“3 Nīfai 24: Ko e Fono ʻa e ʻEikí ki he Vahehongofulú,” Tohi ʻa Molomoná – Tohi Lēsoni ʻa e Faiakó (2024)
“3 Nīfai 24,” Tohi ʻa Molomoná – Tohi Lēsoni ʻa e Faiakó
3 Nīfai 24
Ko e Fono ʻa e ʻEikí ki he Vahehongofulú
Ko e hā ha meʻa kuo talaʻofa mai ʻe he ʻEikí kapau te tau totongi vahehongofulu? Naʻe fakaʻaongaʻi ʻe he Fakamoʻuí ʻa e ngaahi lea ʻa Malakaí ke akoʻi ʻa e kau Nīfaí fekauʻaki mo e fono ʻo e vahehongofulú pea mo e ngaahi tāpuaki ʻo hono moʻui ʻaki ʻa e fekau ko ʻení. ʻOku fakataumuʻa ʻa e lēsoni ko ʻení ke tokoniʻi koe ke fakatupulaki hoʻo loto-holi ke totongi vahehongofulú.
Ko hono akoʻi ʻa e folofolá ʻi he tui mo e taumuʻa. ʻE ngali faingataʻa ke mahino mo fakaʻaongaʻi ʻe he kau akó ha ngaahi moʻoni ʻe niʻihi ʻo e ongoongoleleí ʻi heʻenau moʻuí. Tokoni ki he kau akó ke vakai ki he mahuʻinga ʻo e ngaahi akonaki ko ʻení. Vahevahe hoʻo fakamoʻoni ki he moʻoni ʻo e ngaahi tefitoʻi moʻoni ko ʻení pea mo e ngaahi tāpuaki ʻoku foaki ʻe he ʻEikí kiate kinautolu ʻoku ngāue ʻi he tuí.
Teuteu ʻa e tokotaha akó: Fakaafeʻi ʻa e kau akó ke lau ʻa e 3 Nīfai 24:8–10 pea fakakaukau ki he ngaahi aʻusia kuo nau maʻu pe kuo maʻu ʻe ha niʻihi kehe ʻi he fono ʻa e ʻEikí ki he vahehongofulú.
Ngaahi ʻEkitivitī Ako ʻOku Ala Fakahokó
Ko hoʻo ngaahi aʻusiá
ʻOku fakataumuʻa ʻa e ngaahi tūkunga ko ʻení ke tokoni ki he kau akó ke fakakaukau ki heʻenau ngaahi aʻusia ʻi he fono ʻa e ʻEikí ki he vahehongofulú. Ongoʻi tauʻatāina ke liliu kinautolu kapau ʻe felāveʻi ange ha ngaahi tūkunga kehe mo hoʻo kau akó.
Ka ʻikai, te ke lava ʻo fakaʻaliʻali ha laʻi vahehongofulu pe koini pea fehuʻi ki he kau akó fekauʻaki mo e mahino ʻoku nau maʻú, ngaahi aʻusiá, mo e ngaahi fehuʻi fekauʻaki mo e vahehongofulú.
Lau ʻa e ngaahi tūkunga ko ʻení, ʻo kumi ʻa e ngaahi tūkunga ʻoku felāveʻi taha mo koé pe ko e toʻu tupu ʻi homou feituʻú:
-
ʻOku fakahū tātānaki ʻe Kālosi ha paʻanga ke fakatau mai ʻaki ha telefoni. ʻOku ʻikai ke ne fakakaukau ke totongi vahehongofulu.
-
Naʻe totongi vahehongofulu maʻu pē ʻa Sita ʻi heʻene kei siʻí, ka ko ʻeni kuó ne maʻu ha ngāue pea mo maʻu ha paʻanga ʻoku lahi angé, kuo fakaʻau ke faingataʻa ange hono fakahokó.
-
ʻOku foaki ʻe ʻOneka ʻa e paʻanga kotoa pē ʻokú ne maʻú ke tokoni ki hono fāmilí. ʻOkú ne fifili pe ʻoku fiemaʻu nai ke ne totongi vahehongofulu ʻi he taimi ʻoku fiemaʻu ai ʻe hono fāmilí ʻa e paʻangá.
-
ʻOku ʻikai maʻu ʻe ʻAnisumi ha paʻanga, ko ia ʻokú ne fifili pe ʻoku kaunga fēfē ʻa e fono ʻo e vahehongofulú kiate iá.
-
Ko e ngaahi tūkunga fē ʻokú ke ongoʻi ʻoku felāveʻi taha mo koé? Ko e hā hono ʻuhingá?
Fakakaukau ke hiki ʻi he palakipoé ʻa e tali ʻa e kau akó ki he fehuʻi hokó.
-
Ko e hā ha ngaahi fehuʻi pe hohaʻa ʻe lava ke maʻu ʻe he toʻu tupú fekauʻaki mo e vahehongofulú?
ʻE lava ke fakalaulauloto ʻa e kau akó ki he ngaahi fehuʻi ko ʻení pe tali kinautolu ʻi heʻenau tohinoa akó. Koeʻuhí ko e natula fakataautaha ʻo e ngaahi fehuʻi ko ʻení, ʻoua naʻá ke kole ki he kau akó ke vahevahe ʻenau ngaahi talí.
Fakakaukau ki hoʻo ngaahi aʻusia mo e mahino ki he vahehongofulú. ʻOkú ke totongi vahehongofulu, pe ʻokú ke loto-fiemālie ke totongi vahehongofulu? Ko e hā hono ʻuhingá? Ko e hā kuó ke ako mei hoʻo ngaahi aʻusia ʻi he vahehongofulú? ʻI hoʻo ako ʻa e lēsoni ko ʻení, fekumi ki he fakahinohino ʻa e Laumālie Māʻoniʻoní ke tokoni atu ke ke talangofua ki he fono ko ʻení.
Ko e fono ʻa e ʻEikí ki he vahehongofulú
Lolotonga hono akoʻi ʻe Sīsū ʻa e kau Nīfaí, naʻá Ne fekauʻi kinautolu ke tohi ʻa e ngaahi lea naʻe lekooti ʻe Malakai ʻi he taʻu nai ʻe 400 kimuʻá. Naʻe kikiteʻi ʻe Malakai ʻa e Hāʻele ʻAnga Ua Mai ʻa Sīsū Kalaisí pea mo e fatongia ʻo e Fakamoʻuí ʻi hono fakamāuʻi ʻo e kau faiangahalá (vakai, 3 Nīfai 24:1–6).
Lau ʻa e 3 Nīfai 24:7, ʻo kumi ʻa e ngaahi faingataʻa naʻe fehangahangai mo e kakaí ʻi he kuonga ʻo Malakaí.
-
Naʻe mei tatau fēfē nai ʻa e kau Nīfaí mo e kakai ʻi he kuonga ʻo Malakaí?
-
Ko e hā naʻe talaʻofa ʻe he ʻEikí ki he kakaí kapau te nau tafoki kiate Ia?
Ke poupouʻi ʻa e kakaí ke tafoki ki he ʻEikí pea teuteu ki Heʻene hāʻele maí, naʻá Ne akoʻi ʻa e vahehongofulú ʻo fakafou ʻia Malakai.
Lau ʻa e 3 Nīfai 24:8–12 pea fakakaukau ke fakaʻilongaʻi ʻa e meʻa naʻe akoʻi ʻe he ʻEikí fekauʻaki mo e fono ʻo e vahehongofulú. Fakatokangaʻi ange ʻe lava ke fakatou ʻuhinga ʻa e “fai fakaʻauhá” (veesi 11) ki he fanga kiʻi manu maumaú, laʻalaʻaá pe tāfeá, pea aʻu pē kia Sētane.
-
Ko e hā ha meʻa ʻoku mahuʻinga kiate koe mei he ngaahi veesi ko ʻení?
Fakamālō ki he kau akó ʻi he meʻa ʻoku nau vahevahé. Fakakaukau ke kole ange ke fakamatalaʻi ʻa e ʻuhinga naʻe makehe ai kiate kinautolu ʻa e ngaahi meʻa naʻa nau vahevahé.
-
ʻE tatau fēfē nai ʻa e taʻeloto ke totongi vahehongofulú mo e kaihaʻa mei he ʻOtuá?
Fakakaukau ke fakaʻaliʻali ʻa e sētesi taʻekakato ko ʻení.
-
Te ke fakaʻosi fēfē nai ʻa e sētesi ko ʻení: “Kapau te tau talangofua ki he fono ʻa e ʻEikí ki he vahehongofulú …”?
Ko ha founga ʻeni ʻe taha ʻe lava ke ke fakaʻosi ʻaki ʻa e sētesí: Kapau te tau talangofua ki he fono ʻa e ʻEikí ki he vahehongofulú, te Ne lilingi mai ha ngaahi tāpuaki kiate kitautolu.
ʻI he kuonga ʻo Malakaí pea ʻi he kuonga ʻo e kau Nīfaí, ʻoku ngalingali naʻe totongi vahehongofulu ʻa e Kāingalotú ʻaki ʻenau foaki ha vahe hongofulu ʻe taha ʻo ʻenau meʻakaí pe koloá. ʻI he kuongá ni, “ʻoku foaki ʻe he kāingalotu ʻo e Siasí ha vahehongofulu ʻe taha ʻo ʻenau paʻanga hū maí ki he ʻEikí ʻo fakafou ʻi Hono Siasí. ‘Oku fakaʻaongaʻi ʻa e paʻanga ko ʻení ke langa hake ʻaki ʻa e Siasí mo paotoloaki e ngāue ʻa e ʻEikí ʻi he funga ʻo e māmaní” (Ngaahi Tefito ʻo e Ongoongoleleí, “Vahehongofulú,” topics.ChurchofJesusChrist.org). Kapau ʻoku ʻikai maʻu ʻe ha taha ha paʻanga hū mai, ʻoku ʻikai fiemaʻu ia ke nau totongi vahehongofulu, neongo ʻoku totonu ke nau loto-fiemālie ki ai ʻi he kahaʻú.
Naʻe fakaʻaongaʻi ʻe he ʻEikí ha ngaahi kupuʻi lea mālohi mo mahino ʻi he taimi naʻe tō-folofola ai fekauʻaki mo e vahehongofulú: “ʻAhiʻahiʻi [pe siviʻi] au … pe te u fakaava kiate kimoutolu ʻa e ngaahi matapā ʻo e langí, mo lilingi hifo kiate kimoutolu ha tāpuaki ʻe ʻikai ha potu ʻe faʻa hao ia ki ai” (3 Nīfai 24:10).
-
ʻOkú ke pehē ko e hā e meʻa naʻe fakamamafaʻi ʻe he ʻEikí ʻaki hono fakaʻaongaʻi e ngaahi lea mo e ngaahi kupuʻi lea naʻá Ne fakaʻaongaʻí? Ko e hā ʻokú ke ako fekauʻaki mo Iá?
Fakakaukau ke tā ha fuʻu matapā lahi ʻi he palakipoé pea fakaafeʻi ʻa e kau akó ke hiki ʻi ai ʻa e ngaahi tāpuaki ʻo e talangofua ki he fono ʻo e vahehongofulú. ʻE lava ke hiki tatau ʻe he kau akó ʻa e matapaá mo e ngaahi tāpuaki ʻoku hiki aí ki heʻenau tohinoá. ʻE lava ke tokoni ʻeni ki he kau akó ke fakakaukau pe kumi ha ngaahi fakakaukau:
-
Lau ʻa e Tokāteline mo e Ngaahi Fuakava 64:23.
-
Lau ʻa e ngaahi palakalafi ʻi lalo ʻi he ʻuluʻi fakamatala “Lēsoni Fika 1—Ngaahi Tāpuaki Mahuʻinga kae ʻIkai Fakatokangaʻi” ʻi he lea ʻa ʻEletā David A. Bednar “Ko e Ngaahi Matapā ʻo e Langí” (Ensign pe Liahona, Nōvema 2013, 17–20).
-
Fakakaukau ki he ngaahi meʻa kuó ke aʻusia ʻi hoʻo totongi vahehongofulú mo e ngaahi aʻusia ʻa e kakai ʻokú ke ʻiló.
-
Text ki ha mātuʻa pe taki ʻo e Siasí ʻo fehuʻi ange pe ko e hā ha ngaahi tāpuaki kuo nau aʻusia ʻi hono totongi ʻenau vahehongofulú.
Kapau ʻoku fiemaʻu tokoni ʻa e kau akó ki hono kumi ʻo e ngaahi tāpuakí, ʻe ala tokoni ʻa e konga “Fakamatala Fakamahinó mo e Puipuituʻá” pe “Ngaahi ʻEkitivitī Fakalahi Ki he Akó” ʻi he lēsoni ko ʻení.
Fakaafeʻi ha kau ako ʻe niʻihi ke siakaleʻi ʻi he palakipoé ha tāpuaki ʻoku ʻuhingamālie kiate kinautolu pe te nau fiemaʻu ʻi heʻenau moʻuí. Fakaafeʻi kinautolu ke vahevahe hono ʻuhingá.
-
ʻOku liliu fēfē ʻe he ngaahi tāpuaki ko ʻení hoʻo loto-holi ke totongi vahehongofulú?
-
ʻOkú ke pehē ko e hā ʻoku fekau ai ʻe he ʻEikí Hono kakaí ke totongi vahehongofulú?
-
ʻOku tokoniʻi fēfē kitautolu ʻe he talangofua ki he fono ʻo e vahehongofulú ke tau “tafoki mai” (3 Nīfai 24:7) pe feinga ke toe ofi ange ki he ʻEikí?
Fakaʻaongaʻi fakatāutahá
Fakakaukau ki he meʻa kuó ke ako mo ongoʻi ʻi he ʻahó ni ʻi hoʻo lau ʻa e lea ko ʻeni ʻa ʻEletā Tēvita A. Petinā o e Kōlomu ʻo e Kau ʻAposetolo ʻe Toko Hongofulu Mā Uá:
ʻOku laka hake ʻa e totongi totonu ʻo e vahehongofulú ʻi ha fatongia pē; ko ha sitepu mahuʻinga ia ʻi he ngāue ʻo e fakahaohaoaʻi fakatāutahá. Kiate kimoutolu ʻoku mou totongi hoʻomou vahehongofulú, ʻoku ou fakamālō atu.
Kiate kimoutolu ʻoku ʻikai ke mou talangofua he taimí ni ki he fono ʻo e vahehongofulú, ʻoku ou fakaafeʻi kimoutolu ke mou fakakaukauʻi hoʻomou angafaí pea fakatomala. ʻOku ou fakamoʻoni ʻi hoʻomou talangofua ki he fono ʻa e ʻEikí, ʻe fakaava ʻa e matapā ʻo e langí kiate kimoutolu. (David A. Bednar, “Ko e Ngaahi Matapā ʻo e Langí,” Ensign pe Liahona, Nōvema 2013, 20)
Fakamanatu ki he kau akó ʻa e kamataʻanga ʻo e lēsoní pea mo e ngaahi fehuʻi ʻe ala maʻu ʻe he toʻu tupú fekauʻaki mo e vahehongofulú. ʻEke ki he kau akó pe ʻoku tokoni ha faʻahinga meʻa kuo nau ako ʻi he ngaahi fehuʻi naʻa nau lave ki aí. Pe ko haʻo fakaafeʻi ʻa e kau akó ke lekooti ʻenau ongo fekauʻaki mo e vahehongofulú.
Hiki ʻi hoʻo tohinoa akó ʻa e ongo ʻokú ke maʻu fekauʻaki mo e vahehongofulú pea mo hono ʻuhingá. Kapau ʻokú ke ongoʻi ko e totongi vahehongofulú ko ha faingataʻa ia pe ʻe hoko ia ko ha faingataʻa kiate koe, fakakau ai ʻa e meʻa te ke lava ʻo fai ke fakaafeʻi ʻa e ʻEikí ke tali hoʻo ngaahi fehuʻí mo tokoni ke mahino kiate koe ʻa e ngaahi meʻa ʻokú ke hohaʻa ki aí.