“O Le a Ou Auauna Muamua i le Alii,” Liahona, Fep. 2024.
Atatusi o le Faatuatua
O Le A Ou Auauna Muamua i le Alii
O le auauna atu i le Alii o se faifeautalai na fesoasoani ia te au e fausia lo’u faatuatua i luga o se faavae mautinoa lea na fesoasoani ia te au e faia ai filifiliga sa’o pe a ou feagai ma filifiliga faigata. Ina ua uma la’u misiona, sa sili atu ona ou saunia mo la’u aoga, galuega, ma valaauga eseese i le Ekalesia, e aofia ai le avea ma se epikopo.
O ata na pu’eina e Leslie Nilsson
Mai lava i lo’u laitiiti, sa ou matua tulimatai atu lava e alu i le iunivesite. O le a faatagaina au e le iunivesite ia maua se aoaoga lelei ma iu ai ina taitai atu au i se galuega mautu lea o le a mafai ai ona ou tausia se aiga.
Ae ina ua ou aulia tausaga o le iunivesite, sa ou le mautinoa pe faapefea ona ou gafatia ona alu. Sa le lava punaoa o loo avanoa mo a’u. Na maliu lo’u tama i le tausaga na muamua atu, ma sa ma siitia atu ma lo’u tuafafine ma nonofo i le uso o lo’u tama. I lena taimi, sa lei lava ni punaoa a le uso o lo matou tama e fesoasoani ia te au ona sa ia fesoasoani i le toalima o lana lava fanau i le iunivesite.
Mai lava i lo’u talavou, sa ou manao foi e auauna atu i le Atua i se tasi tulaga po o se isi, ae sa ou le iloa pe faapefea. Ae ou te lei auai i le Ekalesia i le 19 o ou tausaga, sa leai sou avanoa e faia ai lena mea.
Ina ua ou auai i le Ekalesia i le 2004, sa ou manao lava e tulitulimatagauina la’u aoga i le iunivesite, ae sa ou faia le faaiuga e auauna muamua i se misiona. Ou te lei iloa lava pe o le a faapefea ona ou ausia a’u miti ma sini o se aoga i le iunivesite ina ua maea la’u misiona, ae sa ou faaalia le faatuatua o le a iu lava ina lelei mea uma mo a’u. Sa ou faapea ifo ia te au lava, “O le a ou faalagolago i le Alii. O le a ou auauna muamua atu ia te Ia. O le a mulimuli mai isi mea i se taimi mulimuli mai.” O lea, sa ou agai ai i luma i le faatuatua ma amata ona faia se auaunaga e fesoasoani ai e totogi la’u misiona.
Sa fai mai nisi o a’u uo o le a ou maimauina lo’u taimi o se faifeautalai. Ae sa ou faatuatua o se misiona o le mea sa’o lea e fai, o le auauna atu i le Alii e le o se taimi maimau.
O se tasi o mau na musuia ai au e auauna atu o loo maua i le Feagaiga Fou: “Ae ia outou muai saili le malo o le Atua, ma lana amiotonu; ona faaopoopoina atu lea o ia mea uma ia te outou” (Mataio 6:33).
E lei leva ae valaauina au i le Misiona a Kana Cape Coast. O la’u misiona na ou maua ai ni aafiaga e manatua pea ma faataatia ai le faavae mo avanoa ma tiutetauave i le lumanai. Ina ua uma la’u misiona, sa sili atu ona ou saunia mo la’u aoga, galuega, ma valaauga eseese i le Ekalesia, e aofia ai le avea ma se epikopo.
Ina ua ou foi mai i le fale, ua uma aoga a nisi o o’u tausoga. Ona maua lea e le uso lelei o lo’u tama ni punaoa e fesoasoani ia te au e tulitulimatagau ai la’u aoga i le iunivesite. Sa ou faia se kosi tausitusi ua faamaonia mo tagata lautele ona lesitala ai lea i se polokalama o le tikeri o le tagata malaga. O le lima tausaga talu ona maea la’u misiona, sa ou faauu ai i le tausitusi ma mea tau tupe.
E moni lava, a o ou vaai i lo’u olaga talu ona uma la’u misiona, ua faaopoopo mai e le Alii “nei mea uma” i lo’u aiga. A o lei alu la’u misiona, sa ou popole afai ou te le alu i le aoga, afai ou te le maua se aoaoga lelei, o le a ou ola i le mativa. Ae ua faamanuiaina e le Alii lo’u aiga e lemafuatiaina ma mafai ai ona matou ola i se olaga lelei.
Ou te lei faanoanoa lava i le auauna atu i se misiona ae ou te lei alu i le iunivesite. O le faaalia o le faatuatua e auauna atu i se misiona o le faavae lea o le tele o faaiuga sa ou faia i lo’u olaga. O le auauna atu i le Alii na fesoasoani ia te au e fausia lo’u faatuatua i luga o se faavae mautinoa. O lena faavae na fesoasoani ia te au e faia ai filifiliga sa’o ina ua ou feagai ma filifiliga faigata.
Mo i latou e le popole e uiga i le auauna atu i se misiona, ou te tuuina atu lea lava fautuaga e tasi na ou maua mai tusitusiga paia: “Ia outou muai saili le malo o le Atua, ma lana amiotonu,” ma o nei mea uma tou te manatu o le a le oo mai ia te outou o le a iu ina oo mai e tusa ai ma le finagalo o le Atua—e oo lava i le faasefuluina. O lo’u aafiaga lena.