« អេណុស–ពាក្យសម្តីនៃមរមន ៖ ទិដ្ឋភាពទូទៅ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៣ )
« អេណុស–ពាក្យសម្តីនៃមរមន » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
អេណុស–ពាក្យសម្ដីនៃមរមន
ទិដ្ឋភាពទូទៅ
គម្ពីរចាប់ពី អេណុស ដល់ ពាក្យសម្តីនៃមរមន គ្របដណ្ដប់រាប់រយឆ្នាំ ហើយណែនាំយើងឲ្យស្គាល់ពួកព្យាការី និងមនុស្សដែលមានការបំផុសគំនិតជាច្រើននាក់ ។ អេណុស ជាកូនប្រុសរបស់ យ៉ាកុប និងជាចៅរបស់ លីហៃ បានអធិស្ឋានដល់ព្រះ « ដោយការអធិស្ឋានដ៏ខ្លាំង » សម្រាប់អំពើបាបរបស់លោក( អេណុស ១:៤ ) ។ គម្ពីរ យ៉ារ៉ុម និង អោមណៃ មានការបង្រៀនផ្សេងៗដែលអាចផ្តល់ពរជ័យដល់ជីវិតរបស់យើង ។ ព្រះវិញ្ញាណនៃព្រះអម្ចាស់បានដឹកនាំមរមនដើម្បីបញ្ចូលផ្ទាំងតូចៗជា « ប្រយោជន៍មួយដ៏សំខាន់ » ស្របតាមព្រះទ័យរបស់ព្រះអម្ចាស់ ( សូមមើល ពាក្យសម្ដីនៃមរមន ១:៣–៧ ) ។ ហើយស្តេចបេនយ៉ាមីនបានបង្រៀនពួកបុត្រារបស់ទ្រង់អំពីតួនាទីដ៏សំខាន់នៃព្រះគម្ពីរនៅក្នុងសេចក្តីជំនឿរបស់ពួកទ្រង់ ។
រៀបចំខ្លួនដើម្បីបង្រៀន
ព័ត៌មានខាងក្រោមនេះផ្តល់ជាយោបល់ដល់គ្រូបង្រៀនអំពីអ្វីដែលអាចត្រូវរៀបចំទុកជាមុនសម្រាប់មេរៀននីមួយៗ ។
អេណុស
គោលបំណងមេរៀន ៖ គោលបំណងនៃមេរៀននេះគឺដើម្បីជួយសិស្សអនុវត្តសេចក្តីជំនឿលើព្រះយេស៊ូវគ្រីស្ទ ហើយប្រែចិត្តដើម្បីទទួលបានការអភ័យទោស ។
-
ការរៀបចំសិស្ស ៖ សូមអញ្ជើញសិស្សឲ្យអាន អេណុស ១:១–៨ មុនពេលមករៀន ដោយសញ្ជឹងគិតពីអារម្មណ៍របស់អេណុស និងអ្វីដែលលោកបានរៀនអំពីព្រះអម្ចាស់ និងការអភ័យទោសពីអំពើបាបរបស់លោក ។ សូមពិចារណាអញ្ជើញសិស្សឲ្យសញ្ជឹងគិតពីរបៀបដែលពួកគេគិតថា បទពិសោធន៍នេះអាចនឹងផ្លាស់ប្តូរជីវិតរបស់អេណុស ។
-
យោបល់សម្រាប់ការបង្រៀនតាមសន្និសីទវីដេអូ ៖ បន្ទាប់ពីអញ្ជើញសិស្សឲ្យសញ្ជឹងគិតឃ្លាសំខាន់ៗចេញពី អេណុស ១:១–៨ សូមពិចារណាអនុញ្ញាតឲ្យពួកគេចែកចាយឃ្លាទាំងនោះដោយប្រើមុខងារក្តារខៀន ។ សិស្សអាចជ្រើសរើសឃ្លាមួយក្នុងចំណោមឃ្លាទាំងនេះ ដែលពួកគេចង់យល់កាន់តែច្បាស់ ហើយបន្ថែមកំណត់ចំណាំពីការសិក្សារបស់ពួកគេនៅជាប់នឹងឃ្លានេះ ។ បន្ទាប់មក ពួកគេអាចត្រូវបានស្នើសុំឲ្យពន្យល់កំណត់ចំណាំរបស់ពួកគេ ។
យ៉ារ៉ុម–អោមណៃ
គោលបំណងមេរៀន ៖ គោលបំណងនៃមេរៀននេះគឺដើម្បីជួយសិស្សឲ្យអនុវត្តការស្វែងរក និងការអនុវត្តគោលការណ៍ពីព្រះគម្ពីរដែលអាចផ្តល់ពរ និងដឹកនាំជីវិតរបស់ពួកគេ ។
-
ការរៀបចំសិស្ស ៖ នៅពេលសិស្សធ្វើការសិក្សាព្រះគម្ពីរប្រចាំថ្ងៃរបស់ពួកគេ សូមអញ្ជើញពួកគេឲ្យអនុវត្តស្វែងរកឲ្យឃើញនូវគោលការណ៍ដែលអាចជួយពួកគេក្នុងជីវិតរបស់ខ្លួន ។ សូមលើកទឹកចិត្តពួកគេឲ្យមកដោយរៀបចំខ្លួនដើម្បីចែកចាយយ៉ាងហោចណាស់គោលការណ៍មួយដែលពួកគេបានរកឃើញ ។
-
រូបភាព ៖ រូបភាពនៃកប៉ាល់ និងចង្កូត ដោយបង្ហាញជារូបភាព ឬគូរនៅលើក្តារខៀន
-
វីដេអូ ៖ « With All Your Heart » ( ៣:២៦ )
-
យោបល់សម្រាប់បង្រៀនតាមសន្និសីទវីដេអូ ៖ សូមពិចារណាចាប់ផ្តើមថ្នាក់ជាមួយនឹងសំណួរនេះ ៖ « សូមស្រមៃថាដំណើរជីវិតរបស់អ្នក គឺដូចជាកប៉ាល់ដែលកំពុងបើកលើមហាសមុទ្រ ។ តើមានអ្វីខ្លះដែលអ្នកអាចប្រៀបធៀបទៅនឹងការកាច់ដៃចង្កូត ឬចង្កូតកប៉ាល់ដែលដឹកនាំកប៉ាល់តាមផ្លូវធ្វើដំណើរ ? » សូមអញ្ជើញសិស្សឲ្យឆ្លើយសំណួរដោយប្រើមុខងារឈែត ។ សូមអានចម្លើយរបស់ពួកគេខ្លះឲ្យឮៗ មុនពេលបង្ហាញ សេចក្តីថ្លែងការណ៍ មកពីអែលឌើរ ដាវីឌ អេ បែដណា ។
ពាក្យសម្ដីនៃមរមន
គោលបំណងមេរៀន ៖ មេរៀននេះអាចជួយសិស្សមានអារម្មណ៍ថា ព្រះអម្ចាស់ជ្រាបគ្រប់ការណ៍ទាំងអស់ ហើយកិច្ចការរបស់ទ្រង់នឹងត្រូវបានសម្រេច ។
-
ការរៀបចំសិស្ស ៖ សិស្សអាចសួរឪពុកម្ដាយ ឬអ្នកដឹកនាំសាសនាចក្រពីរបៀបដែលពួកគេត្រូវបានណែនាំ ឬទទួលពរ ដោយការឆ្លើយតបទៅនឹងចំណាប់អារម្មណ៍ខាងវិញ្ញាណ ឬការបំផុសគំនិត ។
-
វីដេអូ ៖ « The Work of God » ( ១៣:៣៥ សូមមើលពីនាទីទី ៦:៥២ ដល់នាទីទី ១១:៣០ )
-
យោបល់សម្រាប់ការបង្រៀនតាមសន្និសីទវីដេអូ ៖ នៅពេលសិស្សអាន នីហ្វៃទី១ ៩:៥–៦ និង ពាក្យសម្ដីនៃមរមន ១:៧–៨ សូមពិចារណាចែកសិស្សជាក្រុមដោយប្រើមុខងារបំបែកក្រុម ដើម្បីពិភាក្សាអំពីសំណួរ និងស្វែងរកគោលការណ៍ដែលពួកគេរកឃើញ ។ អាស្រ័យលើទំហំនៃក្រុមនីមួយៗ សិស្សម្នាក់ពីក្រុមនីមួយៗអាចចែកចាយជាមួយសិស្សក្នុងថ្នាក់រៀនអំពីអ្វីដែលក្រុមរបស់ពួកគេបានពិភាក្សានៅក្នុង នីហ្វៃទី១ ៩:៥–៦ ហើយបន្ទាប់មក សិស្សផ្សេងៗមកពីក្រុមនីមួយៗអាចចែកចាយអ្វីដែលក្រុមរបស់ពួកគេបានពិភាក្សានូវ ពាក្យសម្ដីនៃមរមន ១:៧–៨ ។
ពាក្យសម្ដីនៃមរមន ១:១២–១៨; ម៉ូសាយ ១
គោលបំណងមេរៀន ៖ មេរៀននេះអាចជួយសិស្សបង្កើនចំណង់ពួកគេក្នុងការសិក្សាព្រះគម្ពីរ ។
-
ការរៀបចំសិស្ស ៖ សូមអញ្ជើញសិស្សឲ្យធ្វើការសិក្សាព្រះគម្ពីរផ្ទាល់ខ្លួនរបស់ពួកគេ ហើយសញ្ជឹងគិតពីរបៀបដែលវាជះឥទ្ធិពលលើពួកគេ ជាពិសេសអារម្មណ៍ និងការទុកចិត្តរបស់ពួកគេលើព្រះយេស៊ូវគ្រីស្ទ ។
-
វីដេអូ ៖ « Scriptures Legacy » ( ២២:២៩ សូមមើលពីនាទីទី ០:០០ ដល់នាទីទី ៥:៣៦ និងពីនាទីទី ៥:៤០ ដល់នាទីទី ៦:២០ ); « The Blessings of Scripture » ( ៣:០៣ ); « An Invitation to Study the Book of Mormon » ( ១៦:២១ សូមមើលពីនាទីទី ៦:១៧ ដល់នាទី ៩:០០ ); « What Scriptures Mean to Me » ( ៥:០៣ )
-
យោបល់សម្រាប់ការបង្រៀនតាមសន្និសីទវីដេអូ ៖ នៅជិតចុងបញ្ចប់មេរៀន នៅពេលសិស្សអាចជ្រើសរើសសកម្មភាពមួយចំនួនអំពីការសិក្សាព្រះគម្ពីរដើម្បីធ្វើ សូមពិចារណាធ្វើសកម្មភាពវីដេអូជាថ្នាក់ទាំងមូល ។ សូមទាញយកវីដេអូមួយក្នុងចំណោមវីដេអូជាច្រើន ហើយអញ្ជើញសិស្សឲ្យមើលវា ដោយរកមើលឧទាហរណ៍អំពីរបៀបដែលការសិក្សាព្រះគម្ពីរអាចផ្តល់ពរដល់ជីវិតរបស់យើង និងបង្កើនសេចក្ដីជំនឿរបស់យើងលើព្រះវរបិតាសួគ៌ និងព្រះយេស៊ូវគ្រីស្ទ ។ សូមអញ្ជើញពួកគេឲ្យចែកចាយគំនិតរបស់ពួកគេ មុនពេលជ្រើសរើសសកម្មភាពពីរដែលនៅសល់ ។
ការរំឭកចំណេះចំណានខាងគោលលទ្ធិទី ៦
គោលបំណងមេរៀន ៖ មេរៀននេះអាចជួយសិស្សឲ្យយល់កាន់តែស៊ីជម្រៅ និងពន្យល់សេចក្តីពិតចេញពីវគ្គចំណេះចំណានខាងគោលលទ្ធិមួយ ឬច្រើនពីព្រះគម្ពីរមរមន ។
-
ការរៀបចំសិស្ស ៖ សូមអញ្ជើញសិស្សឲ្យរំឭកវគ្គបទគម្ពីរពីតារាងក្នុងមេរៀននេះ ហើយជ្រើសរើសវគ្គបទគម្ពីរមួយដែលពួកគេចង់យល់កាន់តែច្បាស់ ។ សូមឲ្យពួកគេអានវគ្គបទគម្ពីរដែលពួកគេបានជ្រើសរើស ហើយព្យាយាមយល់វាឲ្យកាន់តែច្បាស់ ។ នេះអាចរួមបញ្ចូលការស្វែងរកខគម្ពីរដែលគាំទ្រផ្សេងទៀត ដោយសរសេរគំនិតរបស់ពួកគេអំពីខគម្ពីរនោះនៅក្នុងសៀវភៅកំណត់ហេតុរបស់ពួកគេ ឬសួរអ្នកផ្សេងពីអ្វីដែលពួកគេយល់ពីខគម្ពីរនោះ ។ សូមអញ្ជើញពួកគេឲ្យមកដោយត្រៀមខ្លួនដើម្បីចែកចាយអ្វីដែលពួកគេបានធ្វើ និងអ្វីដែលពួកគេបានរៀន ។
-
រូបភាព ៖ រូបភាពនៃការប្រកួត ឬព្រឹត្តិការណ៍កីឡាផ្សេងៗ
-
យោបល់សម្រាប់ការបង្រៀនតាមសន្និសីទវីដេអូ ៖ សូមពិចារណាបំបែកសិស្សដោយប្រើមុខងារបំបែកក្រុម ហើយអញ្ជើញក្រុមនីមួយៗឲ្យធ្វើការជាមួយគ្នាដើម្បីបង្កើតសកម្មភាព « មួយបន្ទាត់ម្តងៗ » ដោយផ្ទាល់ខ្លួនរបស់ពួកគេ ។ បន្ទាប់ពីទុកពេលគ្រប់គ្រាន់ហើយ សូមឲ្យពួកគេត្រឡប់មកជាមួយគ្នាវិញ ដើម្បីចែកចាយសកម្មភាពរបស់ពួកគេជាមួយនឹងសិស្សដទៃទៀតក្នុងថ្នាក់ ។