Pasiunang mga pahina sa Basahon ni Mormon

Ang mga Pagpamatuod sa Tulo ka mga Saksi ug sa Walo ka mga Saksi

“Kami … Nakakita sa mga Palid”

Joseph Smith ug ang Tulo ka mga Saksi

Sulod sa usa ka panahon, si Joseph Smith wala tugoti sa pagpakita sa bulawan nga mga palid ngadto ni bisan kinsa. Sa katumanan sa panagna, ang Ginoo sa kataposan mibutyag ngadto kang Joseph nga dugang nga mga saksi ang tugotan nga makakita sa mga palid ug mopamatuod sa ilang katinuod (tan-awa sa 2 Nephi 27:12–14). Kini nga leksiyon makatabang kanimo nga makasabot sa kamahinungdanon sa daghang mga saksi sa Basahon ni Mormon ug mamalandong sa imong kaugalingong saksi.

Pagtabang sa mga estudyante nga makat-on pinaagi sa Espiritu. Usa ka paagi mao ang pag-awhag kanila sa pagpamalandong sa ilang personal nga mga kasinatian kalabot niini nga leksiyon. Paghatag og panahon sa pagpamalandong sa mga panalangin nga ilang nadawat pinaagi sa pagsunod sa ebanghelyo ni Jesukristo ug sa unsang paagi sila mahimong mas mahisama Kaniya.

Pagpangandam sa estudyante: Dapita ang mga estudyante nga motambong nga andam sa pagpaambit og mga kasinatian nga nakatabang nila o sa uban nga makahibalo nga ang Basahon ni Mormon iya sa Dios.

Mga Posibleng Kalihokan sa Pagkat-on

Mga saksi sa mga palid

Ikonsiderar ang paggamit sa mosunod nga parapo aron matabangan ang mga estudyante nga makaamgo unsa kaha kadto kalisod alang kang Joseph Smith nga mahimong bugtong saksi nga makakita sa bulawan nga mga palid sulod niadto nga panahon.

Hunahunaa kon unsa kaha kini alang kang Joseph Smith nga mao lamang ang bugtong makakita sa bulawan nga mga palid. Hunahunaa kon unsa kaha ka lisod alang kanimo nga dili tuohan, bugal-bugalan, ug tawgon nga mangingilad tungod kay dili nimo ipakita sa mga tawo ang mga palid. Hunahunaa nga imong sultihan kadtong misuporta nimo nga dili nila mahimong makita ang mga palid.

Samtang naghubad sa Basahon ni Mormon, gidiktar ni Joseph ang mga pulong sa mga saad nga gihimo sa Ginoo mahitungod sa mga palid. Basaha ang 2 Nephi 27:12–14 aron makita ang mga saad nga gihimo sa Ginoo mahitungod sa mga palid (tan-awa usab sa Ether 5:2–4).

• Unsa ang mipatigbabaw kanimo mahitungod niini nga panagna? Ngano man?

• Unsa kaha ang gibati ni Joseph samtang nagbasa siya niini nga panagna? Ngano man?

• Unsa ang imong nakat-onan gikan niini nga tudling mahitungod sa Ginoo ug sa Basahon ni Mormon?

Usa ka kamatuoran nga atong makat-onan gikan niini nga mga panagna mao nga ang Ginoo mihatag og daghang mga saksi sa mga palid sa Basahon ni Mormon.

• Ngano nga mas sayon man ang pagtuo sa usa ka butang nga tinuod kon adunay labaw sa usa ka saksi niini?

Samtang magpadayon ka sa pagtuon, tinguhaa ang panabang sa Langitnong Amahan pinaagi sa Espiritu Santo aron masabtan ang kamahinungdanon sa mga saksi sa bulawan nga mga palid, ug ikonsiderar kon sa unsang paagi ang ilang mga pagpamatuod makatabang nimo nga makaangkon o makapalig-on sa imong kaugalingong pagpamatuod.

Ipakita ang mosunod nga parapo o dapita ang usa ka estudyante sa pagbasa niini.

Ang Ginoo mihatag og grupo sa tulo ug dayon sa walo ka mga lalaki aron makakita sa mga palid. Daghan niini nga mga saksi nakatabang sa pipila ka paagi sa pagtungha sa Basahon ni Mormon. Sama pananglit, si David Whitmer midapit kang Joseph ug Emma sa pagpuyo uban kanila samtang si Joseph naghubad, si Martin Harris miprenda sa iyang umahan aron sa pagbayad sa mga gasto sa pag-imprinta sa Basahon ni Mormon, ug si Oliver Cowdery miserbisyo isip tigsulat sa kadaghanan sa hinubad. Ang amahan ni Joseph ug ang iyang mga igsuong lalaki nga sila si Hyrum ug si Samuel mga saksi usab sa mga palid ug mitabang kang Joseph sa importante nga mga paagi. Bisan tuod og pipila niini nga mga lalaki mibiya sa Simbahan sa kaulahian, walay usa kanila ang milimod sa ilang mga pagpamatuod sa Basahon ni Mormon. (Tan-awa ang Mga Hisgotanan sa Kasaysayan sa Simbahan, “Mga Saksi sa Basahon ni Mormon,” churchofjesuschrist.org/study/history/topics.)

Basaha ang “Ang Pagpamatuod sa Tulo ka mga Saksi” ug ang “Ang Pagpamatuod sa Walo ka mga Saksi,” nga mangita sa unsay ilang nakita, gibati, ug nahibaloan.

Ikonsiderar ang paghatag ngadto sa mga estudyante sa mosunod nga handout ug dapita sila sa pagtubag sa tsart nga magtinagsa, isip usa ka klase, o diha sa ginagmay nga mga grupo.

Ang Pagpamatuod sa Tulo ka mga Saksi ug sa Walo ka mga Saksi

	Tulo ka mga Saksi:	Walo ka mga Saksi:
Unsa ang nakita ug gibati sa mga saksi.
Unsa ang nahibaloan sa mga saksi.
Unsay gibuhat sa mga saksi.

• Unsa nga pagkaparehas ug kalainan ang imong nakita sa mga kasinatian sa duha ka grupo?

• Ngano kaha nga ang mga kalainan mahimong mahinungdanon?

Samtang kita usahay gusto nga makaangkon og mga kasinatian sama niini nga mga saksi, ang Ginoo mipamatuod nga bisan ang pagkakita niini nga mga butang dili makakombinsir sa mga tawo sa kamatuoran (tan-awa sa Doktrina ug mga Pakigsaad 5:7). Si Presidente James E. Faust (1920–2007) sa Unang Kapangulohan mipasabot:

Presidente James E. Faust

Sa atong panahon ug oras kinahanglan natong mahibaloan ang katinuod sa unsay anaa sa bulawan nga mga palid nga dili makakita niini. Dili kini nato mahimong makita ug magunitan sama nga kini kaniadto nahimo sa Tulo ka mga Saksi ug sa Walo ka mga Saksi. Pipila niadtong aktuwal nga nakakita ug nakagunit sa bulawan nga mga palid wala magpabiling matinud-anon sa Simbahan. Ang pagkakita og anghel usa ka talagsaon nga kasinatian, apan mas labaw pa ang makaangkon og kahibalo sa kabalaan sa Manluluwas pinaagi sa hugot nga pagtuo ug sa pagsaksi sa Espiritu. [tan-awa sa John 20:29]. (James E. Faust, “It Can’t Happen to Me,” Ensign, Mayo 2002, 48)

• Ngano nga ang unsay gitudlo niini nga pamahayag importante diha kanimo?

Ang imong saksi kang Jesukristo ug sa Basahon ni Mormon

Usa ka labing dakong katuyoan sa Basahon ni Mormon mao ang pagkombinser sa mga tawo nga si Jesus mao ang Kristo (tan-awa ang ulohan nga pahina sa Basahon ni Mormon). Hunahunaa kon ang imong personal nga saksi ni Jesukristo ug sa Basahon ni Mormon ingon ka lig-on sama sa imong gitinguha nga kini mahimo. Pamalandongi kon sa unsang paagi nga ang pagbaton o paglig-on niana nga pagsaksi mahimong usa ka panalangin nganha kanimo ug sa uban.

Dapita ang mga estudyante sa pagpamalandong diha sa ilang pagpangandam sa klase. Dayon ipakita ang mosunod nga parapo ug awhaga sila sa pagpamalandong ug pagsulat sa ilang mga pagbati.

Isulat ang imong pagpamatuod kang Jesukristo ug sa Basahon ni Mormon. Kon wala ka pa mobati nga aduna na kay pagpamatuod, isulat kon unsay imong mahimo aron makadawat og pagpamatuod. Ilakip kon sa unsang paagi nga ang mga pagpamatuod sa uban mahimong makaimpluwensiya sa imong kaugalingong pagpamatuod. Ikonsiderar ang pagdugang niini samtang magpadayon ka sa pagtuon sa Basahon ni Mormon.

Human ang mga estudyante adunay igong panahon sa pagsulat, dapita ang pipila sa pagpaambit sa ilang mga pagpamatuod ni Jesukristo ug sa Basahon ni Mormon.

Komentaryo ug Background nga Impormasyon

Ngano nga ang mga pagpamatuod sa Tulo ka mga Saksi ug sa Walo ka mga Saksi mahinungdanon kaayo?

Si Presidente Henry B. Eyring sa Unang Kapangulohan mipamatuod:

Presidente Henry B. Eyring

Ang Tulo ka mga Saksi wala gayod molimod sa ilang pagpamatuod sa Basahon ni Mormon. Dili sila makahimo sa paglimod kay nasayod sila nga kini tinuod. Nagsakripisyo sila ug nag-atubang sa mga kalisdanan nga labaw sa nahibal-an sa kadaghanan sa mga tawo. Si Oliver Cowdery mihatag sa susama nga pagpamatuod mahitungod sa balaan nga gigikanan sa Basahon ni Mormon sa dihang himatyon na siya. Apan sa mga panahon sa pagsulay, nagduhaduha sila sa ilang hugot nga pagtuo nga si Joseph propeta gihapon sa Dios ug nga ang bugtong paagi sa pagduol ngadto sa Manluluwas mao ang pinaagi sa Iyang gipahiuli nga Simbahan. Nga padayon nila nga gipamatud-an ang ilang nakita ug nadungog nianang talagsaon nga kasinatian, atol sa taas nga mga panahon sa pagkalayo gikan sa Simbahan ug kang Joseph, naghimo sa ilang pagpamatuod nga mas gamhanan. (Henry B. Eyring, “Usa ka Malungtarong Pagpamatuod sa Misyon ni Propeta Joseph,” Liahona, Nob. 2003, 90)

Ngano kaha nga ang Ginoo mihatag man niining duha ka lain-laing mga matang sa mga kasinatian alang sa mga saksi sa Basahon ni Mormon?

Kon ang mga kritiko sa Simbahan mipasangil sa Tulo ka mga Saksi nga naghanduraw sa ilang panan-awon, kana dili makapatin-aw sa kasinatian sa Walo ka mga Saksi sa mga palid. Sa laing bahin, kon ang mga kritiko mipasangil kang Joseph Smith sa yanong paghimo-himo sa bulawan nga mga palid aron sa paglingla sa Walo ka mga Saksi, kana dili makapatin-aw sa balaanong mga pagpakita, lakip sa pagpakita sa usa ka anghel, nga nasinati sa Tulo ka mga Saksi.

Unsa ang gibati ni Joseph human ang uban nakakita sa mga palid?

Ang iyang inahan, si Lucy Mack Smith, mirekord nga human niining balaanong pagsaksi, si Joseph misulti kaniya:

Lucy Mack Smith

Wala lang mo makahibalo kon unsa ako kalipay. Ang Ginoo mitugot nga ang mga palid ipakita ngadto sa laing tulo ka mga tawo gawas kanako, kinsa nakakita usab og anghel ug mopamatuod sa kamatuoran sa unsay akong gisulti, kay sila nasayod sa ilang mga kaugalingon nga wala ako magtinguha sa pag-ila sa mga tawo, ug akong gibati nga ingon og ako nahuwasan sa hilabihan nga kabug-at nga ingon og sobra ra alang kanako nga sagubangon, apan karon sila moaambit na og kabahin niini, ug nakapalipay kini sa akong kalag nga wala ako mag-inusara sa kalibotan. (Lucy Mack Smith, History, 1844–1845, libro 8, pahina 11, josephsmithpapers.org; gi-moderno ang spelling ug ang punctuation)

Unsa nga dugang nga mga asoy ang makatabang kanako nga mas makasabot sa mga kasinatian sa mga saksi sa bulawan nga mga palid?

Si Elder Ulisses Soares sa Korum sa Napulog Duha ka Apostoles mipaambit sa asoy sa mga saksi. Tan-awa ang “Ang Pagtungha sa Basahon ni Mormon” gikan sa time code 7:58 hangtod sa 10:30 aron makita ang iyang pagsaysay pag-usab.

Ang mga kasinatian sa Tulo ka mga Saksi ug sa Walo ka mga Saksi gidetalye usab sa Mga Santos: Ang Istorya sa Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 [2018], 80–84).

Gipakita usab si Mary Whitmer sa mga palid. Ang istorya sa iyang kasinatian makita sa mga pahina 78–79 sa Mga Santos, vol. 1.

Dugang nga mga Kalihokan sa Pagkat-on

Ubang mga saksi

Makabenepisyo ang mga estudyante gikan sa pagkonsiderar kon sa unsang paagi nga ang pagsaksi sa uban sa Basahon ni Mormon makaimpluwensiya sa ilang kaugalingong pagsaksi. Dapita sila sa paghimo og lista sa mga tawo nga ilang nadunggan nga nagsaksi o nagpamatuod sa kamatuoran sa Basahon ni Mormon. Hangyoa sila sa pagpaambit kon giunsa niadtong mga saksi pag-impluwensiya kanila. Dayon ipasulat nila ang ilang kaugalingong pagsaksi o ipasabot sa daklit kon sa unsang paagi nga ang pagbaton og ilang kaugalingong pagsaksi makaimpluwensiya sa ilang kinabuhi ug sa relasyon uban ni Jesukristo.

testimony of three and eight witnesses handout