Mosiah 26

“Kon Siya Mokumpisal sa Iyang mga Sala … ug Maghinulsol”

batan-on nga nakig-istorya sa iyang bishop o presidente sa branch

Sa unsang paagi ang paghinulsol makatabang kanato sa atong inadlaw-adlaw nga kinabuhi? Ngano nga kinahanglan natong ikumpisal ang atong mga sala isip kabahin sa atong paghinulsol? Isip halangdon nga pari [high priest] sa Simbahan sa Manluluwas, gusto ni Alma nga motabang niadtong nakahimo og bug-at nga mga sala. Gihatagan siya sa Ginoo og klaro nga direksiyon kon unsay angay niyang buhaton. Kini nga leksiyon gituyo aron pagtabang kanimo nga makasabot sa mahigugmaon ug mapasayloon nga kinaiya sa Langitnong Amahan ug ni Jesukristo ug ngano nga kinahanglan kita nga maghinulsol sa atong mga sala.

Higugmaa ang imong mga gitudloan.Pinaagi sa gahom sa Espiritu Santo, mahimo kitang mapuno sa gugma sa Langitnong Amahan ug ni Jesukristo. Pag-ampo nga mapuno ka niini nga gugma alang sa imong mga estudyante ug mangita og mga kahigayonan sa pagpahayag sa imong gugma sa angay nga mga paagi samtang magtudlo ka.

Pagpangandam sa estudyante: Dapita ang mga estudyante sa pagpamalandong sa ilang mga pangutana mahitungod sa paghinulsol. Dasiga sila sa pagbasa sa Mosiah 26, mangita sa mga tubag niini nga mga pangutana.

Mga Posibleng Kalihokan sa Pagkat-on

Unsa ang imong buhaton?

Handurawa nga nakadungog ka og tawo nga naghisgot sa mosunod nga mga pangutana ug mga kabalaka mahitungod sa paghinulsol:

Ikonsiderar ang pagsulat sa mosunod nga mga pamahayag ug mga pangutana diha sa pisara sa dili pa ang klase.

• Dili ko segurado kon bililhon ba ang paghinulsol.

• Ngano nga kinahanglan nako nga ikumpisal ang akong mga sala? Ngano nga ang ubang mga sala kinahanglang ikumpisal ngadto sa usa ka lider sa pagkapari?

• Daghan na kaayo kog sala aron pasayloon ko sa Ginoo.

Tabangi ang mga estudyante sa pagpamalandong kon unsay ilang gibati mahitungod sa paghinulsol. Ang mosunod nga kalihokan usa ka paagi aron mabuhat kini.

Hunahunaa sa makadiyot kon aduna ka bay kaila kinsa mahimong makasabot sa bisan hain niini nga mga kabalaka.

• Unsa ang ubang mga pangutana o kabalaka nga mahimong aduna ang usa ka tawo mahitungod sa paghinulsol?

Ikonsiderar ang pagdugang diha sa pisara sa bisan unsang mga pangutana o mga kabalaka nga hisgotan sa mga estudyante.

Pamalandongi kon hain sa usa o duha niini nga mga pangutana o mga kabalaka ang labing makahuluganon nga imong pagatutokan samtang ikaw magtuon niini nga leksiyon. Tinguhaa ang giya gikan sa Langitnong Amahan aron matabangan ka nga makakita og mga tubag ug madugangan ang imong pagsabot sa paghinulsol.

Mga problema diha sa Simbahan

Human giluwas sa Ginoo si Alma ug ang iyang mga katawhan gikan sa pagkaulipon, sila mitipon sa mga Nephite ug sa katawhan ni Limhi sa Zarahemla. Didto, si Hari Mosiah mitudlo kang Alma isip lider sa Simbahan. Ang ubang mga tawo ubos sa pagpangulo ni Alma nakahimo og seryoso nga mga sala ug wala maghinulsol (tan-awa sa Mosiah 26:1–6). Gidala sila sa atubangan ni Alma, apan si Alma nanlimbasog nga masayod unsaon sa pagtubag.

Basaha ang Mosiah 26:13–15, 19–24, 28–31 ug pangitaa ang giya nga gihatag sa Ginoo kang Alma.

Dasiga ang pipila ka mga estudyante sa pagpaambit sa unsay ilang nakat-onan. Kon maghisgot sila og tinuod nga mga baroganan, isulat kini diha sa pisara. Kon mapuslanon, ikonsiderar ang pagpangutana sa pipila o sa tanang mosunod nga mga pangutana:

• Unsa ang gisulti sa Ginoo nga kinahanglang buhaton sa mga tawo aron madawat ug mapasaylo Niya?

• Sumala sa bersikulo 23, nganong ang Manluluwas kuwalipikado sa pagtino kon kinsa ang mapasaylo ug makadawat sa kinabuhing dayon?

• Unsa pa bahin sa Ginoo ang imong nakat-onan gikan niini nga mga bersikulo?

Kon kita maghinulsol

Tingali nakabantay ka og mga baroganan sama sa mosunod: Kon kita mokumpisal sa atong mga sala ug maghinulsol sa katim-os sa atong mga kasingkasing, ang Ginoo mopasaylo kanato.Ingon sa kanunay nga kita maghinulsol, ang Ginoo mopasaylo kanato.

• Unsay gipasabot sa pagkumpisal sa atong mga sala?

• Unsay imong hunahuna sa gipasabot sa “[paghinulsol] diha sa katim-os sa [imohang] kasingkasing” (Mosiah 26:29)?

• Sa unsang paagi nga ang pagkahibalo sa mapasayloon nga kinaiya sa Ginoo makaapekto sa imong kinaiya sa paghinulsol?

Kini nga mga baroganan makatabang sa mga pangutana ug mga kabalaka mahitungod sa paghinulsol gikan sa sinugdanan sa leksiyon.

Ikonsiderar kon labing maayo nga tubagon ang tanan nga upat ka mga kabalaka o pagatutokan ang usa o duha nga mahimong labing adunay kalabotan sa imong mga estudyante. Mahimo usab nga epektibo ang pagbahin sa mga estudyante ngadto sa gagmay nga mga grupo ug piyalan sila sa pagpangandam sa pagtubag sa nakalain-laing mga kabalaka.

Mahimo usab nimong dapiton ang imong kasamtangang bishop o presidente sa branch sa pagbisita sa klase aron sa pagtubag sa mga pangutana mahitungod sa paghinulsol ug pagpasaylo.

Paghinulsol

Manwal sa Magtutudlo sa Basahon ni Mormon (2024)––”Mosiah 26: ‘Kon Siya Mokumpisal sa Iyang mga Sala … ug Maghinulsol’”

Kabalaka A

Dili ko segurado kon bililhon ba ang paghinulsol.

• Unsa nga mga kasulatan ug mga baruganan gikan sa Mosiah 26, o ubang mga kasulatan, ang mahimo nimong ipaambit nga makatabang niini nga kabalaka?

Kon mapuslanon, ikonsiderar ang pagdapit sa mga estudyante sa pagrebyo sa Mosiah 26:23, 29–30, ingon man usab sa pagbasa sa pipila sa mosunod nga mga bersikulo: 2 Nephi 9:23; 3 Nephi 9:22; 3 Nephi 27:19–20; Doktrina ug mga Pakigsaad 18:10–12; 19:15–20; 58:42–43.

Hinumdumi nga si Alma mismo nakahimo og bug-at nga mga sala sa sayo pa sa iyang kinabuhi ug naghinulsol ug nakadawat og kapasayloan pinaagi sa Manluluwas nga si Jesukristo (tan-awa sa Mosiah 11:5–7; 18:1–3; 26:15, 20).

• Unsa sa imong hunahuna ang mahimong ipaambit ni Alma ngadto sa usa ka tawo nga aduna niini nga kabalaka?

Pamalandongi kon unsay nasinati nimo o niadtong imong nailhan sa dihang midangop ka sa Manluluwas nga si Jesukristo pinaagi sa paghinulsol.

Kabalaka B

Ngano nga kinahanglan nako nga ikumpisal ang akong mga sala? Ngano nga ang pipila ka mga sala kinahanglan nga ikumpisal ngadto sa usa ka lider sa pagkapari?

Gisultihan sa Ginoo si Alma nga kadtong nakasala kinahanglang “mokumpisal sa iyang mga sala sa atubangan kanimo [Alma, ilang lider sa pagkapari] ug kanako [ang Ginoo]” (Mosiah 26:29).

• Tungod kay nahibaloan na sa Ginoo ang atong mga sala, nganong importante man nga ikumpisal nato kini ngadto Kaniya? Sa unsang paagi kini makapanalangin sa atong mga kinabuhi?

Ang ubang mga ideya mahimong maglakip nga kini makatabang kanato nga mahimong may tulubagon sa atong mga lihok, makadugang sa atong pagkamapainubsanon, ug makapalig-on sa personal nga mga relasyon ngadto sa Ginoo samtang kita mangayo ug makadawat og kapasayloan.

Basaha ang mosunod nga mga pamahayag gikan sa Alang sa Kalig-on sa mga Kabatan-onan nga booklet ug ni Elder C. Scott Grow, emeritus sa General Authority Seventy, ug pangitaa ang mga panabot kon kanus-a ug nganong kinahanglan kitang mokumpisal ngadto sa usa ka bishop o presidente sa branch.

Ang imong bishop naghupot sa mga yawe sa pagkapari ug espirituhanong mga gasa sa pagtabang nimo sa paghinulsol. Makapangayo ka sa iyang tabang ug tambag sa bisan unsang panahona. Kon ikaw nakahimo og bug-at nga kasaypanan, sama sa paglapas sa balaod sa kaputli, pakigkita sa imong bishop. Siya dili mohimaraot nimo. Siya mao ang representante ni Jesukristo ug motabang nimo nga masayod unsaon aron hingpit nga makahinulsol ug madawat ang makaalim ug makapalig-on nga gahom sa Manluluwas. (Alang sa Kalig-on sa mga Kabatan-onan, 8)

Elder C. Scott Grow

Ang bishop adunay katungod sa pagpadayag gikan sa Espiritu Santo kabahin sa mga miyembro sa iyang ward, lakip nimo. … [Siya] makatabang nimo sa proseso sa paghinulsol sa mga paagi nga dili mahatag sa imong mga ginikanan o ubang mga lider. …

[Kon dili kita mokumpisal, kita] magpas-an sa palas-anon sa sala nga mag-inusara, imbis nga tugotan ang Manluluwas nga mokuha sa palas-anon. (C. Scott Grow, “Ngano ug Unsay Angay Nakong Ikumpisal sa Akong Bishop?” Liahona, Okt. 2013, 58–59)

• Sa unsang paagi kini nga pamahayag makatabang sa usa ka tawo nga adunay kabalaka bahin sa pagkumpisal ngadto sa ilang lider sa pagkapari?

Kabalaka C

Daghan ra kaayo kog sala aron pasayloon ko sa Ginoo.

• Sa unsang paagi nga ang mga pulong sa Ginoo diha sa Mosiah 26:29–30 makatabang niini nga kabalaka? (Mahimo usab nimong ikonsiderar ang pagtuon sa 1 Timoteo 1:15; 1 Juan 1:9; o Doktrina ug mga Pakigsaad 18:10–12; 58:42–43.)

• Unsa nga mga asoy sa kasulatan mahitungod sa Manluluwas ang naghulagway sa Iyang mga pagbati mahitungod niadtong kinsa naningkamot sa paghinulsol ug sa Iyang kaandam sa pagpasaylo?

Ang ubang mga ehemplo mahimong maglakip sa babaye nga mihugas sa tiil sa Manluluwas sa iyang mga luha (tan-awa sa Lucas 7:36–50), ang sambingay sa anak nga mausikon (tan-awa sa Lucas 15:11–32), ug ang pagpasaylo sa Ginoo kang Pablo (tan-awa sa 1 Timoteo 1:15–16).

Kabalaka D

Imong pagpili

Paghunahuna og laing tinud-anay nga kabalaka o pangutana sa usa ka tawo mahitungod sa paghinulsol. Tun-i ang “Paghinulsol” o “Pagkumpisal” sa Giya ngadto sa mga Kasulatan (scriptures.ChurchofJesusChrist.org), mangita sa mga kamatuoran nga mahimong makatabang. Mahimo usab nimong i-rebyo ang mga kasulatan nga may kalabutan sa “Hinulsol, Paghinulsol” o “Kumpisal, Pagkumpisal” diha sa Giya ngadto sa mga Kasulatan (https://www.churchofjesuschrist.org/study/scriptures/gs/repent-repentance?lang=cebChurchofJesusChrist.org). Mahimong makatabang usab ang pagtuon sa “paghinulsol” diha sa Alang sa Kalig-on sa mga Kabatan-onan nga booklet ug mamalandong unsay imong nahibaloan mahitungod sa Ginoo nga mahimong makatabang.

Dapita ang mga estudyante sa pagpaambit sa unsay ilang nakat-onan ug sa unsang paagi kini makatabang sa usa ka tawo nga aduna niana nga pangutana o kabalaka. Pangita og mga paagi aron paghatag og gibug-aton sa gugma ug tinguha sa Ginoo aron sa pagpasaylo kanato samtang kita maghinulsol.

Unsay nahitabo?

Basaha ang Mosiah 26:34–37, mangita sa unsay nahitabo samtang si Alma misunod sa mga instruksiyon sa Ginoo.

Isulat sa imong journal sa pagtuon kon unsay gusto nimong hinumduman o buhaton tungod niini nga leksiyon. Kini nga pamalandong mahimong maglakip kon unsaon nimo sa paghinumdom ang kaandam sa Ginoo sa pagpasaylo o kon unsaon nimo pagtinguha ang pagpaningkamot sa pagkumpisal ug paghinulsol sa imong kaugalingong mga sala.

Ikonsiderar ang pagpamatuod bahin sa mga baroganan nga gitudlo niini nga leksiyon.

Komentaryo ug Background nga Impormasyon

Sa unsang paagi kaha si Satanas motintal kanato nga dili mokumpisal sa atong mga sala?

Si Sister Linda S. Reeves, kanhi Magtatambag sa Kinatibuk-ang Kapangulohan sa Relief Society, mitudlo:

Sister Linda S. Reeves

Kon kita nakasala, si Satanas kanunayng mosulay sa pagkombinser kanato nga ang dili hinakog nga buhaton mao ang pagpanalipod sa uban gikan sa pagkadaut sa pagkahibalo sa atong mga sala, lakip ang pagkumpisal ngadto sa atong bishop, kinsa makapanalangin sa atong kinabuhi pinaagi sa iyang yawe sa priesthood isip gikauyonang maghuhukom sa Israel. Ang kamatuoran, hinoon, mao nga ang dili hinakog ug Kristohanon nga butang nga buhaton mao ang pagkumpisal ug paghinulsol. Mao kini ang mahinungdanong plano sa Langitnong Amahan bahin sa katubsanan. (Linda S. Reeves, “Ang Dako nga Laraw sa Katubsanan,” Liahona, Nob. 2016, 88)

Mosiah 26:32. Unsa ang gipasabot sa dili na maihap uban sa mga katawhan sa Ginoo?

Ang Ginoo mihatag og instruksiyon kang Alma nga kon ang mga tawo modumili sa paghinulsol sa ilang mga sala, “ang mao dili malakip taliwala sa akong mga katawhan” (Mosiah 26:32). Basaha ang mosunod nga pamahayag aron makita kon sa unsang paagi usahay, ang mga lider sa pagkapari mahimong molihok sa samang mga sitwasyon karon ug ngano:

Kon ang usa ka miyembro makabuhat og seryoso nga sala, ang bishop o ang presidente sa stake motabang niya nga maghinulsol. Isip kabahin niini nga proseso, siya mahimong mohatag og restriksiyon sa pipila ka pribilehiyo sa pagkamiyembro diha sa Simbahan sulod sa usa ka panahon. Sa pipila ka sitwasyon, tingali kinahanglan nga iyang bakwion ang pagkamiyembro sa tawo sulod sa usa ka panahon.

Ang paghatag og restriksiyon o pagbakwi sa pagkamiyembro sa usa ka tawo wala gituyo aron sa pagsilot. Hinoon, kini nga mga aksiyon usahay gikinahanglan aron sa pagtabang sa tawo nga maghinulsol ug makasinati og kausaban sa kasingkasing. Makahatag usab kini sa tawo og panahon nga mangandam sa espirituwal nga paagi sa pagbag-o ug pagtuman pag-usab sa iyang mga pakigsaad. (Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 32.2, https://www.churchofjesuschrist.org/study/manual/general-handbook?lang=ceb, ChurchofJesusChrist.org)

Dugang nga mga Kalihokan sa Pagkat-on

Mga baroganan sa Mosiah 25

Ipasabot nga human ang katawhan ni Limhi ug ang katawhan ni Alma nakalingkawas gikan sa pagkaulipon ug nakighiusa sa katawhan nga nagpuyo sa Zarahemla, gibasa ni Hari Mosiah ang ilang mga rekord ngadto sa tanang katawhan.

Dapita ang mga estudyante sa pagbasa sa Mosiah 25:7–11 o Mosiah 25:19–24, mangita sa tinuod nga mga baroganan. Hisgoti nganong ang mga baroganan nga ilang giila kay importante nga masabtan ug sa unsang paagi kini makatabang kanato karon.

Ang bag-ong henerasyon nga nahisalaag

Ang pagsabot sa mga rason nga ang mga tawo mahimong mahisalaag gikan sa Simbahan o magsugod sa pagbuhat og sala makatabang kanato sa pagpugong niini nga mahitabo kanato. Dapita ang mga estudyante sa pagbasa sa Mosiah 26:1–6, mangita sa mga pagpili nga mitultol sa kadaghanan sa mga batan-on nga henerasyon sa pagbiya sa Simbahan o sa pagpakasala. Hangyoa sila sa pagpaambit kon sa unsang paagi kini nga mga bersikulo mahisama sa mga panghitabo nga nahitabo karon. Hisgoti kon sa unsang paagi kita makapugong sa mga batan-on gikan sa pagkahulog o paghimo og sala sa umaabot.

Dugang nga mga baroganan mahitungod sa pagpasaylo

Dapita ang mga estudyante sa pagbasa sa Mosiah 26:31–32 ug mangita og dugang nga mga baroganan mahitungod sa pagpasaylo. Mahimo silang makakita og mga baroganan sama sa mosunod: Kon kita mopili sa dili pagpasaylo sa uban, diha atong dad-on ang atong mga kaugalingon ubos sa pagpanghimaraut (tan-awa sa Mosiah 26: 31). Kon kita mopili nga dili maghinulsol sa atong mga sala, nan kita dili malakip taliwala sa mga katawhan sa Ginoo (tan-awa sa Mosiah 26:32). Ikonsiderar ang pagpangutana nganong importante alang kanato ang pagpasaylo sa uban ug sa unsang paagi nga ang paghinulsol ug pagpasaylo sa uban konektado (tan-awa sa 3 Nephi 13:14–15; D&C 64:8–11).

handout concerns about repentance