Sukda ang Imong Nakat-onan 7

Alma 53–3 Nephi 7

batan-on nga namalandong samtang nagtuon sa mga kasulatan

Ang pagpamalandong ug ang pagsukod sa atong espirituhanong pagkat-on makatabang nato nga mas maduol ngadto sa Manluluwas. Kini nga leksiyon makatabang kanimo sa paghinumdom ug sa pagsusi kon sa unsang paagi ang imong mga kasinatian sa Alma 53–3 Nephi 7 nakatabang kanimo sa paglambo sa espirituhanon nga paagi.

Dapita ang mga estudyante sa kanunay nga pagsukod sa ilang nakat-onan.Pinaagi sa regular nga pagpamalandong sa ilang pagkat-on ug pag-uswag, mas masusi sa mga estudyante kon giunsa nila paggamit ang mga baroganan sa ebanghelyo diha sa ilang kinabuhi. Paghimo og mga oportunidad alang sa mga estudyante nga makasabot ug mobati sa kaimportante sa mga kausaban nga mahimo sa ebanghelyo ni Jesukristo diha sa ilang mga kinabuhi.

Pagpangandam sa estudyante: Dapita ang mga estudyante sa pagribyo sa ilang nakat-onan sa bag-ohay lang nga mga semana ug sa pagtambong sa klase nga andam mopakigbahin og usa ka paagi nga mahimo nilang tiwason ang mosunod nga pamahayag: “Usa ka leksiyon gikan sa Alma 53–3 Nephi 7 nga sa akong hunahuna importante alang kanako nga hinumduman mao ang … tungod kay …”

Mga Posibleng Kalihokan sa Pagkat-on

Niini nga leksiyon, ang mga estudyante adunay mga oportunidad sa pagpasabot sa tahas sa mga propeta, sa pagtimbang-timbang sa ilang mga kinaiya ug mga tinguha, ug sa pagpamalandong sa mga plano nga ilang gihimo aron sa paggamit sa mga pagtulun-an sa ebanghelyo. Ang pagtuon sa imong klase sa Alma 53–3 Nephi 7 mahimong mihatag og gibug-aton sa mga kamatuoran gawas sa mga anaa sa mosunod nga mga kalihokan. Kon mao, mahimo nimong ipahiangay ang mga kalihokan aron malakip kadto nga mga kamatuoran.

Ang kamahinungdanon sa paghinumdom

Kini nga bahin sa leksiyon gituyo aron matabangan ang mga estudyante nga makasabot sa kamahinungdanon sa paghinumdom sa bililhong mga leksiyon nga ilang nakat-onan samtang nagtuon sa Alma 53–3 Nephi 7. Kini mahimong usa ka maayong dapit sa pagdapit sa mga estudyante sa pagpakigbahin sa ilang mga tubag gikan sa pagpangandam sa kalihokan.

Si Presidente Spencer W. Kimball mitudlo nga ang labing importante nga pulong sa diksyonaryo tingale mao ang hinumdomi. (Tan-awa sa “Circles of Exaltation” [address to Church Educational System religious educators, Hunyo 28, 1968], 5.)

• Ngano kaha sa imong hunahuna nga gisulti ni Presidente Kimball ang unsay iyang giingon mahitungod sa pulong nga hinumdomi?

• Unsa ang pipila ka mga leksiyon nga imong nakat-onan gikan sa Alma 53–3 Nephi 7 nga importante alang kanimo nga hinumdoman? Ngano man?

Mahimo nimong hinumdoman nga giawhag ni Helaman ang iyang mga anak nga lalaki nga sila si Nephi ug Lehi sa paghinumdom sa mahinungdanong mga leksiyon ug mga tawo (tan-awa sa Helaman 5:4–14). Sa susama, kini nga leksiyon gituyo aron matabangan ka nga mahinumdoman ang mga kamatuoran nga imong nakat-onan ug ang mga pasalig nga imong gihimo sa bag-ohay lang nga mga semana.

Ipasabot ang tahas sa mga propeta

Niini nga bahin sa leksiyon, ikaw modapit sa mga estudyante sa pagpasabot sa tahas sa mga propeta gamit ang mga asoy ni Nephi (Helaman 7–11) o Samuel ang Lamanite (Helaman 13–16). Mahimo nimong ikonsiderar ang pagbutang sa mga estudyante nga managpares ug tugotan ang matag kompanyon nga mopili og managlahi nga propeta aron i-drama-drama ang senaryo sa ubos o usa ka lahi nga senaryo nga imong pilion.

Handurawa nga nadasig ka sa pagdapit og higala nga motan-aw og kinatibuk-ang komperensiya uban kanimo. Samtang mainampoon kang nag-andam sa paglihok niini nga pagdasig, nakahukom ka nga ipasabot ngadto sa imong higala kon unsa ang usa ka propeta ug kon nganong naghinamhinam ka sa pagpamati kaniya. Nahinumdoman nimo nga nakakat-on ka bahin sa pipila ka bantogan nga mga propeta diha sa Basahon ni Mormon nga makatabang nimo sa pagpasabot sa tahas sa usa ka propeta ngadto sa imong higala.

Nephi nga nag-ampo diha sa iyang tore sa tanaman

Samuel ang Lamanite diha sa paril

Mahimong tan-awon sa mga estudyante ang mga entry sa journal ubos sa “Mga kamatuoran mahitungod sa mga propeta sa Ginoo” gikan sa “Helaman 7–10” nga leksiyon.

Pagpili sa asoy ni Nephi (Helaman 7–11) o Samuel ang Lamanite (Helaman 13–15). Susiha ang ilang mga istorya sa mga may kalabotan nga mga kapitulo pinaagi sa pagbasa sa mga bersikulo ug sa pagtan-aw sa mga ulohan sa kapitulo o sa mga mugbo nga mga sulat nga imong gihimo diha sa imong journal sa pagtuon.

• Unsaon nimo sa paggamit kini nga istorya aron sa pagpasabot sa tahas sa mga propeta ngadto sa imong higala?

• Unsa nga mga bersikulo gikan sa mga kasulatan ang mahimo nimong ilakip isip kabahin sa imong pagpasabot?

  Kon nagkinahanglan ang mga estudyante og tabang sa pag-ila og mga kasulatan, mahimo nimong idirekta sila ngadto sa mga tudling sama sa Helaman 7:29; 8:22–23; 10:4–7; 11:23; 13:5; ug 14:11–12.

• Unsa ang pipila ka dugang nga mga kamatuoran o personal nga mga kasinatian nga mahimo nimong ipakigbahin aron matabangan ang imong higala nga makasabot sa kaimportante sa mga propeta?

Kon nahuman na sa mga estudyante ang ilang pagrebyo kabahin sa mga propeta, ikonsiderar ang pagdapit kanila sa pagdrama-drama sa senaryo sa ibabaw gamit ang ilang nakat-onan.

Susiha ang imong kinaiya ug mga tinguha

Kini nga kalihokan makatabang sa mga estudyante nga masusi ang ilang mga kinaiya ug mga tinguha sa mapainubsanong pagpuyo sa ebanghelyo ni Jesukristo. Ikonsiderar ang paghangyo og boluntaryo aron sa pagdrowing sa liyok sa garbo diha sa pisara gikan sa panumdoman. Mahimo nimong dasigon ang mga classmate sa pagtabang kon gikinahanglan.

dayagram sa liyok sa garbo

Samtang nagtan-aw ka niini nga dayagram, mahimong imong mahinumdoman ang ebidensiya sa liyok sa garbo sa tibuok Helaman 1–16 ug 3 Nephi 1–7. Mahimo usab nimong mailhan ang mga pananglitan nga imong nakita diha sa imong kaugalingong kinabuhi o diha sa kalibotan palibot nimo.

Gamita ang bisan unsang pagpahiangay nga tingale imong gihimo diha sa pagsukod sa kaugalingon [self-assessment] nga bahin sa “Helaman 11–12 nga leksiyon” aron sa pagkompleto sa mosunod nga kalihokan.

Sa dihang nagtuon ka sa Helaman 11–12, tingale imong nasusi ang imong paningkamot nga magmapainubsanon. Mahimong nakarekord ka usab og pasalig diha sa imong journal sa pagtuon sa pagdugang sa pagkamapainubsanon ug sa pagbuntog sa garbo. Rebyoha unsay imong gisulat ug pamalandongi kon kumusta ang imong nahimo niana nga pasalig. Pamalandongi ang mosunod nga mga pangutana ug irekord ang imong mga tubag diha sa imong journal.

Tungod sa personal nga kinaiyahan niini nga kalihokan, kinahanglan mahibaloan sa mga estudyante nga dili nila ipakigbahin ang ilang mga tubag.

• Unsa man ang imong nahimo sa bag-o lang milabay nga mga semana sa paghinumdom sa Ginoo ug sa tanan nga Iyang gihimo alang kanimo? Sa unsang paagi paminaw nimo nga ang paghinumdom sa Ginoo nagtabang kanimo nga magpabilin nga mapainubsanon?

• Aduna bay mga kausaban nga gusto nimong buhaton aron makatabang nimo sa paghinumdom sa Ginoo kada adlaw ug sa pagdugang sa pagkamapainubsanon?

Pamalandongi ang mga plano sa pagtukod sa imong pundasyon diha kang Jesukristo

Kini nga bahin sa leksiyon makatabang sa mga estudyante sa pagpamalandong sa mga plano nga ilang gihimo sa pagtukod sa ilang mga pundasyon diha kang Jesukristo ug sa pagbatok sa mga tintasyon sa yawa.

Sa bag-ohay lang nga mga leksiyon, imong gitun-an ang daghang asoy sa mga indibidwal nga nakabuntog sa mga pag-atake sa ilang kinabuhi, relihiyon, ug mga pagpamatuod ni Jesukristo. Samtang nagtuon, tingali nakahimo ka og pipila ka mga pasalig nga magtabang kanimo sa pagtukod og mas lig-on nga pundasyon diha kang Jesukristo aron makasugakod sa mga pag-atake ni Satanas.

Dapita ang mga estudyante sa pagpamalandong ug sa pagpakigbahin sa mga asoy nga ilang gitun-an nga nakatabang sa pagpalig-on sa ilang pundasyon diha kang Jesukristo ug sa pagbuntog sa mga pag-atake ni Satanas. Kon nagkinahanglan sila og tabang sa pag-ila og mga pananglitan, ikonsiderar ang pagpakita sa mosunod nga mga hulagway uban sa mosunod nga mga pakisayran. Mahimo nimong bahinon ang klase og katulo ug dapita ang matag grupo sa pagribyo og managlahi nga mga asoy ug sa pagpakigbahin ngadto sa klase sa unsay ilang nakat-onan.

Lehonti ug Amalickiah

Lehonti ug Amalickiah (Alma 47:10–18)

kinoral nga siyudad nga adunay kinawtan nga yuta nga naglibot niini [moat]

Kapitan Moroni nagtukod og mga kota (Alma 50:1–6)

balay sa ibabaw sa usa ka tukuranan

Tambag ni Helaman ngadto sa iyang mga anak nga lalaki (Helaman 5:12)

• Unsa ang pipila ka mga pagtulun-an nga atong makat-onan gikan niini nga mga asoy nga makatabang kanato nga makasugakod sa tentasyon?

Ipasabot ngadto sa mga estudyante nga sila pagadapiton sa pagsukod ug sa pagtimbang-timbang sa mga tumong nga ilang gihimo sa pagtukod sa ilang mga pundasyon diha kang Jesukristo. Dayon hisgotan nila ang pipila sa ilang mga kasinatian ug mga obserbasyon isip usa ka klase.

Mahimo kang magdala og mga dulaan nga mga bloke [building blocks], mga baso nga plastik [plastic cups], o ubang mga butang ngadto sa klase nga mahimong magamit sa mga estudyante sa pagtukod og pundasyon. Hatagi ang matag estudyante og usa sa mga aytem nga himoon og bilding [building item], ug dapita sila sa pagpamalandong sa mga pangutana sa ubos ug sa pagtimbang-timbang sa ilang pag-uswag. Human sa igong panahon, dapita ang matag estudyante sa pagpakigbahin sa bisan unsa nga mga tubag nga komportable sila sa pagpakigbahin. Samtang magpakigbahin sila, mahimo nilang idugang ang ilang aytem sa istruktura sa klase, nga sa kataposan makatukod og lig-on nga pundasyon. Kon walay mga butang nga mahimong magamit sa pagtukod, mahimo nimong dapiton ang matag estudyante sa pagdrowing og brick diha sa pisara samtang magpakigbahin sila, magdugang sa mga drowing sa ubang mga estudyante aron makamugna og lig-on nga pundasyon. Tabangi ang mga estudyante nga makasabot nga sila makatabang sa usag usa samtang sila maningkamot sa pagtukod sa ilang mga tukoranan diha kang Jesukristo.

Pagpamalandong sa mga tumong nga bag-o lang nimong gihimo sa pagtukod sa imong tukuranan diha kang Jesukristo.

• Unsa nga mga kalamposan ang imong nasinati sa imong mga paningkamot sa pagtukod sa imong pundasyon diha kang Jesukristo?

• Unsa nga mga babag ang imong nakita sa pagtukod og lig-on nga pundasyon? Giunsa nimo pagsulay sa pagbuntog niini?

• Sa unsang paagi ka napanalanginan sa imong paningkamot sa pagtukod sa imong tukuranan diha kang Jesukristo? Unsa ang kalainan nga nahimo niini alang kanimo?

Basaha pag-usab ang Helaman 5:12 ug mainampoong ikonsiderar kon aduna bay bisan unsa nga kinahanglan nimong sugdan, hunongon, o padayonon sa pagbuhat aron sa pagtukod og mas lig-on nga pundasyon diha kang Jesukristo. Kon paminaw nimo gikinahanglan nimo nga ayohon ang bisan unsang mga tumong nga imong gihimo, mahimo nimo kining isulat diha sa imong journal sa pagtuon o sa ubang lugar diin mahimo nimo kining pamalandongan kanunay.