Helaman 11–12

Ang Liyok sa Garbo

batan-ong lalaki nga mapainubsanon nga nagtan-aw sa Dios

Usa sa mga sundanan sa tibuok Basahon ni Mormon mao nga ang mga tawo kasagaran nga makalimot sa Dios ug mahimong mapahitas-on kon ang mga butang maayo ra og dagan alang kanila. Sa laing bahin, ang mga tawo kasagaran nga magpaubos sa ilang kaugalingon ug modangop ngadto sa Dios kon ang mga butang malisod. Nakabantay ka ba niini nga sundanan diha sa katilingban o sa imong kinabuhi? Kini nga leksiyon makatabang kanimo nga mobati og mas dakong tinguha nga mas magmapainubsanon ngadto sa Dios.

Tabangi ang mga estudyante nga makakat-on gikan sa mga sundanan sa kasulatan. Adunay mga sundanan sa tibuok mga kasulatan diha sa mga kinaiya ug mga pamatasan, mga tema sa doktrina, ug pinulongan sa kasulatan. Pinaagi sa paghatag ug gibug-aton niini nga mga sundanan , ikaw makatabang sa mga estudyante sa pag-ila sa mahinungdanong doktrina ug mga baroganan. Awhaga sila sa paggamit kon unsay ilang nakat-onan gamit ang tabang niining mga sundanan .

Pagpangandam sa estudyante: Ikonsiderar ang pagdapit sa mga estudyante sa pagbasa sa pakigpulong ni Presidente Ezra Taft Benson sa Abril 1989 nga kinatibuk-ang komperensiya nga giulohan og “Beware of Pride.” Kini nga pakigpulong makita sa Gospel Library o sa Ensign, Mayo 1989, 7-12.

Mga Posibleng Kalihokan sa Pagkat-on

Mga Sundanan [Patterns]

Tan-awa ang mosunod nga mga numero. Sa 30 ka segundo, pangita og daghang mga numero kutob sa imong mahimo sa numerical nga pagkahan-ay, sugod sa “1.”

Ang mosunod nga kalihokan gituyo aron ipakita ang bili sa pag-ila sa mga sundanan. Ipakita ang hulagway o isulat ang mga numero sa pisara, magsunod sa sundanan nga gipasabot sa ubos.

lista sa numero 1 hangtod sa 50

• Pila ka mga numero ang imong nakit-an sulod sa 30 ka segundo? Namatikdan ba nimo ang usa ka sundanan diin nahimutang ang mga numero?

Kon ang mga estudyante nakakita og usa ka sundanan, dapita sila sa pagpakigbahin niini. Kon ang mga estudyante wala makamatikod sa sundanan nga gihulagway sa mosunod nga parapo, itudlo kini kanila. Itudlo ang unang pipila ka mga numero nga magkasunod isip pananglitan.

Adunay sundanan sa mga numero diha sa tsart. Kon magsal-ot ka ug pinatindog ug usa ka pinahigda nga linya sa tunga-tunga sa tsart aron makahimog upat nga managsama nga kwadrante, makit-an nimo nga ang mga numero nagsunod sa usa ka orasan nga sundanan, sama sa gipakita sa arrow. Pananglitan, ang “1” naa sa taas nga wala nga kuwadrante, “2” naa sa taas nga tuo, ug uban pa.

lista sa numero 1 hangtod sa 50 nga adunay gipakita nga sundanan

Paggahin og 30 pa ka segundo aron usbon ang hagit ug tan-awa ang kalainan nga mahimo niini sa pagsunod sa sundanan.

Mahimo nimong dapiton ang mga estudyante sa pagpakigbahin kon sila milambo ug unsa ka taas.

• Unsa ang bili sa pag-ila sa mga sundanan nga sama niini?

Ang pagkahimong makaila sa mga sundanan usa ka kahanas nga makapalambo sa imong pagtuon sa kasulatan. Ang pagbuhat sa ingon makatabang kanimo nga mas magamit kon unsay anaa sa mga kasulatan ngadto sa imong kinabuhi.

Sa leksiyon karon, makakat-on ka mahitungod sa usa ka sundanan nga sagad gitawag og ang liyok sa garbo. Samtang ikaw magtuon, hunahunaa kon sa unsang paagi kana nga sundanan mahimong mahitabo sa imong kaugalingong kinabuhi ug kon unsay imong mahimo aron malikayan ang garbo ug madugangan ang kamapainubsanon.

Ang liyok sa garbo

Tingale makahinumdom ka nga si propeta Nephi makugihon ug nagtinguha lamang sa pagbuhat sa kabubut-on sa Ginoo. Isip resulta, ang Ginoo mipanalangin kaniya og dakong gahom ug misaad nga “tanan nga mga butang mahimo sumala sa [iyang] pulong.” (Helaman 10:5). Ang mga panghitabo nga nahitabo human si Nephi gihatagan niini nga gahom makatabang kanato nga makakita og panag-ingnan sa liyok sa garbo taliwala sa mga Nephite.

Ikonsiderar ang pagpakita sa mosunod nga dayagram ug dapita ang mga estudyante sa pagdrowing og butang nga susama diha sa ilang journal sa pagtuon.

dayagram sa liyok sa garbo

Ikonsiderar ang pag-grupo-grupo sa mga estudyante nga magtinagup-at. Ipabuhat sa matag estudyante ang mosunod nga kalihokan alang sa usa sa mga hugna sa liyok sa garbo. Mahimo dayon ipakigbahin sa mga estudyante ang ilang mga nadiskobrehan ngadto sa mga miyembro sa grupo ug markahan ang ilang mga kasulatan alang sa matag hugna sa liyok sa garbo. Ang mga grupo mahimo usab maghisgot sa mosunod nga pangutana.

Basaha ang mga tudling sa kasulatan diha sa dayagram, sugod sa Helaman 10:13–15. Pangitaa ang mga pulong o mga hugpong sa mga pulong nga naghulagway sa hugna sa liyok garbo nga ang mga tawo nagsinati. Ikonsiderar ang pagmarka niana nga mga pulong ug mga hugpong sa mga pulong ug isulat ang ngalan sa hugna diha sa mga margin sa imong mga kasulatan tupad sa katugma nga mga bersikulo.

• Nganong makatabang man kanato ang pagkahibalo niini nga sundanan?

Hunahunaa kon asa nimo makita ang imong kaugalingon dinhi niini nga sundanan. Samtang magpadayon ka sa pagtuon, hunahunaa kon unsaon nimo pagpalambo sa pagkamapainubsanon ug pagsalig sa Ginoo.

Pagkat-on gikan sa liyok sa garbo

Imbis nga pamub-an ang mosunod nga mga bersikulo, mahimo kang magdapit og pipila ka boluntaryo sa pagbasa niini og kusog ngadto sa klase.

Human giwagtang sa Ginoo ang kagutom, miuswag ang mga tawo. Apan, sulod lang sa pipila ka tuig, ang mga tawo nahimong mapahitas-on pag-usab ug nakasinati og gubat ug kasakit (tan-awa sa Helaman 11:21–33). Napukaw sila sa paghinumdom sa Dios apan daling nahulog sa garbo ug pagkadaotan pag-usab (tan-awa sa Helaman 11:34–38).

Namatikdan seguro nimo gikan sa imong pagtuon sa Basahon ni Mormon nga adunay mga higayon nga si propeta Mormon mihunong sa iyang pagsaysay sa pipila ka mga asoy aron sa pag-ila sa mga leksiyon nga atong makat-onan. Kasagaran niyang gamiton ang mga hugpong sa mga pulong sama sa “sa ingon kita makakita” o “sa ingon kita nakakita.”

Isulat ang hugpong sa mga pulong nga Ug sa ingon kita makakita … diha sa pisara. Pagdapit og pipila ka mga estudyante sa pagpakigbahin sa ilang mga tubag sa mosunod nga pangutana.

• Basi sa imong nakat-onan mahitungod sa mga Nephite sa Helaman 11, unsaon nimo sa pagkompleto niini nga pamahayag: “Ug sa ingon kita makakita …”?

Basaha ang Helaman 12:1–6, mangita sa pipila sa mga konklusyon nga gihimo ni Mormon human sa pagpakigbahin niini nga asoy.

• Ngano kaha sa imong hunahuna nga ang mga tawo nga mauswagon usahay makalimot sa Ginoo?

• Sa unsang paagi malikayan o malaktawan sa usa ka tawo ang garbo ug pag-antos sa mga bahin sa liyok sa garbo (mga kahon 1 ug 2)?

Isip kabahin sa panaghisgotan sa miaging pangutana, mahimo nimong dapiton ang mga estudyante sa pagbasa sa Alma 62:48–51 ug sa pagpamatikod kon sa unsang paagi ang usa ka grupo sa mga Nephite nakahimo sa paglikay sa garbo ug sa mga sangpotanan niini.

Isulat ang mosunod nga kamatuoran sa pisara. Mahimo usab nimong ikonsiderar ang pagdrowing og mga pana [arrow] diha sa dayagram sa liyok sa garbo nga gikan sa kahon 4 balik paingon sa kahon 3.

Usa ka kamatuoran nga makatabang kanato nga magpabilin sa mas maayong bahin niini nga liyok mao kon mopili kita sa paghinumdom sa Ginoo, magpaubos sa atong kaugalingon, ug maghinulsol, malikayan nato ang garbo ug ang mga sangpotanan niini.

Dapita ang mga estudyante sa paghunahuna og pipila ka mga tubag sa mosunod nga pangutana. Mahimo nimong hatagan ang pipila ka mga estudyante og pangmarka ug dapiton sila sa pagsulat og usa ka tubag diha sa pisara. O ang mga estudyante mahimong magbuhat og lista diha sa ilang mga journal sa pagtuon ug pagkahuman ipakigbahin ang ilang mga tubag.

Mahimong makatabang usab ang pagpakigbahin sa pipila o sa tanan nga mga pamahayag sa “Komentaryo ug Background nga Impormasyon” isip kabahin niini nga panaghisgot.

• Unsay atong buhaton nga makatabang kanato aron mahinumdom sa Ginoo ug malikay sa garbo?

Timbang-timbanga [evaluate] ang imong Kaugalingon

Hunahunaa kon sa unsang paagi nga ang mga kamatuoran nga imong natun-an karon may kalabotan kanimo. Ang mosunod nga pagsukod sa kaugalingon mahimong makatabang niini. Gradohi ang imong mga paningkamot sa mosunod nga mga dapit sa sukdanan gikan sa 1 ngadto sa 5, nga ang 1 mao ang “dili gayod” ug ang 5 mao ang “kanunay.”

Mahimo nimong ipakita ang mga pangutana ug hatagan ang mga estudyante og hilom nga panahon sa pagpamalandong ug pagsusi sa ilang kaugalingon sa matag pangutana diha sa ilang journal sa pagtuon. Mahimo usab nga mapuslanon alang sa mga estudyante nga maghimo og ilang kaugalingon nga hugpong sa mga pangutana nga mahimo nilang gamiton aron masusi ang ilang kaugalingon bahin sa garbo. Ayaw hangyoa ang mga estudyante sa pagpakigbahin sa ilang mga tubag.

1. Nibati o nipahayag ka ba sa imong pagpasalamat ngadto sa Dios ug sa uban?

2. Gigahinan ba nimo og panahon ang Dios kada adlaw?

3. Gibati ba nimo nga ang imong kalamposan resulta sa imong kaugalingon nga mga paningkamot?

4. Nagtinguha ka ba sa tabang ug giya sa Dios sa imong kinabuhi?

5. Gitratar ba nimo ang uban nga may kamabination ug pagtahod?

6. Gisaway ba nimo ang uban o naghimo og dili matarong nga mga paghukom ngadto kanila?

Komentaryo ug Background nga Impormasyon

Unsaon nako sa paglikay sa garbo ug magpabiling mapainubsanon?

Si Presidente Henry B. Eyring sa Unang Kapangulohan mitudlo:

Presidente Henry B. Eyring

Dali ra kaayo natong makalimtan nga miabot kita sa kinabuhi nga wala ’y bisan unsa. Bisan unsa ang atong makuha sa dili madugay daw ang atong natural nga katungod, dili usa ka gasa. Ug makalimot kita sa naghatag niini. Unya ang atong panan-aw nabalhin gikan sa unsay nahatag kanato ngadto sa wala pa kanato. …

Ang pag-atubang sa kamatayon ug kalisdanan makapabalik sa panumdoman ug busa pasalamat ngadto sa matarong nga mga tawo ingon man sa mga daotan. Apan kinahanglan adunay laing paagi sa paghinumdom, usa nga mahimo natong pilion. …

Makapili kamo sa paghinumdom sa pinakamahinungdanon nga gasa sa tanan. Sa sunod semana, mahimo kamong motambong sa tigom diin ang sakramento gipahigayon. Kamo makadungog sa mga pulong, “Hinumdomi Siya sa kanunay.” Makasaad kamo sa pagbuhat niana, ug tabangan kamo sa Espiritu Santo. (Henry B. Eyring, “Remembrance and Gratitude,” Ensign, Nob. 1989, 12, 13)

Si Elder Dale G. Renlund sa Korum sa Napulog Duha ka Apostoles mitudlo:

Elder Dale G. Renlund

Ang atong Langitnong Amahan gusto nga kita mahinumdom sa Iyang pagkamaayo ug sa Iyang Hinigugmang Anak, dili alang sa Ilang kaugalingon nga katagbawan apan sa impluwensiya niana nga paghinumdom diri kanato. Pinaagi sa pagkonsiderar sa Ilang pagkamaayo, milapad ang atong panglantaw ug panabot. Pinaagi sa pagpamalandong sa Ilang kamanggiluy-on, mas mapaubsanon na kita, mainampoon, ug makanunayon. (Dale G. Renlund, “Hunahunaa ang Pagkamaayo ug Pagkahalangdon sa Dios,” Liahona, Mayo 2020, 41)

Si Elder Wilford W. Andersen sa Seventy mipasabot:

Elder Wilford W. Andersen

Kon ingon og dili kita makahimo og sayop, kon maayo ang tanan, kon imbes nga magmapasigarbohon kita mahimong magmapasalamaton, niana makalingkawas kita sa liyok sa garbo. Apan … kita moadto sa itaas ngadto paingon sa Dios. Aron makalingkawas sa liyok sa garbo, kinahanglan natong ilhon nga ang matag panalangin nga atong madawat naggikan sa Langitnong Amahan. Siya ang tinubdan sa tanan nga maayo sa atong kinabuhi—ang tuburan sa matag panalangin. … Pun-a ang inyong kasingkasing sa mga pasalamat alang sa Iyang maluluy-on nga kaayo. Ibahandi ug sunda ang tambag sa Iyang mga sulugoon. Ang inyong pasalamat magaprotekta kaninyo batok sa garbo ug maghimog paagi alang sa inyong kalingkawasan gikan sa liyok sa garbo. (Wilford W. Andersen, “The Pride Cycle” [Debosyonal sa Brigham Young University, Nob. 7, 2017], 5–6, speeches.byu.edu)

Si Elder Dieter F. Uchtdorf sa Korum sa Napulog Duha ka Apostoles mitudlo kon unsa ang pagkamapainubsanon ug kon sa unsang paagi kini makatabang kanato sa pagbuntog sa garbo.

Dugang nga mga Kalihokan sa Pagkat-on

Alternatibong paagi sa pagtudlo sa liyok sa garbo

Imbis ipakita sa mga estudyante ang mga lakang sa liyok sa garbo, mahimo nimong ilista ang mga pakisayran sa kasulatan alang sa matag usa sa mga lakang ug dapita ang mga estudyante sa pagsulay sa pag-ila sa upat ka mga lakang base sa ilang gitun-an.

Ang ubang mga dapit nga makita ang liyok sa garbo

Mahimo nimong tugotan ang mga estudyante sa pagpraktis sa pag-ila sa sundanan sa liyok sa garbo sa ubang mga bahin sa Basahon ni Mormon. Mahimo nimo silang dapiton sa pagpili og usa sa mosunod nga mga tudling ug sa pagpangita sa upat ka bahin sa liyok sa garbo.

• 3 Nephi 1:20–23, 27–30; 2:1–3

• Ether 6:16–18; 7:20, 23–27

Pagbantay sa garbo

Mahimong basahon sa mga estudyante ang bahin o ang tanan sa pakigpulong ni Presidente Ezra Taft Benson sa Abril 1989 nga kinatibuk-ang komperensiya nga giulohan og “Beware of Pride.” Mahimo nimong hangyoon ang mga estudyante sa pagpakigbahin kon unsay mipatigbabaw ngadto kanila gikan sa mga pagtulun-an ni Presidente Benson. Mahimo nilang hisgotan kon unsay ilang nakat-onan bahin sa kon unsay buot ipasabot sa pagkamapahitas-on, ingon man kon sa unsang paagi kita makadugang sa pagkamapainubsanon.