“Pepa e Tufa Atu 8: Savali mo Talavou Matutua,” Taliina o A‘u Fesili o le Talalelei Anomea a le Faiaoga (2022)
“Savali mo Talavou Matutua,” Taliina o A‘u Fesili o le Talalelei Anomea a le Faiaoga
Pepa e Tufa Atu 8
Savali mo Talavou Matutua
Pepa e Tufa Atu 8: Savali mo Talavou Matutua
Taliina o A‘u Fesili ole Talalelei—Pepa e Tufa Atu
Na faasoa mai Peresitene M. Russell Ballard o le Korama a Aposetolo e Toasefululua:
Ata
Peresitene M. Russell Ballard
A o amata ona matou mafaufau i nisi o a outou fesili, e taua le manatua o au o se Pulega Aoao, ae e le faapea ua avea ai au ma se pule i se tulaga lautele! …
Ou te popole i nisi taimi i le tele naua o mea e faamoemoeina e tagata o le ekalesia mai taitai ma faiaoga o le Ekalesia—ma le faamoemoe o i latou o ni tagata ua i ai tomai faapitoa i mataupu e sili atu nai lo o latou tiute ma tiutetauave. Na valaauina e le Alii ia aposetolo ma perofeta e valaaulia isi e o mai ia Keriso—ae le ia maua ni tikeri maualuga atu i le talafaasolopito anamua, suesuega faatusi paia, ma isi vaega atonu e aoga i le taliina o fesili uma atonu o loo ia i tatou e uiga i tusitusiga paia, talafaasolopito, ma le Ekalesia. O lo tatou tiute autu lava o le fausia lea o le Ekalesia, aoao atu le mataupu faavae a Keriso, ma fesoasoani ia i latou e manaomia le fesoasoani. …
Ou te faaiu atu i fautuaga e tolu e uiga i le sailia o tali i fesili o le talalelei.
Muamua, a o saili, suesue, ma tatalo mo ni tali, faamolemole ia manatua e tatau ona e ola sa‘o e maua ai tali o loo e sailia. …
Lua, au uo talavou pele, faamolemole faaalu se taimi e “filemu ai, ma iloa ai o A‘u o le Atua” [Salamo 46:10]. O le tele lava o o tatou popolega uma i le olaga e taliina i taimi filemu o le mafaufau, tatalo, ma le aapa atu i le Tama Faalelagi ma le Alii o Iesu Keriso mo le taitaiga, filemu, ma le olioli a o tatou taumafai e ola i le talalelei.
Ma le mea mulimuli, faamolemole ia taulai atu pea i le mea e matuai taua lava. Aua le vaai i talaatu o le faailoga. Talitonu i le Tama Faalelagi. Ua Ia tuuina mai ia i tatou Lana fuafuaga e faavavau, o lea “nofo i totonu o le vaa ma pipiimau!” [M. Russell Ballard, “Nofo i Totonu o le Vaa ma Pipiimau!,” Ensign po o le Liahona, Nov. 2014, 89–92]. Matou te alolofa ia te outou ma matou te manaomia outou i le taimi nei ma i tausaga a sau. (“Fesili ma Tali” [faigalotu a le Iunivesite o le Brigham Young, Nov. 14, 2017], speeches.byu.edu)
Fesili mo Talanoaga
O le a le tiute autu o taitai o le Ekalesia? O a ni faafitauli e mafai ona tatou fatuina mo i tatou lava pe a tatou faamoemoe e avea taitai o le Ekalesia ma tagata atamamai i autu uma?
Aisea e taua tele ai le taumafai e ola i le talalelei a o e sailia tali i au fesili?
O le a le uiga ia te oe o le “filemu”? (Salamo 46:10). Na faapefea e le aoao ia “filemu” ona fesoasoani ia te oe e faalogo i le siufofoga o le Alii ma maua ai tali?
E mafai faapefea e se talavou matua ona vaai i talaatu o le faailoga pe a sailia tali i fesili o le talalelei? Aisea e matautia ai faaleagaga le vaai i talaatu o le faailoga?