Pasiunang mga Pahina sa Basahon ni Mormon

Ulohan nga Pahina

Ang Katuyoan sa Basahon ni Mormon

Moroni, anak ni Mormon, nagsulat sa bulawan nga mga palid

Nganong nagkinahanglan pa man kita sa Basahon ni Mormon nga aduna na man kitay pulong sa Dios diha sa Biblia? Sa ulohan nga pahina sa Basahon ni Mormon, ang propeta nga si Moroni nagtabang kanato sa pagsabot nganong importante kaayo ang Basahon ni Mormon. Kini nga leksiyon gituyo sa pagtabang kanimo nga makasabot ug makapasabot sa mga katuyoan sa Basahon ni Mormon.

Paggamit sa Tumong sa Seminaries and Institutes of Religion.Hinumdomi nga “ang atong katuyoan mao ang pagtabang sa mga kabatan-onan ug mga young adult nga makasabot ug makasalig sa mga pagtulon-an ug Pag-ula ni Jesukristo, makasarang sa mga panalangin sa templo, ug makaandam sa ilang mga kaugalingon, sa ilang mga pamilya, ug sa uban alang sa kinabuhing dayon uban sa ilang Amahan sa Langit” (Pagtudlo ug Pagkat-on sa Ebanghelyo: Usa ka Handbook alang sa mga Magtutudlo ug sa mga Lider sa Seminaries and Institutes of Religion [2012], x).

icon, instruksiyon sa pagtudlo

Pagpangandam sa estudyante: Dapita ang mga estudyante sa pagpamalandong nganong ang Basahon ni Mormon gihatagan og gibug-aton ug kasagara nga gigamit sa Ang Simbahan ni Jesukristo sa mga Santos sa Ulahing mga Adlaw.

Posible nga mga Kalihokan sa Pagkat-on

Ang kamahinungdanon sa pagkahibalo sa katuyoan sa usa ka butang

icon, instruksiyon sa pagtudlo

Ikonsiderar ang pagpakita og mga hulagway sa mga himan nga dili pamilyar sa mga estudyante o pagdala sa maong mga himan ngadto sa klase aron makita ug mahikap sa mga estudyante. Ang himan sa ubos usa ka cross-staff, nga gigamit sa karaang mga panahon alang sa paglawig.

Nakakita ka na ba sukad og himan sama sa anaa sa mosunod nga litrato? Hunahunaa nga kinahanglan nimo nga ipasabot ang katuyoan ug bili sa usa ka dili pamilyar nga himan sa laing tawo.

Hulagway sa cross staff

• Nganong makatabang ang pagkahibalo ug pagsabot sa katuyoan o bili sa usa ka butang sa dili pa kini gamiton o ipakigbahin sa uban?

  icon, instruksiyon sa pagtudlo

  Ikonsiderar ang pagpakita og kopya sa Basahon ni Mormon una pa ang sunod nga pangutana.

• Sa unsang paagi kini may kalabotan sa pagsabot sa katuyoan ug bili sa Basahon ni Mormon?

Ikonsiderar kon unsa ka kamasaligon sa imong gibati sa pagpasabot sa katuyoan ug bili sa Basahon ni Mormon ngadto sa usa ka tawo nga walay kahibalo niini. Samtang magtuon ka niini nga leksiyon, pangitaa kon unsay nagtabang kanimo nga makasabot sa katuyoan ug bili sa Basahon ni Mormon ug unsaon nimo pagpaambit sa imong nasabtan ngadto sa uban.

Pagsabot sa katuyoan ug bili sa Basahon ni Mormon

icon, instruksiyon sa pagtudlo

Ikonsiderar ang pagsulat sa mosunod nga dili kompleto nga kapahayag diha sa pisara ug dapita ang mga estudyante sa pagkompleto sa kapahayag sa unsay ilang nakit-an.

Ang Basahon ni Mormon gisulat alang …

Ang Basahon ni Mormon gisulat alang …

Ang ulohan nga pahina naglangkob sa kataposang mga pulong nga gisulat ni Moroni sa kataposang dahon sa bulawan nga mga palid. Basaha ang ulohan nga pahina ug ang unang tulo ka mga parapo sa pasiuna sa Basahon ni Mormon. Pangita og mga pamaagi nga makompleto ang mga kapahayag sa ibabaw. Ang mosunod nga mga pangutana mahimong makatabang kanimo samtang gibuhat kini.

• Kang kinsa gisulat ang Basahon ni Mormon?

• Mahitungod kang kinsa ang Basahon ni Mormon?

• Nganong gisulat ang Basahon ni Mormon?

(Alang sa dugang impormasyon, tan-awa sa “Mubo nga Pagpasabot mahitungod sa Ang Basahon ni Mormon” sa pasiunang mga pahina.)

Si Elder Ulisses Soares sa Korum sa Napulog Duha ka Apostoles mipamatuod sa mga katuyoan sa Basahon ni Mormon.

Elder Ulisses Soares

Ako mopamatuod nga ang Basahon ni Mormon, mao ang instrumento sa Dios sa pagpahinabo sa pagpundok sa Israel sa atong panahon ug sa pagtabang sa mga tawo nga mahibalo sa Iyang Anak, si Jesukristo. (Ulisses Soares, “Ang Pagtungha sa Basahon ni Mormon,” Liahona, Mayo 2020, 35)

• Unsay imong nakat-onan gikan sa imong kaugalingong pagtuon ug sa pamahayag ni Elder Soares mahitungod sa mga katuyoan sa Basahon ni Mormon?

Usa ka kamatuoran nga tingali imohang nahibaloan mao nga ang Basahon ni Mormon gisuwat aron sa pagtabang sa pagpundok sa Israel ug pagkombinse sa tanang tawo nga si Jesus mao ang Kristo.

• Unsa nga ebidensiya ang imong nakita niini sa ikaduhang parapo sa ulohan nga pahina?

icon, instruksiyon sa pagtudlo

Ang mosunod nga duha ka mga kalihokan makatabang sa mga estudyante nga mas palawman pa ang ilang pagsabot sa gipabag-an nga letra [bolded] sa kamatuoran sa ibabaw. Kini nga mga kalihokan mahimong buhaton sa nagkalainlaing mga pamaagi. Mahimo nimong ipakita ang matag kalihokan alang sa mga estudyante o hatagan sila og mga kopya sa matag usa. Ang mga estudyante mahimong mopili nga mobuhat sa usa niini ug dayon motudlo sa usag usa unsay ilang nakat-onan. Mahimo usab silang magtinabangay nga magpares o sa ginagmay nga mga grupo aron makompleto ang duha ka mga kalihokan.

Kalihokan A: Ang Basahon ni Mormon gituyo aron sa pagtabang sa pagpundok sa Israel

Ang Basahon ni Mormon kanunay nga nagpasabot sa pakigsaad nga gihimo sa Ginoo sa pagpundok sa Israel. Basaha ang pamahayag ni Presidente Russell M. Nelson ug duha o tulo sa mga pakisayran sa kasulatan sa ubos.

Presidente Russell M. Nelson

[Sa] Basahon ni Mormon, inyong makat-onan ang doktrina sa pagpundok, mga kamatuoran mahitungod ni Jesukristo, Iyang Pag-ula, ug ang kahingpitan sa Iyang ebanghelyo nga dili makita diha sa Biblia. Ang Basahon ni Mormon mahinungdanon sa pagpundok sa Israel. Gani, kon wala ang Basahon ni Mormon, ang gisaad nga pagpundok sa Israel dili mahitabo. (Russell M. Nelson and Wendy W. Nelson, “Paglaom sa Israel [tibuok kalibotan nga debosyonal sa kabatan-onan, Hunyo 3, 2018],” dugang ngadto sa New Era ug Ensign, 13, ChurchofJesusChrist.org)

• 1 Nephi 15:14–18

• 1 Nephi 22:11–12

• 2 Nephi 29:14

• Mormon 9:36–37

• Moroni 10:31

• Sa imong hunahuna sa unsang paagi nga ang Basahon ni Mormon makatabang sa pagpundok sa Israel?

Pamalandongi kon sa unsang paagi ang Basahon ni Mormon nakatabang kanimo o sa uban nga mapundok ngadto sa tinuod nga Simbahan ni Jesukristo. Ikonsiderar ang pag-rekord sa mga panalangin nga miabot tungod niini nga pagpundok.

• Sa unsang paagi kaha malahi ang imong kinabuhi kon wala ang Basahon ni Mormon?

• Kang kinsa nimo ipaambit ang Basahon ni Mormon?

Kalihokan B: Ang Basahon ni Mormon gituyo aron makombinse ang tanang katawhan nga si Jesus mao ang Kristo

Pamalandongi kon unsay imong nahibaloan mahitungod ni Jesukristo ug sa unsang paagi ang Basahon ni Mormon nakaapekto sa imong relasyon Kaniya. Dayon paggahin og panahon sa paglista og duha o tulo ka mga kasulatan gikan sa Basahon ni Mormon nga nagtudlo kanimo mahitungod ni Jesukristo. Kon nagkinahanglan ka og tabang, tan-awa ang “Jesukristo” diha sa Giya ngadto sa mga Kasulatan.

• Unsa ang natabang niini nga mga bersikulo sa imong pagsabot mahitungod ni Jesukristo?

icon, instruksiyon sa pagtudlo

Ang mosunod nga kalihokan mahimong ipahiangay alang sa mga estudyante aron mag-drama-drama nga magpares o diha sa gagmay nga mga grupo.

Hunahunaa nga nakig-istorya sa usa ka higala kinsa dili pamilyar sa Basahon ni Mormon o wala mobati nga kini mapuslanon kaayo. Unsa kaha ang imong ipaambit niini nga tawo mahitungod sa Basahon ni Mormon ug sa katuyoan niini? Ikonsiderar ang paglakip og personal nga mga kasinatian, mga hugpong sa pulong gikan sa ulohan nga pahina ug sa pasiuna, o bisan unsang mga pakisayran gikan sa Basahon ni Mormon nga imong gibati nga makatabang.

icon, instruksiyon sa pagtudlo

Ikonsiderar ang pagtapos pinaagi sa personal nga pagpamatuod sa katuyoan ug bili sa Basahon ni Mormon. Mamahimo usab nga ipaambit sa mga estudyante ang ilang pagpamatuod o mga pagbati mahitungod sa ilang nangagi ug umaabot nga pagtuon niining sagrado nga rekord.

Komentaryo ug Background nga Impormasyon

Unsay pasabot sa pipila ka termino sa ulohan nga pahina?

Ang mosunod nga mga kahulugan makatabang nimo nga masabtan ang pipila ka termino gikan sa ulohan nga pahina sa Basahon ni Mormon.

• Ang Balay ni Israel nagpasabot nga mga kaliwat ni Abraham, Isaac, ug Jacob. Dugang pa, ang balay ni Israel naglakip niadtong dili tinuod nga mga kaliwat ni Abraham, Isaac, ug Jacob apan midawat sa mensahe sa gipahiuli nga ebanghelyo ug miduol sa gipahiuli nga Simbahan pinaagi sa gikinahanglan nga mga pakigsaad ug mga ordinansa.

• Ang mga Judeo orihinal nga naila nga bisan kinsa nga gikan sa tribo ni Juda (usa sa napulog duha sa mga tribo sa Israel). Ang mga manunulat sa Basahon ni Mormon, bisan pa niana, kasagaran migamit niini nga termino sa pagpasabot sa tanan niadtong kinsa nagpuyo sa Habagatang Gingharian sa Juda sa panahon sa Daang Tugon (2 Nephi 30:4; 33:8), bisan tuod kon sila tingali mga kaliwat sa ubang mga tribo sa Israel (Alma 10:3). Nagpasabot usab kini sa “mga katawhan nga nagsunod sa relihiyon, mga paagi sa kinabuhi, ug mga tradisyon sa tinuohan sa mga Judeo apan mahimo o mahimo nga dili Judeo pinaagi sa pagkatawo” (Giya ngadto sa mga Kasulatan, “Judeo, Mga,” scriptures.ChurchofJesusChrist.org).

• Mga Hentil nagpasabot “ang mga nasod” (Bible Dictionary, “Gentile”). “Usahay kini nagpasabot sa mga katawhan nga dili kaliwat sa Israel, usahay sa mga katawhan nga dili kaliwat sa mga Judeo, ug usahay sa mga nasod nga walay ebanghelyo, bisan tuod og adunay dugo sa mga Israelite diha sa mga katawhan. Kining ulahi nga paggamit mao ang kasagaran nga pulong nga gigamit diha sa Basahon ni Mormon ug sa Doktrina ug mga Pakigsaad” (Giya ngadto sa mga Kasulatan, “Hentil, Mga,” scriptures.ChurchofJesusChrist.org).

• Ang minubo mao ang gipamubo nga bersyon sa usa ka butang.

• Ang salin mao ang nahibilin nga bahin.

Nganong ang Basahon ni Mormon importante kaayo?

Aron masabtan ang mahinungdanong epekto sa Basahon ni Mormon sa kinabuhi sa daghang tawo, ikonsiderar ang pagtuon sa mensahe ni Presidente Russell M. Nelson “Ang Basahon ni Mormon: Unsa Kaha ang Imong Kinabuhi Kon wala Kini?” (Liahona, Nob. 2017, 60–63). Hatagi pag-ayo og pagtagad ang seksiyon nga “Mga Lista ni Presidente Nelson sa Basahon ni Mormon” anaa sa kataposan sa mensahe.

Unsa ang orihinal nga hitsura sa ulohan nga pahina sa Basahon ni Mormon?

Mamahimo nimong tan-awon ang hulagway sa ulohan nga pahina sa manuskrito sa tig-imprinta dinhi.

Mamahimo nimong tan-awon ang hulagway sa ulohan nga pahina sa unang edisyon sa Basahon ni Mormondinhi.

Dugang nga Kalihokan sa Pagkat-on

“Usa ka Mubo nga Pagpasabot mahitungod sa Basahon ni Mormon”

Aron matabangan ang mga estudyante nga masabtan kon unsa ang Basahon ni Mormon ug giunsa kini paghugpong, ikonsiderar ang pagdala og mga basahon o mga kahon nga nagrepresentar sa lain-laing mga palid sama sa gihulagway sa “Mubo nga Pagpasabot mahitungod sa Ang Basahon ni Mormon.” Dapita ang mga estudyante sa pagbasa sa mga parapo nga ginumerohan og 1–4 sa pagpasabot ug sa pag-andam sa pagpasabot giunsa pagkuha ang Basahon ni Mormon gikan niining nagkalain-laing mga palid.