« អេណុស ៖ សេចក្តីជំនឿលើព្រះយេស៊ូវគ្រីស្ទអាចនាំមកនូវការអភ័យទោសពីអំពើបាប » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« អេណុស » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
អេណុស
សេចក្តីជំនឿលើព្រះយេស៊ូវគ្រីស្ទអាចនាំមកនូវការអភ័យទោសពីអំពើបាប
តើអ្នកធ្លាប់ឆ្ងល់ពីរបៀបទទួលបានការអភ័យទោសពីអំពើបាបរបស់អ្នកដែរឬទេ ? អេណុសជាកូនប្រុសរបស់យ៉ាកុប និងជាចៅរបស់លីហៃ បានអធិស្ឋានដល់ព្រះ « ដោយការអធិស្ឋានដ៏ខ្លាំង » ( អេណុស ១:៤ ) ដើម្បីទទួលការអភ័យទោសពីអំពើបាបរបស់លោក ។ គោលបំណងនៃមេរៀននេះគឺដើម្បីជួយអ្នកអនុវត្តសេចក្តីជំនឿលើព្រះយេស៊ូវគ្រីស្ទ ហើយប្រែចិត្តដើម្បីទទួលបានការអភ័យទោស ។
ការអធិស្ឋាន ។ជាផ្នែកនៃការរៀបចំដើម្បីបង្រៀនមេរៀន សូមពិចារណាអធិស្ឋានទៅកាន់ព្រះវរបិតាសួគ៌ ដោយទូលសុំទ្រង់ឲ្យជួយសិស្សរបស់អ្នក ។ ជាការសមរម្យដើម្បីអធិស្ឋានឲ្យពួកគេដឹងពីអ្វីដែលត្រូវធ្វើ ដើម្បីពង្រឹងសេចក្តីជំនឿរបស់ពួកគេលើព្រះយេស៊ូវគ្រីស្ទ និងដើម្បីជួយពួកគេស្តាប់ការបំផុសគំនិតពីព្រះវិញ្ញាណបរិសុទ្ធ ។
ការរៀបចំសិស្ស ៖ សូមអញ្ជើញសិស្សឲ្យអាន អេណុស ១:១–៨ មុនពេលមករៀន ដោយសញ្ជឹងគិតពីអារម្មណ៍របស់អេណុស និងអ្វីដែលលោកបានរៀនអំពីព្រះអម្ចាស់ និងការអភ័យទោសពីអំពើបាបរបស់លោក ។ សូមពិចារណាអញ្ជើញសិស្សឲ្យសញ្ជឹងគិតពីរបៀបដែលពួកគេគិតថា បទពិសោធន៍នេះអាចនឹងផ្លាស់ប្តូរជីវិតរបស់អេណុស ។
សកម្មភាពសិក្សាដែលអាចធ្វើបាន
ការគិតអំពីអត្ថន័យនៃការអភ័យទោសសម្រាប់អ្នក
សូមពិចារណាធ្វើសកម្មភាពខាងក្រោមនេះ ដើម្បីជួយសិស្សរៀបចំការសិក្សាអំពីអេណុស និងការអភ័យទោស ។
សូមស្រមៃថា អ្នកមានមិត្តម្នាក់ដែលសួរអ្នកអំពីការប្រែចិត្ត និងការអភ័យទោស ។ សូមពិចារណាពីរបៀបដែលអ្នកអាចឆ្លើយតបទៅនឹងសំណួរខាងក្រោម ៖
-
តើអ្នកនឹងដឹងដោយរបៀបណា ប្រសិនបើអ្នកត្រូវអភ័យទោសសម្រាប់អ្វីមួយ ?
-
តើអ្នកអាចទទួលបានការអភ័យទោសចំពោះអំពើបាបដោយរបៀបណា ?
-
តើបុគ្គលម្នាក់អាចដឹងថា តើពួកគេបានទទួលការអភ័យទោសដោយរបៀបណាបន្ទាប់ពីពួកគេបានព្យាយាមប្រែចិត្ត ?
សូមពិចារណាពីអ្វីដែលអ្នកអាចនិយាយទៅកាន់មិត្តរបស់អ្នក ។ សូមគិតអំពីអ្វីដែលអ្នកដឹង និងធ្លាប់មានបទពិសោធន៍ស្វែងរកការអភ័យទោស ក៏ដូចជាអ្វីដែលអ្នកចង់ដឹងកាន់តែច្បាស់ ។
សូមពិចារណាក្នុងការសុំសិស្សពីរបីនាក់ឲ្យចែកចាយពីអ្វីដែលពួកគេអាចនិយាយបាន ។
នៅពេលអ្នកសិក្សាដំណើររឿងរបស់អេណុសក្នុងមេរៀននេះ សូមរកមើលអ្វីដែលលោកបានធ្វើ ដើម្បីទទួលបានការអភ័យទោសពីអំពើបាបរបស់លោក និងរបៀបដែលវាអាចអនុវត្តចំពោះជីវិតរបស់អ្នក ។
ការអភ័យទោសចាប់ផ្តើមដោយការប្រាស្រ័យទាក់ទងយ៉ាងស៊ីជម្រៅរវាងអ្នក និងព្រះ
អេណុសជាកូនប្រុសរបស់យ៉ាកុប និងជាចៅរបស់លីហៃ បានអធិស្ឋានដល់ព្រះ « ដោយការអធិស្ឋានដ៏ខ្លាំង » ដើម្បីទទួលការអភ័យទោសពីអំពើបាប ។
សូមអាន អេណុស ១:១–៨ ហើយគូសចំណាំពាក្យ និងឃ្លានានាដែលជួយអ្នកឲ្យយល់កាន់តែច្បាស់អំពីរបៀបស្វែងរក និងទទួលបានការអភ័យទោស ។
សូមពិចារណាអញ្ជើញសិស្សឲ្យសរសេរឃ្លាដែលពួកគេចាប់អារម្មណ៍នៅលើក្ដារខៀន ។
ការចំណាយពេលសញ្ជឹងគិតឃ្លាសំខាន់ៗអាចជាជំនាញសិក្សាព្រះគម្ពីរដ៏មានប្រយោជន៍ ។ វាអនុញ្ញាតឲ្យព្រះវិញ្ញាណបរិសុទ្ធបំផុសគំនិតអ្នកឲ្យមានការយល់ដឹងកាន់តែច្រើន ។ ដើម្បីសញ្ជឹងគិត អ្នកអាចនឹងគិតអំពីអត្ថន័យនៃឃ្លាមួយ ហើយរកមើលពាក្យណាមួយដែលអ្នកចង់យល់កាន់តែច្បាស់ នៅក្នុងសេចក្តីណែនាំដល់បទគម្ពីរទាំងឡាយ ឬ Topical Guide ។ អ្នកប្រហែលជាសញ្ជឹងគិតពីមូលហេតុដែលអេណុសបានប្រើឃ្លាជាក់លាក់មួយ ហើយប្រសិនបើអ្នកធ្លាប់ជួបប្រទះនឹងអ្វីដែលស្រដៀងគ្នានេះ ។
សូមជ្រើសរើសឃ្លាមួយចំនួនខាងក្រោម ឬឃ្លាផ្សេងទៀតដែលអ្នកបានរកឃើញ ហើយចំណាយពេលខ្លះដើម្បីពិចារណាពីអ្វីដែលអ្នកអាចរៀនពីឃ្លាទាំងនោះ ។
សូមពិចារណាបន្ថែមឃ្លាខាងក្រោមណាមួយនៅលើក្ដារខៀន ។ នៅពេលសិស្សចែកចាយឃ្លាទាំងនេះ អ្នកអាចសួរសំណួរតាមដានដូចជា « តើអ្នកគិតថា អេណុស អាចមានន័យយ៉ាងណាចំពោះឃ្លាថា ‹ ព្រលឹងខ្ញុំស្រេកឃ្លាន ? › » « តើការសញ្ជឹងគិតលើការបង្រៀនអំពីជីវិតដ៏នៅអស់កល្បជានិច្ច និងសេចក្តីអំណររបស់ពួកបរិសុទ្ធអាចធ្វើឲ្យព្រលឹងមនុស្សស្រេកឃ្លានយ៉ាងដូចម្ដេច ? » « ហេតុអ្វីអំពើបាបធ្វើឲ្យយើងមានអារម្មណ៍គ្មានអ្វីសោះខាងវិញ្ញាណ ? » « ហេតុអ្វីពាក្យថា ការពុះពារ ជាពាក្យល្អដើម្បីពិពណ៌នាពីការខិតខំរបស់យើងដើម្បីប្រែចិត្ត ? »
-
« ការពុះពារដែលខ្ញុំបានធ្វើទៅចំពោះព្រះ » ( ខទី ២ )
-
« បានជ្រួតជ្រាបទៅក្នុងដួងចិត្តរបស់ខ្ញុំ » ( ខទី ៣ )
-
« ព្រលឹងខ្ញុំស្រេកឃ្លាន » ( ខទី ៤ )
-
« ការអធិស្ឋាន និងការទូលអង្វរដ៏ខ្លាំង » ( ខទី ៤ )
-
« បាបទាំងឡាយរបស់អ្នកត្រូវបានអត់ទោសឲ្យហើយ » ( ខទី ៥ )
-
« ទោសរបស់ខ្ញុំបានបំបាត់ចោលទៅ » ( ខទី ៦ )
-
« ឱព្រះអម្ចាស់អើយ ចុះតើការណ៍នេះបានធ្វើយ៉ាងណាទៅ ? » ( ខទី ៧ )
-
« ពីព្រោះមកពីសេចក្ដីជំនឿដែលអ្នកមានដល់ព្រះគ្រីស្ទ » ( ខទី ៨ )
សូមពិចារណាចែកសិស្សជាគូ ហើយអញ្ជើញពួកគេឲ្យចែកចាយអ្វីដែលពួកគេបានរៀន និងកំពុងរៀន ។ ពួកគេអាចឆ្លើយសំណួរខាងក្រោមជាមួយគ្នា ៖
-
តើពាក្យ និងឃ្លាអ្វីខ្លះដែលអ្នកចាប់អារម្មណ៍ ? ហេតុអ្វី ?
-
តើអ្នកបានរៀនអ្វីខ្លះ នៅពេលអ្នកសញ្ជឹងគិតអំពីឃ្លាទាំងនេះ ?
-
តើអ្នកមានអារម្មណ៍ថា ព្រះកំពុងបង្រៀនអ្នកអ្វីខ្លះពីបទពិសោធន៍របស់អេណុស ?
ប្រសិនបើសិស្សបានឆ្លើយសំណួរទាំងនេះជាក្រុមតូចៗ សូមអញ្ជើញសិស្សមួយចំនួនឲ្យចែកចាយជាមួយថ្នាក់រៀននូវអ្វីដែលពួកគេបានរៀន ឬអ្វីដែលពួកគេចូលចិត្តដែលពួកគេបានឮពីដៃគូរបស់ពួកគេ ។ នៅពេលពួកគេចែកចាយគោលការណ៍ពិត សូមពិចារណាសរសេរគោលការណ៍ទាំងនោះនៅលើក្ដារខៀន ។
ប្រសិនបើសិស្សពិបាកចែកចាយសេចក្ដីពិត សូមពិចារណាសួរសំណួរដូចតទៅនេះ ៖ « តើអេណុសបានផ្ដល់ហេតុផលអ្វីសម្រាប់ទោសរបស់លោកបានបំបាត់ចោលទៅ ? » « តើអេណុសបានរៀនអ្វីពីព្រះអម្ចាស់ អំពីមូលហេតុដែលលោកត្រូវបានអត់ទោសសម្រាប់អំពើបាបរបស់លោក ? »
គោលការណ៍សំខាន់មួយដែលយើងរៀននៅក្នុងអេណុសគឺថា នៅពេលយើងប្រែចិត្ត ហើយអនុវត្តសេចក្តីជំនឿរបស់យើងលើព្រះយេស៊ូវគ្រីស្ទ នោះយើងអាចត្រូវបានលើកលែងទោសពីអំពើបាបរបស់យើង ហើយយើងអាចបានជាសះស្បើយ ។ អ្នកប្រហែលជាចង់សរសេរគោលការណ៍នេះនៅក្នុងសៀវភៅកំណត់ហេតុការសិក្សារបស់អ្នក ។
សូមអានសេចក្ដីថ្លែងការណ៍ពី អែលឌើរ ឌៀថើរ អេហ្វ អុជដូហ្វ ក្នុងកូរ៉ុមនៃពួកសាវកដប់ពីរនាក់ ។
នៅពេលយើងពិតជាបានប្រែចិត្ត នោះព្រះគ្រីស្ទនឹងដកបន្ទុកនៃអំពើបាបចេញពីអំពើបាបរបស់យើង ។ យើងអាចដឹងដោយខ្លួនឯងថា យើងត្រូវបានអត់ទោសឲ្យ ហើយបានធ្វើឲ្យស្អាត ។ ព្រះវិញ្ញាណបរិសុទ្ធនឹងបញ្ជាក់ពីការណ៍នេះដល់យើង ទ្រង់គឺជាអ្នកញែកឲ្យបរិសុទ្ធ ។ គ្មានទីបន្ទាល់ណាទៀតនៃការអភ័យទោស អាចមានអំណាចមហិមា ជាងនេះនោះទេ ។ ( ឌៀថើរ អេហ្វ អុជដូហ្វ « Point of Safe Return » Ensign ឬ Liahona ខែ ឧសភា ឆ្នាំ ២០០៧ ទំព័រ ១០១ )
ប្រសិនបើសិស្សបានសរសេរគោលការណ៍នេះនៅក្នុងសៀវភៅកំណត់ហេតុការសិក្សារបស់ពួកគេ សូមពិចារណាអញ្ជើញពួកគេឲ្យគូសរង្វង់ផ្នែកនៃគោលការណ៍ដែលពួកគេចង់យល់កាន់តែច្បាស់ ។ បន្ទាប់មក សូមឲ្យពួកគេចែកចាយអ្វីដែលពួកគេបានគូសរង្វង់ ។ សូមអញ្ជើញសិស្សផ្សេងទៀតឲ្យចែកចាយនូវអ្វីដែលពួកគេដឹង ដែលអាចជួយមិត្តរួមថ្នាក់របស់ពួកគេ ។ ពួកគេអាចប្រើបទគម្ពីរ បទពិសោធន៍ ឬសេចក្ដីថ្លែងការណ៍ពីថ្នាក់ដឹកនាំសាសនាចក្រដើម្បីជួយ ។ សំណួរខាងក្រោមក៏អាចមានប្រយោជន៍ផងដែរ ៖
-
តើអ្នកគិតថានឹងមានអ្វីកើតឡើង ប្រសិនបើនរណាម្នាក់ព្យាយាមស្វែងរកការអភ័យទោសដោយមិនប្រែចិត្ត និងមិនអនុវត្តសេចក្តីជំនឿលើព្រះយេស៊ូវគ្រីស្ទ ? ហេតុអ្វី ?
-
តើមានវិធីអ្វីខ្លះដែលអេណុសបានព្យាយាមប្រែចិត្ត ហើយអនុវត្តសេចក្តីជំនឿលើព្រះយេស៊ូវគ្រីស្ទ ?
-
តើអ្នកគិតថា វាមានន័យយ៉ាងណាដើម្បីឲ្យបានជាសះស្បើយ ?
វាអាចមានប្រយោជន៍ដើម្បីឃើញថា តើសំណួរអ្វីខ្លះមកពីស្ថានភាពនៅដើមមេរៀន ដែលអ្នកអាចឆ្លើយដោយប្រើដំណើររឿងរបស់អេណុស ។
យើងអាចមានបទពិសោធន៍ដូចអេណុសសព្វថ្ងៃនេះ
មនុស្សភាគច្រើនមិនទទួលបានការអភ័យទោសតាមរបៀបភ្លាមៗ ឬយ៉ាងអស្ចារ្យដូចអេណុសនោះទេ ។ ទោះជាយ៉ាងណាក៏ដោយ នៅពេលយើងព្យាយាមអនុវត្តសេចក្តីជំនឿលើព្រះយេស៊ូវគ្រីស្ទ ហើយប្រែចិត្តដូចអេណុសបានធ្វើ នោះយើងក៏អាចទទួលបានការអភ័យទោស និងត្រូវបានជាសះស្បើយ ។
សូមជួយសិស្សឲ្យសញ្ជឹងគិតអំពីរបៀបដែលពួកគេអាចអនុវត្តសេចក្តីជំនឿលើព្រះយេស៊ូវគ្រីស្ទ ហើយប្រែចិត្ត ។ អ្នកអាចបង្ហាញគំនិតទាំងនេះ ឬផ្សេងទៀតដែលអ្នកអាចគិតដើម្បីជួយសិស្ស ។
-
សូមសញ្ជឹងគិតអំពីអ្វីដែលអ្នកដឹងអំពីព្រះយេស៊ូវគ្រីស្ទ និងព្រះរាជបំណងប្រាថ្នារបស់ទ្រង់ក្នុងការអត់ទោស និងជួយអ្នក ។ តើអ្នកមានអារម្មណ៍ថា ទ្រង់សព្វព្រះទ័យឲ្យអ្នកធ្វើអ្វីដើម្បីអនុវត្តសេចក្តីជំនឿលើទ្រង់ ហើយប្រែចិត្ត ?
-
សូមគិតអំពីគ្រាចុងក្រោយដែលអ្នកមានអារម្មណ៍ថា អ្នកដូចជាអនុវត្តសេចក្តីជំនឿលើព្រះយេស៊ូវគ្រីស្ទ ហើយប្រែចិត្ត ។ តើវាបានកើតឡើងក្នុងពេលថ្មីៗនេះដែរឬទេ ? ហេតុអ្វីកើតឡើង ឬហេតុអ្វីមិនកើតឡើង ?
-
សូមពិចារណាដាក់ផែនការរកពេលវេលាមួយដើម្បីអធិស្ឋានដោយមានសេចក្តីជំនឿកាន់តែខ្លាំងទៅលើព្រះយេស៊ូវគ្រីស្ទ ។ តើអ្នកអាចធ្វើការអធិស្ឋានរបស់អ្នកខុសពីការអធិស្ឋានដែលអ្នកតែងតែធ្វើដោយរបៀបណា ? តើអ្នកអាចបង្ហាញថា អ្នកចង់បានការអភ័យទោសពីព្រះអម្ចាស់ដូចគ្នានឹងអេណុសយ៉ាងដូចម្ដេច ?
សូមពិចារណាអំពីការអញ្ជើញសិស្សឲ្យចែកចាយចំណាប់អារម្មណ៍ និងទីបន្ទាល់អំពីព្រះអង្គសង្គ្រោះព្រះយេស៊ូវគ្រីស្ទ និងអ្វីដែលពួកគេបានរៀនពីអេណុស ។ សូមពិចារណាចែកចាយគំនិត និងទីបន្ទាល់របស់អ្នកផងដែរ ។