Mai le Pouliuli i le Malamalama

Potu o Talafou

Sa tauivi Taarira ma se vaisu o fualaau faasaina mo le 10 tausaga a o lei filifili o ia e sui le faasinomaga o lona olaga.

“Ina ua mavae le 10 tausaga, sa ou oo i se tulaga maualalo lava,” o lana tala lea. “O aso pogisa na.”

“O o‘u matua …o ni tagata sa fai fo’i fualaau faasaina ma le ava malosi ma vaisu. Sa i ai faafitauli o le puipuiga. Na maliu lo‘u tina ina ua fa o’u tausaga.”

Sa faaauau le tala a Taarira, o se tasi O Le Ekalesia a Iesu Keriso o le Au Paia o Aso e Gata Ai, e faapea: “O lo‘u tinamatua e le o se tagata o le ekalesia, ae sa ia aveina i ma’ua i le lotu ma fesoasoani i lo’u tuagane ia papatiso.”

E talitonu o ia sa ia oo i se tulaga maualalo a o le’i iloaina e tatau ona toe fo’i o ia i le lotu. Sa manao Taarira e toe foi e tapuai ma faaaumea aua sa ia manao ia maua “le susulu” sa mafai ona ia vaaia i foliga o i latou o e ola i le talalelei a Iesu Keriso.

“Sa ou manao e tuu atu lo‘u loto atoa i le talalelei a Iesu Keriso,” o lana tala lea.

Ina ua ia filifili e toe foi mai, sa tuu i luga e Taarira se tusiga i luga o le Facebook e fesili atu ai pe i ai se falelotu o le Au Paia o Aso e Gata Ai i Wellsford, Niu Sila, i le mea sa nofo ai. Sa tali mai se tagata o le faalapotopotoga ma fai mai sa i ai se sauniga i Aso Sa taitasi i le 10 i le taeao. O le Aso Sa na sosoo ai, na auai atu ai Taarira ma lana pepe e tolu masina le matua, o Kayson.

Sa ia manatua sa i ai se lagona mafanafana i le falelotu, ma sa agaga talimalo tagata.

“A o ou savali atu i totonu o le fale, sa ou lagonaina e pei ua ou i ai i le aiga faatasi ma o‘u tuagane ma uso. Sa ou lagonaina le alofa o le Atua, sa ou lagonaina le Agaga, ma sa ou iloaina o le mea lea na finagalo le Alii ou te i ai.”

Fai mai Taarira o le ‘ai ma inu i le faamanatuga na avea ma se aafiaga ese mo ia nai lo le taimi muamua. “I le taimi muamua na ou faatoa mauaina ai le faamanatuga, sa ou manatu ua na o se falaoa ma se vai, ae o lenei ua pei ua ou lagonaina Lona (Iesu Keriso) tigā,” o lana tala lea. “Pe a ou ai ma inu i le faamanatuga ou te manatua ai Iesu, o Lona faasatauroga ma le lagona atonu na oo ia te Ia.

“Ou te lagonaina o Ia e oo lava i le usuina o viiga o le faamanatuga. O se taimi faapitoa. A oo mai le Aso Gafua, e le mafai ona ou faatali mo le Aso Sa e toe i ai iinei.

Na tomanatu o ia i se taimi alofa ina ua maua lona faamanuiaga faapeteriaka.

A o agai atu e maua le faamanuiaga, sa fai mai Taarira o le tau sa “faateia” ma sa popole o ia nei ono tapunia auala i soo se taimi. “Ae sa ou tatalo ma sa mafai ona ou faia. Na tapunia auala i le sefulu minute mulimuli ane.”

Ina ua ia taunuu, sa ia mauaina se molimau o le alofa o le Tama Faalelagi mo ia. “Sa lagonaina moni lava e le Peteriaka le Agaga. Sa ma fetagisi uma.”

“O le faitauina o tusitusiga paia e fesoasoani ia te au i le aluga o le vaiaso,” o le tala lea a Taarira. “O le faitau a o lei moe e faamanatu mai ai ia te au ou te faamuamua le Faaola i lo‘u olaga. Afai ou te le faitau i aso taitasi, ou te le lagonaina foi o Ia.

“E tele mea e aoao mai e tusitusiga paia ia i tatou,” sa ia faaauau ai. “O i latou o se taiala ia i tatou i o tatou olaga. Ou te faitauina tusitusiga paia i la‘u pepe. Ou te manao i se olaga lelei mo ia. Ou te fiafia i le auala o loo aoao mai ai i tatou e le talalelei a Iesu Keriso ia alolofa i tagata uma.”

E fiafia foi Taarira e faaalu se taimi ma faifeautalai. I le lagonaina o le fiafia e uiga i le talalelei a Iesu Keriso, sa amata ona ia faasoa atu mau mai tusitusiga paia i tagata, ma valaaulia i latou e o faatasi ma ia i le lotu.

Sa siitia atu talu ai nei Taarira i Perth, Ausetalia, lea e auai ai o ia i sauniga tapuai i Aso Sa uma i le eria o Rockingham. O loo umia nei se pepa faataga o le malumalu, ua ia lagonaina le olioli i le auai atu i le Malumalu o Perth. Faatasi ai ma aso pogisa i ona tua, “ua i ai nei aso silisili,” o lana tala lea. “Ua faamanuiaina i tatou.”

“O le asō, ou te fia tuuina atu le faafetai i tagata matagofie uma o e sa avea ma se vaega tele o la‘u malaga i le fesoasoani mai ia te a’u ia oo i o‘u taimi faigata faalelagona,” o le tala lea a Taarira. “Ia fetaomi atu i luma i taimi uma, ou te faafetaia outou uma ma alofa ia te outou ma le lē faatuaoia.

“Mai ia te a‘u ma Kayson, ma te faafetai atu ai.”