti panangadal no kasano ti panangisuro ti Mangisalakan—dagiti pamay-an nga inusarna ken dagiti banag nga insaona. Ngem ti bileg ni Jesus a mangisuro ken mangitag-ay kadagiti dadduma ket kangrunaan a naggapu iti kinataona ken iti panagbiagna. No ad-adda a napasnekka iti panagkagumaanmo nga agbiag a kas ken ni Jesucristo ket agpannuray iti pangsubbot a bilegna, gagangay nga ad-adda a mangisurokanto iti wagasna.
Tapno Maipatungpal ti Amin a Kinalinteg, ni Liz Lemon Swindle