“3 Nīfai 25: Ngāue Fakatemipalé mo e Hisitōlia Fakafāmilí,’” Tohi ʻa Molomoná – Tohi Lēsoni ʻa e Faiakó (2024)
“3 Nīfai 25,” Tohi ʻa Molomoná – Tohi Lēsoni ʻa e Faiakó
3 Nīfai 25
Ngāue Fakatemipalé mo e Hisitōlia Fakafāmilí
Kuó ke fakamatalaʻi nai ki ha taha ʻa e ʻuhinga ʻoku tau maʻu ai ha ngaahi temipale pe fakahoko ʻa e ngāue ki he hisitōlia fakafāmilí? ʻOku mahuʻinga fēfē ʻa e hisitōlia fakafāmilí mo e ngāue fakatemipalé kiate koé? Lolotonga hono akoʻi ʻe Sīsū ʻa e kau Nīfaí, naʻá Ne folofola ʻaki ha pōpoaki naʻá Ne ʻuluaki vahevahe mo Malakai ʻa ia naʻe kau ai ʻa e foki mai ʻa ʻIlaisiaá mo hono fatongia mahuʻinga ʻi he ngāue fakatemipalé mo e hisitōlia fakafāmilí. ʻOku fakataumuʻa ʻa e lēsoni ko ʻení ke tokoniʻi koe ke ke kau atu ki he hisitōlia fakafāmilí mo e ngāue fakatemipalé.
Ko hono tokoniʻi ʻo e kau akó ke fakahoko ha ngāue māʻoniʻoni mo ola leleí. Ko e fakatupulaki ʻo e tuí mo e hoko ʻo anga faka-Kalaisi angé ʻoku ʻikai hoko ia ʻi ha foʻi kalasi pē ʻe taha. ʻI hoʻo fakaafeʻi ʻa kinautolu ʻokú ke akoʻí ke ngāueʻi ʻa e tokāteline moʻoní, ʻokú ke tokoni ai ke fakaaʻu ʻa e aʻusia fakaakó ki honau ngaahi ʻapí mo e moʻui fakaʻahó (vakai, Tokāteline mo e Ngaahi Fuakava 43:8–10).
Teuteu ʻa e tokotaha akó: Fakaafeʻi ʻa e kau akó ke teuteu ke vahevahe fekauʻaki mo ha tokotaha moʻui pe pekia kuo nau ako fekauʻaki mo ia ʻi heʻenau hisitōlia fakafāmilí. Mahalo ʻe ʻaonga ki he kau akó ke talanoa mo ha mātuʻa pe kui pe fakaʻaongaʻi ʻa e polokalama FamilySearch.
Ngaahi ʻEkitivitī Ako ʻOku Ala Fakahokó
Ko hoʻo ngaahi kuí
Fakakaukau ke tufa ha ngaahi tatau ʻo e saati ko ʻení ki he tokotaha ako takitaha pea fakaafeʻi kinautolu ke fakafonu ki he lahi tahá ʻa e fakamatala te nau ala lavá.
Fakakaukau ki he meʻa ʻokú ke ʻilo mo ongoʻi fekauʻaki mo e moʻui ʻa kinautolu ʻokú ke ʻofa aí, ko e meʻa ʻokú ke fie ʻiló, pea mo e founga kuo nau liliu ai hoʻo moʻuí.
-
Ko e hā ʻoku mahuʻinga ai ke tau fekumi ke ʻilo lahi ange ki heʻetau ngaahi kuí?
Fakapapauʻi pe ʻe lelei taha ke vahevahe ʻe he kau akó ʻenau ngaahi tali ki he ngaahi fehuʻí ni, fai ha savea ʻoku ʻikai fakahaaʻi ke ʻilo honau hingoá, pe vakaiʻi fakalongolongo pē maʻanautolu.
-
ʻI ha meʻafua 1–10 (1 = ʻikai ke tokanga ki ai, 10 = mātuʻaki tokanga ki ai), ʻoku fēfē hoʻo mahuʻingaʻia ʻi hono ʻiloʻi hoʻo ngaahi kuí? ʻI he kau ʻi he ngāue fakatemipalé mo e hisitōlia fakafāmilí? Ko e hā hono ʻuhingá?
ʻI hoʻo akó, kumi ha ngaahi fakakaukau ʻe ala tokoni ke fakaʻaiʻai koe ke ke kau lahi ange ʻi he ngāué ni.
“ʻI he teʻeki ai hoko ʻa e fuʻu ʻaho lahi mo fakamanavahē ʻo e ʻEikí”
ʻI hono fakaʻaongaʻi ʻe Sīsū ʻa e fakatātā mo e ngaahi lea fakataipe naʻe lekooti ʻe he palōfita ko Malakaí ʻi he Fuakava Motuʻá, naʻá Ne akoʻi ʻa e kakai ʻo ʻAmeliká fekauʻaki mo ʻEne Hāʻele ʻAnga Ua Mai ki he māmaní pea kikite fekauʻaki mo e ngāue fakatemipalé mo e hisitōlia fakafāmilí.
Lau ʻa e 3 Nīfai 25:1–2, ʻo kumi ʻa e meʻa naʻe akoʻi ʻe he Fakamoʻuí ʻe hoko ʻi Heʻene liuaki mai ki he māmaní. ʻE ala ʻaonga ʻa e ngaahi ʻuhinga mo e fakaʻuhinga ko ʻeni ʻo e ngaahi fakataipé.
Fakakaukau ke fakaʻaliʻali e ngaahi meʻá ni:
-
Tungaʻi ʻakau: Tungotungaʻi ʻakau ʻoku kei toe ʻi ha ngoueʻanga hili ʻa e ututaʻú ʻa ia ʻe tutu ʻe ha tangata faama
-
Ngaahi Aká: Ngaahi Kuí
-
Ngaahi Vaʻá: Hakó
-
Fakamoʻui ʻi Hono kapakaú: Ko e mālohi faifakamoʻui mo maluʻi ʻo e ʻEikí mo ʻEne Fakaleleí
-
ʻUhikiʻi pulu ʻi he fale fafangá: ʻE ngaohi mo tauhi lelei ʻa ʻIsileli ʻo hangē ko e fanga monumanu ʻi ha fale fafanga
-
Te ke fakamatalaʻi fēfē ʻa e meʻa ʻe hoko ʻi Heʻene Hāʻele ʻAnga Ua Maí ʻo fakatatau ki he ongo veesi ko ʻení? Ko e hā ʻe hoko ki he kakai faiangahalá?
Kapau ʻe fiemaʻu, fakamatalaʻi ange ʻi he Hāʻele ʻAnga Ua Mai ʻa Sīsū Kalaisí, ʻe aʻusia ʻe he kau faiangahalá ʻa e fakaʻauhá pea ʻe tuʻusi kinautolu mei heʻenau ngaahi kuí mo e hakó (vakai, 3 Nīfai 25:1).
-
Ko e hā ʻokú ke ako mei he ngaahi fakataipe ko ʻeni fekauʻaki mo e Fakamoʻuí mo ʻEne ngaahi tāpuaki maʻanautolu ʻoku muimui kiate Iá?
Lau ʻa e 3 Nīfai 25:5–6 pea fakakaukau ke fakaʻilongaʻi ʻa e meʻa ʻe fai ʻe he Fakamoʻuí ke tokoni ki he ngaahi fāmili ʻo e māmaní kimuʻa ʻi Heʻene Hāʻele ʻAnga Ua Maí. Ko e taha ʻo e ngaahi ʻuhinga ʻo e foʻi lea “liliú” ko e fakamaʻu, pe haʻi (vakai, Ngaahi Akonaki ʻa e Kau Palesiteni ʻo e Siasí: Siosefa Sāmita [2007], 547). ʻE lava foki ke tokoni ʻa e ngaahi futinouti ʻi hoʻo folofolá ke mahino lelei ange kiate koe ʻa e ngaahi veesi ko ʻení.
Mahalo te ke fie fakamahinoʻi ange ʻoku toutou hā ʻa e kikite ko ʻení ʻi he ngaahi folofola takitaha ʻoku fakaʻaongaʻi ʻe he Siasí. Te ke lava ʻo fakaafeʻi ʻa e kau akó ke vakai pe te nau lava ʻo maʻu ʻa e ngaahi meʻa takitaha ko ʻeni ʻe faá pe vahevahe mo kinautolu e ngaahi veesi ko ʻení: Malakai 4:5–6; Luke 1:17; Tokāteline mo e Ngaahi Fuakava 110:15–16; Siosefa Sāmita—Hisitōlia 1:38–39.
Fakakaukau ke fehuʻi ki he kau akó pe ko e hā ʻoku nau ʻilo fekauʻaki mo ʻIlaisiā mo e ngaahi kī naʻá ne maʻú. Fakatatau mo e tali ʻa e kau akó, vahevahe ʻa e ngaahi palakalafi ko ʻení (pe ngaahi konga ʻoku fiemaʻú).
Naʻe maʻu ʻe ʻIlaisiā, ko ha palōfita ʻo e kuonga muʻá, ʻa e ngaahi kī ʻo e mālohi faisilá. ʻOku hanga ʻe he mālohi faisilá ʻo ngaohi ke tali ʻi he langí ʻa e ngaahi ouau naʻe fakahoko ʻi he mafai ʻo e lakanga fakataulaʻeikí ʻi he māmaní (Fakahinohino ki he Ngaahi Folofolá, “Fakamaʻú,” scriptures.ChurchofJesusChrist.org).
Lau ʻa e Tokāteline mo e Ngaahi Fuakava 110:13–16 ke ʻiloʻi ʻa e meʻa naʻe hoko ʻi he Temipale Ketilaní ʻi he 1836 naʻe kau ai ʻa ʻIlaisiā, Siosefa Sāmita, mo ʻŌliva Kautelé.
Koeʻuhí ko e mālohi faisila kuo fakafoki maí, te tau lava ʻo fakahoko ʻa e ngāue fakatemipalé maʻatautolu mo ʻetau ngaahi kui kuo pekiá.
-
Ko e hā kuó ke ako mei he 3 Nīfai 25 mo e Tokāteline mo e Ngaahi Fuakava 110?
ʻE lava ke kau ʻi he ngaahi moʻoni ʻe maʻu ʻe he kau akó ʻa e ngaahi meʻá ni: Naʻe fakafoki mai ʻe Sīsū Kalaisi ʻa e ngaahi kī faisilá ki he ngāue fakatemipalé mo e hisitōlia fakafāmilí ʻo fakafou ʻi he palōfita ko ʻIlaisiaá. ʻI heʻetau kau ki he ngāue fakatemipalé mo e hisitōlia fakafāmilí, ʻoku tau teuteuʻi ai kitautolu mo hotau fāmilí ki he Hāʻele ʻAnga Ua Mai ʻa e Fakamoʻuí.
-
Ko e hā ha ngaahi founga pau ʻe lava ke kau ai ʻa e toʻu tupú ʻi he ngāue fakatemipalé mo e hisitōlia fakafāmilí?
-
ʻE tokoni fēfē ʻa e kau ki he ngāue fakatemipalé mo e hisitōlia fakafāmilí ke teuteu ai ha taha ki he Hāʻele ʻAnga Ua Mai ʻa e Fakamoʻuí?
ʻOku mahuʻinga ke ʻiloʻi naʻe ʻikai ngata pē ʻi hono fakafoki mai ʻe he Fakamoʻuí ʻa e ngaahi kī faisilá, ka ʻoku fakafou ʻi Heʻene Fakaleleí pē ʻa ʻetau lava ke huhuʻi, fakahaohaoaʻi, mo maʻu ʻa e ngaahi ouau mo e ngaahi tāpuaki taʻengatá ʻo kau ai ʻa e ouau ʻo e silá.
Fakalaulauloto ki he ʻuhinga ʻoku mahuʻinga ai ʻa e ngāue fakatemipalé mo e hisitōlia fakafāmilí ʻi hoʻo moʻuí. ʻI hoʻo fakalaulaulotó, mahalo te ke fie sio ʻi he foʻi vitiō “The Promised Blessings of Family History 2” (4:04), ʻoku maʻu ʻi he ChurchofJesusChrist.org.
Fakakaukau ke fakaafeʻi ʻa e kau akó ke aleaʻi ʻa e ngaahi meʻá ni ʻi ha ngaahi hoa pe fanga kiʻi kulupu iiki kimuʻa pea vahevahe ʻa e ngaahi talí mo e kalasí.
-
Ko e hā ha ngaahi aʻusia kuó ke maʻu ʻi he temipalé mo e hisitōlia fakafāmilí?
-
Ko e hā ha ngaahi tāpuaki kuó ke fakatokangaʻi ʻi hoʻo moʻuí ko ha ola mei ai?
Ko e kau ʻi he ngāue fakatemipalé mo e hisitōlia fakafāmilí
Ke tokoniʻi koe ke ke kau ʻi he ngāue fakatemipalé mo e hisitōlia fakafāmilí, fakahoko ha meʻa ʻe taha pe ua mei heni. ʻE lava foki ke ke fakakaukau ke fai ha meʻa kehe ʻoku fekauʻaki mo e ngāue fakatemipalé mo e hisitōlia fakafāmilí ʻa ia ʻokú ke ongoʻi ʻoku tataki koe ʻe he Laumālié ke ke fakahoko.
ʻOku fakataumuʻa ʻeni ke fokotuʻu ha faingamālie maʻá e kau akó ke nau kau ʻi he ngāue fakatemipalé mo e hisitōlia fakafāmilí ʻi he kalasí. Te ke lava ʻo nofotaha ki ha ʻekitivitī ʻe taha fakataha mo e kalasí pe tuku ke fili ʻe he kau akó ha ʻekitivitī pea nau ngāueʻi fakafoʻituitui ia. Kapau ʻe ʻaonga, pea ʻi hano fakangofua ʻe hoʻo taki lakanga fakataulaʻeikí, fakakaukau ke fakaafeʻi ʻa e faifaleʻi hisitōlia fakafāmili ʻi he uōtí pe siteikí ki hoʻo kalasí ke tokoni.
-
ʻI hono fakaʻaongaʻi hoʻo ʻakauni ChurchofJesusChrist.org, hū ki he FamilySearch.org. Vakaiʻi ʻa e ngaahi maʻuʻanga tokoní ke ako ai ki ha taha hoʻo ngaahi kuí. Fakakaukau ke kamata ʻi he “Ko e hā e founga ʻokú ke loto ke ke kamata ʻakí?”
-
Text, telefoni, pe fokotuʻu ha taimi ke talanoa ai ki he mātuʻá, ngaahi kuí, pe kāinga kehé ke ako lahi ange fekauʻaki mo ʻenau moʻuí, ngaahi hisitōliá pe ului ki he ongoongoleleí. Fakakaukau ke lekooti ʻa e meʻa ʻokú ke akó.
-
Kau ʻi he fakahū fakamatalá. Ke maʻu ha tokoni ke mahino pe ko e hā ʻeni mo e founga ke kamata aí, fakakaukau ke ʻuluaki sio ʻi he foʻi vitiō “FamilySearch Indexing—How it Works” (1:48), ʻoku maʻu ʻi he FamilySearch.org.
-
Kumi ʻa e hingoa ʻo e ngaahi kui kuo pekia ʻoku fiemaʻu ke fakahoko ki ai ha ngāue ouau ʻi he temipalé ʻi he polokalama FamilySearch pe FamilySearch.org. Fakakaukau ke kamata ʻi he “Ko e hā e founga ʻokú ke loto ke ke kamata ʻakí?”
Hili hono maʻu ʻe he kau akó ha taimi feʻunga ke maʻu ha aʻusia ʻi he kalasí ʻi he ngāue fakatemipalé mo e hisitōlia fakafāmilí, fakakaukau ke fakaafeʻi kinautolu ke vahevahe ʻenau ngaahi aʻusiá. ʻE lava ke tokoni ʻa e ngaahi fehuʻi ko ʻení ke ke fakaʻosi ʻa e lēsoní.
-
Ko e hā ha meʻa ʻokú ke ongoʻi ʻe finangalo ʻa e ʻEikí ke ke fakahoko ke hokohoko atu hoʻo kau ki he ngāue fakatemipalé mo e hisitōlia fakafāmilí? Ko e hā ha liliu ʻe hoko ʻi hoʻo moʻuí koeʻuhí ko e meʻá ni?
ʻI hoʻo feinga ke hokohoko atu hoʻo kau ki he hisitōlia fakafāmilí mo e ngāue fakatemipalé, manatu ki he lea ko ʻeni meia Palesiteni Lāsolo M. Nalesoni:
Ko e taimi kotoa pē ʻokú ke fai ai ha faʻahinga meʻa pē ke tokoni ki ha faʻahinga taha pē—ʻi ha faʻahinga tafaʻaki pē ʻo e veilí—ke ne laka ki muʻa ʻi hono fakahoko e ngaahi fuakava mo e ʻOtuá mo maʻu honau ngaahi ouau mahuʻinga ʻo e papitasó mo e temipalé, ʻokú ke tokoni ai ke tānaki fakataha ʻa ʻIsileli. (Russell M. Nelson mo Wendy W. Nelson, “ʻAmanakiʻanga ʻo ʻIsilelí” [fakataha lotu fakaemāmani lahi ʻa e toʻu tupú, 3 Sune 2018], ChurchofJesusChrist.org)
Fakamoʻoni pe fakaafeʻi ʻa e kau akó ke nau fakamoʻoni ki he mahuʻinga ʻo e ngāue fakatemipalé mo e hisitōlia fakafāmilí.