“2 Nīfai 21–24: Ko e Nofo Tuʻí,” Tohi ʻa Molomoná – Tohi Lēsoni ʻa e Faiakó (2024)
“2 Nīfai 21–24,” Tohi ʻa Molomoná – Tohi Lēsoni ʻa e Faiakó
2 Nīfai 21–24
Ko e Nofo Tuʻí
Fakakaukauloto pe naʻe mei fēfē ʻa e moʻuí kapau naʻe ʻikai ha kovi ʻi he māmaní. ʻE ʻi ai e ʻaho ʻe peheni ai ʻa e māmaní. ʻE hoko ia lolotonga e pule ʻa Sīsū Kalaisi ʻi he nofo tuʻí. Naʻe kikite ha kau palōfita tokolahi, kau ai ʻa Nīfai mo ʻĪsaia, ki he nofo melino taʻu ʻe 1,000 ʻoku ui ko e Nofo Tuʻí. ʻE lava ke tokoni e lēsoni ko ʻení ke mahino kiate koe mo ke teuteu ki he pule ʻa e Fakamoʻuí ʻi he nofo tuʻí.
Ko e Tokanga Taha ki he Tamai Hēvaní mo Sīsū Kalaisí ʻI hono fakakaukauʻi e ngaahi moʻoni pe tefitoʻi moʻoni ke tokoni ke ʻilo ʻe he kau akó, kumi e meʻa ʻe tokoni kiate kinautolu ke haʻu kia Sīsū Kalaisí. ʻE lava ke tokoniʻi koe ʻe he Laumālie Māʻoniʻoní ke ako ke ʻiloʻi e ngaahi moʻoni fekauʻaki mo e Fakamoʻuí mo Hono mālohi huhuʻi ʻi he tefitoʻi moʻoni, fekau mo e akonaki fakaepalōfita takitaha.
Teuteu ʻa e tokotaha akó: Fakaafeʻi e kau akó ke fakakaukau ki he meʻa ʻoku nau ʻilo fekauʻaki mo e Nofo Tuʻí pea omi mateuteu ke fakahoko ha ngaahi fehuʻi fekauʻaki mo ia.
Ngaahi ʻEkitivitī Ako ʻe Ala Fakahokó
Ko e kahaʻú
ʻE lava ke hiki ʻe he kau akó ʻenau tali ki he ngaahi fehuʻi ko ʻení ʻi he palakipoé pe aleaʻi kinautolu ʻi ha fanga kiʻi kulupu iiki.
-
Ko e hā ha ngaahi meʻa mahuʻinga ʻi he kahaʻú ʻokú ke hanganaki fiefia atu ki ai? Ko e hā hono ʻuhingá?
-
Ko e hā ha ngaahi ongo ʻokú ke maʻu ʻi hoʻo fakakaukau ki he ngaahi meʻa ko ʻení?
-
Ko e hā ʻokú ke fai ke teuteu ki aí?
Ko e Nofo Tuʻí
Ko e meʻa mahuʻinga ʻe taha ʻi he kahaʻú ko e Nofo Tuʻí.
Fakafanongo fakalelei ki he ngaahi tali ʻa e kau akó ki he ongo fehuʻi ko ʻení . Fakakaukau ke hiki e ngaahi fehuʻi ʻa e kau akó ʻi he palakipoé. Ke ʻoua naʻá ke tali fakahangatonu ki he kau akó, poupouʻi kinautolu ke fekumi ki he ngaahi talí ʻi heʻenau akó.
Liliu e lēsoní ʻo fakatatau ki he ngaahi tali ʻoku nau ʻoatú. Hangē ko ʻení, kapau ʻoku maʻu ʻe ha kau ako tokolahi ʻa e fehuʻi tatau, te mou lava ʻo kumi e talí ko ha kalasi. ʻE lava ke ʻave e kau ako ʻoku ʻi ai haʻanau ngaahi fehuʻi tataú ʻi ha ngaahi kulupu ke nau kumi fakataha e ngaahi talí.
-
Ko e hā ʻokú ke ʻilo fekauʻaki mo e Nofo Tuʻí? Ko e hā ha ngaahi fehuʻi ʻokú ke maʻu fekauʻaki mo ia?
Naʻe tohi e palōfita ko Nīfaí fekauʻaki mo e ngaahi ʻaho fakaʻosí pea fakakau ai ha ngaahi kikite lahi ʻa ʻĪsaia kau ki he ngaahi ʻaho fakaʻosí. Naʻe kikiteʻi ʻe ʻĪsaia ʻa hono fakaʻauha ʻo ʻAsīlia mo Pāpiloné ko ha fakataipe ʻo e fakaʻauha ʻi he Hāʻele ʻAnga Ua Maí (vakai, 2 Nīfai 20; 23). Naʻá ne toe kikiteʻi foki ʻa hono Fakafoki Mai ʻo e ongoongoleleí kimuʻa ʻi he pule ʻa Sīsū Kalaisi ʻi he nofo tuʻí. ʻOku fonu ʻEne ngaahi kikité ʻi he fakataipe mo e fakatātā ʻokú ne fakalahi ke loloto ʻetau mahino kau ki he Nofo Tuʻí.
Lau e ngaahi kikite ko ʻeni meia Nīfai mo ʻĪsaiá pea kumi ha ngaahi fakamatala fekauʻaki mo e Nofo Tuʻí.
Fakakaukau ke tuku takai ha ʻū laʻipepa mo e ngaahi potufolofola ko ʻení ʻi he lokí pea fakaafeʻi e kau akó ke nau lue takai ʻo lau e ngaahi potufolofola kehekehé. Ko ha founga ʻe taha ko hono fakaafeʻi e kau akó ke tā ʻi ha tohinoa ako pe ʻi he palakipoé ha niʻihi ʻo e ngaahi fakamatala ʻi he ngaahi veesi ko ʻení.
Tokoni ke mahino ki he kau akó e ngaahi potufolofolá ʻo ka fiemaʻu. Hangē ko ʻení, te ke lava ʻo fakamahinoʻi ange ʻoku fakafofongaʻi ʻe he nofo fakataha ʻa e fanga monumanú ʻo ʻikai ke nau fekainakí ʻa e ngaahi tuʻunga ʻo e melinó (vakai, 2 Nīfai 21:6–7) pe ko hono fakafofongaʻi ʻe he ngaahi vai ʻoku nau fakafonu ʻa e tahí ʻa e ʻilo ʻa e ʻEiki ʻa ia ʻokú ne fakafonu ʻa e māmaní (vakai, 2 Nīfai 21:9).
-
Mei he ngaahi fakamatala ko ʻení, ʻokú ke pehē ʻe kehe fēfē hoʻo moʻuí ʻi he Nofo Tuʻí?
-
Ko e hā ha ngaahi fakamatala ʻo e Fakamoʻuí naʻá ke maʻu? Ko e hā ʻoku nau akoʻi atu fekauʻaki mo Iá?
Ko e taha ʻo e ngaahi moʻoni ʻoku tau ako mei he ngaahi potufolofola ko ʻení, ʻe pule ʻa Sīsū Kalaisi ʻi he māmaní ʻi he māʻoniʻoni mo e melino lolotonga e Nofo Tuʻí.
Fakakaukauloto angé pe ʻe fēfē haʻo moʻui lolotonga e Nofo Tuʻi —ʻi he pule ʻa e Fakamoʻuí ʻi he māʻoniʻoni mo e melino. Fakakaukau ki he founga ʻe lava ke faitāpuekina ai ʻe he melino ʻa e Fakamoʻuí hoʻo moʻuí.
Naʻe fakamatalaʻi ʻe Tāleni H. ʻOakesi ʻo e Kau Palesitenisī ʻUluakí ha toe tāpuaki ʻe taha ʻo e Nofo Tuʻí:
ʻOku uesia ʻe he taʻe-malí, hala fānaú, maté pea mo e vete malí ʻa e ngaahi meʻa ʻoku fiemaʻú mo fakatoloi hono fakahoko ʻo e ngaahi tāpuaki kuo talaʻofá. … Kuo ʻosi talaʻofa ʻe he ʻEikí he ʻikai taʻofi ha ngaahi tāpuaki mei hono ngaahi foha mo e ngaahi ʻofefine ʻoku nau tauhi e ngaahi fekaú mo faipau ki heʻenau ngaahi fuakavá, mo fakaʻamua e meʻa ʻoku totonú.
Ko e konga lahi ʻo e ngaahi meʻa mahuʻinga taha ʻoku ʻikai hoko ʻi he moʻui fakamatelié ʻe fakahoko tonu ia ʻi he Nofo Tuʻí, ʻa ia ko e taimi ia ke fakakakato ai ʻa e meʻa kotoa pē ʻoku ʻikai kakato ʻi he palani lahi ʻo e fiefiá maʻá e fānau moʻui taau kotoa ʻa ʻetau Tamaí. ʻOku tau ʻilo ʻe moʻoni ia fekauʻaki mo e ngaahi ouau ʻo e temipalé. ʻOku ou tui ʻe toe hoko foki ia ʻo moʻoni ʻi he ngaahi vā fetuʻutaki mo e ngaahi aʻusia fakafāmilí. (President Dallin H. Oaks, “The Great Plan of HappinessEnsign,, Nov. 1993, 75)
-
Ko e hā ha meʻa ʻoku akoʻi atu ʻe he fakamatala ko ʻení kau ki he Tamai Hēvaní mo Sīsū Kalaisí?
-
Ko e fē ʻi he ngaahi tāpuaki ʻo e Nofo Tuʻí ʻokú ke fiemaʻu lahi tahá? Ko e hā hono ʻuhingá?
-
Lolotonga e lēsoní, ko e hā ha ngaahi tali naʻá ke maʻu ki hoʻo ngaahi fehuʻi fekauʻaki mo e Nofo Tuʻí?
Kapau ʻoku kei fekumi ʻa e kau akó ki ha tali ki heʻenau ngaahi fehuʻí, fakahinohino kinautolu ki he feituʻu te nau lava ʻo maʻu ai ha talí. ʻE lava ke tokoni ha niʻihi ʻo e ngaahi potufolofola ko ʻení: Tokāteline mo e Ngaahi Fuakava 29:11; 88:110; 101:26–34; Ngaahi Tefito ʻo e Tuí 1:10. Toe vakai foki ki he “Nofo Tuʻí” ʻi he Fakahinohino ki he Ngaahi Folofolá pe Ngaahi Tefito ʻo e Ongoongoleleí.
Teuteu ki he Nofo Tuʻí
Naʻe kamata ʻi he 2020 hono fakaleleiʻi ʻo e Temipale Salt Lake. Naʻe lea ʻa ʻEletā Keuli E. Sitīvenisoni ʻo e Kōlomu ʻo e Kau ʻAposetolo ʻe Toko Hongofulu Mā Uá fekauʻaki mo e ngaahi fakalelei ko ʻeni. Fekumi ki he founga naʻá ne fakafehoanaki ai kinautolu ki heʻetau moʻuí. Mamata ʻi he foʻi vitiō “Tokonaki ha Fakavaʻe Lelei ki he Kuonga ʻe Hoko Maí,” ʻoku maʻu ʻi he ChurchofJesusChrist.org, mei he taimi 14:51 ki he 15:26, pe lau ʻa e fakamatala ʻi laló.
Ko e fakaʻamu lahi ia ʻa e kau taki ʻo e Siasí, ke tokoni ʻa e fakaleleiʻi mahuʻinga ʻo e Temipale Sōlekí ki hono fakahoko ʻo e fakaʻānaua ko ia ʻa Pilikihami ʻIongi ke mamata “ʻoku langa ʻa e temipalé ʻi ha founga ʻe tuʻuloa ʻo aʻu ki he [nofo tuʻí].” Fakatauange te tau fakaʻatā e ngaahi fakalelei ko ia ʻoku fai ki he Temipale Sōlekí ʻi he ngaahi taʻu ka hokó, ke ne fakaʻaiʻai mo ueʻi kitautolu, ko e niʻi hi fakafoʻituitui mo e ngaahi fāmili, ke tau— ʻi hono fakalea fakaheliakí—ʻe “langa ʻi ha founga ʻe tuʻuloa ʻo aʻu ki he [nofo tuʻí].” (Gary E. Stevenson, “Tokonaki ha Fakavaʻe Lelei ki he Kuonga ʻe Hoko Maí,” Ensign pe Liahona, Mē 2020, 51–52)
-
ʻOkú ke pehē ʻoku ʻuhinga ki he hā ke “langa ʻi ha founga ʻe tuʻuloa ʻo aʻu ki he [nofo tuʻí]”?
Fakakaukau ke toe vakaiʻi e ngaahi meʻa ʻoku hanganaki atu ki ai ʻa e kau akó ʻi he kahaʻú pea aleaʻi e ngaahi meʻa ʻoku nau fai ke teuteu ai ki he ngaahi meʻa ko iá. Pea aleaʻi leva ha ngaahi founga ke teuteu ai ki he Nofo Tuʻí.
ʻE ala ʻaonga ki he kau akó haʻanau tali e ngaahi fehuʻi ko ʻení ʻi heʻenau tohinoa akó.
-
ʻI hoʻo fakakaukau ki he pule ʻa e Fakamoʻuí ʻi he nofo tuʻí, ko e hā ʻokú ke ongoʻí?
-
Ko e hā te ke lava ʻo fakahoko he taimí ni ke teuteu ai ki he Nofo Tuʻí?
-
Ko e hā ha ngaahi faingataʻa te ke ala fehangahangai mo ia ʻi hoʻo fakahoko e ngaahi teuteu ko ʻení?