Aoaoga laiti 6

Auala e Aoao Atu ai Upumoni i le Faigofie ma le Manino

Faamatalatala

Faamalamalama atu o le aoao atu o le upumoni i le faigofie ma le manino o se auala mamana lea e tali ai fesili ma talanoaina ai popolega. Faaali atu ma faitau le saunoaga lenei a Peresitene M. Russell Ballard o le Korama a Aposetolo e Toasefululua ma Peresitene Ioane Teila:

Peresitene M. Russell Ballard

O le talosaga e sili ona taatele tatou te faalogo i ai e faigofie lava e faapenei: “Ta’u mai sina mea itiiti e uiga i lau Ekalesia.” O le upu autu iinei e “itiiti.” Latou te le o fai mai, “Ta‘u mai mea uma e te iloa ona auina mai lea o isi e ta’u mai isi mea uma ia te au.” …

… O loo i ai se manaoga tele mo ni faamatalaga manino, faigofie e tuuina atu ai ia i latou o e fia iloa mea faavae e uiga i le Ekalesia e pei ona i ai i aso nei. (M. Russell Ballard, “Faatuatuaga, Aiga, Mea Moni, ma Fua,” Ensign po o le Liahona, Nov. 2007, 25)

Peresitene Ioane Teila

O se tagata atamai moni na te aveina se mataupu e le manino ma faigata, e faalauteleina ma faafaigofieina ina ia mafai ona malamalama ai se tamaitiiti. (John Taylor, “Discourse,” Deseret News, Sept. 30, 1857, 238)

Ituaiga

Faasoa atu i tagata aoga faataitaiga nei o faamatalaga faigofie ma manino na tuuina mai e Peresitene Ballard (tagai “Faatuatua, Aiga, Mea Moni, ma Fua,” 26):

• Toefuataiga: “Matou te talitonu o le uluai ekalesia na faatuina e Iesu na leiloa ma ua toe toefuatai mai i o tatou aso. O le perisitua, o le pule ua tuuina atu i le tagata e galue ai i le suafa o le Atua, faatasi ai ma aposetolo ma se perofeta e taitaia i tatou, ua toefuataiina mai e pei ona i ai sauniga tatau uma o le faaolataga.”

• Tusitusiga Paia: “Matou te talitonu i le Tusi a Mamona ma isi tusi o tusitusiga paia lea e lagolagoina ma faamaonia ai le Tusi Paia ma molimau atu i le galuega ma le paia o Keriso ma faaaliga faifai pea a le Atua i le tagata. E moni, O Le Tusi a Mamona O Se ‘Tasi Molimau ia Iesu Keriso.’”

E mafai foi ona e matamata i le vitio “What Happens after We Die?” (1:43) ma vaavaai mo mea e avea ai lenei vitio ma se tali faigofie ma manino i lena fesili.

• O le a se mea na faagaeetia ai oe e uiga i nei faataitaiga o faamatalaga faigofie ma manino?

• E mafai faapefea ona e faamanuiaina isi e ala i le faaleleia o lou tomai e faasoa atu ni faamatalaga faigofie ma manino?

Faaaoga

Faaali atu fesili nei. Valaaulia tagata aoga e galulue ma se paga ma feauauai i le taliina o nei fesili. Fautuaina i latou e tali fesili taitasi i le 30–60 sekone.

• E talitonu le Au Paia o Aso e Gata Ai ia Iesu?

• Aisea ou te manaomia ai le Tusi a Mamona pe afai o ia te au le Tusi Paia?

• Pe o fai ea e tagata o la outou Ekalesia ia autaunonofo?

• Aisea ou te manaomia ai se ekalesia faatulagaina lelei?

Ina ia faauma le faataitaiga, valaaulia se tagata aoga se toatasi pe toalua e faasoa mai mea na latou aoaoina e ala i lenei aafiaga.