tagata o loo uuina le telefoni ma le Gospel Library o loo faaalia

Lesona 1

O Le Latalata Atili atu i le Tama Faalelagi ma Iesu Keriso e ala i Punavai Talitonuina ma Faatuatuaina

E toatele talavou matutua e i ai ni fesili e uiga i aoaoga faavae, aoaoga, aiaiga faavae, ma le talafaasolopito O Le Ekalesia a Iesu Keriso o le Au Paia o Aso e Gata Ai ae atonu e le o mautinoa po o fea e maua ai ni tali faatuatuaina. O lenei lesona o le a maua ai e tagata aoga le avanoa e saili ai punavai eseese ua saunia e le Ekalesia e talanoaina ai a latou fesili. O le a latou mafaufau foi pe aisea e faatuatuaina ai nei punavai.

Fautuaga mo le Aoao Atu

Faaleleia o Lo Tatou Aoao Atu ma le Aoaoina

Fatu se lagona o le auai. Faatasi ai ma le tuuina atu i tagata aoga o se avanoa e aoao ai le talalelei, faateleina le faatuatua ia Iesu Keriso, ma faalolotoina lo latou liua, e tatau i le inisitituti ona tuuina atu se aafiaga e mafai ai e tagata aoga ona atiina ae ni sootaga anoa ma le tasi ma le isi. A o e amataina lenei kosi, mafaufau po o le a se mea e mafai ona e faia e atiina ae ai se siosiomaga o le alofa, taliaina, ma le faaaloalo. Saili ina ia faaaofia ai tagata uma e o mai. Atonu e te manao e amata lenei lesona muamua i se gaoioiga e mafai ai e au tagata aoga ona faamasani le tasi i le isi.

Faailoaina o taunuuga o le aoaoina lea e fausia ai le faatuatua ia Iesu Keriso

Faaali atu ma faitau leotele taunuuga nei o le aoaoina:

I lenei kosi o le a tatou maua ai le avanoa e faamalosia ai lo tatou faatuatua ia Iesu Keriso ma faateleina ai lo tatou talitonuga i Lana Ekalesia toefuataiina e ala i le

• filifilia o autu e uiga i aoaoga faavae o le Ekalesia, aoaoga, aiaiga faavae, ma le talafaasolopito tatou te lagona e talafeagai i la tatou vasega;

• aoao pe faapefea ona faailoa ma faaaoga punaoa faatuatuaina e talanoaina ai autu taitasi;

• faaupuina o a tatou autu filifilia mai se vaaiga o le faatuatua;

• faaleleia o lo tatou tomai e talanoaina nei autu i se agaga o le fefaaaloaloai ma le alofa; ma

• mafaufau pe faapefea ona faia faatinoga amiotonu, ma mataalia i mea ua tatou aoaoina.

Ona mafai ai lea ona e fai atu fesili nei:

• E mafai faapefea e nei taunuuga ona fesoasoani ia te oe e avea ai o se soo e sili atu ona atamai ma lafolafo lelei o Iesu Keriso?

• Aisea e taua ai le faamautinoa o talanoaga a a tatou vasega, e tusa lava po o le a le autu, e atinae ai le faatuatua ia Iesu Keriso ma Lana talalelei e faavavau? (Atonu e te manao e faitau ma talanoaina le 2 Nifae 25:26.)

Aoao mai punaoa a le Ekalesia

Faaali atu le fesili lenei: O a nisi o fesili e fesiligia soo ua e faalogo i ai e uiga i le Ekalesia? (Afai e tauivi tagata aoga ma ni fesili, e mafai ona e faasoa atu nisi o faataitaiga mai Fesili e Fesiligia Soo [tagai newsroom.ChurchofJesusChrist.org].) Atonu e te manao e lisi tali a tagata aoga i luga o le laupapa ona fesili atu lea:

• O a ituaiga o tali ua e faalogo i ai i nei fesili?

• O le a se mea e mafai ona tupu pe a faavae tali i fesili o le talalelei i tala faalogo, faamatalaga sese, manatu, po o le taumatemate?

Faasoa atu le ata faataitai lenei:

E i ai sau uo faatoa auai lava i le fale tatala o se malumalu. Ua ia ta‘u atu ia te oe o lona aafiaga sa lelei. Ina ua maea le faletatala sa ia faia se sailiga i le initoneti e aoao atili ai e uiga i le malumalu ma faitau i nisi o mea e uiga i le ofusa o le malumalu. O se tasi o lautusi na faasino i ofusa o le malumalu o se “ofuvae maneta.” Ua ia fesili atu ia te oe le fesili lenei: “Aisea e ofu ai e tagata o le tou Ekalesia ‘ofuvae maneta’ pe a o i le malumalu?”

Valaaulia tagata aoga e talanoaina ma se paga pe faapefea ona latou taliina le fesili e uiga i le “ofuvae maneta.” A uma se taimi e talanoaina ai e tagata aoga a latou tali, mafaufau e fai atu fesili nei:

• O le a se mea na lelei ina ua fai atu au tali? O le a se mea sa lei lelei?

• O a luitau e mafai ona oo mai pe a faia se sailiga i luga o le initoneti e saili atili ai e uiga i le Ekalesia?

Mafaufau e faasoa atu faamatalaga nei mai i taitai o le Ekalesia:

Elder Neil L. Andersen

E mafai ona tatou faamanatu atu i le tagata fesili faamaoni o faamatalaga o loo i le Initoneti e le o i ai se faamama o “mea moni”. O nisi faamatalaga, e tusa lava po o le a le faatalitonuina, e le moni lava. (Neil L. Andersen, “Iosefa Samita,” Ensign po o le Liahona, Nov. 2014, 29)

Elder Dale G. Renlund

E mafai ona tatou iloa le moni o lenei galuega i aso e gata ai, ae e manaomia ai lo tatou filifilia o le faatuatua, ae le o le masalosalo, ma ia tatou o i punavai faatuatuaina mo a tatou tali. (Dale G. Renlund, “Aua le Masalosalo, ae Ia Talitonu” [faigalotu i le lalolagi atoa mo le autalavou matutua, 13 Ian., 2019], broadcasts.ChurchofJesusChrist.org)

Peresitene Dallin H. Oaks

Ua tatou ola i se taimi ua matuai taaape ma salalau solo ai faamatalaga. Ae e le o faamatalaga uma nei e moni. E tatau ona tatou faaeteete a o tatou saili i le upumoni ma filifili ni punavai mo lena sailiga. (Dallin H. Oaks, “Upumoni ma le Fuafuaga,” Ensign po o le Liahona, Nov. 2018, 25)

• Aisea e avea ai anomea a le Ekalesia o se punavai taua pe a saili ia iloa atili e uiga i aoaoga faavae, aoaoga, aiaiga faavae, ma talafaasolopito o le Ekalesia?

Ta‘u i ai e ui o tusitusiga paia ma upu a aposetolo ma perofeta i ona po nei o a tatou punaoa faavae, ae ua saunia e le Ekalesia ni punaoa faaopoopo e sa’olele, faamaoni, ma ogatusa ma a tatou aoaoga faavae. Mo se faataitaiga, ua i ai i le uepisaite a le Ekalesia ni faamatalaga aoga e uiga i le faamoemoega o le ofusa o le malumalu. E mafai ona e faitauina le tusiga “Ofusa” mai le itulau o Autu ma matamata le vitio “Sacred Temple Clothing” (4:12).

• O le a se mea e tulaga ese mai ia te oe e uiga i lenei faamatalaga i le ofusa o le malumalu?

• E faavae i mea ua e aoaoina, e mafai faapefea ona e suia lau tali e uiga i “ofuvae maneta”? (Atonu e te manao e tuu atu i tagata aoga se avanoa e faasoa ai a latou tali ua toe faafouina ma se paga.)

Faamalamalama atu o le Gospel Library o loo tuuina atu ai le tele o punaoa e sili ona aoga pe a talanoaina fesili ma atugaluga i ni autu eseese. O nei mea e aofia ai, mo se faataitaiga, Taiala i Tusitusiga Paia, Autu o le Konafesi Aoao, Fesoasoaniga mo le Olaga, ma Autu. E faaopoopo atu i le Gospel Library, ua tuuina mai e le Newsroom ni talafou, tusiga, ma tala e mafai ona fesoasoani ia i tatou e tumau ai i le taimi nei i mea o loo tutupu i le Ekalesia.

Ina ia fesoasoani i tagata aoga ia iloa nei punaoa mai le vaaiga talafeagai, fai atu le fesili lenei:

• E ui e taua nei punaoa a le Ekalesia, aisea e le lava ai mo la latou sailiga mo le upumoni?

E faavae i tali a tagata aoga, mafaufau po o fea o fesili nei o le a sili ona fesoasoani i tagata aoga ia malamalama ai o nei punaoa e le mafai ona suitulaga i le matafaioi taua e faia e sui o le aigaAtua i la tatou sailiga mo le upumoni:

• Aisea e taua ai lo tatou vaai atu i le Tama Faalelagi ma Iesu Keriso o punavai autu o le upumoni? (Tagai Mosaea 4:9 ma le Ioane 14:6.)

• O le a le matafaioi a le Agaga Paia e fai a o tatou sailia tali i a tatou fesili? (Tagai Mataupu Faavae ma Feagaiga 8:2–3 ma le Moronae 10:5.)

• Aisea e taua ai le tatalo a o tatou sailia tali i a tatou fesili? (Tagai Iakopo 1:5–6 ma le 2 Nifae 32:8–9.)

Faaleleia o Lo Tatou Aoao Atu ma le Aoaoina

Faailoa punavai faatuatuaina. Atonu e aoga le ta‘u atu e faapea, e ui o le a tatou taulai atu i lenei kosi i le sailia o tali mai le Gospel Library ma le Newsrooma le Ekalesia, ae e tele isi lomiga a le Ekalesia e mafai ona tatou maua ai tali, faapea foi ma isi punaoa faatuatuaina e le o lagolagoina e le Ekalesia. O nisi o nei punaoa e mafai ona maua i le “Links to Gospel Study Resources” (o loo maua i le ChurchofJesusChrist.org). Ia mautinoa ua malamalama tagata aoga uma o tusitusiga paia ma aoaoga a aposetolo ma perofeta o aso nei a le Alii o le tagavai lea tatou te fuaina ai isi punaoa uma (tagai D. Todd Christofferson, “O Le Mataupu Faavae a Keriso,” Ensign po o le Liahona, Me 2012, 86–90).

Atonu e aoga le faaali atu i tagata aoga le mea e maua ai itulau o le Newsroom, Taiala i Tusitusiga Paia, Konafesi Aoao, Fesoasoaniga mo le Olaga, ma Autu i luga o se komepiuta ma luga o se masini feaveai. Ta‘u i ai o nei punavai e faafouina e le aunoa ma faaleleia ina ia faigofie ai ona faaaoga.

Valaaulia tagata aoga e faaaoga a latou lava masini ma faaalu ni nai minute e suesue ai nei punavai. Atonu e te manao e tusi i luga o le laupapa ulutala nei: Newsroom, Taiala i Tusitusiga Paia, Konafesi Aoao, Fesoasoaniga mo le Olaga, ma Autu. (Manatua: Afai e leai ni masini a nisi o tagata aoga, valaaulia i latou e galulue ma se tasi e i ai sana masini. Atonu e manaomia ona e fetuunaia lenei gaoioiga e fuafua i le malosi o le initoneti feaveai [Wi-Fi bandwidth].)

A o suesue e tagata aoga nei punaoa, valaaulia i latou e vaavaai mo vaega tulaga ese o punavai taitasi ma mafaufau po o a mea e sili ona faagaeetia ai i latou. Fautuaina tagata aoga e faailoa mai ni autu talafeagai latou te mananao e aoao atili i ai i le taimi o lenei kosi.

A uma ua lava se taimi e suesue ai tagata aoga, valaaulia i latou e faasoa mai se mea na latou maua i punavai taitasi ma tusi a latou tali i lalo o le ulutala talafeagai i luga o le laupapa. Ia mautinoa e matau autu o loo i ai se faatosinaga lautele i au tagata aoga. Ta‘u i ai mo lesona 7–14 o le a tatou talanoaina autu e filifili e le vasega.

A o faasoa mai e tagata aoga mea na latou matauina e uiga i nei punaoa, mafaufau e fai atu se tasi pe sili atu o fesili nei e faaleleia ai lau talanoaga:

• Pe na i ai ni autu, tusiga, po o ni faafitauli na faateia ai oe? Afai e i ai, aisea?

• E mafai faapefea e se mataalia sili atu o faamatalaga o loo maua i nei punaoa ona fesoasoani ia te oe e faamanuia ai olaga o isi? (Atonu e te manao e faitau ma talanoaina se tasi pe sili atu foi o mau nei: 1 Peteru 3:15; Mataupu Faavae ma Feagaiga 11:21; 88:118.)

• E mafai faapefea e le nofouta atili i le tulaga o le Ekalesia i nei autu ona fesoasoani e faalatalata atili atu ai i tatou ma isi i le Tama Faalelagi ma Iesu Keriso?

Valaaulia ni nai tagata aoga e faasoa mai o latou lagona i lenei kosi e mafai ona faamanuiaina ai o latou olaga. Fai atu i tagata aoga e mafaufau i se isi talavou matua e mafai ona faamanuiaina e ala i le auai, ma fautuaina tagata aoga e valaaulia lena tagata e auai i le vasega e sosoo ai.

Mo Le Isi Taimi

Valaaulia tagata aoga e faaaoga le saite o le Newsroom po o le polokalama feaveai o Talafou a le Ekalesia i le aluga o le vaiaso ma vaavaai mo tala fou talu ai nei mai le Ekalesia. Faamalamalama atu o le isi vasega e sosoo ai o le a latou maua ai le avanoa e faasoa atu ai se mea na latou maua ia latou paaga. Mafaufau e auina atu se faamanatu i tagata aoga e uiga i lenei gaoioiga i ni nai aso a o lei oo i le isi au vasega.