Siviʻi Hono 2 Hoʻo Akó

1 Nīfai 16–2 Nīfai 25

tokotaha ʻoku sio ki hono ʻatá

ʻOku fakataumuʻa ʻa e lēsoni ko ʻení ke tokoniʻi koe ke vakaiʻi e tuʻunga fakalakalaka kuó ke aʻusia lolotonga hoʻo ako e Tohi ʻa Molomoná.

Ko hono fakamanatu ki he kau akó ʻenau ngaahi taumuʻa fakataautahá: Mahalo naʻe faʻu ʻe he kau akó ha ngaahi taumuʻa fakalaumālie, fakasōsiale, fakatuʻasino, mo fakaʻatamai ke tokoniʻi kinautolu ke hoko ʻo hangē ko e Fakamoʻuí, ko ha konga ʻo e polokalama Fānaú mo e Toʻu Tupú. Fakaafeʻi maʻu pē ʻa e kau akó ke fakakaukau ki he founga ʻe lava ke tokoniʻi ai kinautolu ʻe he ngaahi moʻoni ʻoku nau ako ʻi he seminelí ke aʻusia ʻenau ngaahi taumuʻá.

Teuteu ʻa e tokotaha akó: Fakaafeʻi e kau akó ke toe vakaiʻi ha konga ʻo e meʻa ne nau ako ʻi he 1 Nīfai 16 ki he 2 Nīfai 25 pea omi mateuteu ke vahevahe e ngaahi potufolofola ʻoku nau manako taha aí pe ngaahi moʻoni mahuʻingá.

Ngaahi ʻEkitivitī Ako ʻe Ala Fakahokó

Fakakaukau ki hono ako ʻo e ongoongoleleí

ʻOku fakataumuʻa e lēsoni ko ʻení ke tokoniʻi e kau akó ke vakaiʻi e (1) ngaahi taumuʻa kuo nau fokotuʻú, (2) ko ʻenau malava ke fakamatalaʻi e ngaahi akonaki ʻi he Tohi ʻa Molomona, pe (3) founga ʻoku liliu ai honau ʻulungāngá, holí, mo ʻenau malava ke moʻui ʻaki e ongoongoleleí. Mahalo naʻe fakamamafaʻi ʻi he ako ʻa e kalasí ʻo e 1 Nīfai 16 ki he 2 Nīfai 25 ha ngaahi moʻoni makehe. mei he ngaahi moʻoni ʻi he ngaahi ʻekitivitī ko ʻení. Kapau ko ia, ʻe lava ke liliu e ngaahi ʻekitivitií ke fakakau ai e ngaahi moʻoni ko iá.

Ke tokoniʻi e kau akó ke vakai ki he mahuʻinga ʻo e fakakaukau ki heʻenau fakalakalaka fakalaumālié ʻi heʻenau ako e Tohi ʻa Molomoná, ʻomi ha sioʻata. Fakaafeʻi e kau akó ke aleaʻi e founga ʻe lava ke ʻaonga ai ʻenau sio kiate kinautolú (sio ki he ngaahi meʻa ʻi honau tuʻá, sio ki honau ʻatá, mo e ngaahi meʻa peheé). Fakaafeʻi leva kinautolu ke fakakaukau ki he mahuʻinga ʻo e fakakaukau mo hono siviʻi ʻenau ako ki he ongoongoleleí mo ʻenau ngaahi filí. ʻE lava ke ke ʻeke ange ha ngaahi fehuʻi hangē ko ʻení:

• Ko e hā e ngaahi lelei ʻo hono maʻu ha sioʻatá?

• ʻE lava fēfē ke faitatau e vakai kiate kitautolu ʻi he sioʻatá mo e fakakaukau mo hono siviʻi ʻetau ako e ongoongoleleí?

Ko e fakakaukau ki he fakalakalaka fakalaumālié

ʻOku fakataumuʻa e konga ko ʻeni ʻo e lēsoní ke tokoni ki he kau akó ke fakakaukau ki heʻenau aʻusia ʻi he fekumi mo ngāueʻi e fakahā mei he Tamai Hēvaní ʻi heʻenau ako ʻa e Tohi ʻa Molomoná.

Fakakaukau ki he ngaahi ueʻi mo e ngaahi ongo mei he Laumālie Māʻoniʻoní naʻá ke mei maʻu ʻi hono ako ʻo e Tohi ʻa Molomoná. ʻOku lahi ha ngaahi founga kuo fetuʻutaki ai ʻa e Laumālie Māʻoniʻoní mo koe. Hangē ko ʻení, mahalo naʻe makehe ha ngaahi veesi pau kiate koe pea naʻá ke ongoʻi ha holi ke fakaʻilongaʻi kinautolu. Mahalo naʻá ke maʻu ha ongoʻi nonga pe ʻofa. Mahalo naʻá ke lau mo ongoʻi ʻoku ueʻi koe ke ke ngāue ʻi ha faʻahinga founga pau pe maʻu ha tali ki ha fehuʻi naʻá ke maʻu.

Fakaʻaliʻali e ngaahi fehuʻi ko ʻení ke lava e kau akó ʻo fakalaulauloto ki ai ʻi he taimi pē ʻanautolu. ʻE ala tokoni foki ke fakaafeʻi e kau akó ke hiki ʻenau ngaahi tali ki ha fehuʻi ʻe ua pe tolu ʻi heʻenau tohinoa akó.

• Ko e ngaahi fakamatala pe potufolofola fē mei he Tohi ʻa Molomoná kuó ne tokoniʻi koe ke ke vakai ki he founga ʻoku fetuʻutaki ai ʻa e Tamai Hēvaní mo ʻEne fānaú?

• Ko e hā ha ngaahi fakakaukau pe ongo kuó ke aʻusia ʻi he seminelí pe ʻi hoʻo ako fakataautaha he taʻu ní?

• Ko e hā ha meʻa kuó ke fai ke fekumi ai ki ha fakahā mei he Tamai Hēvaní?

• Ko e hā te ke lava ʻo fai ke fekumi ai ki ha fakahā mo mateuteu ke ʻiloʻi ʻa e fakahaá ʻi he taimi ʻoku hoko mai aí?

• Ko e hā ha founga kuó ke ngāueʻi ai e ngaahi ongo kuó ke maʻú?

Fakaafeʻi e kau ako te nau loto fiemālie ke vahevahe mo e kalasí ha niʻihi ʻo ʻenau ngaahi talí, ʻo ka feʻunga. ʻE lava foki ke vahevahe tautau toko ua pe fakakulupu iiki ʻa e kau ako.

Fakamatalaʻi e Hinga ʻa ʻĀtama mo ʻIví pea mo e Fakalelei ʻa Sīsū Kalaisí.

ʻI he ʻekitivitī ko ʻení, fakakaukau ke fakaafeʻi e kau akó ke ngāue mo ha kaungā ako mo e hoa takitaha ʻo fili ha taha ʻo e ngaahi tefito ʻoku hiki fakahihifi ʻi he palakalafi hono hokó.

Ko e mavahe ʻa ʻĀtama mo ʻIvi mei he Ngoue ko ʻĪtení

Fakakaukauloto ʻokú ke hoko ko ha faifekau pea ʻokú ke teuteu mo ho hoa ngāué ke akoʻi ha taha fekauʻaki mo e Hingá. Kuó mo fakakaukau ʻoku totonu ke ako ha taha fekauʻaki mo e Ko e Hingá mo hono ngaahi nunuʻa ki he faʻahinga ʻo e tangatá pea ʻoku totonu ke akoʻi ʻe he tokotaha ʻa e founga ʻoku tokoniʻi ai kitautolu ʻe he Fakamoʻuí ke ikunaʻi e ngaahi nunuʻa ʻo e Hingá.

Fakaʻaongaʻi e folofolá ke tokoni atu ke fakamatalaʻi ʻa e tefito naʻá ke filí. ʻE ala tokoni ke toe vakaiʻi ʻa e 2 Nīfai 2:17–27; 9:6–12; 10:23–25, ngaahi fakamatala ʻi hoʻo tohinoa akó, pe ko e “Hinga ʻa ʻĀtama mo ʻIvi” ʻi he Ngaahi Tefito ʻo e Ongoongoleleí (topics.ChurchofJesusChrist.org) ke tokoni atu ʻi hoʻo teuteu ke vahevahé.

Fakaafeʻi e kau akó ke vahevahe e meʻa ne nau teuteú mo honau hoá pe ko e kalasí kotoa. Pe fakakaukau ke fakaafeʻi e kau akó ke ʻave ʻenau fakamatalá ki ha taha ʻi honau fāmilí, kaungāmeʻá, pe ko ha taki ʻi he Siasí.

Ko ʻeku ngaahi ongo kau kia Sīsū Kalaisí

ʻOku fakataumuʻa ʻa e konga ko ʻeni ʻo e lēsoní ke fakaʻatā e kau akó ke fakakaukau ki heʻenau ngaahi ongo fekauʻaki mo Sīsū Kalaisí.

ʻOange ha taimi ki he kau akó ke lau mo fakakaukau ai ʻo hangē ko hono fokotuʻu atu ʻi he palakalafi ko ʻení. Mahalo te ke fakakaukau ke tā leʻo siʻi ha ngaahi himi ʻapasia fekauʻaki mo e Fakamoʻuí ʻo hangē ko e ʻOku Fakaofó” (Ngaahi Himi, fika 102) pe “Ko e ʻOfa ʻa e Fakamoʻuí” (Ngaahi Himi, fika 56).

ʻOku fakamoʻoni e Tohi ʻa Molomoná kia Sīsū Kalaisi. Fakakaukau ki he meʻa kuó ke ako fekauʻaki mo e Fakamoʻuí. Toe vakaiʻi e ngaahi vahe kuó ke akó, hangē ko e 1 Nīfai 19, 2 Nīfai 9, mo e 2 Nīfai 25. Te ke lava foki ʻo kumi e ngaahi potufolofola kuó ke fakaʻilongaʻí. ʻE ala tokoni ke toe vakaiʻi ʻa e meʻa kuó ke tohi ʻi hoʻo tohinoa akó, tautautefito ki he ngaahi fakamatala fekauʻaki mo hoʻo ngaahi ongo kiate Iá.

• Faʻu ha foʻi maau pe ko ha tohi ki he Fakamoʻuí ʻo fakahaaʻi hoʻo ngaahi ongo kiate Iá. Fakakaukau ke fakaʻaongaʻi e ngaahi foʻi lea pe kupuʻi lea mei he folofolá pe fakafekauʻaki mo e ngaahi potufolofolá.

• Fakatahatahaʻi ha lisi ʻo ha ngaahi lea ʻokú ne fakamatalaʻi hoʻo ngaahi ongo fekauʻaki mo e Fakamoʻuí. Fakakau ai mo ha ngaahi fakamatala mei he folofolá. Faʻu ha ngaahi foʻi lea, pe tohiʻi e ngaahi foʻi leá ʻi ha ʻū laʻipepa taautaha pea fakakaukau ke tautau kinautolu ʻi ho lokí pe ʻi ha feituʻu kehe te ke toutou sio ai kiate kinautolu.

• Tā fakatātaaʻi ha meʻa ʻoku tokoni atu ke fakahaaʻi ai hoʻo ngaahi ongo fekauʻaki mo e Fakamoʻuí.

Kapau ʻe feʻunga e taimí, tuku ke vahevahe ʻe he kau akó e meʻa ne nau faʻú koeʻuhí ke lava ʻo fakahaaʻi ʻenau fakamoʻoni fekauʻaki mo e Fakamoʻuí. Toe fakakaukau foki ke fakaafeʻi e kau akó ke vahevahe e meʻa ne nau faʻú mo honau fāmilí pe niʻihi kehe. Te ke lava foki ʻo vahevahe hoʻo fakamoʻoni ki hoʻo houngaʻia ʻi he Fakamoʻuí.