“Marso 9–15. “Jacob1–4: ‘Makitunoskayo iti Dios babaen ti Pannubbot ni Cristo,’” Umaykayo, Sumurot Kaniak—Para kadagiti Indibidual ken Pamilia: Libro ni Mormon 2020 (2020)
“Marso 9–15. Jacob 1–4,” Umaykayo, Sumurot Kaniak—Para kadagiti Indibidual ken Pamilia: 2020
Napakawanen, ni Greg K. Olsen
Marso 9–15
Jacob 1–4
Makitunoskayo iti Dios babaen ti Pannubbot ni Cristo
No agilistaka kadagiti naespirituan nga impresion, ipakitam a kayatmo a suruannaka ti Espiritu Santo. Bayat ti panagbasam iti Jacob 1–4, ibilangmo ti panangisuratmo kadagiti nauneg a pannakaawatmo ken pannakaammom [insights].
Isuratmo dagiti Impresionmo
Ibilang dagiti Nephite ni Nephi ti “nabileg a salaknibda” (Jacob 1:10). Sinalaknibanna ida a maibusor kadagiti iraraut dagiti kabusorda, ket binallaaganna ida maipapan kadagiti naespirituan a pagpeggadan. Ita nga awanen isuna, ket ti trabaho a mangidaulo kadagiti Nephite ket naespirituan a naisaad ken ni Jacob, nga inikkan-pateg ni Nephi nga agbalin a saserdote ken mannursuro kadagiti tao (kitaen iti Jacob 1:18). Babaen ti pammaregta, nasirmata ni Jacob a kasapulan dagiti tattaona a masursuruan iti “nabatbatad,” agsipud ta “mangrugi[dan] nga agiray iti basol” (Jacob 2:7, 5). Maipada unay dagitoy a basol iti no ania ti panagkarigatan dagiti tao iti agdama: ayat iti kinabaknang ken seksual a pannakinaig wenno pannakikamalala. Ket bayat ti pannakarikna ni Jacob a kasapulanna a kedngan daytoy a kinadangkes, agsakit met ti pusona para kadagiti biktima daytoy, a dagiti pusoda ket “aglak-am iti nauneg a sugsugat” (Jacob 2:35). Impaneknek ni Jacob a ti panangpaimbag iti agpada a grupo—ti managbasol ken ti naespirituan a nasugatan—ket aggapu iti Mangisalakan a ni Jesucristo. Ti mensahe ni Jacob, kas iti mensahe ni Nephi sakbay kenkuana ket ti awag a “makitunos iti [Dios] babaen ti Pannubbot ni Cristo” (Jacob 4:11).
Dagiti Kapanunotan para iti Bukod a Panagadal iti Nasantuan a Kasuratan
Kayat ti Apo nga aramidek a nasayaat [magnify] ti takem a nakaawagak [calling].
Ken ni Jacob, ti panangisuro iti balikas ti Dios ket nalablabes pay ngem iti naidutok nga aramiden manipud iti kabsatna—daytoy ti “nakaibaonanda manipud iti Apo,” isu a nagtrabaho a sipapasnek tapno “ipateg[na] ti takem[na]” (Jacob 1:17, 19). Insuro ni Presidente Gordon B. Hinckley nga ipategtayo dagiti takem a nakaawagantayo “bayat ti panagserbitayo a sipapasnek, bayat ti panangisurotayo nga addaan iti pammati ken pammaneknek, bayat ti panangitag-ay ken panangpapigsa ken panangbangontayo iti natibker a pammati ti kinalinteg kadagiti tao a sinagidtayo iti panagbiagda” (“Magnify Your Calling,” Ensign, Mayo 1989, 47). Panunotem maipapan kadagiti bukodmo a “[nakaibaonan] manipud iti Apo” bayat ti panangbasam iti Jacob 1:6–8, 15–19 ken 2:1–11. Apay a sipupudno unay a nagserbi ni Jacob? Ania ti iparegta kenka ti pagwadanna a mangipatungpal a nasayaat kadagiti takemmo iti Simbaan ken dagiti pagrebbengam iti pagtaengan?
Pakaragsakan ti Apo ti kinadalus ti dayaw.
Adda dagiti bunga ti basol kadagiti indibidual ken kagimongan. Iti panagsaona maipapan iti seksual a basol, binallaagan ni Jacob dagiti agpada a kita dagiti bunga. No basaem ti Jacob 2:31–35 ken 3:10, sapulem dagiti wagas nga ar-aringan ti imoralidad dagiti Nephite kas tattao ken kas indibidual. Kasano a maipada dagitoy a wagas kadagiti bunga ti imoralidad a makitam iti lubong iti agdama? Ania iti masarakam kadagiti balikas ni Jacob a makatulong kenka a mangisuro iti maysa nga ipatpateg maipapan iti kinapateg ti kinadalus ti dayaw? Kasano a nakatulong kenka dagiti panagkagumaam nga agbalin a nadalus iti dayaw?
Makita a dinakamat pay ni Jacob ti aramid a kaadda ti ad-adu pay ngem maysa nga asawa a babai. Ania ti masarakam iti Jacob 2:23–30 a makatulong kenka a maawatam no apay a ti Apo, kadagiti limitado a kasasaad, imbilinna kadagiti taona nga aramidenda ti panagasawa iti adu? Kasano ti nariknana maipapan kadagitoy mangaramid nga awan iti pammalubosna?
Makitunosak iti Dios babaen ti Pannubbot ni Jesucristo.
Nagpakaasi ni Jacob kadagiti taona a “makitunos[da] iti [Dios] babaen ti pannubbot ni Cristo” (Jacob 4:11). Ania iti panagkunam ti kaipapanan dayta? Makatulong kadi a kitaen ti itunos iti diksionario? Nalabit a masarakam dagiti balikas wenno ragup dagiti balikas iti daytoy a kapitulo a mangisingasing iti no kasano a makaasidegkayo ken ni Cristo tapno mabalinmo ti makitunos iti Dios. Kas pagarigan, insuro ni Jacob a naited ti paglintegan ni Moises a mangitudo kadagiti tao ken ni Jesucristo (kitaen iti Jacob 4:5). Ania ti impaay ti Dios a mangitudo kenka ken ni Cristo? Kasano nga us-usarem dagitoy a bambanag tapno mayasideg iti Dios?
Kitaen met ti 2 Nephi 10:24.
Maliklikak ti naespirituan a pannakabulsek babaen ti panangipamaysak iti Mangisalakan.
Bayat ti panangkalikagum ni Jacob a mangisubli a naan-anay dagiti taona iti Apo, binallaaganna ida a saanda nga agbalin a naespirituan a bulsek ken saanda nga umsien dagiti“nalawag a balikas” ti ebanghelio (kitaen iti Jacob 4:13–14). Imballaag ni Elder Quentin L. Cook dagiti isu met la a parikut iti panawentayo: “Adda ugali ti sumagmamano kadatayo a ‘kumita iti labes ti marka’ imbes a mangpatalinaed iti maysa a pammaneknek maipapan kadagiti kangrunaan a banag ti ebanghelio. Aramidentayo daytoy no sukatantayo dagiti pilosopia ti tao kadagiti kinapudno ti ebanghelio, makiramantayo iti panangpasantak iti ebanghelio, … wenno mangital-otayo kadagiti annuroten iti doktrina. Ti panangliklik kadagitoy nga ugali ket mangtulongto kadatayo a mangliklik iti pakaseknan ti relihion iti kinabulsek ken pakaitibkolan nga inladawan ni Jacob” (“Looking beyond the Mark,” Ensign, Mar. 2003, 42).
Segun iti Jacob 4:8–18, ania ti maaramidtayo a mangipamaysa iti Mangisalakan ken mangliklik iti naespirituan a kinabulsek?
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.
Jacob 1:6–8, 15–19; 2:1–11; 4:18
Ania dagiti balikas ken ragup ti balikas kadagitoy a bersikulo a mangidanon ti ayat a narikna ni Jacob para kadagitoy inturongna? Ania ti naaramid dagiti lidertayo iti Simbaan a mangtulong kadatayo a makarikna iti “tarigagay ken gagar[da] para iti pagimbagan dagiti kararua[tayo]”? (Jacob 2:3). Nalabit a mabalin nga iburay dagiti miembro ti pamilia dagiti wagas a pakanunongantayo kadagiti lidertayo iti Simbaan. Mabalinmo a planuen nga aramiden ti maysa a banag a kas maysa a pamilia para kadagiti lokal a lider iti Simbaan, kas iti panagsurat tapno agyaman kadakuada iti serbisioda wenno pananglaglagip kadakuada ken dagiti pamiliada kadagiti kararagmo.
Jacob 2:8
Kasano a paimbagen ti balikas ti Dios “ti nasugat a puso”?
Jacob 2:12–21
Ania ti isuro dagitoy a bersikulo maipapan iti no kasano ti nasken a panangibilantayo iti material a kinabaknang? Ania ti ar-aramidentayo a mangtulong kadagiti dadduma nga agkasapulan iti tulongtayo?
Jacob 3:1–2
Ania ti kayat a sawen ti “natarnaw iti panagpuspuso” ken “kumitakayo iti Dios nga addaan iti natibker a panunot”?
Jacob 4:4–11
Maysa a wagas a makatulong iti pamiliam a maawatanda no ania ti kaipapanan ti “saan a maisin” iti pammatida ket ti mangsapul iti dakkel a kayo iti asideg ket saludsoden kadagiti miembro ti pamilia a dayyegen dagiti tunggal maysa a sanga. Kalpasanna papadasmo a dayyegenda ti puon. Apay a narigrigat a dayyegen ti puon? Ania ti masursurotayo manipud kadagiti pannursuro ni Jacob maipapan iti no kasano a mapadakkel ti pammati a “saan a maisin”?
Kas iti puon ti kayo, ti pammatitayo ken ni Cristo ket mabalin a “saan a maisin.”
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Bukod a Panagadal
Dumngeg iti Espiritu. Bayat ti panagadalmo, ikasom dagiti pampanunotmo ken riknam (kitaen iti DkK 8:2–3), uray no kasla saan a mainaig dagitoy iti no ania ti basbasaem. Mabalin a dagita nga impresion ti mismo a kayat ti Dios a maammuam ken aramidem.
Ipatulodkonto dagiti Balikasda (Ni Jacob ti Mannursuro), ni Elspeth Caitlin Young