Ngaahi peesi fakalotofonuá
ʻOkú Ne Fakaulo ʻa e Maama ʻo e Ongoongoleleí ʻi Hono Taʻu 78
ʻOku fakaulo ʻe Brother Sione Viliami Ofu, taʻu 78, ʻa e maama ʻo e ongoongoleleí neongo ʻene fefaʻuhi mo e mahaki Pākinisoní. Naʻe hoko ʻa Sione ko ha mēmipa faivelenga ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi he kotoa ʻo ʻene moʻuí, fua fatongia ʻi ha ngaahi uiuiʻi kehekehe, kau ai ʻene hoko ko ha pīsope. ʻI he meimei taʻu ʻe nima kuo hilí, hili ia haʻane fefaʻuhi lōloa mo e puké, naʻe fiemaʻu ʻe Sione ke ʻai hano ʻapi nofoʻanga ʻi he Lutheran Homes ʻi Glynde, South Australia, ko ha ʻapi tauhiʻanga vaivai naʻe fakalele ʻe he Siasi Lūteló.
Neongo ʻa e ngaahi palopalema fakaemoʻui lelei ʻa Sioné, ka naʻá ne kei fakatuʻamelie pē mo longomoʻui ʻi hono komiunitī Lutheran Homes, ʻa ia ʻoku nau fakahoko ʻa e lotú mo e ngaahi kalasi ʻo tokangaʻi ʻe ha faifekau taimi kakato. Hili pē ha taimi nounou mei he hiki ʻa Sione ki he nofoʻangá, naʻá ne ʻilo ʻe mamaʻo ʻa e faifekaú ʻi ha kiʻi taimi peá ne fokotuʻu ange ai lolotonga ʻene mamaʻó, ʻe taki ʻa e ngaahi kalasí ʻe he niʻihi naʻe ʻi aí - naʻe fiefia ʻa Sione ke ne taki ha kalasi ʻe taha, ʻo ka fiemaʻu. Naʻe tali ʻe he faifekaú ʻa e fie tokoni ʻa Sioné, pea naʻe akoʻi ʻe Sione ha ngaahi kalasi lahi talu mei ai, kau ai ha fakamafola fakauike (ʻi he taimi ʻoku moʻui lelei aí) ʻi ha sēnolo TV ʻi loto pē ki he laungeau ne nofo aí mo e ngaahi kolo takatakai aí.
Neongo ʻa e fefaʻuhi ʻa Sione mo e ngaahi faingataʻaʻia fakaesinó, ka naʻá ne fakaʻaongaʻi ha ngaahi houa lahi ʻi he uiké ke teuteu ʻene ngaahi lēsoní, mo e ngaahi vitiō fakamoʻoni ongongofuá mo e naunau ako kehe mei he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻI he kamatá, naʻe toe vakaiʻi ʻe he faifekaú ʻa e lēsoni takitaha kimuʻa pea toki fakahokó, ka ʻi he taimi ní ʻoku ʻikai haʻane hohaʻa kau ki he ngaahi akonaki ʻa Sioné. Ko hono moʻoní, kuo kau ʻi he ngaahi pōpoaki ʻa Sioné ha ngaahi tatau lahi ʻo e Tohi ʻa Molomoná kiate kinautolu ʻoku nofo aí, pea kuo kole ange ʻe he tokolahi ke fakakakato ha ngaahi tefito pau. ʻOkú ne talanoa lelei ki ha kole pehē ʻe taha, ʻa ia naʻe iku ki ha ako uike ʻe 5 ʻi he fakahinohino fekauʻaki mo e ʻaloʻofá.
Naʻe tākiekina foki ʻe Sione ha ngaahi liliu kehe ʻi he falé. Naʻá ne teuteu ha ngaahi kaati fakahinohino kuo ʻosi fakamilemila ke ʻoange kiate kinautolu aí ko ha fokotuʻutuʻu ki heʻenau ngaahi lotú. ʻOku nau tāpuakiʻi he taimí ni ʻa e meʻakaí ʻi he ngaahi houa kaí pea fai ha poupou fakalaumālie ko ha konga ʻo ʻenau ngaahi fakataha fakapule mo e kakai aí. ʻOkú ne ʻamanaki lelei ʻe hanga ʻe he meʻá ni ʻo poupouʻi kinautolu ke nau faʻa lotu lahi ange pea fakakaukau ki he palani ʻo e fakamoʻuí.
ʻOku fakalotoa ʻa Sione ʻe hono misioná ke vahevahe ʻa e ongoongoleleí mo hono ngaahi kaungāʻapí ʻi he tauhiʻanga ʻo e kau vaivaí, ke teuteuʻi kinautolu ki ha ngaahi akonaki lahi ange pea ke tōkaki ʻa e ʻamanaki leleí ʻiate kinautolu ʻoku manavahē ki he meʻa ʻoku hanganaki mai mei muʻá. ʻOkú ne fiemaʻu ke nau ongoʻi fakatuʻamelie fekauʻaki mo e moʻui ʻoku ope atu ʻi he veilí pea ke ʻilo ʻa e ʻofa ʻa e Tamai Hēvaní. ʻI he taimi ʻoku mate ai ha taha ʻoku nofo aí, ʻoku teuteu ʻe Sione honau hisitōlia fakafāmilí pea fakahū honau ngaahi hingoá ke fakahoko ʻa e ngāue fakatemipalé ʻi he feituʻu ʻe malava aí.
ʻOku ʻikai ha ofo, he ko ʻene potufolofola manakó ʻa e Mōsaia 2:17: “Pea vakai, ʻoku ou fakahā kiate kimoutolu ʻa e ngaahi meʻá ni koeʻuhí ke mou ʻiloʻi ʻa e potó; koeʻuhí ke mou ʻiloʻi ʻo ka mou ka ʻi he tauhi ʻo homou kāingá, ʻoku mou ʻi he tauhi pē ʻo homou ʻOtuá”.
ʻI Mē 2023, naʻe maʻu ʻe Sione ha ʻaʻahi taʻe-ʻamanekina meia ʻEletā Paula Uipi ʻo e Kau Fitungofulu ʻo e ʻĒlia Pasifikí maʻá e Siasí. Naʻe ongo moʻoni kia ʻEletā Uipi ʻa e sīpinga ʻa Sione ʻo e ʻofa mo e tokoni faka-Kalisitiané, naʻá ne vahevahe ai ʻa e aʻusiá mo ʻEletā Taniela B. Uakolo, ko hono taki lakanga fakataulaʻeikí ʻi he Kau Palesitenisī Faka-ʻĒliá.
ʻI he taimi naʻe fakahā ai kia Sione naʻe fiemaʻu ʻe ʻEletā Uakolo ke talanoa mo iá, naʻá ne fokotuʻutuʻu ha kau tauhi ke fakapapauʻi ʻokú ne ʻā pea teuteu lelei ʻi hono teunga lotú, ʻo mateuteu ki he ʻaʻahí. ʻI he ongo ʻaʻahi fakatouʻosi ko ʻení, naʻe vahevahe ai ʻe Sione ʻene fakamoʻoní mo e kau ʻeletaá pea mo e niʻihi ʻo e ngaahi lēsoni kuó ne ako ʻi ha ngaahi taʻu lahi ʻo e ngāue faivelenga ʻi he siasí.
Naʻe ʻofaʻi moʻoni ʻa Sione ʻe hono uaifi ko Taianá, pea mo hono ngaahi foha ʻe toko nimá: Ko Penisimani, Sione Viliami ko e Siʻí, Tēvita, ʻEnitī, Sami mo honau ngaahi fāmilí. Naʻa nau laukau ʻaki ʻa e hokohoko atu ʻo ʻene ngāue tokoni faka-Kalaisí pea ʻoku nau muimui ki heʻene sīpingá ʻi honau ngaahi uiuiʻi ʻi honau uōtí mo e siteikí.
ʻI he 2018 naʻe fanongonongo ʻe Palesiteni Lāsolo M. Nalesoni, “ʻOku fakavaveʻi ʻe he ʻEikí ʻEne ngāue ki hono tānaki ʻo ʻIsilelí. Ko e tānaki fakataha ko iá ʻa e meʻa mahuʻinga taha ʻoku hoko ʻi he māmaní ʻi he ʻaho ní. ʻOku ʻikai ha toe meʻa te ne fakatataua hono mālohí, ʻikai ha toe meʻa ʻe fakatataua ki hono mahuʻingá, ʻikai ha toe meʻa ʻe fakatataua ki hono fakaʻeiʻeikí”.1
Kuo tali lelei ʻe Brother Sione Ofu ʻa e fanongonongo ʻa Palesiteni Nalesoní pea ʻokú ne fakahoko kotoa ʻa e meʻa ʻokú ne lavá ke tānaki ʻa ʻIsileli ʻi he ongo tafaʻaki fakatouʻosi ʻo e veilí. Ko ha faʻifaʻitakiʻanga fakaofo ia ʻo hono tuku ke ulo atu hoʻo māmá pea kātaki ki he ngataʻangá neongo ʻa e ngaahi pole mo e ngaahi faingataʻa ʻo e moʻuí.