ʻAlamā 53–63

Vakai Fakalūkufuá

Naʻe ʻomi ʻe he kakai ʻo ʻĀmoní ha sīpinga mālohi kiate kitautolu ʻo hono tauhi e ngaahi fuakavá naʻa mo e taimi ʻoku tau fehangahangai ai mo e ngaahi nunuʻa faingataʻá. Lolotonga ha taimi ʻo e tau lahi, naʻe taki honau ngaahi fohá ʻe Hilamani ki he ngaahi ikuna naʻá ne fakahaofi ha moʻui ʻa ha tokolahi. Naʻe talangofua pau ʻa e kau sōtia kei talavoú ni “ki he fekau kotoa pē,” ʻo “tuku ʻenau falalá ki he ʻOtuá maʻu ai pē” (ʻAlamā 57:21, 27). Naʻe tukuakiʻi hala ʻa Peiholani kimui ange, ko e fakamaau lahi ʻo e kau Nīfaí, ki hono taʻe-tokangaʻi ʻo e ngaahi kongakau ʻi he taú pea naʻe pau ke ne fili e founga ke fakahoko ʻaki ha talí.

Teuteu ke Akoʻí

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ‘i he lēsoni takitaha.

ʻAlamā 53

Taumuʻa ʻo e lēsoní: Ko e taumuʻa ʻo e lēsoni ko ʻení ke tokoni ke fakatupulaki e tukupā ʻa e kau akó ke tauhi ʻenau ngaahi fuakava mo e ʻOtuá.

• Teuteu ʻa e tokotaha akó: Fakaafeʻi e kau akó ke kumi ʻa e foi lea fuakavá ʻi he Fakahinohino ki he Ngaahi Folofolá, pea mateuteu ke vahevahe ʻa e ʻuhinga ʻoku mahuʻinga ai ke tauhi ʻetau ngaahi fuakava mo e ʻOtuá.

• Ngaahi ʻīmisi ke fakaʻaliʻalí: Ko ha fakatātā ʻo e hala ʻo e fuakavá; ko ha fakatātā ʻo hono tanu ʻe he kakai ʻo ʻĀmoní ʻenau ngaahi meʻataú

• Fokotuʻu ki hono akoʻi ʻi he konifelenisi vitioó: Fakakaukau ke fakaafeʻi ha mēmipa faivelenga ʻo ha uooti pe kolo fakalotofonua ke haʻu ki he kalasí pe hiki ha vitiō nounou ʻo vahevahe ai ʻa e founga kuo tāpuekina ai ia ʻe he ʻEikí ʻi heʻene tauhi ʻene ngaahi fuakava mo Iá. Fakapapauʻi ke maʻu ha ngofua mei hoʻo kouʻōtineitá pe pule ʻo e polokalamá mo e kau taki lakanga fakataulaʻeiki fakalotofonuá kimuʻa pea fakahoko e fakaafé.

ʻAlamā 56

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ke mahino ki he kau akó ko e taimi ʻoku nau ngāue loto-toʻa ai ʻi he tui kia Sīsū Kalaisí, ʻe tāpuekina kinautolu ʻe he ʻEikí ʻaki Hono mālohí.

• Teuteu ʻa e tokotaha akó: Fakakaukau ke fakaafeʻi e kau akó ke nau fakakaukau ki ha toʻu tupu pe kulupu toʻu tupu naʻa nau fakahaaʻi ha tui lahi ki he ʻEikí neongo e ngaahi pole faingataʻá.

• Laʻipepa Tufa: “Ko e Tūkunga Naʻe Fehangahangai mo e Kau Tau Kei Talavou ʻe Toko 2,000”

• Fokotuʻu ki hono akoʻi ʻi he konifelenisi vitioó: Fakakaukau ke fakaʻaliʻali ʻa e ʻekitivitī fakatauhoa ki he kalasí. ʻI he taimi ʻoku ʻiloʻi ai ʻe ha tokotaha ako ha tali ʻoku tonú, fakaafeʻi kinautolu ke fakaʻaongaʻi ʻa e konga ki he tā fakatātaá ke fakafehokotaki ʻa e fakamoʻoni fakafolofola totonú ki he fakamatala fakanounoú pe hiki ʻenau ngaahi talí ʻo fakaʻaongaʻi ʻa e polokalama fetalanoaʻakí.

ʻAlamā 57

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke fāifeinga ke talangofua pau ki he ngaahi fekau ʻa e ʻOtuá.

• Teuteu ʻa e tokotaha akó: Fakaafeʻi hoʻo kau akó ke fakakaukau ki ha ngaahi sīpinga ʻo e talangofua ʻa e Fakamoʻuí ki he Tamai Hēvaní pea fakalaulauloto ki he meʻa ʻoku nau ako mei he ngaahi sīpinga ko iá.

• Fokotuʻu ki hono akoʻi ʻi he konifelenisi vitioó: ʻOange ha taimi ki he kau akó ke fakakakato ai ha ʻekitivitī ʻe ua mei he ngaahi ʻekitivitī ʻe tolu ʻoku fakahingoa A, E, mo e F. Vahevahe kinautolu ki ha fanga kiʻi kulupu iiki ʻi he fanga kiʻi loki fakatahá, pea fakaafeʻi e tokotaha ako takitaha ke vahevahe mo ʻene kulupú ha fakakaukau mei ha taha ʻo e ngaahi ʻekitivitī naʻa nau filí. Hili iá pea tuifio leva e fanga kiʻi loki fakatahá, pea fakaafeʻi e tokotaha ako takitaha ke vahevahe mo ʻenau kulupu foʻoú ha fakakaukau mei he ʻekitivitī kehe ne nau filí. Toe fakatahaʻi e kalasí, pea fakaafeʻi e kau akó ke vahevahe ha meʻa mahuʻingamālie naʻa nau ako mei ha mēmipa ʻe taha ʻo e kalasí.

ʻAlamā 59–61

Taumuʻa ʻo e lēsoní: ʻE lava ke ueʻi fakalaumālie ʻe he lēsoni ko ʻení ʻa e kau akó ke nau hoko ʻo hangē ange ko Sīsū Kalaisí ʻi heʻenau tali e ngaahi fehalaaki ʻa e niʻihi kehé ʻi he ʻofa mo e faʻa kātaki lahi ange.

• Teuteu ʻa e tokotaha akó: Fakaafeʻi e kau akó ke omi mateuteu ki he kalasí ke vahevahe ʻa e meʻa ʻokú ne fakafaingataʻaʻiaʻi hono moʻui ʻaki e ngaahi akonaki ʻa e Fakamoʻuí ʻoku maʻu ʻi he 3 Nīfai 11:29–30, ka ko e hā ʻoku mahuʻinga ai ke moʻui ʻaki e ngaahi akonaki ko iá.

• Fokotuʻu ki hono akoʻi ʻi he konifelenisi vitioó: Ke kamata e lēsoní, fakakaukau ke huluʻi ʻa e lea ʻa ʻEletā Tēvita A Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá. Fakaafeʻi leva e kau akó ke fakaʻaongaʻi ʻa e polokalama fetalanoaʻakí ke hiki ha toe ngaahi ʻuhinga kehe ʻoku tau ongoʻi loto-mamahi aí.

Toe Vakaiʻi Hono 16 ʻo e Fakataukei Fakatokāteliné

Taumuʻa ʻo e lēsoní: ʻE lava ke tokoni ʻa e lēsoni ko ʻení ki he kau akó ke nau fakaʻaongaʻi ʻa e ngaahi moʻoni mei he ngaahi potufolofola fakataukei fakatokāteline ʻi he konga hono ua ʻo e Tohi ʻa Molomoná ki heʻenau moʻuí.

• Teuteu ʻa e tokotaha akó: Fakaafeʻi e kau akó ke omi mateuteu ke vahevahe ha ngaahi tāpuaki pe ngaahi lelei kuo nau fakatokangaʻi ʻi heʻenau feinga ke fakaʻaongaʻi e folofolá ʻi heʻenau moʻuí.

• Vitiō: “Ko Hono Fakaleleiʻi e Ngaahi Palopalema ʻo e Moʻuí ʻAki ʻa e Tohi ʻa Molomoná” (1:00)

• Meʻa ke fakaʻaliʻalí: “Fakataukei Fakatokāteline ʻi he Tohi ʻa Molomoná: ʻAlamā–Molonai”

• Fokotuʻu ki hono akoʻi ʻi he konifelenisi vitioó: ʻOange ha taimi feʻunga ki he kau akó ke fakahoko ai ʻa e sitepu A, E, mo e F ke fakaʻaongaʻi e ngaahi potufolofola fakataukei fakatokāteliné ki he tūkunga naʻa nau filí. Fakaafeʻi e kau akó ke fakaʻaongaʻi ha fakaʻilonga thumbs up pe taipeʻi ʻa e “maau” ʻi he chat ʻi he taimi ʻoku nau mateuteu ai ke vahevahe ʻenau ngaahi fakakaukaú mo e kalasí. ʻE ongoʻi fiemālie ange e kau akó kapau ʻe ʻoange ha taimi feʻunga ke nau teuteu ai.