“2 Nīfai 25: Fakamoui ʻe Sīsū Kalaisí,” Tohi ʻa Molomoná – Tohi Lēsoni ʻa e Faiakó (2024)
“2 Nīfai 25,” Tohi ʻa Molomoná – Tohi Lēsoni ʻa e Faiakó
2 Nīfai 25
Fakamoʻui ʻe Sīsū Kalaisi
Kuo ʻi ai nai ha taha kuó ne fakafiemālieʻi pe fakahaofi koe mei ha tūkunga faingataʻa? Ko e hā hoʻo ongo fekauʻaki mo e tokotaha ko iá hili ʻene tokoní? Hili hono fakamamafaʻi ʻe Nīfai e mahuʻinga ʻo e ngaahi akonaki fakaepalōfitá, naʻá ne fakamoʻoni ko Sīsū Kalaisi pē ʻokú Ne maʻu ʻa e mālohi ke fakamoʻui ʻa e kakai kotoa pē. ʻE tokoni ʻa e lēsoni ko ʻení ke mahino kiate koe ʻa e founga ʻoku fakahaofi ai koe ʻe he ʻaloʻofa ʻa Sīsū Kalaisí.
Ko hono akoʻi ʻo e ngaahi folofolá mo e ngaahi lea ʻa e kau palōfita. ʻOku maʻu e tokāteline moʻoni mo e ngaahi tefitoʻi moʻoni ʻo e ongoongolelei ʻo Sīsū Kalaisí ʻi he folofolá mo e ngaahi lea ʻa e kau palōfitá. ʻI hoʻo tokoniʻi e kau akó ke nau ako ʻení, ʻe lava ke fakamoʻoniʻi ʻe he Laumālie Māʻoniʻoní ʻa e moʻoní ki honau ʻatamaí mo e lotó. Te nau lava ʻo hoko ʻo hangē ange ko e Tamai Hēvaní mo Sīsū Kalaisi ʻaki ʻenau fakaʻaongaʻi maʻu pē e tokāteline moʻoní mo e ngaahi tefitoʻi moʻoní.
Teuteu ʻa e tokotaha akó: Fakakaukau ke fakaafeʻi e kau akó ke nau omi mateuteu ki he kalasí ke talanoa fekauʻaki mo ha pōpoaki fekauʻaki mo Sīsū Kalaisi kuó ne tākiekina kinautolu.
Ngaahi ʻEkitivitī Ako ʻe Ala Fakahokó
Ko e founga pē taha ʻe lava ke fakahaofi ai kitautolú
Ke kamata e lēsoní, vahevahe ha fakamatala ʻo ha taha naʻe fakahaofi. Te ke lava foki ʻo kole ki he kau akó ke vahevahe fekauʻaki mo ha taimi naʻe fakahaofi ai kinautolu pe ko ha taha ʻoku nau ʻiloʻi.
Ko ha founga ʻe taha ko hono vahevahe ʻa e foʻi vitiō “Feluteni Ai e Fakamaau Totonú, ʻOfá, mo e ʻAloʻofá” (5:36), lava ke maʻu ʻi he ChurchofJesusChrist.org.
Naʻe fakamanatu ʻe Nīfai ki hono kakaí ʻi he 2 Nīfai 25, naʻe fakamoʻoniʻi ʻe he kau palōfitá ko Sīsū Kalaisi ʻa e Mīsaiá, ʻa ia ko hono ʻuhingá ko e Tokotaha kuo Pani pe Tokotaha Fakahaofi, ʻo e kakai kotoa pē (vakai, Fakahinohino ki he Ngaahi Folofolá, “Mīsaiá,” scriptures.ChurchofJesusChrist.org). Naʻe lekooti ʻe Nīfai neongo ʻe fakamoveteveteʻi ʻa e kau Siú koeʻuhí ko ʻenau taʻetuí, kapau te nau tui kia Sīsū Kalaisi, ʻe hanga ʻe he ʻEikí ʻo tānaki mo “fakafoki [ʻa kinautolu] mei honau tuʻunga mole mo tō ki laló” (2 Nīfai 25:15–17).
Lau ʻa e 2 Nīfai 25:18–20, ʻo kumi e meʻa naʻe akoʻi ʻe Nīfai kau ki he founga ʻe fakahaofi ai ʻa e kau Siú (mo e fānau kotoa ʻa e ʻOtuá). ʻE ala tokoni ke ʻiloʻi ʻe lava ke fakaʻaongaʻi e foʻi lea huafa ʻi he folofolá ke fakafofongaʻi ʻa e mālohi pe mafai ʻo ha taha. ʻOku moʻoni ʻaupito ʻeni ʻi heʻene ʻuhinga ki he Fakamoʻuí.
-
Ko e hā ʻoku fakahaofi kitautolu mei ai ʻe Sīsū Kalaisí?
-
Naʻe mei fēfē nai kapau ne ʻikai ke tau maʻu ha Fakamoʻui?
Fakamoʻui ʻi he ʻaloʻofa
Lau ʻa e 2 Nīfai 25:23, ʻo kumi e founga ʻoku fakamoʻui ai kitautolu ʻe Sīsū Kalaisí.
ʻOku fakataumuʻa e konga ko ʻení ke tokoni ke mahino lelei ange ki he kau akó ʻa e ʻaloʻofá.
ʻOku maʻu mo ha ngaahi tokoni kehe ʻi he konga “Ngaahi Fakamatala Fakamahinó mo e Puipuituʻá.”
-
Ko e hā ha ngaahi fehuʻi te ke ala fakahoko ke maʻu ha mahino lahi ange ki he ngaahi akonaki ʻa Nīfai ʻi he veesi 23?
Fakakaukau ke hiki ha ngaahi fehuʻi ʻi he palakipoé maʻá e kau akó. ʻE lava ke nau fakahoko ha ngaahi fehuʻi hangē ko e “Ko e hā ʻa e ʻaloʻofa?” mo e “ʻOku ʻuhinga ki he hā ʻa hono fakamoʻui kitautolu hili ʻetau fai ʻa e meʻa kotoa pē ʻe ala faí?”
Fakaʻaongaʻi e naunau ko ʻení ke tokoni ki he kau akó ʻi hono tali ʻenau ngaahi fehuʻí.
Ko e ʻaloʻofá ko e tokoni pe ivi [fakalangi] ʻoku foaki tuʻunga ʻi he Fakalelei ʻa e ʻEiki ko Sīsū Kalaisí. …
Ko e ʻaloʻofá ko ha meʻaʻofa ia mei he Tamai Hēvaní ʻoku fakafou mai ʻi Hono ʻAlo ko Sīsū Kalaisí. Ko e tefitoʻi ʻuhinga ʻo e foʻi lea ʻaloʻofá, ʻo hangē ko hono fakaʻaongaʻi ʻi he folofolá, ʻoku fakatautefito ia ki he mālohi ke fakahoko mo e faitoʻo fakalaumālie ʻoku ʻomi ʻi he ʻaloʻofa mo e ʻofa ʻa Sīsū Kalaisí. (Ngaahi Tefito ʻo e Ongoongoleleí, “ʻAloʻofá,” topics.ChurchofJesusChrist.org)
Naʻe fakamatala ʻa Palesiteni Tieta F. ʻUkitofa, ʻo e Kau Palesitenisī ʻUluakí ʻo pehē:
ʻOku ou fifili pe ʻoku tau faʻa fakaʻuhingaʻi hala [nai] he taimi ʻe niʻihi ʻa e kupuʻi lea “ʻo ka hili ʻetau fai ʻa e meʻa kotoa pē [te tau] ala faí.” Kuo pau ke mahino kiate kitautolu ʻoku ʻikai tatau ʻa e “ʻo ka hilí” mo e “koeʻuhí.”
ʻOku ʻikai fakahaofi kitautolu “koeʻuhí” ko e meʻa kotoa te tau lava ʻo faí. Kuo ʻi ai nai ha niʻihi ʻo kitautolu kuó ne fai ʻa e meʻa kotoa [ʻokú ne] lava ke faí? ʻOku tatali nai ʻa e ʻOtuá kae ʻoua kuo tau fakahoko ʻa e feinga kotoa pē, kimuʻa peá Ne toki kau mai ki heʻetau moʻuí mo ʻEne ʻaloʻofa fai fakamoʻuí?
ʻOku loto-foʻi ha kakai tokolahi koeʻuhí ʻoku nau faʻa tōnounou. ʻOku nau ʻiloʻi tonu “ʻoku fie fai ʻe he laumālié, ka ʻoku vaivai ʻa e kakanó.” [Mātiu 26:41]. ʻOku hiki fakataha honau leʻó mo Nīfai ʻo pehē, “ʻOku mamahi ʻa hoku laumālié koeʻuhí ko ʻeku ngaahi angahalá.” [2 Nīfai 4:17].
ʻOku ou ʻilo pau naʻe ʻiloʻi ʻe Nīfai ʻoku hanga ʻe he ʻaloʻofa ʻa e Fakamoʻuí ʻo fakaʻatā kitautolu mo fakafaingofuaʻi ʻetau ikunaʻi ʻa e angahalá [vakai, ʻAlamā 34:31]. Ko e ʻuhinga ʻeni naʻe ngāue tōtōivi ai ʻa Nīfai ke fakalotoʻi ʻene fānaú mo hono kāingá ke nau “tui kia Kalaisi, pea mo fakalelei ki he ʻOtuá” [2 Nīfai 25:23].
Ko hono moʻoní, ko e meʻa ia ʻoku tau lava ʻo faí! Pea ko hotau tufakanga ia ʻi he moʻui fakamatelié! …
ʻOku ʻatā ʻi he ʻahó ni pea maʻu ai pē, ʻa e ʻaloʻofa ʻa e ʻOtuá kiate kinautolu kotoa kuo mafesifesi honau lotó mo fakatomala honau laumālié [vakai, 3 Nīfai 9:19–20]. (Dieter F. Uchtdorf, “Ko e Meʻaʻofa ʻo e ʻAloʻofá,” Ensign pe Liahona, Mē 2015, 110)
Fakaʻaongaʻi ha fehuʻi ʻe taha pe lahi ange mei heni ke tokoni ki he kau akó ke vahevahe ʻenau ngaahi fakakaukaú. Mahalo ʻe ueʻi koe ke ke fai ha ngaahi fehuʻi vakaiʻi pe ke vahevahe ha taimi naʻá ke aʻusia ai e ʻaloʻofa ʻa e Fakamoʻuí. Te ke lava foki ʻo fakakaukau ke vahevahe ha sīpinga ʻo e founga naʻe tokoniʻi ai koe, pe ko ha taha ʻokú ke ʻilo, ʻe he ʻaloʻofa ʻa e Fakamoʻuí.
-
Te ke fakamatalaʻi fēfē hoʻo ngaahi ongo ki he Fakamoʻuí, ʻi hoʻo ʻiloʻi ʻoku ʻatā ʻEne ʻaloʻofá maʻau fakataautaha?
-
Ko e hā ha ngaahi founga ʻe niʻihi te ke lava ai ʻo maʻu e ʻaloʻofa ʻa e Fakamoʻuí?
-
Ko e hā ha ngaahi tafaʻaki ʻi hoʻo moʻuí naʻe mei kehe kapau naʻá ke ongoʻi lahi ange ʻa e ʻaloʻofa ʻa e Fakamoʻuí? ʻI he ngaahi founga fēfē?
Fakakaukau taimi siʻi ki he meʻa kuó ke ako fekauʻaki mo e hoko ʻa Sīsū Kalaisi ko e founga pē ʻe taha ʻe lava ke fakamoʻui ai koé. Ko e hā ha pōpoaki pe moʻoni naʻe mahuʻinga taha kiate koe pe naʻá ne ueʻi koe ke ke fie fakahikihikiʻi ʻa Sīsū Kalaisi? Ko e hā ʻoku ueʻi koe ke ke fakahoko koeʻuhí ko e meʻa naʻá ke ako mo ke ongoʻi? Mahalo te ke loto ke hiki hoʻo ngaahi fakakaukaú ʻi hoʻo tohinoa akó.
Fiefia ʻia Kalaisi
Koeʻuhí naʻe ʻiloʻi ʻe Nīfai e ʻaloʻofa mo e mālohi ʻo e Fakamoʻuí ke fakahaofí, naʻá ne tohi ai ke tokoniʻi e niʻihi kehé ke nau tui kia Kalaisi. Lau ʻa e 2 Nīfai 25:26 ʻo kumi e meʻa te tau lava ʻo fai ke tokoniʻi e niʻihi kehé ke tui kia Sīsū Kalaisí. Mahalo te ke fie fakaʻilongaʻi e ngaahi lea ngāue kehekehe ʻoku fakaʻaongaʻi ʻi he veesi ko ʻení.
-
Ko e ngaahi lea fē ʻi he veesi ko ʻení naʻe makehe kiate koé?
-
Ko e hā ha founga kuo tākiekina ai hoʻo moʻuí ʻe ha meʻa kuo vahevahe ʻe ha taha kehe fekauʻaki mo Sīsū Kalaisi?
-
ʻE fakamālohia fēfē ho vā fetuʻutaki mo Sīsū Kalaisí ʻi hono vahevahe mo e niʻihi kehé hoʻo ngaahi ongo fakataautaha fekauʻaki mo Iá?
Ke tokoni ke fakaʻaongaʻi ʻe he kau akó e veesi 26, fakakaukau ke vahevahe e kalasí ke nau tauhoa pe fakakulupu iiki pea fakaafeʻi kinautolu ke nau “lea ʻia Kalaisi” ʻaki hono vahevahe ʻenau ngaahi fakakaukau mo e ongo fekauʻaki mo Sīsū Kalaisí. ʻE lava foki ke fakaʻosi ʻe he kau akó e kalasí ʻaki hono fakakakato fakafoʻituitui ʻa e ʻekitivitī ko ʻení:
Fakakaukau ki ha taha ʻi hoʻo moʻuí ʻe ala ʻaonga hano fakamanatu kiate ia ʻa e ʻofa mo e ʻaloʻofa ʻa e Fakamoʻuí. Faʻu ha pōpoaki (hangē ko ha pōpoaki telefoni, tohi ʻi he mītia fakasōsialé, pe tohi fakataautaha) te ke lava ʻo vahevahe mo kinautolu.