“Marso 16–22. Jacob 5–7: ‘Makipagtrabaho ti Apo Kadatayo,’” Umaykayo, Sumurot Kaniak—Para kadagiti Indibidual ken Pamilia: Libro ni Mormon 2020 (2020)
“Marso 16–22. Jacob 5–7,” Umaykayo, Sumurot Kaniak—Para kadagiti Indibidual ken Pamilia: 2020
Pangngarig ti Kayo ti Olibo, ni Brad Teatre
Marso 16–22
Jacob 5–7
Makipagtrabaho ti Apo Kadatayo
Mangyawis iti paltiing ti panagbasa kadagiti nasantuan a kasuratan. Isu a kabayatan ti panagbasam iti Jacob 5–7, agkalikagumka a manggun-od iti pannarabay manipud iti Espiritu a mangtulong kenka ken ti pamiliam. Ania dagiti adda a mensahe ti Apo para kenka?
Isuratmo dagiti Impresionmo
Adu, adu a tattao ti saan pay a nakangngeg iti ebanghelio ni Jesucristo. No mariknayo ti rikut babaen iti kinaadu ti aramid a panangummong kadakuada iti Simbaan ti Apo, ti pangngarig dagiti kayo ti olibo iti Jacob 5 addaan iti makapanamnama a palagip: ti bangkag ket kukua ti Apo. Intedna iti tunggal maysa kadatayo ti maysa a bassit a lugar tapno tumulong iti aramidna—ti pamiliatayo, dagiti gagayyemtayo, ti sakup ti impluensiatayo. Ket no dadduma ti umuna a tao a matulongantayo nga ummongen ket ti bagbagitayo. Ngem iti kaano man saantayo nga agmaymaysa iti daytoy nga aramid, ta ti Apo ti bangkag makipagtrabaho a kaduana dagiti katulonganna (kitaen iti Jacob 5:72). Am-ammo ti Dios ken ay-ayatenna dagiti annakna, ket Isu ti mangisagananto iti dalan para iti tunggal maysa kadakuada a dumngeg iti ebanghelio, uray pay dagiti saan a nangawat Kenkuana iti napalabas (kitaen iti Jacob 4:15–18). Ket kalpasanna, no nalpasen ti aramid, amin dagiti “naregta a nakipagtrabaho [Kenkuana]…makipagrag-o[danto] [Kenkuana] gapu iti bunga ti bangkag[na]” (Jacob 5:75).
Dagiti Kapanunotan para iti Bukod a Panagadal iti Nasantuan a Kasuratan
Ania ti pangngarig?
Dagiti pangngarig ket estoria a mangisuro iti naespirituan a kinapudno babaen kadagiti simbolo. Ti pangngarig maipapan kadagti kayo ti olibo, kas pagarigan, maysa a bangkag ti mangibagi iti lubong, maysa a naamo a kayo ti olibo ti mangibagi iti Israel (dagiti nagaramid iti katulagan iti Dios), ken dagiti balang a kayo ti olibo ti mangibagi kadagiti pagilian ti gentil, (dagiti saan a nagaramid iti katulagan iti Dios).
Bayat ti panagadalmo iti pangngarig iti Jacob 5, sapulem dagiti mainayon a simbolo ken utobem no ania ti mabalin a kayatda a sawen. Kas pagarigan, ania iti panagkunam ti ibagi ti nasayaat a bunga? Ania ti mabalin nga isimbolo ti dakes a bunga?
Ni Jesucristo ti Apo ti bangkag.
Sakbay nga irugim ti panagadalmo iti pangngarig dagiti kayo ti olibo iti Jacob 5, mabalin a makatulong nga irebyum ti Jacob 4:10–18 tapno masursurom no apay a narikna ni Jacob a naparegta nga ibinglayna daytoy a pangngarig kadagiti taona. Iti Jacob 6:3–5, masarakam ti sumagmamano a nayon a mensahe a tinarigagayan ni Jacob a yunay-unay; sapulem dagitoy a mensahe iti pangngarig. Ania dagiti mensahe a masarakam para iti bagim iti Jacob 5?
Ti Jacob 5 ket atiddog a kapitulo—ti kaatiddogan iti Libro ni Mormon. Mabalin a makatulong a bingaybingayen kadagiti sumaganad a benneg, a mangiladawan kadagiti panawen iti pakasaritaan ti lubong:
-
Dagiti bersikulo 3–14:Ti pannakasayyasayya ti Israel sakbay ti panawen ni Cristo
-
Dagiti bersikulo 15–28:Ti panagministro ni Cristo ken dagiti Apostol
-
Dagiti bersikulo 29–49:Ti Dakkel nga Ikakalilis iti Kinapudno
-
Dagiti bersikulo 50–76:Pannakaummong ti Israel kadagiti ud-udina nga aldaw
-
Dagiti bersikulo 76–77:Ti Millennium ken ti panungpalan ti lubong
Para iti nayon a nauneg a pannakaammo ken pannakaawat maipapan iti pangngarig, kitaen iti dayagram a naikadua iti daytoy a balabala.
Makapagserbitayo amin iti Dios babaen ti panangtulong kenkuana a mangummong kadagiti annakna.
Awisennak ti Dios a mangtulong Kenkuana a mangummong kadagiti annakna.
Ti “sabsabali pay a katulongan” (Jacob 5:70) a naawagan iti bangkag ti Apo ket iramanna ti tattao a kas kenka—kas dagiti miembro ti Simbaan, responsabletayo amin a tumulong iti Dios a mangummong kadagiti annakna. Ania dagiti prinsipio a masarakam iti Jacob 5, nangnangruna kadagiti bersikulo 61–62 ket 70–75, maipapan iti panagtrabaho iti bangkag ti Apo? Kasano ti nariknam Kenkuana iti panangawagna kenka nga agserbi iti bangkagna? Ania dagiti padas a napasaramon kabayatan ti pannakiramanmo iti aramidna?
Kitaen met iti “Missionary Work,” Gospel Topics, topics.ChurchofJesusChrist.org; “Old Testament Olive Vineyard,” “Help the Church Grow”(videos, ChurchofJesusChrist.org).
Makatakderak a napigsa no kariten ti dadduma ti pammatik.
Ti padas dagiti Nephite ken ni Sherem ti masansan a maulit kadagitoy nga aldaw: mabalin nga adda dagiti deadal, nalaing a sumarita a tattao a mangpadas a mangdadael iti pammatiyo. Ngem ni Jacob ket “saan a maisin” (Jacob 7:5). Kasano a sinungbatan ni Jacob idi nadarup ti pammatina? Ania ti masursurom manipud kadagiti sungbatna? Ania ti maaramidmo itan nga agsagana para kadagiti panawen a makarit ti pammatim ?
Kitaen met iti “Answering Gospel Questions,” Gospel Topics, topics.ChurchofJesusChrist.org; Jeffrey R. Holland, “The Cost—and Blessings—of Discipleship,” Ensign wenno Liahona, Mayo 2014, 6–9.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.
Jacob 5
Natakuatan ti sumagmamano a pamilia a makatulong ti mangidrowing kadagiti simbolo manipud iti pangngarig ti kayo ti olibo bayat ti panagbasada iti daytoy. Mabalin nga agragsak ti pamiliam iti dayta a wagas, wenno adda mabalin a sabali a wagas a makatulongka kadagiti miembro ti pamilia a mangiladawan iti panunotyo dagiti simbolo iti pangngarig. Nalabit a mabalinmo a markaan ti maysa a lugar iti lamisaan wenno datar a mangibagi iti bangkag (wenno ti lubong) ket mangibagi iti mula nga olibo, (wenno iti balay ti Israel) iti maysa a banag, kas maysa a puzzle, a mabalin a bingayen iti pedpedaso (a mangibagi ti pannakasayyasayya ti Israel) ket kalpasanna isubli dagitoy a sangkamaysa (a mangibagi iti pannakaummong ti Israel). Ania iti isuro kadatayo daytoy a pangngarig maipapan iti Apo? maipapan kadagiti katulonganna?
Jacob 5:70–77
Bayat ti panangbasam maipapan iti “maudi a panawen” nga agtrabaho ti Apo iti bangkagna, ania ti mangparegta kenka ken ti pamiliam nga agserbi iti Apo “iti kabaelanyo”? (Jacob 5:71). Mabalinmo nga awisen dagiti miembro ti pamilia a mangyaplikar iti biagda ti bersikulo 75 babaen iti pananginayon kadagiti naganda iti daytoy a bersikulo—kas pagarigan, “Nabendisionanka [nagan].” Nalabit a mabalinda nga ibinglay dagiti padas a nakariknaanda iti rag-o kabayatan ti panagserbida iti Apo ti bangkag, kas pagarigan babaen ti panangibinglay iti ebanghelio, panagserbi iti templo, wenno panangpapigsa kadagiti miembro ti Simbaan. (Kitaen met iti M. Russell Ballard, “Put Your Trust in the Lord,” Ensign wenno Liahona, Nob. 2013, 43–45.)
Jacob 6:4–7
Kasano nga iyawat ti Apo ti takiag ti kaasina kadatayo? Ania ti kayat a sawen ti balikas a “kumapet” kadagitoy a bersikulo? Kasano a kumpet ti Apo kadatayo? Kasanotayo a kumpet Kenkuana?
Jacob 7:1–12
Ania ti masursurotayo manipud kadagitoy a bersikulo maipanggep no kasano a padasen dagiti tattao nga iturong dagiti dadduma a mayaw-awan? Kasano a masurottayo ti pagwadan ni Jacob ket agbalin a natibker iti pammatitayo ken ni Cristo?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Panangisurotayo
Mangyulo iti maysa a nasantuan a kasuratan. Pumilika iti maysa a binatog ti nasantuan a kasuratan a nangnangruna a napateg iti pamiliam, ket aggigiddan a yuloyo daytoy. Insuro ni Elder Richard G. Scott, “Ti maysa a nayulo a nasantuan a kasuratan ket agbalin a napaut ken naibtur a gayyem a saan nga agkapsut iti panaglabas ti panawen” (The Power of Scripture, ” Ensign wenno Liahona, Nob. 2011, 6).